ʼE Koutou Tali Koa Te Tokoni ʼa Sehova?
“Ko [Sehova, MN ], ko toku tokoni, e mole au mataku anai.”—HEPELEO 13:6.
1, 2. He koʼe ʼe maʼuhiga ke tou tali te tokoni pea mo te takitaki ʼo Sehova ʼi totatou maʼuli?
ʼE KOUTOU kake ʼi te kiʼi ala ʼi te moʼuga. Kae ʼe mole koutou haʼele tokotahi, heʼe kaugā ʼolo mo koutou te tagata takitaki ʼaē ʼe ina ʼiloʼi lelei tokotahi ia te ala ʼaia. Kua māhani ia pea ʼe mālohi age ia koutou, kae ʼe haʼele māmālie pe ʼi ʼokotou tafa. ʼE ina tokagaʼi ʼi ʼihi temi ʼe koutou ʼamanaki tūkia. ʼI tana mole loto ʼaē ke koutou lavea, ʼe tokoni atu ʼo ina faoʼi atu tona nima. ʼE koutou fakafisi anai koa ki tana tokoni? Kailoa ia, heʼe mole koutou fia tuʼutāmaki.
2 ʼI totatou ʼuhiga Kilisitiano, ʼe faigataʼa te ala ʼaē ʼe tou haʼele ai. Kae ʼe tou haʼele tokotahi koa ʼi te ala fāveliveli ʼaia? (Mateo 7:14) Kailoa, heʼe fakahā mai ʼi te Tohi-Tapu ko Sehova ʼAtua, te Tagata Takitaki ʼaē ʼe lelei tokotahi, ʼe ina fakagafua ke haʼele te hahaʼi mo ia. (Senesi 5:24; 6:9) ʼE tokoni koa ia Sehova ki te haʼele ʼo tana kau kaugana? ʼE ina ʼui fēnei: “Ko au, ia Sehova tou ʼAtua, ʼe au puke tou nima mataʼu, ʼe au ʼui atu, ‘ ʼAua naʼa ke mataku. ʼE au tokoni atu anai.’ ” (Isaia 41:13) Ohage ko te tagata takitaki ʼaē neʼe talanoa kiai ia te faʼifaʼitaki ʼo te ʼuluaki palakalafe, ʼe agalelei ia Sehova ʼo faoʼi mai tona nima moʼo tokoni kiā nātou ʼaē ʼe fia haʼele mo ia pea ʼe fia kaumeʼa mo nātou. ʼE mahino ia ʼe mole he tahi ia tatou ʼe tou fakafisi anai ki tana tokoni!
3. Koteā te ʼu fehuʼi ʼaē ka tou vakaʼi anai ʼi te alatike ʼaenī?
3 ʼI te ʼuluaki alatike, neʼe tou palalau ki te ʼu faʼahi e fā neʼe tokoni ai Sehova ki tana hahaʼi ʼi te temi muʼa. ʼE toe tokoni feiā koa ki tana hahaʼi ʼi te temi nei? Pea e feafeaʼi hatatou ʼiloʼi ʼe tou tali te ʼu tokoni ʼaia? Tou vakaʼi te ʼu fehuʼi ʼaia. ʼI tatatou fai te faʼahi ʼaia, ʼe tuputupu ai tatatou falala ʼaē ko Sehova ʼe tokoni moʼoni kiā tatou.—Hepeleo 13:6.
ʼE Tokoni Mai ʼAki Te ʼu ʼĀselo
4. He koʼe ʼe lava falala te ʼu kaugana ʼa te ʼAtua ia ʼaho nei ki te tokoni ʼa te kau ʼāselo?
4 ʼE tokoni koa te kau ʼāselo ki te ʼu kaugana ʼa Sehova ʼo te temi nei? Ei. ʼE moʼoni, ia ʼaho nei ʼe mole nātou ʼasi mai moʼo hāofaki te kau atolasio moʼoni mai he tuʼutāmaki. ʼO feiā mo te ʼu temi muʼa, neʼe tahitahiga te fai e te kau ʼāselo ia te faʼahi ʼaia. Neʼe lahi age tanatou gāue fakapulipuli, ohage pe ko tanatou fai ʼi te temi nei. Kae neʼe lahi te lotomālohi ʼa te ʼu kaugana ʼa te ʼAtua ʼi tanatou ʼiloʼi ʼaē ʼe tokoni te kau ʼāselo kiā nātou. (2 Hau 6:14-17) ʼE feala mo tatou ke tou logoʼi te faʼahi ʼaia.
5. Koteā ʼaē ʼe ʼui ʼi te Tohi-Tapu ʼo ʼuhiga mo te pikipikiga ʼa te kau ʼāselo ki te gāue fai faka mafola ia ʼaho nei?
5 ʼE tokaga tāfito te kau ʼāselo ʼa Sehova ki te gāue makehe ʼaē ʼe tou kau kiai. Koteā te gāue ʼaia? ʼE tou maʼu te tali ia Apokalipesi 14:6, (MN ) ʼaē ʼe ʼui fēnei ai: “Neʼe au sio ki te tahi ʼāselo ʼe lele ʼi te lotomalie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohage he evaselio kiā nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe.” Ko te “logo lelei” ʼaia ʼe tatau mo te “logo lelei . . . ʼo te puleʼaga,” ʼaē neʼe fakakikite e Sesu, “ ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa” ʼi muʼa ʼo te fakaʼosi ʼo te tuʼu ʼaenī. (Mateo 24:14, MN ) ʼE mahino ia ʼe mole ko te kau ʼāselo ʼaē ʼe nātou fai faka mafola. Neʼe tuku age e Sesu te gāue maʼuhiga ʼaia ke fai e te hahaʼi ʼi te kele. (Mateo 28:19, 20) ʼE mole tou lotomālohi koa ʼi tatatou ʼiloʼi ʼaē ʼi tatatou fakahoko ia te gāue ʼaia, ʼe tokoni mai te kau ʼāselo maʼoniʼoni, te ʼu laumālie popoto pea mo mālolohi ʼaia?
6, 7. (a) Koteā ʼaē ʼe hā mai ai ʼe lagolago te kau ʼāselo ki tatatou gāue fai faka mafola? (b) Koteā ʼaē ʼe tonu ke tou fai ke lagolago mai te kau ʼāselo ʼa Sehova?
6 ʼE lahi te ʼu ʼaluʼaga ʼe hā ai ʼe lagolago te kau ʼāselo ki tatatou gāue. Ohage la, ʼi tatatou minisitelio, ʼe tou tau logo, neʼe felāveʼi te kau Fakamoʼoni ʼa Sehova mo he tahi neʼe hoki faikole age pe ki te ʼAtua, ke tokoni age ke ina maʼu te moʼoni. Neʼe hoko tuʼa lahi te ʼu meʼa feiā, koia ʼe mahino ia neʼe mole ko he ʼu meʼa neʼe hoko fakafokifā. ʼAki te tokoni ʼaia ʼa te kau ʼāselo, tokolahi te hahaʼi ʼe nātou ako ke nātou fai te meʼa ʼaē neʼe tala e te “ ʼāselo [ʼaē] ʼe lele ʼi te lotomalie ʼo te lagi”: “Koutou manavasiʼi ki te ʼAtua pea mo koutou faka kolōlia kiā te ia.”—Apokalipesi 14:7, MN.
7 ʼE koutou loto koa ke lagolago atu te kau ʼāselo mālolohi ʼa Sehova? Kapau ʼe koutou loto kiai, pea koutou faiga mālohi ke koutou kau ki te minisitelio. (1 Kolonito 15:58) Kapau ʼe lahi tatatou kau ki te gāue makehe ʼaia neʼe foaki mai e Sehova, pea ʼe tou lava falala ʼe tokoni mai anai te kau ʼāselo.
Te Tokoni ʼa Te Pule ʼa Te Kau ʼĀselo
8. Koteā te tuʼulaga māʼoluga ʼa Sesu ʼi selo, pea he koʼe ʼe fakatupu fīmālie kiā tatou tatatou ʼiloʼi tona tuʼulaga?
8 ʼE toe tokoni Sehova kiā tatou ʼaki te tahi ʼāselo. Ia Apokalipesi 10:1, ʼe talanoa ai ki “he . . . aselo malohi” mo fakaofoofo pea ko tona “fofoga nee hage ko te laa.” Ko te ʼāselo ʼaia ʼe ko Sesu Kilisito totonu ʼaē kua faka kolōlia ʼaki te mālohi ʼi selo. (Apokalipesi 1:13, 16) ʼE moʼoni koa ko Sesu ʼe ko he ʼāselo? ʼE feala hatatou ʼui ʼe ko he ʼaselo, heʼe ko te alekaselo. (1 Tesalonika 4:16) Koteā te alekaselo? Ko te kupu ʼaia ko tona faka ʼuhiga ko “te ʼāselo tāfito,” peʼe ko te “ ʼāselo pule.” Ko Sesu ʼe ko te foha fakalaumālie ʼaē ʼe mālohi tokotahi age ʼi te ʼu foha fakalaumālie ʼo Sehova. Neʼe fakanofo ia ia e Sehova ko te pule ʼo Tana ʼu kautau ʼāselo fuli. Ko te alekaselo mālohi ʼaia ʼe ko he tokoni lahi. ʼO feafeaʼi?
9, 10. (a) ʼE liliu feafeaʼi ia Sesu ko totatou “tokoni” ʼi te ʼu temi ʼaē ʼe tou agahala ai? (b) Koteā te tokoni ʼe feala ke tou maʼu mai te faʼifaʼitaki ʼa Sesu?
9 Neʼe tohi fēnei e te ʼapositolo matuʼa ko Soane: “Kapau ʼe agahala he tahi, ʼe ʼi ai totatou tokoni iā tafa ʼo te Tāmai, ko Sesu Kilisito, ko te faitotonu.” (1 Soane 2:1, MN ) He koʼe neʼe ʼui e Soane ko Sesu ko tatatou “tokoni” tāfito ʼi te ʼu temi ʼaē ʼe tou “agahala” ai? ʼE tou agahala ʼi te ʼaho fuli, pea ko te agahala ʼe iku ki te mate. (Tagata Tānaki 7:20; Loma 6:23) Kae neʼe sākilifisioʼi e Sesu tona maʼuli maʼa tatatou ʼu agahala. Pea ʼe nofo ia tafa ʼo tatatou Tāmai manavaʼofa moʼo fakakolekole ʼo ʼuhiga mo tatou. ʼE ʼaoga kiā tatou fuli te tokoni ʼaia. ʼE tou lava tali feafeaʼi te tokoni ʼaia? ʼE tonu ke tou fakahemala mai tatatou ʼu agahala pea mo tou kole ke fakamolemole mai ʼo fakatafito ki te sākilifisio ʼo Sesu. Pea ʼe mole tonu ke tou toe fai te agahala ʼaia.
10 Neʼe mole gata pe te mate ʼa Sesu maʼa tatou, kae neʼe ina toe tuku mai foki mo te faʼifaʼitaki ʼaē ʼe lelei ʼaupito. (1 Petelo 2:21) Ko tana faʼifaʼitaki ʼe ina takitaki tatou, mo tokoni mai ke tou fakahoko fakalelei tatatou lele fakalaumālie, ke ʼaua naʼa tou fai he ʼu agahala mamafa pea ke feala hatatou fakafiafia ia Sehova ʼAtua. ʼE tou fiafia lahi ʼi te tokoni ʼaia! Neʼe fakapapau e Sesu ki tana kau tisipulo ʼe foaki anai te tahi tokoni.
ʼE Tokoni Mai ʼAki Te Laumālie Maʼoniʼoni
11, 12. Koteā te laumālie ʼo Sehova, ʼe mālohi feafeaʼi, pea he koʼe ʼe ʼaoga kiā tatou ia ʼaho nei?
11 Neʼe fakapapau fēnei e Sesu: “ ʼE au fai anai he kole ki te Tāmai, pea ʼe ina foaki atu anai kiā koutou he tahi tokoni ke nofo mo koutou ʼo talu ai, ko te laumālie ʼo te moʼoni, ʼaē ʼe mole feala ke maʼu e te malamanei.” (Soane 14:16, 17, MN ) Ko “te laumālie [ʼaia] ʼo te moʼoni,” peʼe ko te laumālie maʼoniʼoni, ʼe mole ko he tahi kae ʼe ko he mālohi—te mālohi gāue ʼo Sehova. ʼE mole he tuʼakoi ʼo te mālohi ʼaia. ʼE ko te mālohi ʼaē neʼe fakaʼaogaʼi e Sehova moʼo fakatupu te ʼatulaulau, moʼo fakahoko te ʼu milakulo fakaofoofo, pea mo fakahā tona finegalo ʼi he ʼu moemisi. ʼE mole kei fakaʼaogaʼi e Sehova tona laumālie ʼi he ʼu ʼaluʼaga feiā ia ʼaho nei. Ko tona ʼuhiga koa ʼe mole ʼaoga kiā tatou te laumālie maʼoniʼoni?
12 Kailoa ia! ʼI te ʼu “temi faigataa” ʼaenī, ʼe ʼaoga lahi age kiā tatou te laumālie ʼo Sehova. (2 Timoteo 3:1) ʼE ina fakaloto mālohiʼi tatou ke tou kātakiʼi te ʼu ʼahiʼahi. ʼE tokoni mai ke tou maʼu te ʼu kalitātē lelei ʼaē ʼe feala ai hatatou fakaōvi kiā Sehova pea mo tatatou ʼu tēhina mo tuagaʼane fakalaumālie. (Kalate 5:22, 23) Koteā ʼaē ʼe feala ke tou fai ke tou maʼu ai te tokoni fakatalakitupua ʼaia mai ia Sehova?
13, 14. (a) He koʼe ʼe feala ke tou tui papau ʼe loto lelei Sehova ke ina foaki tona laumālie maʼoniʼoni ki tana hahaʼi? (b) Koteā ʼaē ʼe feala ke tou fai ʼe hā ai tatatou mole tali moʼoni te meʼa ʼofa ʼaē ko te laumālie maʼoniʼoni?
13 ʼUluaki, ʼe tonu ke tou faikole ke foaki mai te laumālie maʼoniʼoni. Neʼe ʼui fēnei e Sesu: “Kapau ko koutou, logope takotou agakovi, ʼe koutou popoto ʼi te foaki ki ʼakotou ʼu fānau he ʼu meʼa ʼofa ʼe lelei, e feafeaʼi leva la te lahi ake ia ʼo te foaki e te Tāmai ʼaē ʼi selo te laumālie maʼoniʼoni kiā nātou ʼaē ʼe nātou kole kiā te ia!” (Luka 11:13, MN ) Ei, ko Sehova ʼe ko te Tāmai ʼaē ʼe lelei tokotahi. Kapau ʼe tou kole fakamalotoloto ʼaki te tui ke ina foaki mai te laumālie maʼoniʼoni, ʼe mahino ia ʼe ina foaki mai anai te meʼa ʼofa ʼaia. Koia ʼe tonu ai ke tou fai te fehuʼi ʼaenī: ‘ ʼE tou kole koa ia te laumālie?’ ʼE tonu ke tou kole kiā te ia te laumālie ʼi te ʼaho fuli pe.
14 Lua, ʼe tou tali te meʼa ʼofa ʼaia mokā tou mulimuli kiai. Tou toʼo he faʼifaʼitaki: Ohage la ko he Kilisitiano ʼe ina tauʼi tona vaivaiʼaga ʼaē ko te sioʼi ʼo he ʼu pāki peʼe ko he ʼu ata ʼo te ʼu felāveʼi fakasino. ʼE faikole ke tokoni age ia te laumālie maʼoniʼoni ke ina tekeʼi ia te aga heʼeʼaoga ʼaia. ʼE kumi tokoni ki te kau tagata ʼāfea Kilisitiano, pea ʼe nātou tokoniʼi ia ia ke ina fai he ʼu puleʼaki mālohi, pea ke fakamamaʼo mai te ʼu meʼa fakalialia ʼaia. (Mateo 5:29) Koteā anai ʼaē ka hoko mo kapau ʼe mole mulimuli ki tanatou ʼu fai tokoni, kae ʼe ina hoko atu pe tana sioʼi te ʼu meʼa ʼaia ʼi te temi ʼaē ʼe holi kiai? ʼE mulimuli koa ki tana faikole ʼaē ke tokoni age te laumālie maʼoniʼoni? Peʼe feala koa ke ina fakaloto mamahiʼi ia te laumālie ʼo te ʼAtua pea mole ina maʼu te meʼa ʼofa ʼaia? (Efeso 4:30) Ei, ko tatou fuli ʼe tonu ke tou faiga mālohi ke hoko atu tatatou maʼu te tokoni fakaofoofo ʼaia mai ia Sehova.
ʼE Tokoni Mai ʼAki Tana Folafola
15. ʼE tou lava fakahā feafeaʼi ko te Tohi-Tapu ʼe mole hage pe ko te ʼu tohi fuli?
15 Talu mai ni sēkulō, ko te Tohi-Tapu ʼe ko he tokoni ki te ʼu kaugana agatonu ʼa Sehova. ʼE mole tonu ke tou manatu ko te Tohi-Tapu ʼe hage pe ko te ʼu tohi fuli, kae ke tou manatuʼi ʼe feala ke tou maʼu ai he tokoni mālohi maʼa tatou. ʼE tonu ke tou faiga mālohi ke tou tali te tokoni ʼaia. ʼE tonu ke liliu ko hatatou agamāhani te lau tuʼumaʼu ʼo te Tohi-Tapu.
16, 17. (a) ʼE fakamatala feafeaʼi ia Pesalemo 1:2, 3 te ʼu tapuakina ʼo te lau ia te lao ʼo te ʼAtua? (b) ʼE fakahā feafeaʼi ia Pesalemo 1:3 te maʼua ʼaē ke tou gāue lahi?
16 Ia Pesalemo 1:2, 3 ʼe ʼui fēnei ai ʼo ʼuhiga mo te tagata ʼaē ʼe leleiʼia e te ʼAtua: “Ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po. ʼE liliu moʼoni anai ohage ko he fuʼu ʼakau ʼe to ōvi ki te ʼu tafeʼaga vai, ʼe fua ʼi tona temi totonu pea ʼe mole fefe tona ʼu lau, pea ko meʼa fuli ʼaē ʼe ina fai ʼe lava anai.” ʼE koutou mahino koa ki te manatu tāfito ʼo te ʼu vaega ʼaia? ʼE feala ʼi tatatou lau ia te ʼu vaega ʼaia ke tou manatu ʼe ko he fakamatala ʼo ʼuhiga mo he koga meʼa ʼe mole ʼi ai he logoaʼa—te malumalu ʼo he fuʼu ʼakau ʼe homo ia tafa ʼo he vaitafe. ʼI meʼa lelei ʼi he hili hoʼatā hata ʼalu ʼo mālōlō ai! Kae ʼe mole fia fakahā mai ʼi te pesalemo ʼaia ke tou manatu ki he temi mālōlō. ʼE talanoa ia ki he tahi faʼahi, ki he gāue lahi. ʼE lahi feafeaʼi?
17 Koutou tokagaʼi ko te fuʼu ʼakau faka malumalu ʼaia ʼe mole maʼuli lelei pe he neʼe homo feiā ake pe ʼo ōvi ki te vaitafe. ʼE ko he fuʼu ʼakau ʼe fuifui lelei, he neʼe “tō” ʼi he koga meʼa neʼe filifili, ʼe “ōvi ki te ʼu tafeʼaga vai.” ʼE lava feafeaʼi ki he fuʼu ʼakau ke homo ōvi ki he ʼu tafeʼaga vai? ʼI he kele ʼe tō ai he ʼu fuʼu ʼakau ʼe fua, ʼe feala ki te tagata ʼaē ʼaʼana te kele ke ina keli he ʼu tafeʼaga vai ke faka aʼu ake ia te vai ki te ʼu aka ʼo tona ʼu fuʼu ʼakau maʼuhiga ʼaia. Kua tou kamata mahino lelei leva ki te manatu tāfito ʼo te ʼu vaega ʼaia! ʼE tou maʼuli lelei ʼi te faʼahi fakalaumālie ohage pe ko te fuʼu ʼakau ʼaia, koteʼuhi neʼe fai te ʼu gāue lahi moʼo tokoni mai kiā tatou. ʼE tou kau ki he kautahi ʼe ina foaki mai te vai maʼa ʼo te moʼoni, kae ʼe tonu mo tatou ke tou fai he puleʼaki. ʼE tonu ke tou fai he ʼu puleʼaki ke tou lava ʼinu te vai maʼuhiga ʼaia, ʼo tou metitāsio pea mo fai he ʼu kumi ke hū te ʼu moʼoni ʼo te Folafola ʼa te ʼAtua ki totatou ʼatamai pea mo totatou loto. Kapau ʼe tou fai feiā, pea ʼe tou maʼu anai he ʼu fua lelei.
18. Koteā ʼaē ʼe tonu ke tou fai ke tou maʼu ai te ʼu tali ʼa te Tohi-Tapu ki tatatou ʼu fehuʼi?
18 ʼE mole fua lelei anai kiā tatou te Tohi-Tapu mo kapau ʼe tou fafaʼo ʼi he puha kae mole tou avahi ʼo lau. Ko ʼihi ʼe nātou pupunu tonatou ʼu mata, ʼo nātou hoko fuli te ʼu pasina ʼo te Tohi-Tapu, pea mo nātou ʼamanaki ʼe nātou tō anai ki te pasina ʼaē ka nātou maʼu ai te tali ki tanatou fehuʼi. Ka ʼe tonu ke tou fai he ʼu puleʼaki, pea ʼe tonu ke tou kumikumi lelei ke feala hatatou maʼu ia “te ʼatamai mālama ʼo ʼuhiga mo te ʼAtua” ohage ko hatatou keli te kele ke tou maʼu he ʼu koloā neʼe fufū. (Tāʼaga Lea 2:1-5) ʼI te agamāhani, ʼe tonu ke tou fai lelei pea mo fai fakamalotoloto he ʼu kumi ke tou maʼu ai te tokoni faka Tohi-Tapu ʼaē ʼe pipiki ki te ʼu meʼa ʼaē ʼe ʼaoga tāfito kiā tatou. ʼE tou maʼu te ʼu tuʼuga tohi faka Tohi-Tapu moʼo tokoni mai ʼi tatatou ʼu kumi. ʼI tatatou fakaʼaogaʼi te ʼu tohi ʼaia moʼo kumikumi lelei ia te ʼu manatu fakapotopoto ʼo te Tohi-Tapu, ʼe tou fakaʼaogaʼi lelei ai ia te tokoni ʼaē ʼe haʼu mai ia Sehova.
ʼE Tokoni Mai ʼAki Te ʼu Tēhina Mo Tuagaʼane
19. (a) He koʼe ʼe feala ke tou ʼui ko te ʼu alatike ʼo Te Tule Leʼo pea mo te Réveillez-vous ! ʼe ko he tokoni ʼe foaki mai e te ʼu tēhina mo tuagaʼane? (b) Ko te alatike fea ʼo tatatou ʼu nusipepa neʼe tokoni atu kiā koutou?
19 Tuʼumaʼu pe, neʼe fetokoniʼaki ia te ʼu kaugana ʼa Sehova. Kua fetogi koa e Sehova ia te fakatuʼutuʼu ʼaia? Kailoa. ʼE mahino ia, neʼe ʼi ai he ʼu ʼaluʼaga neʼe tokoni mai ai totatou ʼu tēhina mo tuagaʼane, ʼi te temi tonu ʼaē neʼe ʼaoga ai kiā tatou. Ohage la, ʼe kei koutou manatuʼi koa he ʼu alatike ʼi Te Tule Leʼo peʼe ko te Réveillez-vous ! neʼe koutou maʼu ai he fakaloto fīmālie ʼi te temi ʼaē neʼe ʼaoga ai kiā koutou, pe neʼe koutou maʼu ai he tokoni moʼo fakatokatoka hokotou fihifihia, peʼe ko te tauʼi ʼo he ʼahiʼahi ʼo takotou tui? Neʼe foaki atu e Sehova te tokoni ʼaia ʼaki “te tagata kaugana agatonu mo poto” ʼaē neʼe hinoʼi ke ina foaki te “meʼa kai ʼi tona temi totonu.”—Mateo 24:45-47, MN.
20. Ko te ʼu ʼaluʼaga fea ʼaē ʼe hā ai ko te ʼu tagata ʼāfea ʼe ko “he ʼu tagata ʼe ko he ʼu meʼa ʼofa”?
20 Kae ʼi ʼihi temi, ʼe foaki fakahagatonu mai te tokoni e totatou ʼu tēhina mo tuagaʼane. ʼE lagi fai e he tagata ʼāfea he akonaki ʼe malave ki totatou loto, peʼe ina ʼaʼahi mai tatou ʼo tokoni mai ʼi te temi faigataʼa, peʼe ina fai mai hana ʼu palalau agalelei moʼo tokoni mai ke tou mahino pea mo tauʼi he vaivaiʼaga. ʼAki he loto fakafetaʼi, neʼe tohi fēnei e te tuagaʼane ʼo ʼuhiga mo te tokoni ʼaē neʼe foaki age e te tagata ʼāfea: “ ʼI te fai faka mafola, neʼe ina fakaloto mālohiʼi au ke au fakahā age taku manatu. ʼI te po ʼi muʼa atu, neʼe au faikole kiā Sehova, ʼo au kole age he tahi ʼe feala ke au palalau ki ai. ʼI te ʼapogipogi ake, neʼe palalau mai te tēhina ʼaia ʼaki he manavaʼofa lahi. Neʼe tokoni mai ke au manatuʼi te ʼu taʼu ʼaē neʼe tokoni mai ai ia Sehova. ʼE au fakamālo kiā Sehova ʼi tana fekauʼi mai ia te tagata ʼāfea ʼaia.” ʼI te ʼu ʼaluʼaga fuli ʼaia, ʼe fakahā ai e te ʼu tagata ʼāfea Kilisitiano ko nātou ko “he ʼu tagata ʼe ko he ʼu meʼa ʼofa,” mai ia Sehova ʼaki ia Sesu Kilisito, moʼo tokoni mai ke tou faʼa kātaki ʼi te ala ʼaē ʼe ina taki ki te maʼuli.—Efeso 4:8.
21, 22. (a) Koteā ʼaē ʼe hoko mokā maʼuliʼi e te kokelekasio te tokoni ʼaē ʼe tou maʼu ia Filipe 2:4? (b) He koʼe ʼe toe maʼuhiga mo te agaʼofa ʼaē ʼe fakahā ʼi he ʼu kiʼi ʼaluʼaga ʼe mole faʼa maʼuhiga fau?
21 ʼO mole gata pe ki te kau tagata ʼāfea, ʼe toe fia maʼuliʼi e te kau Kilisitiano agatonu fuli ia te fakatotonu ʼaē ke ‘mole tou tōkakaga pe ki te ʼu meʼa ʼa tatou totonu, kae ke tou toe tōkakaga pe foki ki te ʼu meʼa ʼa ʼihi.’ (Filipe 2:4) ʼE fakahā he toe agaʼofa lahi mokā maʼuliʼi e te kokelekasio te tokoni ʼaia. Ohage la ko te famili, neʼe hoko ki ai te ʼu fihifihia lahi. Neʼe ʼolo motokā ia te tāmai pea mo tona ʼofafine ki te fale koloā. ʼI tanā liliu, neʼe nā feʼīʼaki mo te tahi motokā. Neʼe mate ai te taʼahine, pea neʼe lavea kovi te tāmai. ʼI te kamata, ʼi tana ʼosi mavae mai lōpitali, neʼe mole feala ki te tāmai ʼaia ke ina fai he meʼa, he neʼe lavea ʼaupito. Pea ko tona ʼohoana, ʼi te hēʼia ʼo tona fakakaukau ʼuhi ko te fakaʼī, neʼe mole heʼeki feala ke tokoni age ki ai. Koia, ko te taumatuʼa ʼi te kokelekasio neʼe nā toʼo kiō nāua ia te taumatuʼa ʼaia ʼaē neʼe tau mo te mamahi ʼaia pea nā tōkakaga kiā nāua lolotoga ni ʼu vāhaʼa.
22 ʼE moʼoni, ko te fakahā ʼo te agaʼofa ʼe mole fai pe mokā hoko he tuʼutāmaki lahi feiā pea mo tonu ke fai he sākilifisio feiā. ʼE lava fakahā te agaʼofa ʼi he ʼu kiʼi ʼaluʼaga ʼe mole faʼa maʼuhiga fau. Tatau aipe peʼe veliveli te agaʼofa ʼaia, kae ʼe tou leleiʼia. ʼE koutou manatuʼi koa te temi ʼaē neʼe tokoni atu he tēhina peʼe ko he tuagaʼane, he neʼe ina fai hana palalau agalelei pe neʼe agalelei atu kia koutou? ʼE tau fai e Sehova te taʼi agaʼofa ʼaia kiā tatou.—Tāʼaga Lea 17:17; 18:24.
23. E feafeaʼi kiā Sehova mokā tou faiga ke tou fetokoniʼaki?
23 ʼE koutou loto koa ke fakaʼaogaʼi koutou e Sehova moʼo tokoni ki ʼihi? ʼE faka fealagia atu kiā koutou ia te pilivilesio ʼaia. Ei, ʼe maʼuhiga kiā Sehova takotou faiga ʼaia. ʼE ʼui fēnei ʼi tana Folafola: “Ko ʼaē ʼe ʼofa kiā ia ʼaē ʼe veliveli, ʼe ina ʼavage kiā Sehova, pea ko Ia ʼe ina liufaki anai kiā ia.” (Tāʼaga Lea 19:17) ʼE tou maʼu he fiafia lahi mokā tou foaki ia tatou ki totatou ʼu tēhina mo tuagaʼane. (Gaue 20:35) Ko nātou ʼaē ʼe fakatōtō tokotahi, ʼe mole nātou ʼiloʼi te fiafia ʼo te foaki ʼo he tokoni pea mo te loto mālohi mokā tokoni mai he tahi. (Tāʼaga Lea 18:1) Koia, tou agatonu ʼo kau tuʼumaʼu ki te ʼu fono ke feala hatatou fefakaloto mālohiʼaki.—Hepeleo 10:24, 25.
24. Logope la ʼe mole tou sisio ki te ʼu milakulo fakaofoofo ʼaē neʼe fai e Sehova ʼi te temi muʼa, kae he koʼe ʼe mole tonu ke tou manatu ʼe tou hala ʼi he meʼa?
24 ʼE ko he meʼa fakafiafia kiā tatou hatatou vakavakaʼi ia te ʼu ʼaluʼaga ʼaē ʼe tokoni mai ai ia Sehova kiā tatou. Logope la ʼe mole tou maʼuʼuli ʼi he temi ʼe fakahoko ai e Sehova te ʼu milakulo fakaofoofo moʼo fakahoko tana ʼu fakatuʼutuʼu, kae ʼe mole tonu ke tou manatu ʼe tou hala ʼi he meʼa. Ko te faʼahi ʼaē ʼe maʼuhiga ʼe ko te foaki mai e Sehova te tokoni fuli ʼaē ʼe ʼaoga kiā tatou ke feala hatatou nonofo agatonu. Pea kapau ʼe tou faʼa kātaki fakatahi ʼi te tui, pea ʼe tou hāo anai ʼo tou lava sisio ki te ʼu gāue fakaofoofo pea mo faka kolōlia ʼa Sehova, ʼaē mole heʼeki hoko talu mai muʼa! Tou loto papau ke tou tali pea mo fakaʼaogaʼi kātoa ia te tokoni ʼofa ʼa Sehova, ke tou fai mo tatou ia te ʼu palalau ʼo tatatou vaega faka Tohi-Tapu ʼo te taʼu 2005: “Ko toku tokoni ʼe haʼu mai ia Sehova.”—Pesalemo 121:2.
Koteā Takotou Manatu?
ʼE foaki feafeaʼi e Sehova te tokoni ʼaē ʼe ʼaoga kiā tatou ia ʼaho nei—
• ʼaki te kau ʼāselo?
• ʼaki tona laumālie maʼoniʼoni?
• ʼaki tana Folafola?
• ʼaki te ʼu tēhina mo tuagaʼane?
[Paki ʼo te pasina 18]
ʼE fakaloto mālohi te ʼiloʼi ʼaē ʼe lagolago te kau ʼāselo ki te gāue fai faka mafola
[Paki ʼo te pasina 21]
ʼE lava fakaʼaogaʼi e Sehova hotatou tēhina peʼe ko hotatou tuagaʼane moʼo fakaloto fīmālieʼi tatou ʼi te temi ʼaē ʼe ʼaoga ai