“Kotou Haga Nonofo ʼi Te ʼOfa ʼo Te ʼAtua”
“Kotou haga nonofo ʼi te ʼofa ʼo te ʼAtua, ʼi takotou talitali ki te manavaʼofa ʼo totatou ʼAliki ko Sesu Kilisito ki te maʼuli heʼegata.”—SUTA 21.
1, 2. Neʼe fakahā feafeaʼi e Sehova ia tona ʼofa ʼaē kiā tātou, pea ʼe tou ʼiloʼi feafeaʼi ʼe mole ina haga taupau aipē tātou ʼi tona ʼofa?
ʼE LAHI te ʼu ʼaluʼaga neʼe fakahā ai e Sehova ʼAtua ia tona ʼofa ʼaē kiā tātou. Kae, ʼe mahino ia, ko te toe fakamoʼoni lahi tokotahi ʼo te ʼofa ʼo Sehova kiā tātou, ʼe ko tana fakatuʼutuʼu ʼaē ʼo ʼuhiga mo te sākilifisio faitotogi. ʼI te lahi ʼaupitō ʼo tona ʼofa ʼaē ki te mālamanei, neʼe ina fekauʼi mai tona ʼAlo ʼofaina ke haʼu ʼo mate ʼi te kele moʼo haofaki tātou. (Soa. 3:16) Neʼe fai e Sehova ia te faʼahi ʼaia, koteʼuhi ʼe ina loto ke tou māʼuʼuli ʼo heʼegata, pea ʼe ina loto foki ke fua lelei kiā tātou ia tona ʼofa ʼo talu ai!
2 Kae ʼe tonu koa ke tou manatu ko Sehova ʼe ina haga taupau aipē tātou ʼi tona ʼofa, tatau aipē peʼe koteā he ʼu aga ʼe tou fai? Kailoa ia. ʼI te vaega 21 ʼo Suta, ʼe tou maʼu ai ia te tokoni ʼaenī: “Kotou haga nonofo ʼi te ʼofa ʼo te ʼAtua, ʼi takotou talitali ki te manavaʼofa ʼo totatou ʼAliki ko Sesu Kilisito ki te maʼuli heʼegata.” Ko te kupusiga palalau “kotou haga nonofo ʼi te ʼofa ʼo te ʼAtua,” ko tona fakaʼuhiga ʼe fakamaʼua mai kiā tātou ke tou fai he ʼu gāue. Koteā ʼaē ʼe tonu ke tou fai ke tou nonofo ai ʼi te ʼofa ʼo te ʼAtua?
ʼE Lava Feafeaʼi Hatatou Nonofo ʼi Te ʼOfa ʼo Te ʼAtua?
3. Koteā ʼaē neʼe ʼui e Sesu neʼe maʼuhiga kiā te ia ke feala ai hana nofo ʼi te ʼofa ʼo tana Tamai?
3 ʼE tou maʼu te tali ʼo te fehuʼi ʼaia ʼi te ʼu palalau ʼaē neʼe fai e Sesu ʼi te pō fakaʼosi ʼo tona maʼuli ʼaē ʼi te kele. Neʼe ina ʼui fēnei: “Kapau ʼe kotou taupau taku ʼu fakatotonu, pea ʼe kotou nonofo anai ʼi toku ʼofa, ohagē pē ko taku taupau te ʼu fakatotonu [ʼa] te Tamai pea mo au nofo ʼi tona ʼofa.” (Soa. 15:10) Ohagē ko tona fakahā ʼi te vaega ʼaenī, neʼe ʼiloʼi e Sesu ko te taupau ʼo te ʼu fakatotonu ʼa Sehova, neʼe ko he faʼahi maʼuhiga ke felōgoi lelei ai mo tana Tamai. Koia, kapau neʼe moʼoni ia te faʼahi ʼaia ki te ʼAlo haohaoa ʼo te ʼAtua, pea ʼe feafeaʼi age lā kiā tātou?
4, 5. (a) Ko te faʼahi fea ʼaē ʼe tou lava fakahā tāfito ai ʼe tou ʼofa kiā Sehova? (b) He koʼē ʼe mole tonu ke tou manatu ko te fakalogo ʼaē ki te ʼu fakatotonu ʼa Sehova ʼe faigataʼa fau?
4 ʼE tou fakahā tāfito ʼe tou ʼofa kiā Sehova ʼaki tatatou fakalogo ʼaē kiā te ia. Neʼe fakahā e te ʼapositolo ko Soane ia te faʼahi ʼaia, ʼo ina ʼui fēnei: “Koʼenī te fakaʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; kae ko tana ʼu fakatotonu ʼe mole fakamāfasia ia.” (1 Soa. 5:3) ʼE mahino ia, ko te fakalogo ki he tahi, ʼe mole ko he aga ʼe leleiʼia e te tokolahi ʼi te mālama ʼaenī. Kae kotou fakatokagaʼi te faʼahi ʼaenī: “Kae ko tana ʼu fakatotonu ʼe mole fakamāfasia ia.” Ko Sehova ʼe mole ina kole mai ke tou fai ia he meʼa ʼe faigataʼa fau kiā tātou.
5 Tou toʼo he fakatā: ʼE kotou kole age anai koa ki hokotou kaumeʼa ke ina hiki he meʼa, kae ʼe kotou ʼiloʼi lelei pē ʼe mamafa fau kiā ia? Kailoa ia! Ko Sehova ʼe agalelei age iā tātou pea mo ina ʼiloʼi lelei age totatou ʼu tuʼakoi. ʼE fakahā lelei mai ʼi te Tohi-Tapu, ko Sehova ʼe ina “manatuʼi ko tātou ʼe tou efu.” (Pes. 103:14) ʼE mole ina kole mai anai he meʼa ʼe mole tou lavaʼi. Koia ʼe mole tonu ke tou manatu ko te fakalogo ʼaē ki te ʼu fakatotonu ʼa Sehova ʼe faigataʼa fau. Kae ʼe tou fakalogo heʼe tou mahino ko te fakalogo ʼaē kiā Sehova ʼe ko he faigamālie taulekaleka ʼaia moʼo fakahā ki tatatou Tamai ʼaē ʼe ʼi selō, ʼe tou ʼoʼofa moʼoni kiā te ia pea ʼe tou fia nonofo ʼi tona ʼofa.
Ko He Meʼa ʼOfa Makehe Mai Iā Sehova
6, 7. (a) Koteā koa ia te leʼo ʼo loto? (b) Tuku mai he fakatā, ʼe hā ai ko te leʼo ʼo loto ʼe lava tokoni mai ke tou nonofo ʼi te ʼofa ʼo te ʼAtua.
6 ʼI te mālama faigataʼa ʼaenī ʼe tou māʼuʼuli ai, ʼe lahi ia te ʼu tonu ʼe tou fai ʼe fakahā ai ia tatatou fakalogo ʼaē ki te ʼAtua. ʼE feafeaʼi hatatou ʼiloʼi papau ko te ʼu tonu ʼaia ʼe ʼalutahi mo te finegalo ʼo te ʼAtua? Neʼe foaki mai e Sehova ia te meʼa ʼofa, ʼe feala ke tokoni lahi mai kiā tātou ʼi te faʼahi ʼo te fakalogo. ʼE ko te leʼo ʼo loto. Koteā koa ia te leʼo ʼo loto? ʼE ko he fealagia makehe ʼe tou maʼu iā tātou moʼo vakavakaʼi ʼo kita totonu. ʼE gāue ohagē ko he tuʼi fakamāu kiā kita totonu, pea ʼe ina fakafealagia mai ke tou tokagaʼi ia te ʼu tonu ʼaē ʼe tou fai ʼi totatou maʼuli peʼe ke tou fakakaukauʼi ia te ʼu meʼa ʼaē kua tou fai pea mo vakavakaʼi peʼe lelei peʼe kovi.—Lau ia Loma 2:14, 15.
7 Ko te ʼu faʼahi fea ʼaē ʼe feala ai ki totatou leʼo ʼo loto ke tokoni mai kiā tātou? Tou toʼo he fakatā. Ko te pōʼuli pea kua matemoe te tagata ʼi tona moeʼaga. Fokifā pē kua kō tana kulī he neʼe logo ki te logoaʼa, ʼo tupu ai te hola ʼa te tagata kaihaʼa. ʼE lahi te ʼu ʼapi ʼe ʼi ai te ʼu kulī moʼo leʼo ia te loto fale. Kapau ʼi he ʼapi, ʼe mole he kulī moʼona leʼoleʼo, pea ʼe feala pē ke tuʼutāmakiʼia ia te hahaʼi ʼo te loto fale ʼaia. ʼO toe fēia pē, ko he tagata ʼe mole hona leʼo ʼo loto, ʼi te agamāhani ʼe mole ina ʼiloʼi anai te meʼa ʼaē ʼe tonu ke ina filifili ʼo ʼuhiga mo te ʼu aga ʼaē ke ina fai.
8, 9. (a) Ko te ʼu tuʼakoi fea ʼo ʼuhiga mo totatou leʼo ʼo loto ʼe tonu ke tou manatuʼi? (b) Koteā ʼaē ʼe tou lava fai ke tou ʼiloʼi papau ʼe ʼaoga moʼoni totatou leʼo ʼo loto kiā tātou?
8 Kae ohagē pē ko te leʼoleʼo ʼa he kulī ʼi he ʼapi, ko te leʼo ʼo loto ʼe ʼi ai tona ʼu tuʼakoi. Heʼe kapau ʼe mole kō te kulī pea ʼe feala ke tuʼutāmaki te hahaʼi ʼo te loto fale. ʼO toe fēia pē mo kapau ʼe tou mulimuli fau ki te ʼu holi ʼo totatou loto, koteā anai ʼaē kā hoko? ʼE lagi mole kei taki lelei tātou e totatou leʼo ʼo loto ʼuhi ko tatatou fakamuʼamuʼa ia te ʼu holi ʼo totatou loto. ʼE fakatokaga fēnei mai ʼi te Tohi-Tapu: “ ʼE kākā te loto, ʼo laka iā meʼa fuapē, pea mo kovi ʼaupitō.” (Sel. 17:9; Taag. 4:23) Tahi ʼaē meʼa, kapau ʼe mole leʼoleʼo lelei ia te kulī, pea ʼe mole ʼi ai hona ʼaoga ki te ʼapi. ʼO toe fēia pē, kapau ʼe mole tou falala ki te Folafola ʼa te ʼAtua ʼaē ʼe totonu pea mole fetogi tana takitaki, pea ʼe mole lava tokoni mai anai totatou leʼo ʼo loto. (Pes. 119:105) Meʼa fakaʼofaʼofa, tokolahi te hahaʼi ʼi te mālama ʼaenī, ʼe natou fakamuʼamuʼa ia te ʼu holi ʼo tonatou loto, ʼo mole natou fakaʼaogaʼi kātoa ia te ʼu lēkula ʼaē ʼe tuʼu ʼi te Folafola ʼa te ʼAtua, peʼe natou meʼa noaʼi ʼosi pē. (Lau ia Efesi 4:17-19.) Koia ʼaē, logolā ko te tokolahi ʼe ʼi ai tonatou leʼo ʼo loto, kae ʼe natou fai ia te ʼu aga ʼe mole lelei.—1 Tim. 4:2.
9 ʼE tonu ke tou fakatotonu ke mole tou fēia ʼi he temi! Kae ke tou haga tuku ia te Folafola ʼa te ʼAtua ke ina akoʼi tātou pea mo taki totatou leʼo ʼo loto, ke feala ai hona ʼaoga moʼoni kiā tātou. ʼE tonu ke tou fakalogo ki totatou leʼo ʼo loto ʼaē neʼe akoʼi e te Tohi-Tapu, kae ʼaua naʼa tou mulimuli ki te ʼu holi ʼo totatou loto. Tahi ʼaē meʼa, ʼe tonu ke tou fakaʼapaʼapa ki te ʼu leʼo ʼo loto ʼo totatou ʼu tehina mo tuagaʼane. ʼE tou tōkakaga naʼa tou fai he meʼa ʼe fakatupu tūkia kiā nātou, ʼo tou manatuʼi ko te leʼo ʼo loto ʼo totatou tehina, ʼe feala ke mole tatau mo tātou ʼi ʼihi tonu ʼe natou fai.—1 Ko. 8:12; 2 Ko. 4:2; 1 Pet. 3:16.
10. Koteā te ʼu faʼahi e tolu ʼo totatou maʼuli ʼaē kā tou vakaʼi anai?
10 Tou vakaʼi age muʼa ia faʼahi e tolu ʼi totatou maʼuli, ʼe feala ai ke tou fakahā ia totatou ʼofa ʼaē kiā Sehova ʼaki tatatou fakalogo. ʼE mahino ia, ʼe ʼaoga anai ki te ʼu faʼahi ʼaia e tolu te gāue ʼo totatou leʼo ʼo loto, kae ʼe tonu ke takitaki totatou leʼo ʼo loto e he ʼu lēkula ʼo te Tohi-Tapu ʼo ʼuhiga mo te ʼu aga ʼaē ʼe tonu ke fai. Koʼenī ia te ʼu faʼahi e tolu ʼaē ʼe feala ai ʼaki te ʼofa ke tou fakalogo kiā Sehova: (1) Ke tou ʼoʼofa kiā nātou ʼaē ʼe ʼofa ki ai Sehova, (2) ke tou fakalogo ki te takitaki ʼo nātou ʼaē neʼe fakanofo e te ʼAtua ʼi te kōkelekāsio, pea (3) ke tou faiga ke tou nonofo maʼa kiā mata ʼo te ʼAtua.
Ke Tou ʼOʼofa Kiā Nātou ʼAē ʼe ʼOfa Ki Ai Sehova
11. He koʼē ʼe tonu ke tou ʼoʼofa kiā nātou ʼaē ʼe ʼofa ki ai Sehova?
11 ʼUluaki, ʼe tonu ke tou ʼoʼofa kiā nātou ʼaē ʼe ʼofa ki ai Sehova. ʼO ʼuhiga mo te ʼu fakakaugā, ʼe hagē te hahaʼi ko he moʼi vavae. ʼE tou faʼifaʼitakiʼi te ʼu aga ʼa te hahaʼi ʼaē ʼe tou fakakaugā ki ai. Ko totatou Tupuʼaga ʼe ina ʼiloʼi lelei ia te ʼu tuʼutāmaki peʼe ko te ʼaoga ʼo te ʼu fakakaugā ki te hahaʼi heʼe haohaoa, pea ʼe ina toe ʼiloʼi lelei mo te ʼu fakakaugā ʼaē ʼe ʼaoga kiā nātou. Koia ʼe ina foaki mai ia te tokoni poto ʼaenī: “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kiā ia.” (Taag. 13:20; 1 Ko. 15:33) ʼE mole he tahi iā tātou ʼe loto ke “fua kovi” ia tona maʼuli. Ko tātou fuli ʼe tou loto ke tou ‘popoto.’ ʼO ʼuhiga mo Sehova, kua ina maʼu kātoa ia te poto, pea ʼe mole feala ki he tahi ke ina uga ia ia ke ina fai ia he meʼa ʼe kovi. Kae ʼe ina tuku mai ia te faʼifaʼitaki lelei ʼo ʼuhiga mo te ʼu fakakaugā. Kotou fakakaukauʼi age muʼa, ko te ʼu tagata heʼe haohaoa fea ʼaē neʼe filifili e Sehova ke liliu ko tona ʼu kaumeʼa?
12. Ko te ʼu taʼi faʼahiga kaumeʼa feafeaʼi ʼaē ʼe filifili e Sehova?
12 Neʼe ʼui e Sehova ʼo ʼuhiga mo te pāteliaka ko Apalahamo, ko ‘tona kaumeʼa.’ (Isa. 41:8) Ko te tagata ʼaia neʼe agatonu, mo faitotonu, pea mo fakalogo, neʼe ko te tagata tui. (Sake 2:21-23) Ko te taʼi faʼahiga kaumeʼa lā ʼaia, ʼaē ʼe filifili e Sehova. Ko te ʼu taʼi kaumeʼa ʼaia ʼe filifili e Sehova iā ʼaho nei. Kapau ʼe ina filifili he ʼu kaumeʼa fēia, pea ʼe mole toe maʼuhiga koa ke tou filifili lelei mo tātou totatou ʼu kaumeʼa, ke tou haʼele mo nātou ʼaē ʼe popoto pea ke tou liliu ai ʼo popoto?
13. ʼO ʼuhiga mo te filifili ʼo te ʼu kaumeʼa, koteā ʼaē ʼe feala ke tokoni mai ke tou filifili lelei ʼi te faʼahi ʼaia?
13 Koteā ʼaē ʼe feala ke tokoni atu ke kotou filifili hokotou ʼu kaumeʼa ʼe lelei? ʼI takotou ako ia te ʼu faʼifaʼitaki lelei ʼaē ʼi te Tohi-Tapu, ʼe feala ai ke kotou filifili lelei hokotou ʼu kaumeʼa. Kotou fakatokagaʼi ia te fakakaumeʼa ʼaē ʼa Lute pea mo Naomi ia te faʼē ʼo tona ʼohoana, ia te fakakaumeʼa ʼa Tavite pea mo Sonatane, peʼe ko te fakakaumeʼa ʼa Timoteo pea mo Paulo. (Lute 1:16, 17; 1 Sam. 23:16-18; Filp. 2:19-22) Neʼe natou kaumeʼa lelei he neʼe fakatafito ki te meʼa pē e tahi: neʼe natou ʼoʼofa moʼoni kiā Sehova. ʼE feala koa hakotou kaumeʼa mo niʼihi ʼe ʼoʼofa kiā Sehova ohagē ko koutou? Ke kotou tui papau, ʼe kotou lava maʼu hokotou ʼu tuʼuga kaumeʼa fēia ʼi te kōkelekāsio. Ko te ʼu taʼi kaumeʼa ʼaia ʼe mole natou uga anai koutou ke kotou fai he ʼu meʼa ke fua kovi ki tokotou maʼuli fakalaumālie. Kae ʼe natou tokoni atu anai ke kotou fakalogo kiā Sehova, ke kotou felōgoi lelei mo ia, pea ke kotou fai he ʼu gāue ʼaki te takitaki ʼa te laumālie māʼoniʼoni. (Lau ia Kalate 6:7, 8.) ʼE natou tokoni atu anai ke kotou nonofo ʼi te ʼofa ʼo te ʼAtua.
Ke Tou Fakalogo Ki Te Takitaki ʼo Nātou ʼAē Neʼe Fakanofo e Te ʼAtua ʼi Te Kōkelekāsio
14. Ko te ʼu ʼaluʼaga fea ʼaē ʼe feala ai ke faigataʼa ia tatatou fakaʼapaʼapa kiā nātou ʼaē ʼe takitaki ʼi te kōkelekāsio?
14 Ko te lua faʼahi ʼaē ke tou fakahā ai ia totatou ʼofa ʼaē kiā Sehova, ʼe ko tatatou fakalogo kiā nātou ʼaē neʼe fakanofo e te ʼAtua ʼi te kōkelekāsio. ʼE tonu ke tou fakalogo ki tanatou takitaki. He koʼē ʼi ʼihi temi ʼe faigataʼa kiā tātou ia tatatou fakalogo ʼaē kiā nātou? Mai tona ʼaluʼaga ʼaē, ko nātou ʼaē ʼe natou takitaki, ʼe ko te ʼu tagata heʼe haohaoa. Pea tahi, mo tātou pē lā ʼe tou heʼe haohaoa. Neʼe tou tutupu ake ʼaki te holi ʼaē ke tou talagataʼa.
15, 16. (a) He koʼē ʼe maʼuhiga ke tou fakaʼapaʼapa kiā nātou ʼaē neʼe foaki ki ai e Sehova ia te maʼua ʼaē ke natou tōkakaga ki tana hahaʼi? (b) Koteā te ako lelei ʼe tou tāʼofi mai te manatu ʼaē ʼa Sehova ki te talagataʼa ʼa te kau Iselaele kiā Moisese?
15 ʼE feala ke kotou feʼekeʼaki fēnei: ‘Kapau ʼe faigataʼa fau kiā tātou ia te fakalogo ʼaē kiā nātou, pea he koʼē ʼe tonu ke tou fakalogo kiā nātou?’ Ko te tali ki te fehuʼi ʼaenī, ʼe ʼi ai tona pikipikiga mo te pule faʼitaliha ʼa Sehova. Ko ai koa ʼaē kā kotou filifili anai ko tokotou pule? Kapau ʼe tou filifili ia Sehova ko totatou Pule, pea ʼe tonu ke tou fakaʼapaʼapa ki tana takitaki. Kapau ʼe mole tou fakaʼapaʼapa ki ai, pea ʼe feala koa ke tou ʼui ko ia totatou Pule? Tahi ʼaē, ʼi te agamāhani ʼe fakahoko e Sehova ia tana pule ʼaki he ʼu tagata heʼe haohaoa neʼe ina foaki kiā nātou ia te maʼua ʼaē ke natou tōkakaga ki tana hahaʼi. Kapau ʼe tou talagataʼa ki te ʼu tagata ʼaia, pea koteā anai ia te manatu ʼa Sehova ki tatatou aga?—Lau ia 1 Tesalonika 5:12, 13.
16 Ohagē lā, ʼi te temi ʼaē neʼe muhumuhu ai te kau Iselaele kiā Moisese pea mo natou talagataʼa ki ai, neʼe fakaʼuhiga e Sehova ia tanatou aga ʼaia, ʼe natou fai fakahagatonu age kiā te ia. (Fkau. 14:26, 27) ʼE mole fetogi te ʼAtua. Kapau lā ʼe tou talagataʼa ʼi he ʼaho kiā nātou ʼaē ʼe natou takitaki ʼi te kōkelekāsio, pea ʼe tou talagataʼa ki te ʼAtua!
17. Koteā ia te manatu lelei ʼaē ʼe tonu ke tou maʼu ʼo ʼuhiga mo nātou ʼaē ʼe natou takitaki ʼi te kōkelekāsio?
17 ʼE fakahā e te ʼapositolo ko Paulo ia te manatu lelei ʼaē ʼe tonu ke tou maʼu ʼo ʼuhiga mo nātou ʼaē ʼe natou takitaki ʼi te kōkelekāsio Fakakilisitiano. Neʼe ina tohi fēnei: “Kotou fakalogo kiā nātou ʼaē ʼe natou takitaki koutou, pea mo kotou talagafua, heʼe natou leʼoleʼo tuʼumaʼu ʼokotou ʼu nefesi, ohagē ko he ʼu tagata ʼe fakamāuʼi anai ʼi he ʼaho; koteʼuhi ke natou fai fakafiafia te faʼahi ʼaia kae ke ʼaua naʼa natou fai ʼaki he loto fītaʼa, heʼe fakatupu kovi anai kiā koutou.” (Hep. 13:17) ʼE mahino ia, ʼe tonu ke tou faiga mālohi ke tou maʼu ia te taʼi fakalogo ʼaia pea mo tou talagafua kiā nātou. Kae tou manatuʼi, ʼe tou lolotoga gāue nei ke tou nonofo ʼi te ʼofa ʼo te ʼAtua. ʼE mole ko he fakatuʼutuʼu koa lā ʼe tuha mo te ʼu faiga fuli ʼaē ʼe tonu ke tou fai kiai?
Ke Tou Nonofo Maʼa Kiā Mata ʼo Sehova
18. He koʼē ʼe loto e Sehova ke tou nonofo maʼa?
18 Ko te tolu faʼahi ʼaē ke tou fakahā ai ia totatou ʼofa ʼaē kiā Sehova, ke tou nonofo maʼa ʼi ʼona muʼa. ʼI te agamāhani, ʼe gāue kinakina ia te tamai mo te faʼē ke maʼa tanā fānau. Koteā tona tupuʼaga? ʼE maʼuhiga ke maʼa te tamasiʼi moʼo puipui ia ia mai te mahaki pea ke lelei tona maʼuli. Pea tahi, ko he tamasiʼi ʼe maʼa, ʼe toe palalau lelei aipē te hahaʼi ki te fāmili, ʼo fakahā ai ia te ʼofa pea mo te tokaga ʼaē ʼa te ʼu mātuʼa ki tanā fānau. Tupu ko te ʼu faʼahi ʼaia, ʼe toe loto ai e Sehova ke tou maʼa. ʼE ina ʼiloʼi ʼe maʼuhiga ki totatou maʼuli fakasino ke tou maʼa. ʼE ina toe ʼiloʼi foki ko tatatou agamaʼa ʼe toe palalau lelei ai te hahaʼi ʼo ʼuhiga mo ia, tatatou Tamai ʼaē ʼe ʼi selō. ʼE maʼuhiga ʼaupitō ia te faʼahi ʼaia, heʼe feala ai ki te hahaʼi ke natou fia tauhi ki te ʼAtua, koteʼuhi ʼe natou tokagaʼi ia tatatou mole tatau ʼaē mo nātou ʼo te mālama heʼemaʼa ʼaenī.
19. ʼE tou ʼiloʼi feafeaʼi ko te maʼa ʼi te faʼahi fakasino ʼe maʼuhiga?
19 Ko te ʼu faʼahi fea ʼaē ʼe ʼaoga ai ke tou nonofo maʼa? ʼI te ʼu faʼahi fuli ʼo totatou maʼuli. ʼI te temi ʼo te kau Iselaele ʼo te temi muʼa, neʼe fakahā lelei e Sehova ki tana hahaʼi, ko te maʼa ʼi te faʼahi fakasino neʼe maʼuhiga. (Lev. 15:31) Ko te Lao ʼa Moisese neʼe ina takitaki te maʼuli ʼo te kau Iselaele ʼi te laku ʼo te ʼu ʼotaʼota, te fakamaʼa ʼo te ʼu naunau, pea mo te fufulu ʼo te ʼu nima, mo te ʼu vae, pea mo te fō ʼo te ʼu mutuʼi meʼa. (Eke. 20:17-21; Lev. 11:32; Fkau. 19:17-20; Teu. 23:13, 14) Neʼe tonu ki te kau Iselaele ke natou manatuʼi ko tonatou ʼAtua ʼaē ko Sehova ʼe māʼoniʼoni, ko tona fakaʼuhiga ʼe “maʼa,” mo “taputapu.” ʼE toe ʼaoga ki te ʼu kaugana ʼa te ʼAtua māʼoniʼoni ke natou māʼoniʼoni.—Lau ia Levitike 11:44, 45.
20. Ko te ʼu faʼahi fea ʼaē ʼe ʼaoga ai ke tou nonofo maʼa?
20 ʼE ʼaoga ke tou maʼa ʼi totatou loto pea mo totatou sino. ʼE tou faiga ke tou taupau he ʼu fakakaukau ʼe maʼa. ʼE tou agatonu ʼo mulimuli ki te ʼu lēkula ʼa Sehova ʼo ʼuhiga mo te maʼa ʼi te aga ʼaē ʼe tonu ke fai, logolā te ʼu aga heʼeʼaoga ʼaē ʼe tuputupu ʼi te mālamanei. Ko te faʼahi ʼaē ʼe maʼuhiga age, ke tou taupau ke maʼa tatatou tauhi, ʼo tou fakafeagai ki te ʼu akonaki peʼe ko te ʼu aga fakalotu ʼa te ʼu lotu hala. ʼE tou manatuʼi tuʼumaʼu ia te fakatokaga ʼaenī iā Isaia 52:11: “Kotou fakamamaʼo, kotou fakamamaʼo, kotou mavae mai ai, ʼaua naʼa kotou fāfā ki he meʼa ʼe heʼemaʼa; kotou mavae mai ai, ke kotou maʼa.” Iā ʼaho nei, ʼe tou nonofo maʼa ʼi te faʼahi fakalaumālie ʼaki tatatou mole kau ki he meʼa ʼe heʼemaʼa ʼi te faʼahi fakalotu kiā mata ʼo tatatou Tamai ʼaē ʼe ʼi selō. Koia lā ʼaē, ʼe tou tōkakaga fakalelei ai ke mole tou kau ki te ʼu toʼotoʼaga ʼo te lotu hala pea mo te ʼu ʼaho lalahi ʼo te mālamanei. ʼE mahino ia, ʼe ko he meʼa faigataʼa hatatou nonofo maʼa. Kae ko te hahaʼi ʼa Sehova ʼe natou faiga ke natou fai ia te faʼahi ʼaia heʼe tokoni ai kiā nātou ke natou nonofo ʼi te ʼofa ʼo te ʼAtua.
21. ʼE feafeaʼi hatatou ʼiloʼi papau ʼe tou nonofo anai ʼi te ʼofa ʼo te ʼAtua?
21 ʼE loto e Sehova ke tou nonofo ʼi tona ʼofa ʼo talu ai. Kae ko tātou fuli takitokotahi ʼe ʼaoga ke tou vakavakaʼi fakalelei peʼe tou fai ia meʼa fuli ke feala ai hatatou nonofo ʼi te ʼofa ʼo te ʼAtua. ʼE tou lava fai te faʼahi ʼaia, ʼaki hatatou muliʼi ia te faʼifaʼitaki ʼa Sesu pea mo fakahā ia totatou ʼofa ʼaē kiā Sehova, ʼaki hatatou fakalogo ki Tana ʼu fakatotonu. Kapau ʼe tou fai ia te faʼahi ʼaia, pea ʼe tou ʼiloʼi papau ai anai ʼe mole he meʼa ʼe ina “lava fakamavae anai tātou mai te ʼofa ʼo te ʼAtua ʼaē ʼe iā Kilisito Sesu totatou ʼAliki.”—Loma 8:38, 39.
ʼE Kei Kotou Manatuʼi Koa?
• ʼE lava tokoni feafeaʼi mai ia totatou leʼo ʼo loto ke tou nonofo ʼi te ʼofa ʼo te ʼAtua?
• He koʼē ʼe tonu ke tou ʼoʼofa kiā nātou ʼaē ʼe ʼofa ki ai Sehova?
• He koʼē ʼe maʼuhiga ke tou fakaʼapaʼapa kiā nātou ʼaē ʼe takitaki ʼi te kōkelekāsio?
• ʼE maʼuhiga feafeaʼi ki te hahaʼi ʼa te ʼAtua ia te nofo maʼa?
[Talanoa ʼo te pasina 31]
Ko He Tohi ʼe ʼAoga Ki Te Fai ʼo Te Aga ʼAē ʼe Lelei
ʼI te polokalama ʼo te fakatahi fakatisitilike 2008/2009, neʼe tā te tohi koʼenī ia tona kupu tāfito “Kotou Haga Nonofo ʼi Te ʼOfa ʼo Te ʼAtua.” He koʼē neʼe fai ia te tohi foʼou ʼaenī? Neʼe fai moʼo tokoni ki te kau Kilisitiano ke natou ako ke natou ʼiloʼi ia te ʼu lēkula ʼa Sehova pea mo manako kiai, ʼo natou tōkakaga tāfito ki te aga Fakakilisitiano ʼaē ʼe tonu ke fai. Ko te akoʼi fakalelei ʼo te tohi “Kotou Haga Nonofo ʼi Te ʼOfa ʼo Te ʼAtua,” ʼe ina fakamālohiʼi anai tatatou tui papau ʼaē ko te maʼuliʼi ʼo te ʼu lēkula ʼa Sehova, ʼe ko te faʼahiga maʼuli pē ʼaia ʼe lelei ʼi te temi nei pea mo taki tātou ki te maʼuli heʼegata ʼi te kā haʼu.
ʼO mole gata ai, neʼe toe fai ia te tohi ʼaia moʼo tokoni kiā tātou, ke tou mahino ko te fakalogo ʼaē kiā Sehova ʼe mole fakamāfasia ia. Kae ʼaki tatatou fakalogo ʼaē kiā Sehova, ʼe tou fakahā ai ia totatou ʼofa ʼaupitō ʼaē kiā te ia. Koia ko te tohi ʼaia, ʼe ina uga anai tātou, ke tou fai te fehuʼi ʼaenī: ‘He koʼē ʼe au fakalogo kiā Sehova?’
Kā sītuʼa ʼihi ki te ʼofa ʼo Sehova, pea ʼi te agamāhani neʼe tupu ʼuhi ko he aga ʼe kovi neʼe natou fai kae mole tupu ko he akonaki fakalotu ʼaē neʼe mole natou mahino kiai. Koia, ʼe maʼuhiga ai ke tou fakamālohiʼi ia totatou ʼofa pea mo tatatou leleiʼia ia te ʼu lao ʼa Sehova pea mo tana ʼu pelesepeto, ʼaē ʼe natou taki tātou ʼi te ʼaho fuli! ʼE matou falala ko te tohi foʼou ʼaia, ʼe tokoni anai ki te ʼu ovi ʼa Sehova ʼo te mālamanei ke natou nonofo agatonu ʼo ʼuhiga mo te meʼa ʼaē ʼe totonu, ʼo natou fakahā ko Satana ʼe gutuloi, pea tāfito ke natou nonofo ʼi te ʼofa ʼo te ʼAtua!—Suta 21.
[Paki ʼo te pasina 28]
“Kapau ʼe kotou taupau taku ʼu fakatotonu, pea ʼe kotou nonofo anai ʼi toku ʼofa, ohagē pē ko taku taupau te ʼu fakatotonu [ʼa] te Tamai pea mo au nofo ʼi tona ʼofa”