Kapite Valu
‘Koutou Fakafeagai Ki Te ʼu Mālohi Fakalaumālie Agakovi’
1. He koʼe ʼe tou fia ʼiloʼi tāfito te ʼu gāue ʼa te ʼu laumālie agakovi?
TOKOLAHI te hahaʼi ʼe nātou fia kakata mokā ʼui age ʼe ʼi ai te ʼu laumālie agakovi. Kae ʼaua naʼa tou kakata ʼo ʼuhiga mo te faʼahi ʼaia. Tatau aipe peʼe tui ki ai te hahaʼi peʼe kailoa, kae ʼe maʼuʼuli moʼoni te ʼu laumālie agakovi, pea ʼe nātou faiga ke nātou fakahalaʼi te hahaʼi fuli pe. ʼE nātou toe fakahalaʼi mo te kau atolasio ʼa Sehova. ʼE ko nātou tāfito ʼaē ʼe ina tauʼi. ʼE fai e te ʼapositolo ko Paulo te fakatokaga ʼaenī kia tatou: “Ko tatatou tau ʼe mole fai ʼo fakafeagai ki te toto pea mo te kakano, kae ʼe fakafeagai ki te ʼu puleʼaga, ʼe fakafeagai ki te kau takitaki, ʼe fakafeagai ki te kau pule ʼo te mālama ʼo te ʼu fakapōʼuli, ʼe fakafeagai ki te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” (Efeso 6:12) Ia ʼaho nei, ʼe lahi ʼaupito te ʼu fakahala ʼaē ʼe fai e te ʼu mālohi fakalaumālie agakovi, koteʼuhi kua kapu ifo Satana mai selo ʼaki hana ʼita lahi, heʼe ina ʼiloʼi kua nounou tona temi.—Apokalipesi 12:12.
2. E feafeaʼi hatatou lava mālo ʼi tatatou fakafeagai ki te ʼu laumālie mālohi?
2 ʼE tou lava mālo koa ʼi he tau ʼe mālolohi age te ʼu laumālie ʼi te tagata? Ei, mo kapau ʼe tou falala katoa kia Sehova. ʼE tonu ke tou fakalogo kia te ia pea mo tana Folafola. Kapau ʼe tou fai feiā, pea ʼe tou hāofaki anai tatou mai te ʼu tuʼutāmaki fakasino, mo te ʼu tuʼutāmaki ʼi te ʼu aga ʼaē ʼe mole tonu ke fai pea mo te ʼu tuʼutāmaki ʼo te loto, ʼaē neʼe hoko kia nātou ʼaē ʼe puleʼi e Satana.—Sakopo 4:7.
Te ʼu Pule Faka Malamanei ʼi Te ʼu Potu ʼo Te Lagi
3. Ko ai ʼaē ʼe fakafeagai mālohi ki ai Satana, pea ʼe fakahoko feafeaʼi te fakafeagai ʼaia?
3 ʼE fakamatala mai e Sehova te ʼaluʼaga ʼo te malamanei ʼi tana sio ifo mai lagi. Neʼe ina fakahā ki te ʼapositolo ko Soane ia Satana ohage ko “he talakone lahi ʼe lanuʼi afi.” Neʼe ina ʼamanaki folo ia te Puleʼaga Faka Mesianike, mo kapau ʼe feala, ʼi te temi pe ʼaē neʼe tupu ai ʼi te lagi ʼi te 1914. Kae neʼe mole lavaʼi e Satana, pea neʼe ina fakahoko he ʼu fakafeagai lahi ki te kau fakafofoga ʼo te Puleʼaga ʼi te kele. (Apokalipesi 12:3, 4, 13, 17) ʼE fakahoko feafeaʼi e Satana te tau ʼaia? ʼE ina fakaʼaogaʼi tana ʼu hahaʼi ʼi te kele.
4. Ko ai ʼaē ʼe ina foaki te mālohi ki te ʼu puleʼaga fakatagata, pea ʼe tou ʼiloʼi feafeaʼi te faʼahi ʼaia?
4 Ki muli age, neʼe sio ia Soane ki te manu fekai ʼulu fitu pea mo tala e hogofulu, ko te manu ʼe ina puleʼi “te ʼu telepi kehekehe, mo te hahaʼi kehekehe, mo te ʼu lea kehekehe pea mo te ʼu puleʼaga kehekehe.” Ko te manu ʼaia ʼe ina fakatātā te tuʼu faka politike ʼo te malamanei katoa. Neʼe fakahā age kia Soane “neʼe foaki age e te talakone [ia Satana te Tevolo] tona mālohi [ki te manu] mo tona hekaʼaga faka hau pea mo tana pule lahi.” (Apokalipesi 13:1, 2, 7) Ei, ko Satana ʼaē ʼe ina foaki te mālohi pea mo te pule ki te ʼu puleʼaga fakatagata. Koia ohage ko tona tohi e te ʼapositolo ko Paulo, ʼi tona fakahagatonu ko “te ʼu pule faka malamanei,” ʼe ko “te ʼu mālohi fakalaumālie agakovi ʼaē ʼe maʼuʼuli ʼi te ʼu potu ʼo te lagi,” ʼaē ʼe nātou puleʼi te ʼu puleʼaga fakatagata. Ko nātou fuli ʼaē ʼe fia tauhi kia Sehova, ʼe tonu ke nātou mahino ki te faka ʼuhiga lelei ʼo te faʼahi ʼaia.—Luka 4:5, 6.
5. ʼI te temi nei, he koʼe ʼe fakatahitahi te ʼu puleʼaga faka politike?
5 Logola ʼe lahi te ʼu pule faka politike ʼe nātou ʼui ko he ʼu hahaʼi lotu, kae ʼe mole he puleʼaga ʼe fakalogo ki te takitaki ʼa Sehova, pea mo te takitaki ʼa te Hau ʼaē neʼe ina fakanofo, ia Sesu Kilisito. ʼE nātou faiga mālohi fuli ke nātou taupau tanatou mālohi. Ia ʼaho nei, ohage ko tona fakahā ʼi te tohi ʼo Apokalipesi, “ko te ʼu palalau ʼe haʼu mai te kau temonio” ʼe nātou fakatahitahi te ʼu puleʼaga ʼo te malamanei ki “te tau ʼo te ʼaho lahi ʼo te ʼAtua te Māfimāfi” ʼi Halamaketone.—Apokalipesi 16:13, 14, 16; 19:17-19.
6. He koʼe ʼe ʼaoga ke tou tokakaga naʼa tou liliu ʼo lagolago ki te tuʼu ʼa Satana?
6 ʼI te ʼaho fuli pe, ʼe malave ki totatou maʼuli te ʼu fihi faka politike, faka sosiale, faka ekonomika, pea mo faka lotu ʼaē ʼe nātou faka maveuveu te ʼatu ʼu famili fuli pe. ʼI te ʼu tokakovi ʼaia, ko te hahaʼi ʼe nātou tahi lagolago ʼi tanatou ʼu palalau pea mo te ʼu meʼa ʼe nātou fai, ki tonatou puleʼaga, ki tonatou telepi, ki te hahaʼi ʼo tonatou lea peʼe ko tonatou kalasi faka sosiale. Ko te meʼa ʼe tautau hoko, māʼiape la mo nātou ʼaē ʼe mole kau fakahagatonu ki te ʼu tokakovi, ʼe nātou lagolago ki he kūtuga. Kae tatau aipe peʼe ko ai he tahi peʼe ko he tonu ʼe nātou lagolago kiai, kae ʼi tona fakahagatonu ko ai ʼaē ʼe nātou lagolago ki ai? ʼE ʼui fakalelei mai e te Tohi-Tapu: “Ko te malamanei katoa ʼe takoto ʼi te mālohi ʼo te agakovi.” (1 Soane 5:19) Kae koteā ʼaē ʼe lava fai e he tahi ke mole kākāʼi ia ia ohage ko te kākāʼi ʼo te malamanei? ʼE tonu ke lagolago katoa ki te Puleʼaga ʼa te ʼAtua, pea ke mole kau ki te ʼu fihi ʼo te malamanei.—Soane 17:15, 16.
Te ʼu Kākā ʼo Te Agakovi
7. ʼE ʼiloga feafeaʼi te faiva kākā ʼa Satana ʼi tana fakaʼaogaʼi te lotu hala?
7 ʼI te ʼu temi fuli pe, neʼe fakaʼaogaʼi e Satana te ʼu manuki pea mo te ʼu fakataga, moʼo fakamaliu kehe te hahaʼi mai te tauhi moʼoni. ʼE toe faiva ʼi te fakaʼaogaʼi ʼo te ʼu ʼaluʼaga moʼo kākāʼi, pea mo fakahalaʼi ʼo te hahaʼi. Koia ʼaki he faʼahiga fakapotopoto, ko te lotu hala ʼe ina taupau te tokolahi ʼo te malamanei ʼi te fakapōʼuli, ʼo ina kākāʼi nātou ke nātou manatu ʼe nātou tauhi ki te ʼAtua. ʼI tanatou mole maʼu te ʼatamai mālama totonu ʼo ʼuhiga mo te ʼAtua pea mo tanatou mole ʼoʼofa ki te moʼoni, ʼe lagi leleiʼia e te hahaʼi te ʼu toʼotoʼoga lotu faka misitelio peʼe fakaofoofo, peʼe nātou ʼofolele ʼi he ʼu gāue faka milakulo. (2 Tesalonika 2:9, 10) Kae ʼe fakatokagaʼi mai, ʼe feiā pe mo nātou ʼaē ʼi he tahi lakaga neʼe nātou kau ki te tauhi moʼoni, “ ʼe līaki anai e ʼihi . . . ʼe nātou fakalogo anai ki he ʼu folafola kākā mai te ʼu laumālie pea mo te ʼu akonaki ʼa te kau temonio.” (1 Timoteo 4:1) ʼE lava hoko feafeaʼi te faʼahi ʼaia?
8. ʼE fakaneke feafeaʼi tatou e Satana ke tou fia ʼolo ki te lotu hala, tatau aipe peʼe tou tauhi kia Sehova?
8 ʼAki he aga fakakākā, ʼe fakaʼaogaʼi e te Tevolo totatou ʼu vaivaiʼaga. ʼE kei tou matataku koa ki te tagata? Kapau koia, pea ʼe feala ke tou mulimuli ki te ʼu fakaneke ʼo totatou famili peʼe ko tatatou vāhaʼa fale ke tou kau mo nātou ki he ʼu faʼahi ʼo te lotu hala. ʼE tou fialahi koa? Kapau koia, pea ʼe feala ke tou ʼiʼita mokā tuku mai he ʼu tokoni, peʼe kapau ʼe mole tali tatatou ʼu manatu. (Tāʼaga Lea 15:10; 29:25; 1 Timoteo 6:3, 4) Mole tou fia fetogi tatou tatatou ʼu manatu ke tou mulimuli ki te faʼifaʼitaki ʼa Kilisito, kae ʼe lagi tou fia logo tatou kia nātou ʼaē ʼe nātou ‘alaala totatou ʼu taliga,’ ʼaē ʼe nātou ʼui ʼe feʼauga pe mo te lau ʼo te Tohi-Tapu pea mo te maʼuli fakahagatonu. (2 Timoteo 4:3) ʼE mole maʼuhiga kia Satana peʼe tou kau ʼi he tahi lotu peʼe tou nonofo ʼi tatatou lotu; kae kehe pe ke mole tou tauhi kia Sehova ohage ko tana fakamaʼua mai ʼi tana Folafola pea mo tana kautahi.
9. ʼE fakaʼaogaʼi feafeaʼi e Satana te ʼu felāveʼi fakasino moʼo fakahoko tana ʼu fakatuʼutuʼu?
9 Tahi ʼaē, ko Satana ʼe ina fakaoloolo ʼo ʼeke te hahaʼi ke nātou fakahoko tonatou ʼu holi māhani, ʼi hona faʼahiga ʼaluʼaga ʼe mole lelei, ohage la ʼi te faʼahi ʼo te ʼu felāveʼi fakasino. Koia, ʼe līaki e te tokolahi te aga ʼaē ʼe fakahā e te Tohi-Tapu, kae ʼe nātou faka ʼuhiga te ʼu felāveʼi fakasino ʼa he toko lua ʼe mole heʼeki ʼohoana, ko he fiafia ʼe mole tapu, peʼe ko he aga moʼo fakahā ai kua nātou lalahi. Kae e feafeaʼi kia nātou ʼaē kua ʼohoana? Tokolahi ʼe nātou tono. Pea tatau aipe peʼe mole hala he tahi ʼi te taumatuʼa, kae ko ʼihi ʼe nātou fia mavete ke feala hanatou nonofo mo he tahi age. ʼAki he aga fakakākā ʼe fakaneke e Satana te hahaʼi ke nātou kumi te fiafia fakavilivili, ke mole nātou tuʼania ki te ʼu fua kovi ʼaē ka hoko kia nātou pea mo ʼihi ki ʼamuli, kae tāfito ki tanatou ʼu felogoi mo Sehova pea mo tona ʼAlo.—1 Kolonito 6:9, 10; Kalate 6:7, 8.
10. Koteā te ʼu meʼa ʼaē ʼe fakaʼaogaʼi e Satana moʼo fakahalaʼi tatatou manatu ki te ʼu aga heʼeʼaoga pea mo te agamālohi?
10 Ko te tahi holi māhani ʼe ko te ʼu gaoʼi fakafiafia. Kapau ko he ʼu gaoʼi fakafiafia lelei, pea ʼe feala ke fua lelei ki te sino, mo te fakakaukau pea mo te loto. Kae e feafeaʼi mo kapau ko Satana, ʼaki he faiva kākā, ʼe ina fakaliliu te ʼu temi fakafiafia ʼaia moʼo faigaʼi ke mole tou manatu tahi mo te ʼAtua? Ohage la, ʼe tou ʼiloʼi ko Sehova ʼe fehiʼa ki te ʼu felāveʼi fakasino heʼeʼaoga pea mo te agamālohi. Ka tou sio ki he ʼu ʼata peʼe ko he ʼu polokalama televisio, peʼe ko he ʼu gaoʼi ʼe fakahā ai te ʼu meʼa ʼaia, ʼe tou sioʼi koa pea mo tali te ʼu meʼa ʼaia? Pea tou manatuʼi foki, ʼe faigaʼi anai e Satana ke toe ʼāsili kovi age te ʼu meʼa ʼaia ʼi te fakaōvi mai ʼo te temi ʼaē ka fakaʼauha ai, koteʼuhi “ko te ʼu hahaʼi agakovi pea mo te ʼu hahaʼi kākā ʼe tuputupu anai ki te kovi ʼaupito, ʼo nātou fakahēʼi te hahaʼi pea mo nātou hēʼia.” (2 Timoteo 3:13; Apokalipesi 20:1-3) Koia ʼe tonu ke tou nofo tokaga tuʼumaʼu ki te ʼu fakatuʼutuʼu ʼa Satana.—Senesi 6:13; Pesalemo 11:5; Loma 1:24-32.
11. ʼE lava feafeaʼi ki he tahi ʼe ina ʼiloʼi te moʼoni ʼo ʼuhiga mo te faifakalauʼakau, ke tō ki te hele ʼaia mo kapau ʼe mole nofo tokaga?
11 Tahi ʼaē meʼa, ʼe tou ʼiloʼi ʼe fehiʼa ia Sehova kia nātou ʼaē ʼe faifakalauʼakau—ohage ko te fai fakakikite, mo te gaohi meʼa fakatemonio, pea mo te palalau mo te kau mate. (Teutalonome 18:10-12) Kapau ʼe tou manatuʼi te faʼahi ʼaia, pea ʼe mole tou ʼolo anai ki te hahaʼi ʼaē ʼe palalau mo te ʼu laumālie, pea ʼe mole tou tali anai nātou ʼi totatou loto fale ke nātou fai tanatou ʼu meʼa fakatemonio. Kae ʼe tou fakalogo anai koa kia nātou mo kapau ʼe nātou ʼasi mai ʼi tatatou televisio peʼe ʼi te Internet? Logola ʼe mole tou tali anai he ʼu faitoʼo fakatemonio, kae ʼe tou tali anai koa ke liligi te vai tapu ki totatou ʼapi moʼona puipui? ʼI tatatou ʼiloʼi ʼaē ʼe tapuʼi e te Tohi-Tapu te ʼu faitoʼo fakatemonio, ʼe tou ʼolo anai koa ʼo kumi faitoʼo ki he tagata peʼe ko he fafine fai faitoʼo?—Kalate 5:19-21.
12. (a) ʼE fakaʼaogaʼi feafeaʼi te musika moʼo fakatupu ia tatou he ʼu manatu ʼe tou ʼiloʼi ʼe kovi? (b) ʼE lava hā feafeaʼi ʼi tatatou faʼahiga teu, mo te gaohi ʼo totatou ʼulu, peʼe ko tatatou ʼu palalau, ʼe tou leleiʼia te hahaʼi ʼaē ʼe mole tali e Sehova tanatou maʼuli? (c) Koteā ʼaē ʼe tonu ke tou fai mo kapau ʼe mole tou fia tō ʼi te ʼu fai fakahala ʼa Satana?
12 ʼE tala mai e te Tohi-Tapu, ko te folonikasio pea mo te heʼemaʼa ʼi tona ʼu ʼaluʼaga kehekehe, ʼe mole tonu ke ia tatou, māʼia mo tona palalauʼi (ʼaki he ʼu manatu kovi). (Efeso 5:3-5) Kae e feafeaʼi mo kapau ʼe maʼu te ʼu manatu ʼaia ʼi he ʼu hiva pea mo he ʼu musika ʼe logo mālie, pea mo kita fia meʼe ai? ʼE faifai koa pea tou hivaʼi he ʼu hiva ʼe talanoa tāfito ai ki te ʼu felāveʼi fakasino ʼi tuʼa ʼo te ʼohoana, mo te fakaʼaogaʼi ʼo te toloke moʼo fakafiafia, pea mo te tahi age ʼu aga ʼe tautea? Peʼe logola ʼe tou ʼiloʼi ʼe mole tonu ke tou faʼifaʼitakiʼi te maʼuli ʼo te hahaʼi ʼaē ʼe nātou fai te ʼu meʼa ʼaia, kae ʼe ko he agamāhani koa hatatou faʼifaʼitaki tanatou faʼahiga teu, mo te faʼahiga gaohi ʼo tonatou ʼulu, peʼe ko tanatou faʼahiga palalau? ʼE kākā ʼaupito te ʼu gāue ʼa Satana moʼo fakahalaʼi te hahaʼi ke nātou mulimuli ki tana ʼu manatu kovi. (2 Kolonito 4:3, 4) Kapau ʼe mole tou fia tō ʼi tana ʼu fai fakahala, pea ʼe mole tonu ke tou mulimuli ki te mālama. ʼAua naʼa galo kia tatou peʼe ko ai “te ʼu pule faka malamanei ʼo te fakapōʼuli ʼaenī,” pea mo tou fakafeagai mālohi ki tanatou ʼu fai fakahala.—1 Petelo 5:8.
Tou Teuteu Lelei Ke Tou Mālo
13. ʼE lava feafeaʼi kia tatou fuli, logola totatou heʼe haohaoa, ke tou mālo ʼi te mālama ʼaē ʼe puleʼi e Satana?
13 ʼI muʼa ʼo tana mate, neʼe ʼui fēnei e Sesu ki tana kau tisipulo: “Koutou kātaki, kua ʼau mālo ʼi te malamanei.” (Soane 16:33) Neʼe feala mo nātou ke nātou mālo. Hili taʼu e 60, neʼe tohi fēnei e te ʼapositolo ko Soane: “Ko ai koa ʼaē ʼe mālo ʼi te malamanei, ʼe mole ko ia koa ʼaē ʼe tui ko Sesu ko te ʼAlo ʼo te ʼAtua?” (1 Soane 5:5) ʼE tou fakahā tatatou tui mokā tou fakalogo ki te ʼu fakatotonu ʼa Sesu pea mo falala ki te Folafola ʼa te ʼAtua, ohage ko Sesu. Koteā ʼaē ʼe toe fakamaʼua mai? Ke tou tapiki maʼu ki te kokelekasio ʼaē ʼe Pule ai Sesu. Ka tou fai hatatou agahala, ʼe tonu ke tou fakahemala moʼoni pea mo tou kole ke fakamolemole mai te ʼAtua ʼaki te sakilifisio ʼo Sesu. ʼE feala ai mo tatou ke tou toe mālo, logola totatou heʼe haohaoa pea mo tatatou ʼu hala.—Pesalemo 130:3, 4.
14. Koutou lau ia Efeso 6:13-17, pea koutou fakaʼaogaʼi te ʼu fehuʼi pea mo te ʼu vaega ʼaē ʼe tuʼu ʼi te palakalafe moʼo talanoa ki te ʼu lelei ʼaē ʼe foaki atu e te ʼu koga kehekehe ʼo te teu tau fakalaumālie.
14 Ke feala hatatou mālo, ʼe tonu ke tou fakaʼaogaʼi “te teu tau katoa ʼo te ʼAtua,” ʼo mole tuku he koga e tahi ʼo te teu tau ʼaia. Koutou avahi takotou Tohi-Tapu ia Efeso 6:13-17, ʼo koutou lau te fakamatalatala ʼo te teu tau ʼaia. Pea ʼi takotou tali ki te ʼu fehuʼi ʼaē ʼe tuʼu ʼi lalo, koutou vakaʼi te lelei ʼo te puipui ʼaē ʼe foaki atu e te ʼu koga kehekehe ʼo te teu tau.
“Koutou nonoʼo ʼokotou koga loto ʼaki te moʼoni”
Tatau aipe peʼe tou ʼiloʼi te moʼoni, kae ʼe puipui feafeaʼi tatou mokā tou ako tuʼumaʼu, mo metitasioʼi te ʼu moʼoni ʼo te Tohi-Tapu, pea mo tou kau ki te ʼu fono? (1 Kolonito 10:12, 13; 2 Kolonito 13:5; Filipe 4:8, 9)
“Te kofu ukamea ʼo te faitotonu”
Ko ai ʼaē ʼe ina fakatuʼu te ʼu lekula ʼo te faitotonu? (Apokalipesi 15:3)
ʼAki he faʼifaʼitaki, koutou fakahā peʼe lava tuʼutāmaki feafeaʼi he tahi ʼi te faʼahi fakalaumālie, mo kapau ʼe mole mulimuli ki te ʼu lekula faitotonu ʼa Sehova? (Teutalonome 7:3, 4; 1 Samuele 15:22, 23)
“Te ʼu vaʼe ʼaē neʼe tui ki te teu ʼo te logo lelei ʼo te tokalelei”
ʼE hāofaki feafeaʼi tatou mo kapau ʼe tou ʼolo tuʼumaʼu ʼo palalau ki te hahaʼi ʼo ʼuhiga mo te fakatuʼutuʼu ʼa te ʼAtua ke ina foaki mai te tokalelei? (Pesalemo 73:2, 3; Loma 10:15; 1 Timoteo 5:13)
“Te tali tao lahi ʼo te tui”
Kapau ʼe mālohi te fakatafito ʼo tatatou tui, pea koteā anai ka tou fai mokā faiga ʼihi ke nātou faka lotolotolua tatou peʼe nātou fakamatakuʼi tatou? (2 Hau 6:15-17; 2 Timoteo 1:12)
“Te puloga tau ʼo te hāofaki”
Ko te ʼamanaki ʼo te hāofaki ʼe tokoni feafeaʼi mai ke mole tou tō ki te hele ʼaē ko te faiga fakavale ki te maʼu koloā? (1 Timoteo 6:7-10, 19)
“Te heletā ʼo te laumālie”
Koteā ʼaē ʼe tonu ke tou falala tuʼumaʼu ki ai mokā tou teteke te ʼu fakafeagai ʼaē ʼe fakahoko ki totatou maʼuli fakalaumālie peʼe ko te maʼuli fakalaumālie ʼa ʼihi? (Pesalemo 119:98; Tāʼaga Lea 3:5, 6; Mateo 4:3, 4)
Koteā ʼaē ʼe toe ʼaoga ke tou mālo ai ʼi tatatou tau fakalaumālie? ʼE tonu ke fakaʼaogaʼi feafeaʼi te faʼahi ʼaia, pea maʼa ai? (Efeso 6:18, 19)
15. ʼE tou lava laga tau feafeaʼi ʼi te tau fakalaumālie?
15 ʼI totatou ʼuhiga kau solia ʼa Kilisito, ʼe tou kau ʼi te foʼi solia kaugamālie ʼe ina fakahoko te tau fakalaumālie. Kapau ʼe tou nonofo tokaga pea mo fakaʼaogaʼi lelei te ʼu koga fuli ʼo te teu tau ʼaē neʼe foaki mai e te ʼAtua, pea ʼe mole tou mamate anai ʼi te tau ʼaia. Kae ʼe tou liliu anai ko he ʼu fakaloto mālohi maʼa te tahi ʼu kaugana ʼa te ʼAtua. ʼE tou nofo teuteu anai pea mo tou fakavilivili anai moʼo fakahoko te tau, ʼo tou faka mafola anai te logo lelei ʼa te Puleʼaga Faka Mesianike, te puleʼaga ʼaē ʼi selo ʼaē ʼe fakafeagai mālohi kiai Satana.
Fakamanatu
• He koʼe ʼe mole kau te kau atolasio ʼa Sehova ki te ʼu tau ʼo te malamanei?
• Koteā he ʼu kākā ʼe fakaʼaogaʼi e Satana moʼo maumauʼi te maʼuli fakalaumālie ʼa te kau Kilisitiano?
• ʼI tatatou tau fakalaumālie, ʼe hāofaki feafeaʼi tatou e te teu tau fakalaumālie ʼaē neʼe foaki mai e te ʼAtua?
[Paki ʼo te pasina 76]
Ko te ʼu puleʼaga ʼe nātou fakatahitahi moʼo teuteu ki Halamaketone