Kāpite 15

“Ko Ai ʼAē ʼe Tāu Mo Feʼauga Ke Ina ʼAvahi Ia Te Takaiga Tohi?”

1. Koteā te ʼu meʼa ʼaē neʼe sio leva kiai ia Soane?

ʼE FAKAMAMALU PEA MO FAKAOFOOFO! Ko te ʼaluʼaga ʼaia ʼo te meʼa fakaofoofo ʼaē neʼe hā ai te hekaʼaga fakahau ʼo Sehova ʼi te lotolotoiga ʼo te ʼu mālama afi, mo te ʼu kelupimi, mo te toko 24 tagata ʼāfea, pea mo te tai sioʼata. Kae koteā ʼaē neʼe toe sio kiai ia Soane? Neʼe sioʼi e Soane ia te lotomālie ʼo te meʼa ʼaia neʼe hā ʼi selō, ʼo ina fakamatala fēnei mai: “Pea neʼe au sio ki te nima mataʼu ʼo ia ʼaē ʼe heka ʼi te hekaʼaga fakahau, te takaiga tohi ʼe tohi ʼi loto pea mo tuʼa, kua fakamaʼu ʼaki te ʼu meʼa fakamaʼu e fitu. Pea neʼe au sio ki te ʼāselo mālohi ʼe kalaga leʼolahi fēnei: ‘Ko ai ʼaē ʼe tāu mo feʼauga ke ina ʼavahi ia te takaiga tohi pea mo vevete tona ʼu meʼa fakamaʼu?’ Kae neʼe mole he tahi, peʼe ʼi te lagi, peʼe ʼi te kele, peʼe ʼi te lalo kele, neʼe feala ke ina ʼavahi te takaiga tohi pea mo vakaʼi ia loto. Pea neʼe lahi taku tagi, he neʼe mole he tahi neʼe tāu mo feʼauga ke ina ʼavahi ia te takaiga tohi pea mo vakaʼi ia loto.”—Fakahā 5:1-4.

2, 3. (a) He koʼē ʼe loto e Soane ke foimo maʼu he tahi moʼo ʼavahi ia te takaiga tohi, kae ʼe faigafua koa te maʼu ʼo he tahi moʼo fai ia te faʼahi ʼaia? (b) ʼI totatou temi, koteā ʼaē neʼe fakaʼamu e te kau fakanofo ʼa te ʼAtua ke foimo hoko?

² Ko Sehova totonu, te Tuʼi ʼAliki ʼo te ʼu fakatupu fuapē, ʼaē neʼe ina puke ia te takaiga tohi. ʼE mahino ia ʼe lahi te ʼu logo maʼuhiga ʼe tohi ai, he neʼe tohi ʼi muʼa pea mo muli. ʼE tupu ai tatatou fia mahino peʼe koteā ʼapē ʼaē ʼe tohi ʼi te takaiga tohi ʼaia! ʼE tou manatuʼi neʼe fai e Sehova ia te fakaafe ʼaenī kiā Soane: “Hake mai ki ʼoluga, pea ʼe au fakahā atu anai ia te ʼu meʼa ʼaē ʼe tonu ke hoko.” (Fakahā 4:1) ʼE tou fakatalitali anai ke tou foimo mahino ki te ʼu meʼa ʼaē ʼe tohi ʼi loto. Kae ko tona koviʼaga, he neʼe fakamaʼu lelei ia te takaiga tohi ʼaki te ʼu meʼa fakamaʼu e fitu!

³ ʼE maʼu anai koa e te ʼāselo mālohi ia he tahi ʼe feala ke ina ʼavahi ia te takaiga tohi? Ohagē ko tona ʼui ʼi te Tohi-Tapu (Kingdom Interlinear), ʼe hili te takaiga tohi “ ʼi te nima mataʼu” ʼo Sehova. ʼE hā ʼaki mai, ʼe hili ʼi tona ʼalofi nima. Kae ʼe mole he tahi ʼi te lagi pea mo te kele, ʼe tāu mo feʼauga ke foaki age ki ai pea mo ina ʼavahi ia te takaiga tohi ʼaia. Māʼia pē lā mo nātou ʼaē ʼi te lalo kele, ʼi te ʼu kaugana agatonu ʼa te ʼAtua ʼaē kua mamate, ʼe mole he tahi ʼe tāu mo feʼauga mo te pilivilēsio ʼaia. Ko te tupuʼaga lā ʼaia ʼo te lotomamahi ʼa Soane! ʼE mole lagi feala anai ke ina ʼiloʼi ia “te ʼu meʼa ʼaē ʼe tonu ke hoko.” Neʼe toe hoko te faʼahi ʼaia ʼi totatou temi, neʼe fakatalitali ia te kau fakanofo ʼa te ʼAtua, ʼaki he fakaʼamu ke foimo foaki age lā e Sehova ia tona mālama pea mo tana moʼoni ʼo ʼuhiga mo te Fakahā. Kae ko te faʼahi ʼaia, ʼe ina fakahoko anai ʼo mulimuli pē ki te temi, ki te temi ʼaē kua fakakatofa ke hoko ai te lea faka polofetā, ke feala hana taki tana hahaʼi ʼi te ʼala ʼo te “haofaki lahi.”​—Pesalemo 43:3, 5.

Ko Ia ʼAē ʼe Tāu Mo Feʼauga

4. (a) Ko ai ʼaē ʼe tāu mo feʼauga ke ina ʼavahi ia te takaiga tohi pea mo tona ʼu meʼa fakamaʼu ʼaē e fitu? (b) Koteā ia te fakapale pea mo te pilivilēsio ʼaē ʼe maʼu e te kalasi ʼo Soane pea mo tonatou ʼu tehina mo tuagaʼane?

⁴ ʼEī, ʼe ʼi ai te tokotahi ʼe feala ke ina ʼavahi ia te takaiga tohi! Neʼe ʼui fēnei e Soane: “Kae ʼe ʼui mai kiā te au e te tahi ʼi te kau tagata ʼāfea: ‘Tuku tau tagi. Koʼenī te Laione ʼo te telepī ʼo Suta, te aka ʼo Tavite, kua mālo ke feala hana ʼavahi ia te takaiga tohi pea mo tona ʼu meʼa fakamaʼu ʼaē e fitu.’ ” (Fakahā 5:5) ʼEī, neʼe tonu kiā Soane ke tuku lā tana tagi! Neʼe fēia mo te kalasi ʼo Soane pea mo tona ʼu kaumeʼa agatonu, neʼe natou kātakiʼi lolotoga te ʼu taʼu ʼe lauʼi hogofulu te ʼu ʼahiʼahi faigataʼa, ʼo natou fakatalitali aipē ke fakamālamaʼi nātou ʼo ʼuhiga mo te Fakahā. ʼI fakapale fakaloto fīmālie leva kiā tātou ʼi te temi nei hatatou mahino ki te meʼa ʼaē neʼe hā, pea ʼi toe pilivilēsio foki hatatou lava kau ki tona fakahoko ʼo kalagaʼi te logo ʼaē ʼe tohi ai!

5. (a) Koteā te lea faka polofetā ʼaē neʼe fai ʼo ʼuhiga mo Suta, pea kofea ʼaē neʼe hau ai te hōloga ʼo Suta? (b) Ko ai ia Silo?

⁵ ʼE ʼiloʼi lelei e Soane ia “te Laione ʼo te telepī ʼo Suta,” heʼe ko Sakopo, te kuī ʼo te kau Sutea, neʼe ina fai ia te lea faka polofetā ʼo ʼuhiga mo Suta, ia tona foha ʼaē neʼe tuʼulaga fā: “Ko Suta ʼe ko he laione mui. ʼE ke hake mai anai mo hau meʼa kai, e toku foha. Neʼe ina peluki ʼona vaʼe, ʼo fakafalō ohagē he laione, pea ohagē he laione, ko ai ʼaē kā ina fia lagaʼi ake? Ko te tokotoko fakahau ʼe mole maliu kehe anai mai ia Suta, pea ko te tokotoko faka kamutoa ʼe mole maliu kehe anai mai te vaha ʼo tona ʼu vaʼe, ʼo kaku ki te haʼu ʼa Silo; pea ʼe ina maʼu anai te fakalogo ʼa te hahaʼi.” (Senesi 49:9, 10) Ko te hōloga hau ʼo te hahaʼi ʼa te ʼAtua neʼe haʼu mai ia Suta. ʼO kamata mai ia Tavite, ko te ʼu hau fuli ʼaē neʼe hau ʼi Selusalemi ʼo aʼu ki te fakaʼauha ʼo te kolo ʼaia e te kau Papiloni, neʼe natou kau fuli ki te hōloga hau ʼo Suta. Kae neʼe mole he tahi iā nātou neʼe ko te Silo ʼaē neʼe fakakikite e Sakopo. Ko te kupu Silo ko tona faka ʼuhiga “Ko ia ʼaē ʼe tonu ke ina maʼu [ko ia ʼaē ʼe ina maʼu ia te fealagia ʼaia].” Ko te higoa ʼaia neʼe ko he fakakikite ʼo ʼuhiga mo Sesu, ʼaē kua ina maʼu ia te Puleʼaga ʼo Tavite, ʼi te temi nei pea ʼo talu ai.​—Esekiele 21:25-27; Luka 1:32, 33; Fakahā 19:16.

6. He koʼē ʼe feala ke tou ʼui ko Sesu ʼe ko “te muko” ʼo Sese pea mo “te aka ʼo Tavite”?

⁶ Neʼe mahino vave kiā Soane peʼe ko ai “te aka ʼo Tavite.” ʼI te tahi lea faka polofetā, neʼe fakahigoaʼi ia te Mēsia ʼaē neʼe fakapapauʼi mai, ko ‘te muko peʼe ko te huli . . . ʼo te tafitoʼi ʼakau ʼo Sese [te tamai ʼa te Hau ko Tavite]’ pea ko “te aka ʼo Sese ʼe tuʼu anai ohagē ko he fakaʼiloga ki te hahaʼi.” (Isaia 11:1, 10) Ko Sesu neʼe ko he muko ʼo Sese, he neʼe tupu mai te hōloga hau ʼo Tavite, foha ʼo Sese. Tahi ʼaē meʼa, ʼi tona ʼuhiga aka ʼo Sese, neʼe ko Ia ʼaē neʼe ina toe hoko atu ia te hōloga hau ʼo Tavite, ʼo ina fakamaʼuli pea mo lagolago ki ai ʼo talu ai.​—2 Samuele 7:16.

7. He koʼē neʼe tāu mo feʼauga mo Sesu ke ina toʼo ia te takaiga tohi ʼi te nima ʼo Ia ʼaē ʼe heka ʼi te hekaʼaga fakahau?

⁷ ʼO mole hona fakatatau, ko Sesu ʼi tona ʼuhiga tagata haohaoa, neʼe tauhi agatonu kiā Sehova, logopē lā ia te ʼu fakataga fakamataku ʼaē neʼe hoko ki ai. Neʼe ina fai he tali ʼe kātoa ki te fakafifihi ʼa Satana. (Tāʼaga Lea 27:11) Koia neʼe feala ai ke ina ʼui ʼi te pō fakaʼosi ʼi muʼa ʼo tona mate faka sākilifisio, “kua au mālo ʼi te mālamanei.” (Soane 16:33) Koia ʼi tona ʼosi fakatuʼuake, neʼe foaki age e Sehova ia “te pule kātoa . . . ʼi te lagi pea mo te kele.” Ko ia tokotahi ʼi te ʼu kaugana ʼa te ʼAtua, ʼe tāu mo feʼauga ke foaki age ki ai te takaiga tohi, ke feala hana fakaʼiloʼilo ia te logo maʼuhiga ʼaē ʼe tohi ai.​—Mateo 28:18.

8. (a) ʼO ʼuhiga mo te Puleʼaga, koteā ia te ʼu faʼahi ʼaē ʼe hā ʼaki ai ʼe tāu mo feʼauga ke ʼavahi e Sesu ia te takaiga tohi? (b) He koʼē ʼe tāu mo feʼauga ki he tahi ʼi te toko 24 tagata ʼāfea ke ina fakahā kiā Soane ia ia ʼaē ʼe tāu mo feʼauga ke ina ʼavahi ia te takaiga tohi?

⁸ ʼE moʼoni ia, ʼe tāu mo feʼauga mo Sesu ke ina ʼavahi ia te takaiga tohi. Talu mai te taʼu 1914, neʼe fakanofo Hau ia ia ʼi te Puleʼaga faka Mēsia ʼa te ʼAtua, pea ʼe lahi te ʼu meʼa ʼaē ʼe tuʼu ʼi te takaiga tohi ʼaia ʼo ʼuhiga mo te Puleʼaga pea mo te ʼu gāue ʼaē kā ina fakahoko. ʼI tana kei maʼuli ʼi te kele, neʼe agatonu ia Sesu ʼi tana faka mafola ia te moʼoni ʼo ʼuhiga mo te Puleʼaga. (Soane 18:36, 37) Neʼe ina akoʼi ki tana ʼu tisipulo ke natou faikole ke hoko mai te Puleʼaga. (Mateo 6:9, 10) ʼI te kamataʼaga ʼo te temi faka Kilisitiano, neʼe ina faka mafola ia te logo lelei pea mo ina fakakikite ʼe tuputupu ʼaupitō anai ia te fai faka mafola ʼi te ʼu temi fakaʼosi. (Mateo 4:23; Maleko 13:10) Koia ʼe toe matatonu ai foki ki he tahi ʼi te toko 24 tagata ʼāfea ke ina fakahā ʼe ko Sesu ʼaē kā ina ʼavahi ia te ʼu meʼa fakamaʼu. Koteā tona tupuʼaga? ʼE tupu heʼe ko te kau tagata ʼāfea ʼaia ʼaē ʼe heheka ʼi te ʼu hekaʼaga fakahau pea mo hili te ʼu kolona ʼi ʼonatou ʼulu, ʼe natou kaugā hau mo Kilisito ʼi tona Puleʼaga.​—Loma 8:17; Fakahā 4:4.

‘Te ʼAkeno ʼAē Neʼe Matehi’

9. Ko te manu fea ʼaē neʼe sio kiai ia Soane ʼe tuʼu “ ʼi te lotomālie ʼo te hekaʼaga fakahau,” pea koteā tana fakamatalatala ʼo ʼuhiga mo te manu ʼaia?

⁹ Neʼe faiga ia Soane ke sio ki te “Laione ʼo te telepī ʼo Suta.” Kae neʼe hoko te meʼa fakapunamaʼuli, he neʼe kehe ʼaupitō te meʼa fakatā ʼaē neʼe sio kiai: “Pea neʼe au sio ʼe tuʼu ʼi te lotomālie ʼo te hekaʼaga fakahau pea mo te ʼu fakatupu maʼuli e fā, pea ʼi te lotomālie ʼo te ʼu tagata ʼāfea, te ʼakeno ʼe hagē neʼe matehi, ʼe ʼi ai tona ʼu tala e fitu pea mo tona ʼu mata e fitu, pea ko te ʼu mata ʼaia ʼe natou fakatātā ia te ʼu laumālie e fitu ʼo te ʼAtua ʼaē neʼe fekauʼi mai ki te kele kātoa.”—Fakahā 5:6.

10. Ko ai ia te “ ʼakeno” ʼaē neʼe sio kiai ia Soane, pea he koʼē neʼe tāu mo feʼauga ia te meʼa fakatā ʼaia?

¹⁰ ʼI te lotomālie, iā tafa ʼo te hekaʼaga fakahau, ʼi te lotomālie ʼo te ʼu fakatupu e fā pea mo te toko 24 tagata ʼāfea, neʼe ʼi ai te ʼakeno! ʼE mahino papau ia, neʼe ʼiloʼi atu aipē e Soane ko te ʼakeno ʼaia ʼe ko “te Laione ʼo te telepī ʼo Suta” pea mo “te aka ʼo Tavite.” Neʼe ina manatuʼi, kua hili kiai taʼu e 60 tupu, neʼe ʼui e Soane Patita ki te kau Sutea ʼaē neʼe mamata ki ai, ko Sesu ʼe ko “te ʼAkeno ʼo te ʼAtua ʼaē ʼe ina toʼo te agahala ʼo te mālamanei!” (Soane 1:29) Lolotoga tona maʼuli kātoa ʼi te kele, neʼe nofo maʼa ia Sesu ʼi te mālamanei​—ohagē ko he ʼakeno haohaoa​—ke feala hana momoli tona maʼuli haohaoa ko he sākilifisio maʼa te mālamanei.​—1 Kolonito 5:7; Hepeleo 7:26.

11. He koʼē ʼe mole ko he meʼa fakalainoa te fakatātā ʼo Sesu ʼi tona kolōlia ki “he ʼakeno ʼe hagē neʼe matehi”?

¹¹ ʼE ko he meʼa fakalainoa koa peʼe ko he meʼa fakaufiufi koa ʼo ʼuhiga mo Sesu ʼi tona kolōlia, ke fakatātā ia ia ki he “ ʼakeno ʼe hagē neʼe matehi”? Kailoa ia! ʼI te nofo agatonu ʼa Sesu ʼo aʼu ki tona mate, neʼe ko hana mālo lahi iā Satana pea mo he mālo lahi ʼa Sehova ʼAtua. Ko te meʼa fakatā ʼaenī ʼo ʼuhiga mo Sesu, ʼe ina fakahā lelei mai kua mālo ia ʼi te mālama ʼa Satana, pea mo ina fakamanatuʼi mai ia te ʼofa ʼaupitō ʼa Sehova pea mo Sesu ki te mālamanei. (Soane 3:16; 15:13; vakaʼi ia Kolose 2:15.) Koia, ʼe ina fakahā mai ko Sesu ʼe ko te Hako ʼo te fakapapau ʼaē ʼe tāu mo feʼauga ke ina ʼavahi ia te takaiga tohi.​—Senesi 3:15.

12. Koteā ʼaē ʼe fakatātā e te ʼu tala ʼaē e fitu ʼo te ʼAkeno?

¹² Koteā te tahi age ʼu agaaga ʼo te “ ʼakeno” ʼaia ʼaē ʼe tonu ke ina uga ai tātou ke tou fakaʼapaʼapa ki ai? ʼE ʼi ai tona ʼu tala e fitu. ʼI te Tohi-Tapu, ʼe tautau fakatā te ʼu tala ki te mālohi peʼe ki te tuʼulaga pule, pea ko te nūmelo fitu ʼe faka ʼuhiga ki he meʼa kua kātoa. (Vakaʼi ia 1 Samuele 2:1, 10; Pesalemo 112:9; 148:14.) Koia ʼe feala ai ke tou ʼui ko te ʼu tala e fitu ʼo te ʼakeno ʼe natou fakatātā ia te kātoa ʼo te pule ʼaē neʼe tuku age e Sehova kiā Sesu. ʼE “māʼoluga ake ia ʼi te puleʼaga fuli, mo te ʼu pule fuli, mo te ʼu mālohi fuli pea mo te ʼu higoa fuli ʼaē ʼe fakaʼaogaʼi, ʼo mole gata ʼaki pē ki te tuʼu ʼo te ʼu faʼahiga meʼa ʼaenī, kae ʼe toe fēia mo te tuʼu ʼaē kā haʼu.” (Efesi 1:20-23; 1 Petelo 3:22) Kua gāue tāfito ia Sesu ʼi tona tuʼulaga faka puleʼaga talu mai te taʼu 1914, taʼu ʼaia neʼe fakanofo ai e Sehova ke Hau ʼi selō.​—Pesalemo 2:6.

13. (a) Koteā ʼaē ʼe fakatātā e te ʼu mata e fitu ʼo te ʼAkeno? (b) Koteā ʼaē neʼe fai ki muli age e te ʼAkeno?

¹³ Tahi ʼaē meʼa, ʼe fonu ia Sesu ʼi te laumālie māʼoniʼoni, ohagē ko tona fakatātā e te ʼu mata e fitu ʼo te ʼAkeno, ʼaē “ ʼe natou fakatātā ia te ʼu laumālie e fitu ʼo te ʼAtua.” ʼE fakaʼaogaʼi e Sehova ia Sesu moʼo foaki ia tona mālohi gāue kātoa ki Tana ʼu kaugana ʼaē ʼi te kele. (Tito 3:6) ʼE mahino mai, ʼaki ia te laumālie ʼaia ʼe feala ai kiā Sesu ke sio peʼe koteā ʼaē ʼe hoko ʼi te kele. Ohagē ko tana Tamai, ʼe ina maʼu he fakasiosio tonu ʼe kātoa, heʼe mole he meʼa ʼe pulipuli kiā te ia. (Vakaʼi ia Pesalemo 11:4; Sakalia 4:10.) ʼE hā ʼaki mai, ko te ʼAlo ʼaia​—te tagata agatonu ʼaia neʼe mālo ʼi te mālamanei, te Laione ʼo te telepī ʼo Suta, te aka ʼo Tavite, ia ia ʼaē neʼe ina momoli tona maʼuli maʼa te mālamanei, ia ia ʼaē ʼe ina maʼu te tuʼulaga pule faitotonu, mo ina maʼu kātoa ia te laumālie māʼoniʼoni, pea mo te fakasiosio tonu kātoa mai ia Sehova ʼAtua​—ʼio, ko te foha ʼaia ʼe tāu mo feʼauga ke ina toʼo ia te takaiga tohi mai te nima ʼo Sehova. ʼE ina tali fakaʼapē koa ia te gāue ʼaia ʼe tuku age ke ina fai ʼi te kautahi faka kolōlia ʼa Sehova? Kailoa ia, heʼe “ ʼi te temi pē ʼaia, neʼe ʼalu ai ʼo toʼo [ia te takaiga tohi] mai te nima mataʼu ʼo ia ʼaē ʼe heka ʼi te hekaʼaga fakahau.” (Fakahā 5:7) ʼI faʼifaʼitaki lelei leva ʼo ʼuhiga mo te fakalogo!

Te ʼu Hiva Fakavikiviki

14. (a) Koteā ʼaē neʼe fai e te ʼu fakatupu ʼaē e fā pea mo te toko 24 tagata ʼāfea ʼi te temi ʼaē neʼe toʼo ai e Sesu ia te takaiga tohi? (b) Ko te ʼu faʼahi ʼaē neʼe fakahā age kiā Soane ʼo ʼuhiga mo te toko 24 tagata ʼāfea, ʼe natou fakamoʼoni kiteā ʼo ʼuhiga mo nātou ʼaia pea mo tonatou tuʼulaga?

¹⁴ Koteā ʼaē neʼe fai e nātou ʼaē ʼe nonofo iā muʼa ʼo te hekaʼaga fakahau ʼa Sehova? “Pea ʼi te temi ʼaē neʼe ina toʼo ai ia te takaiga tohi, neʼe tulolo ia te ʼu fakatupu maʼuli ʼaē e fā pea mo te toko ʼuafulu-mā-fā tagata ʼāfea iā muʼa ʼo te ʼAkeno, ʼo takitahi mo tana ʼalepa pea mo te ʼu ʼipu ʼaulo neʼe fonu ai te ʼisēsō, pea ko te ʼisēsō ʼe ina fakatātā ia te ʼu faikole ʼa te kau māʼoniʼoni.” (Fakahā 5:8) Ohagē ko te ʼu fakatupu ʼaē e fā, ia te ʼu kelupimi, ʼaē ʼe natou tutuʼu iā muʼa ʼo te hekaʼaga fakahau ʼo te ʼAtua, ʼe tuʼutuli te toko 24 tagata ʼāfea kiā Sesu ʼo natou fakamoʼoni ki tona ʼuhiga pule. Kae ʼe gata pē ki te kau tagata ʼāfea ʼaia te maʼu ʼo te ʼu ʼalepa pea mo te ʼu ʼipu ʼisēsō.a Pea ʼi te lakaga ʼaia, ʼe ko nātou ʼāteaina pē ʼaē neʼe natou hiva ia te hiva foʼou. (Fakahā 5:9) Koia, ʼe natou hagē ko te toko 144 000 kau māʼoniʼoni ʼo te “Iselaele ʼo te ʼAtua,” ʼaē ʼe natou takitahi tanatou ʼu ʼalepa pea ʼe natou hivaʼi te hiva foʼou. (Kalate 6:16; Kolose 1:12; Fakahā 7:3-8; 14:1-4) Tahi ʼaē meʼa, ʼe hā mai ko te toko 24 tagata ʼāfea ʼe natou fakahoko te ʼu gāue faka pelepitelō ʼi selō, ʼaē neʼe fakatātā e te ʼu pelepitelō ʼo te Iselaele ʼāfea, ʼaē neʼe natou tutu ia te ʼisēsō iā muʼa ʼo Sehova ʼi te tapenakulo, pea neʼe fakagata leva ia te gāue ʼaia ʼi te kele, ʼi te temi ʼaē neʼe tutuki ai e Sehova ia te Lao ʼa Moisese, ki te pou fakamamahi ʼo Sesu. (Kolose 2:14) Koteā ʼaē kua tou mahino kiai ʼaki ia te ʼu faʼahi fuli ʼaenī? Kua mahino mai, ʼe talanoa ia te vaega ʼaenī ki te kau fakanofo ʼaē kua mālo, ʼe natou fai tanatou ʼu gāue ʼaē neʼe tuku age, ke natou ‘gāue faka pelepitelō maʼa te ʼAtua pea mo Kilisito, ʼo natou pule mo ia lolotoga taʼu e afe.’​—Fakahā 20:6.

15. (a) ʼI Iselaele, ko ai pē ʼaē neʼe fakagafua ke hū ki te Potu Taputapu ʼAupitō ʼo te tapenakulo? (b) He koʼē neʼe fakalogo te maʼuli peʼe ko te mate ʼo te pelepitelō lahi ki tana tutu ia te ʼisēsō mokā hū ki te Potu Taputapu ʼAupitō?

¹⁵ ʼI te Iselaele ʼāfea, neʼe fakagafua pē ki te pelepitelō lahi ke hū ki te Potu Taputapu ʼAupitō, ki te ʼafioʼaga fakatātā ʼo Sehova. Neʼe maʼuhiga kiā ia hana hū mo te ʼisēsō, he neʼe fakalogo kiai tona maʼuli peʼe ko tona mate. Neʼe ʼui fēnei ʼi te lao ʼa Sehova: “ ʼE tonu anai [kiā Alone] ke ina toʼo te ʼipu afi, ʼe fonu ai te ʼu mamala kakaha ʼi te fuga ʼaletale iā muʼa ʼo Sehova, pea ke fonu ʼi tona ʼu ʼalofi nima te ʼisēsō mānifi pea mo magoni, pea ʼe tonu anai ke ina ʼave ki loto [ʼaē ʼe pupunu ʼaki] te lito. ʼE tonu anai ke ina ʼai te ʼisēsō ki te afi iā muʼa ʼo Sehova, pea ko te kohu ʼo te ʼisēsō ʼe tonu anai ke ina ʼaofi ia te tāpunu ʼo te ʼAleka, ʼaē ʼe hili ʼi te Fakamoʼoni, ke ʼaua naʼa mate.” (Levitike 16:12, 13) Neʼe feala ke mate ia te pelepitelō lahi, mo kapau neʼe hū ki te Potu Taputapu ʼAupitō kae mole ina tutu he ʼisēsō.

16. (a) ʼI te fakatuʼutuʼu faka Kilisitiano, ko ai ʼaē ʼe hū ki te Potu Taputapu ʼAupitō ʼo te temi ʼaenī? (b) He koʼē ʼe maʼua ki te kau Kilisitiano fakanofo ke natou ‘tutu ia te ʼisēsō’?

¹⁶ ʼI te fakatuʼutuʼu faka Kilisitiano, ʼe mole ko te Pelepitelō Lahi pē ʼo te temi ʼaenī ʼaē ko Sesu Kilisito ʼaē kā hū anai ki te Potu Taputapu ʼAupitō ʼo te temi ʼaenī, te faʼahi ʼaē ʼe ʼafio ai ia Sehova ʼi selō, kae ʼe toe kau foki kiai mo nātou takitokotahi ʼo te toko 144 000 ʼu kaugā pelepitelō. (Hepeleo 10:19-23) ʼE hoki feala ki te kau pelepitelō ʼaia, ʼaē ʼe fakatātā ʼi henī e te toko 24 tagata ʼāfea, ke natou hū ki te Potu Taputapu ʼAupitō, mo kapau ʼe natou ‘tutu ia te ʼisēsō,’ ʼaē ko tona faka ʼuhiga ke natou momoli tuʼumaʼu he ʼu faikole pea mo he ʼu kole mamahi kiā Sehova.​—Hepeleo 5:7; Suta 20, 21; vakaʼi ia Pesalemo 141:2.

Te Hiva Foʼou

17. (a) Koteā ia te hiva foʼou ʼaē ʼe hivaʼi e te toko 24 tagata ʼāfea? (b) ʼI te agamāhani, ko te kupusiga palalau ʼaē ko te “hiva foʼou,” ʼe faka ʼuhiga kiteā ʼi te Tohi-Tapu?

¹⁷ ʼI te lakaga leva ʼaē, neʼe toʼo ake te hiva mālie maʼa te ʼAkeno, e tana ʼu kaugā pelepitelō, ia te toko 24 tagata ʼāfea: “Pea ʼe natou hiva ia te hiva foʼou, ʼo ʼui maʼa nātou: ‘ ʼE tāu mo feʼauga ke ke toʼo ia te takaiga tohi pea mo ʼavahi tona ʼu meʼa fakamaʼu, he neʼe matehi koe pea ʼaki tou taʼataʼa neʼe ke totogi maʼa te ʼAtua ia te ʼu hahaʼi mai te ʼu telepī kehekehe, mo te ʼu lea kehekehe, mo te ʼu hahaʼi kehekehe pea mo te ʼu puleʼaga kehekehe.’ ” (Fakahā 5:9) ʼE lahi ia te ʼu vaega faka Tohi-Tapu ʼe hā ai ia te kupusiga palalau ʼaē ko te “hiva foʼou,” pea ʼi te agamāhani ʼe faka ʼuhiga ki te ʼu fakavikiviki ʼaē ʼe fai kiā Sehova ʼo ʼuhiga mo tana ʼu gāue mālohi ʼaē neʼe ina fai moʼo haofaki. (Pesalemo 96:1; 98:1; 144:9) Koia ʼe ʼui ai ʼe ko he hiva foʼou, heʼe ko ia ʼaē kā ina hivaʼi kua feala hana kalagaʼi he tahi age ʼu gāue fakaofoofo ʼa Sehova pea mo fakahā he fakaʼapaʼapa lahi ʼo ʼuhiga mo Tona huafa faka kolōlia.

18. He koʼē ʼe fakavikiviki ia te toko 24 tagata ʼāfea kiā Sesu ʼaki tanatou hiva foʼou?

¹⁸ Kae ʼi te ʼaluʼaga ʼaenī, ʼe mole hivaʼi e te toko 24 tagata ʼāfea ia te hiva foʼou iā muʼa ʼo Sehova, kae ʼe natou hivaʼi nātou iā muʼa ʼo Sesu. ʼE mole hona kehekehe, heʼe natou fakavikiviki kiā Sesu ʼo ʼuhiga mo te ʼu gāue foʼou ʼaē neʼe ina fai maʼa nātou, ʼi tona ʼuhiga ʼAlo ʼo te ʼAtua. ʼAki tona taʼataʼa, neʼe ina fai tona tuʼulaga ʼaē ko te faka felōgoi ʼo te fuakava foʼou, ʼo ina faka fealagia ai ia te fakatupu ʼo he puleʼaga foʼou, ʼaē ko te koloa makehe ʼo Sehova. (Loma 2:28, 29; 1 Kolonito 11:25; Hepeleo 7:18-25) Ko nātou ʼaē ʼe kau ki te puleʼaga fakalaumālie foʼou ʼaia, ʼe natou ʼomai mai te ʼu puleʼaga kehekehe, kae ʼe fakatahiʼi nātou e Sesu ke natou liliu ko te kōkelekāsio e tahi, ko he puleʼaga e tahi.​—Isaia 26:2; 1 Petelo 2:9, 10.

19. (a) ʼUhi ko tana heʼe agatonu, ko te tapuakina fea ʼaē neʼe mole maʼu e te Iselaele ʼo te kakano? (b) Ko te tapuakina fea ʼaē kā maʼu anai e te puleʼaga foʼou ʼo Sehova?

¹⁹ ʼI te temi ʼaē neʼe faʼufaʼu ai e Sehova ia te kau Iselaele ko he puleʼaga ʼi te ʼu ʼaho ʼo Moisese, neʼe ina fai tana fuakava mo nātou, pea mo ina fakapapau age kapau ʼe natou nonofo agatonu ki te fuakava ʼaia, pea ʼe natou liliu anai maʼa ia ko he puleʼaga faka pelepitelō. (Ekesote 19:5, 6) Kae neʼe mole nonofo agatonu ia te kau Iselaele pea neʼe mole natou sisio ki te hoko ʼo te fakapapau ʼaia. Kae neʼe nofo agatonu ia te puleʼaga foʼou ʼaē neʼe faʼufaʼu ʼuhi ko te fuakava foʼou ʼaē ko Sesu tona tagata faka felōgoi. Koia ʼaē ʼe feala ai kiā nātou ʼaē ʼe kau ki te fuakava ʼaia ke natou puleʼi ia te kele ʼi tonatou ʼuhiga hau pea mo gāue ʼi tonatou ʼuhiga pelepitelō moʼo tokoni ki te hahaʼi agatonu ke natou felōgoi lelei mo Sehova. (Kolose 1:20) ʼE hagē pē ko tona fakahā ʼi te hiva foʼou: “Pea neʼe ke fakaliliu ia nātou ko he puleʼaga pea mo he ʼu pelepitelō maʼa totatou ʼAtua, pea ʼe natou pule fakahau anai ki te kele.” (Fakahā 5:10) ʼI meʼa fakafiafia ki te toko 24 tagata ʼāfea ʼaia, tanatou hiva ia te hiva foʼou ʼaia moʼo fakavikiviki kiā Sesu ʼaē kua faka kolōliaʼi!

Te Kau Hiva ʼi Selō

20. Koteā ia te hiva fakavikiviki ʼaē neʼe fai ʼi te lakaga ʼaia maʼa te ʼAkeno?

²⁰ ʼI tanatou logo ʼaē ki te hiva foʼou, koteā ʼaē ʼe fai e te tokolahi ʼaupitō ʼo nātou ʼaē ʼe kau ki te kautahi ʼa Sehova ʼaē ʼi selō? Neʼe malave ʼaupitō ki te loto ʼo Soane tana sio ʼaē ki tanatou logo tahi: “Pea neʼe au sio, pea neʼe au logoʼi te leʼo ʼo te ʼu ʼāselo e tokolahi iā tafa ʼo te hekaʼaga fakahau pea mo te ʼu fakatupu maʼuli mo te ʼu tagata ʼāfea, pea ko tonatou kaugamālie neʼe ko te ʼu miliate ʼo te ʼu miliate, pea mo te ʼu lauʼi afe ʼo te ʼu lauʼi afe, ʼo natou ʼui leʼolahi fēnei: ‘ ʼE tāu mo te ʼAkeno ʼaē neʼe matehi ke ina maʼu ia te pule, mo te ʼu koloa, mo te poto, mo te mālohi, mo te fakaʼapaʼapa, mo te kolōlia pea mo te tapuakina.’ ” (Fakahā 5:11, 12) ʼE malave loto ia te hiva fakavikiviki ʼaia!

21. ʼE fakatupu kovi koa ki te pule faʼitaliha ʼa Sehova peʼe ko tona tuʼulaga, ia te ʼu fakavikiviki ʼaē ʼe fai ki te ʼAkeno? Kotou fakamahino.

²¹ Ko tona faka ʼuhiga koa, kua toʼo e Sesu ia te tuʼulaga ʼo Sehova ʼAtua pea ko te ʼu fakatupu fuapē ʼe natou fakavikiviki kiā te ia kae mole natou fakavikiviki ki tana Tamai? Kailoa ia! Ko te hiva fakavikiviki ʼaia ʼe ʼalutahi mo te ʼu palalau ʼaenī neʼe tohi e te ʼapositolo ko Paulo: “[Neʼe] hikihiki [ia Sesu] e te ʼAtua ki he tuʼulaga maʼuhiga, pea mo ina tali fakalelei ke ina foaki age ia te higoa ʼaē ʼe māʼoluga age ʼi te higoa fuli pē, ke feala ʼi te huafa ʼo Sesu, ke tuʼutuli ia te tuli fuli pē ʼo nātou ʼaē ʼi te lagi, pea mo nātou ʼaē ʼi te kele, pea mo nātou ʼaē ʼi te lalo kele, pea ke fakamoʼoni fakahāhā e te ʼalelo fuapē ko Sesu Kilisito ʼe ʼAliki ki te kolōlia ʼo te ʼAtua ia te Tamai.” (Filipe 2:9-11) ʼI te vaega ʼaenī, neʼe vikiʼi ia Sesu he neʼe lagolago iā muʼa ʼo te fakatupu fuapē, ki te fakatokatoka ʼo te fakafifihi tāfito ʼo ʼuhiga mo te fakatonuhia ʼo te pule faʼitaliha faitotonu ʼa Sehova. ʼE moʼoni, ʼaki tana aga ʼaia ʼe tupu ai te faka kolōliaʼi ʼo tana Tamai!

ʼE ʼĀsili Age Te Mālohi ʼo Te Hiva

22. Ko te hiva fea ʼaē ʼe kau fakatahi mai kiai ia te ʼu leʼo mai te kele?

²² ʼI te ʼaluʼaga ʼaē neʼe fakamatala mai e Soane, ko te ʼu fakatupu kaugamālie ʼaē ʼi selō, neʼe natou kalaga fakafiafia kiā Sesu, moʼo fakahā tanatou fakamoʼoni ʼaē ki tana nofo agatonu pea mo tana pule ʼaē neʼe foaki age ki ai ʼi selō. ʼE ʼāʼāsili age te mālohi ʼo te ʼu kalaga ʼaia, heʼe kau fakatahi mai kiā nātou ia te ʼu leʼo ʼe logo mai te kele, ʼe toe fakavikiviki foki mo nātou ki te Tamai pea mo te ʼAlo. Ohagē pē ko te ʼu gāue lelei ʼaē ʼe fai e he tama ʼe feala ke tupu ai he fakaʼapaʼapaʼi ʼo tana ʼu mātuʼa, ʼe toe fēia pē mo te agatonu ʼa Sesu ʼi te lotolotoiga ʼo te ʼu fakatupu fuapē, ʼe tupu ai ‘te faka kolōliaʼi ʼo te ʼAtua ia te Tamai.’ Koia ʼaē neʼe hoko fēnei atu ai e Soane: “Pea ko te ʼu fakatupu fuapē ʼaē ʼi selō, mo te kele, mo te lalo kele, mo te tai pea mo te ʼu meʼa fuli ʼaē ʼi ai, neʼe au logoʼi nātou neʼe natou ʼui fēnei: ‘Kiā ia ʼaē ʼe heka ʼi te hekaʼaga fakahau pea mo te ʼAkeno, ke foaki kiā nāua ia te tapuakina, mo te fakaʼapaʼapa, mo te kolōlia pea mo te mālohi ʼo talu ai.’ ”—Fakahā 5:13.

23, 24. (a) Ko te temi fea ʼaē neʼe kamata ai te hiva ʼaē ʼi selō, pea ko te temi fea ʼaē neʼe kamata ai ʼi te kele? (b) ʼAki te temi, neʼe tuputupu feafeaʼi te mālohi ʼo te hiva?

²³ Ko te temi fea ʼaē neʼe fai ai te hiva mālie ʼaia? Neʼe kamata hivaʼi ʼi te kamata ʼo te ʼaho ʼo te ʼAliki. ʼI te ʼosi kapu ifo ʼo Satana pea mo tana kau temonio mai selō, neʼe feala ai leva ki “te ʼu fakatupu fuapē ʼaē ʼi selō” ke natou hiva fakatahi ia te hiva fakavikiviki ʼaia. Pea ohagē ko tona fakahā ʼi te ʼu tānaki gāue, talu mai te taʼu 1919 ko te toe hahaʼi tokolahi ʼi te kele kua natou fakatahiʼi tonatou ʼu leʼo moʼo fakavikiviki kiā Sehova, ʼo fakalaka tonatou kaugamālie mai te ʼu lauʼi afe ʼo aʼu ki te ono miliona tupu ʼi te taʼu 2005.b Kā ʼosi fakaʼauha anai te tuʼu fakakelekele ʼa Satana, ʼe hivaʼi anai e te ʼu “fakatupu fuapē ʼaē ʼi . . . te kele” ia te ʼu fakavikiviki kiā Sehova pea mo tona ʼAlo. ʼI te temi ʼaē kua fakakatofa e Sehova, ʼe kamata anai te fakatuʼuake ʼo te ʼu lauʼi miliale hahaʼi ʼaē kua mamate, ʼo feala ai leva ki te ʼu “fakatupu fuapē ʼaē ʼi . . . te lalo kele” ʼaē neʼe manatuʼi e te ʼAtua, ke natou kau fakatahi moʼo hiva ia te hiva ʼaia.

²⁴ Kua kamata hivaʼi ‘mai te potu taupotu ʼo te kele, mai te tai pea mo te ʼu motu,’ e te toko lauʼi miliona hahaʼi ia te hiva foʼou, ʼo natou hiva fakatahi mo te kautahi faka ʼatulaulau ʼa Sehova. (Isaia 42:10; Pesalemo 150:1-6) ʼE toe mālohi age anai ia te ʼu fakavikiviki fakafiafia ʼaia, ʼi te fakaʼosi ʼo te ʼu Taʼu e Afe, mokā kaku anai ia te mālamanei ki te maʼuli haohaoa. ʼE fakaʼauha anai mo te gata ʼāfea, te kākā lahi, ia Satana totonu, ke hoko kātoa ia Senesi 3:15, pea ʼi te mālo fakaʼosi, ʼe hiva fakatahi anai ia te ʼu fakatupu fuapē, ʼaē ʼe sino fakalaumālie pea mo ʼaē ʼe sino kakano: “Kiā ia ʼaē ʼe heka ʼi te hekaʼaga fakahau pea mo te ʼAkeno, ke foaki kiā nāua ia te tapuakina, mo te fakaʼapaʼapa, mo te kolōlia pea mo te mālohi ʼo talu ai.” ʼE mole ʼi ai anai he leʼo ʼe tō kehe ʼi te ʼatulaulau kātoa.

25. (a) Ko tatatou lau ia te fakamatala ʼa Soane ʼo ʼuhiga mo te hiva, ʼe ina uga tātou ke tou fai teā? (b) ʼI te fakaʼosi ʼo te meʼa ʼaē neʼe hā, koteā ia te faʼifaʼitaki lelei ʼaē neʼe tuku mai e te ʼu fakatupu ʼaē e fā pea mo te toko 24 tagata ʼāfea?

²⁵ ʼE ko he temi fakafiafia anai! ʼE mahino papau ia, ko te faʼahi ʼaē ʼe fakamatala mai e Soane, ʼe ina fakafonu totatou loto ʼaki ia te fiafia, pea mo fakaloto mālohiʼi tātou ke tou fakatahi ki te kau hiva ʼaē ʼi selō, ʼo hiva ʼaki totatou loto kātoa ia te ʼu fakavikiviki ʼaē kiā Sehova ʼAtua pea mo Sesu Kilisito. ʼE mole koa lā toe mālohi age tatatou loto papau ʼaē ke tou hoko atu ʼaki he loto faʼa kātaki te fai ʼo te ʼu gāue ʼaē ʼe lelei? Kapau koia ʼaia, pea ʼe feala hatatou ʼamanaki ke tou sio mata, ʼaki te tokoni ʼa Sehova, ki te ikuʼaga fakafiafia ʼo te meʼa ʼaē neʼe hā, ʼo fakatahiʼi tatatou ʼu leʼo ki te hiva fakavikiviki ʼaia ʼe fai ʼi te mālamanei kātoa. ʼE mahino papau ia, ʼe kau fakatahi ia te ʼu fakatupu e fā, peʼe ko te ʼu kelupimi, mo te kau Kilisitiano ʼaē kua fakatuʼuake, heʼe fēnei ia te ʼu palalau fakaʼosi ʼo ʼuhiga mo te meʼa ʼaē neʼe hā: “Pea neʼe ʼui fēnei maʼa te ʼu fakatupu maʼuli ʼaē e fā: ‘Ameni!’ pea neʼe tulolo te ʼu tagata ʼāfea ʼo natou ʼatolasio.”—Fakahā 5:14.

26. Ko ai ʼaē ʼe tonu ke tou haga tui ki ai, pea koteā te meʼa ʼaē neʼe ʼamanaki fai e te ʼAkeno?

²⁶ ʼE matou fakaʼamu, kiā koutou kau lautohi, ke kotou haga tui ki te sākilifisio ʼa te ʼAkeno​—‘ia ia ʼaē ʼe tāu mo feʼauga,’—​pea ke tapuakiʼi takotou ʼu faiga ʼaki he agavaivai ke kotou ʼatolasio pea mo tauhi kiā Sehova​—“ ʼaē ʼe heka ʼi te hekaʼaga fakahau.” Kotou fakaʼaogaʼi ia te tokoni ʼaē ʼe foaki mai e te kalasi ʼo Soane ʼi te temi ʼaenī, ʼi tana tufa ia te “ ʼinasi meʼa kai [fakalaumālie] ʼi tona temi totonu.” (Luka 12:42) Kae ʼi te lakaga leva ʼaē, neʼe ʼamanaki ʼavahi e te ʼAkeno ia te ʼu meʼa fakamaʼu ʼaē e fitu. Koteā ia te ʼu fakahā fakaofoofo ʼaē kā tou maʼu?

[Kiʼi nota]