Te ʼu Fehuʼi ʼa Te Kau Lautohi

Hili te ʼahiʼahi fakamuli ʼi te fakaʼosi ʼo te ʼu Taʼu e Afe, ʼe feala anai koa ke toe agahala te hahaʼi pea mo mamate?

Ko te ʼu vaega faka Tohi-Tapu e lua ʼi te tohi ʼo Apokalipesi ʼe fakahā ai te manatu ʼe lava tokoni mai ke tou tali ki te fehuʼi ʼaia: “Neʼe lī te mate pea mo te Hatesi ki te ano ʼo te afi. Ko te faka ʼuhiga ʼaenī ʼo te lua mate, ko te ano ʼo te afi.” (Apokalipesi 20:​14, MN ) “ ʼE ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.”​—Apokalipesi 21:​4, MN.

Koutou tokagaʼi te temi ʼaē ʼe hoko ai te ʼu meʼa ʼaia. Ko te lī ʼo “te mate pea mo te Hatesi” ki te ano ʼo te afi, ʼe hoko ʼi te ʼosi fakamāuʼi ʼo nātou ʼaē neʼe hāo ʼi Halamaketone, mo te kau fakatuʼuake, pea mo nātou fuli ʼaē neʼe tutupu ake hili ia Halamaketone, ʼo mulimuli ki “te ʼu meʼa ʼaē neʼe tohi ʼi te takaiga tohi,” peʼe ko te fakamatala lelei ʼo te ʼu meʼa ʼaē ʼe fakamaʼua e Sehova ki te hahaʼi lolotoga te ʼu taʼu e afe. (Apokalipesi 20:​12, 13, MN ) ʼE fakamatala e te ʼapositolo ko Soane te tahi meʼa neʼe hā kiā ia, iā Apokalipesi kapite 21, ka hoko anai lolotoga te ʼAfio ʼa Kilisito Sesu Iā Taʼu e Afe. Kae ko te fakahoko kātoa ʼo te meʼa ʼaia neʼe hā, ʼe hoko ʼi te fakaʼosi ʼo te ʼAho ʼo Te Fakamāu ʼaē ʼe fai iā taʼu e afe. ʼE nofo anai te ʼAtua mo te malamanei ʼo mole he tahi ʼi te vaha ʼo ia pea mo nātou, heʼe fakatoʼo anai e Sesu te Puleʼaga ki tana Tāmai. ʼI hona ʼaluʼaga fakatātā, ʼe nofo anai ia Sehova mo ‘tana hahaʼi’ ʼo talu ai pea mo felogoi fakahagatonu mo nātou. ʼE hoko kātoa anai te ʼui ʼaē “ko te mate ʼe pulihi anai ia,” ʼi te temi ʼaē ka maʼu ai te malamanei te ʼuhiga haohaoa ʼaki te fakaʼaogaʼi ʼo te maʼuhiga ʼo te sākilifisio faitotogi ʼa Kilisito.​—Apokalipesi 21:​3, 4, MN.

Koia ko te mate ʼaē ʼe talanoa kiai ʼi te ʼu vaega ʼaē ki muʼa atu, ʼe ko te mate ʼaē neʼe tou maʼu mai ia Atama, ʼaē ka pulihi anai ʼaki te totogi ʼa Kilisito. (Loma 5:​12-21) Ka pulihi te mate ʼaē ʼe hoko ki te malamanei tupu ko te ʼuluaki tagata, ʼe liliu pe anai te hahaʼi ohage ko Atama ʼi te temi ʼaē neʼe fakatupu ai. Neʼe haohaoa ia Atama, kae neʼe mole faka ʼuhiga leva neʼe mole feala ke mate. Neʼe ʼui age e Sehova kiā Atama ke ʼaua naʼa ina kai ki “te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi” pea neʼe ina ʼui fēnei: “Ko te ʼaho ʼaē ka ke kai anai kiai, ʼe ke mate moʼoni ai anai.” (Senesi 2:17) Neʼe hoko ai te mate ʼuhi ko tana agahala ʼaki tona loto faʼifaʼitaliha. Hili te ʼahiʼahi fakamuli ʼi te fakaʼosi ʼo tana ʼAfio Iā Taʼu e Afe, ʼe kei maʼu pe anai e te hahaʼi te loto faʼifaʼitaliha. (Apokalipesi 20:​7-10) ʼE kei feala anai hanatou filifili peʼe nātou haga tauhi kiā Sehova peʼe kailoa. ʼE mole ʼiloʼi papau peʼe lītuʼa anai he tahi ki te ʼAtua, ohage ko tona fai e Atama.

Koteā anai ka hoko ki he tahi ʼe ina filifili ke talagataʼa hili te ʼahiʼahi fakamuli, ʼi te mole kei ʼi ai he mate peʼe ko te Hatesi? ʼI te temi ʼaia, ʼe mole kei ʼi ai anai te mate ʼaē neʼe tou maʼu mai ia Atama. Pea ʼe mole kei ʼi ai mo te Hatesi, te faitoka ʼaē ʼe feala ke fakatuʼuake mai ai te kau mate. Kae ʼe feala kiā Sehova ke ina lī te kau talagataʼa ki te ano ʼo te ʼafi, ʼo mole nātou maʼu he ʼamanaki ke fakatuʼuake nātou. Ko te mate ʼaia ʼe hage pe ko te mate ʼo Atama mo Eva, kae mole ko te mate ʼaē neʼe tou maʼu mai ia Atama.

Kae ʼe mole tonu ke tou manatu ʼe hoko anai he meʼa feiā. Ko nātou ʼaē ka fakalaka ʼi te ʼahiʼahi fakamuli ʼe nātou kehekehe mo Atama ʼi te faʼahi maʼuhiga. Neʼe ʼahiʼahiʼi kātoa nātou. ʼE feala ke tou falala ki te hoko fakalelei ʼo te ʼahiʼahi fakamuli, heʼe feala kiā Sehova ke ina sivisivi te hahaʼi ʼi te meʼa ʼaē ʼe hā ki tuʼa pea mo tonatou loto. ʼE feala ke tou tui papau, ʼi te ʼahiʼahi fakamuli ʼe pulihi anai ia nātou ʼaē ʼe nātou fakaʼaogaʼi kovi tonatou loto faʼifaʼitaliha. Koia, logola ʼe feala pe kiā nātou ʼaē ʼe fakalaka ʼi te ʼahiʼahi fakamuli ke nātou toe agatuʼu ki te ʼAtua pea mo fakaʼauha nātou, kae ʼe ko he meʼa ʼe lagi mole feala anai ke hoko.

[Paki ʼo te pasina 11]

Hili te ʼahiʼahi fakamuli, ʼe liliu feafeaʼi anai te hahaʼi ʼo nātou hage ko Atama?