Tou Liliu Ko He ʼu Hahaʼi ʼe Nātou Maʼuliʼi, Ka Mole Gata ʼAki Pe Tatatou Fagono
1 ʼI te temi nei, ko te kau Kilisitiano moʼoni ʼe nātou mulimuli ki te tokoni ʼa te Tohi-Tapu ʼaē ʼe ina ʼui, ke nātou liliu ko he ʼu hahaʼi ʼe nātou maʼuliʼi te folafola, ka mole gata ʼaki pe ʼi tanatou fagono. (Sake 1:22) Ko te faʼahi ʼaia ʼe ina fakakeheʼi ʼaupito ia nātou, pea mo te hahaʼi ʼaē ʼe nātou ʼui ko nātou ko te kau Kilisitiano, pea mo nātou lau ʼe nātou tauhi ki te ʼAtua. (Is. 29:13) Neʼe fakahā lelei e Sesu, ko nātou pe ʼaē ʼe nātou fai te finegalo ʼo te ʼAtua ʼaē ka hāofaki anai.—Mat. 7:21.
2 Ko he tauhi ʼe mole pipiki ki he ʼu gāue faka lotu ʼe mole hona ʼuhiga. (Sake 2:26) Koia ʼe tonu ke tou fai te ʼu fehuʼi ʼaenī kia tatou, ‘ ʼE fakahā feafeaʼi koa e taku ʼu gāue ʼe moʼoni taku tui? Koteā ʼaē ʼe hā moʼoni ai ʼe ʼalutahi toku maʼuli mo taku tui? E feafeaʼi haku faʼifaʼitakiʼi katoa ia Sesu?’ Ko he tali fakahagatonu ki te ʼu fehuʼi ʼaia ʼe tokoni anai kia tatou ke tou ʼiloʼi ai te tuputupu ʼaē kua tou fai pea koteā ʼaē kei ʼaoga ke tou fai moʼo fai te finegalo ʼo te ʼAtua.
3 ʼI totatou ʼuhiga tisipulo ʼa Sesu, ʼe tonu ke tou fakamuʼamuʼa te fakatuʼutuʼu ʼaenī ʼi totatou maʼuli ohage ko te manatu ʼaenī ʼa te tagata fai pesalemo: “ ʼE mātou fakahake anai ki te ʼAtua he ʼu fakavikiviki ʼi te lolotoga ʼo te ʼaho katoa, pea ʼe mātou fakavikiviki anai tou huafa ʼo aʼu ki he ʼu temi ʼe mole hona gataʼaga.” (Pes. 44:8) Ko te Lotu Faka Kilisitiano ʼe ko he faʼahiga maʼuli ʼe hā ʼi te ʼaho fuli pea ʼe toe hā ʼi te ʼu meʼa fuli ʼaē ʼe tou fai. ʼE tou fiafia mokā ʼe tou fakahā ʼi tatatou ʼu gāue fuli tatatou holi fakamalotoloto ʼaē ke tou fakavikiviki ia Sehova!—Filp. 1:11.
4 Ko Te Fakavikiviki Kia Sehova ʼe Mole Gata Pe ʼi He Maʼuli Faitotonu: Kapau ko meʼa fuli ʼaē ʼe kole mai e te ʼAtua ʼe ko he fai pe ʼo he aga ʼe lelei, pea ʼe feala ke tou gāueʼi tāfito pe tatou te hikihiki ʼo tatatou aga. Kae, ko tatatou tauhi ʼe toe kau pe foki kiai te fakahā ʼo te ʼu vilitute ʼo Sehova pea mo te fakahā ʼo tona huafa ia muʼa ʼo te hahaʼi!—Hep. 13:15; 1 Pe. 2:9.
5 Ko te faka mafola ʼo te logo lelei ki te hahaʼi ʼe kau ki te ʼu gāue tāfito ʼaia ʼe tou fai. Neʼe foaki e Sesu tona maʼuli katoa ki te gāue ʼaia, he neʼe ina ʼiloʼi ko te faʼahi ʼaia, ko tona faka ʼuhiga ko te maʼuli heʼegata kia nātou ʼaē ka fakalogo anai kiai. (Soane 17:3) Ia ʼaho nei ko “te minisitelio ʼo te folafola” ʼe toe tatau pe tona maʼuhiga; ko te meʼa pe ʼaia e tahi ʼaē ʼe feala ke hāofaki ai te hahaʼi. (Gāue 6:4; Loma 10:13) ʼI tatatou fakakaukau ki te ʼu tapuakina lahi ʼaia, ʼe tou mahino ai leva pe koʼe neʼe tokoniʼi tatou e Paulo ke tou “faka mafola te folafola” pea mo tou “haga fai.”—2 Tim. 4:2.
6 Koteā te temi loaloaga ʼaē ʼe tonu ke tou fakaʼaogaʼi moʼo fakavikiviki kia Sehova? Neʼe ʼui e te tagata fai pesalemo ko te meʼa ʼaia neʼe manatu kiai ʼi te lolotoga ʼo te ʼaho katoa. ʼE mole tou manatu feiā koa la? Ei, pea ʼe tou fakaʼaogaʼi anai te faigamālie fuli moʼo palalau ki te hahaʼi ʼo ʼuhiga mo te huafa ʼo Sehova. ʼE tou kumi anai te ʼu faigamālie fuli ke tou palalau ki te ʼu meʼa fakalaumālie ʼaia, moʼo fakahaga tatatou ʼu fai palalau ki te ʼu meʼa fakalaumālie. Pea ʼe tou faigaʼi anai ke tou kau tuʼumaʼu ki te gāue faka mafola ʼaē ʼe fakatuʼutuʼu e te kokelekasio. Ko nātou ʼaē ʼe faigamālie ʼe feala ke nātou vakaʼi fakamalotoloto te gāue pionie, heʼe tokoni te gāue ʼaia kia tatou ke tou tuku ki muʼa te gāue fai faka mafola ʼi totatou maʼuli ʼi te ʼaho fuli. Ko te Folafola ʼa te ʼAtua ʼe ina fakapapau mai kia tatou, kapau ʼe tou kātaki ʼo maʼuliʼi te finegalo ʼo te ʼAtua, ʼe tou fiafia anai.—Sake 1:25.