He Koʼe ʼe Tonu Ke Tou Foaki Kia Sehova?
ʼI TE lolotoga tō ʼaē ʼo te laʼā ʼi te kiʼi kolo ʼo Sitoni, ʼi Salefate, neʼe punou te fafine vitua ʼo ina tae tana ʼu fafie. Neʼe tonu ke ina fai he afi, ke feala hana fakamoho tana kiʼi meʼa kai, pea neʼe lagi ko te kiʼi meʼa kai fakaʼosi pe ʼaia ʼoʼona pea mo tana kiʼi tama. Neʼe faigataʼa tona maʼuli mo tana kiʼi tama, ʼi te loaloaga ʼo te hoge, pea ko te tupuʼaga la ʼaia ʼo tanā maʼuli fakaʼofaʼofa. Neʼe mole kei ʼi ai hanā meʼa kai.
Neʼe fakaōvi age te tagata. Ko tona higoa ko Elia, pea neʼe ʼiloʼi vave ai e te fafine vitua neʼe ko te polofeta ʼa Sehova. ʼE hā mai ai neʼe kua logo te fafine ki te ʼAtua ʼaia. Neʼe mole tatau ia Sehova pea mo Paale, ʼaē neʼe aga fekai, pea neʼe mafola tana tauhi fakalialia ʼi te fenua ʼo Sitoni. Koia, ʼi te temi ʼaē neʼe kole age ki ai e Elia hana moʼi vai, neʼe fia tokoni moʼoni kia ia. Lagi neʼe manatu ʼi tona loto, kapau ʼe ina fai te faʼahi ʼaia pea ʼe ina maʼu anai te ʼofa ʼa Sehova. (Mateo 10 :41, 42) Kae neʼe kole age leva e Elia te tahi meʼa, neʼe ina kole age hana meʼa kai. Neʼe fakamahino age e te fafine ko te meʼa ʼaē neʼe ina maʼu neʼe feʼauga pe ia ki te kai fakaʼosi. Kae, neʼe toe kole age e Elia, ʼo ina fakapapau age ʼe foaki faka milakulo anai e Sehova hana meʼa kai ʼo aʼu ki te fakaʼosi ʼo te hoge. Koteā ʼaē neʼe ina fai? ʼE ʼui fēnei e te Tohi-Tapu: “Koia, neʼe ʼalu ai pea mo ina fai ʼo mulimuli ki te ʼu palalau ʼa Elia.” (1 Hau 17:10-15) ʼE fakahā e te ʼu kupu nounou ʼaia neʼe ina fai te meʼa ʼaia he neʼe lahi tana tui—ei, ʼi te lahi ʼaia ʼo tana tui, hili kiai te ʼu taʼu ʼe lauʼi afe, neʼe vikiʼi e Sesu Kilisito te fafine vitua ʼaia!—Luka 4:25, 26.
Kae, ʼe hage ko he meʼa faikehe te kole e Sehova he meʼa lahi feiā ki he fafine neʼe masiva. ʼE moʼoni te faʼahi ʼaia, mo kapau ʼe tou vakaʼi te faikole ʼaē neʼe fai e te tagata maʼuhiga ʼaupito. Ko te tānaki ʼo te ʼu meʼa ʼofa ʼaē neʼe fai e te Hau ko Tavite maʼa tona foha, ko Salomone, ke ina fakaʼaogaʼi moʼo laga ʼo te fale lotu, neʼe uga ai te hahaʼi ke lahi te ʼu meʼa ʼaē ʼe nātou foaki. Kapau ʼe lau ʼi te temi nei, pea ʼe lau anai ʼe ko te lauʼi miliale falā ʼaē neʼe nātou foaki! Kae, neʼe ʼui e Tavite ʼi tana faikole: “Ko ai koa ia ʼau, pea ko ai koa taku hahaʼi, ke mātou tāʼofi te mālohi moʼo fai ʼo te taʼi mōlaga ʼaenī ʼaki he lotolelei? He ko meʼa fuli ʼe haʼu mai ia te koe, pea ʼe haʼu mai tou nima te ʼu meʼa ʼaē neʼe mātou foaki atu.” (1 Fakamatala 29:14) Ohage ko tona ʼui e Tavite, ko meʼa fuli ʼe ʼa Sehova. Tatau aipe pe koteā te meʼa ʼaē ʼe tou foaki moʼo fakahaʼele ki muʼa ʼo te tauhi maʼa, ʼe tou toe liufaki pe tatou kia Sehova te meʼa ʼaē ʼaʼana. (Pesalemo 50:10) Koia, ʼe tou feʼekeʼaki ai: Pe koʼe ʼe maʼuhiga kia Sehova ke tou foaki?
Ko He Koga Maʼuhiga ʼi Te Tauhi Moʼoni
Ko tona tali fakanounou kiai, heʼe talu mai te kamataʼaga neʼe fakatuʼutuʼu e Sehova ʼe ko he koga maʼuhiga ʼaia ʼi te tauhi maʼa. Neʼe sakilifisioʼi e te tagata agatonu ko Apele tana ʼu manu lelei kia Sehova. Neʼe toe fai e te kau pateliaka ko Noe, mo Apalahamo, mo Isaake, mo Sakopo, pea mo Sopo te ʼu mōlaga feiā.—Senesi 4:4; 8:20; 12:7; 26:25; 31:54; Sopo 1:5.
Neʼe fakamaʼua pea neʼe sivisivi e te Lao ʼa Moisese te foaki ʼo te ʼu meʼa ʼofa kia Sehova. Ohage la, neʼe fakatotonu ki te kau Iselaelite fuli ke nātou foaki te vahe hogofulu ʼo te taʼukai ʼo te fenua pea mo te vahe hogofulu ʼo te faga manu. (Faka au 18:25-28) Ko te tahi ʼu meʼa ʼofa neʼe mole sivi ohage ko te sivi ʼo te ʼu meʼa ʼaia. Ohage la, neʼe fakamaʼua ki te kau Iselaelite fuli ke nātou foaki kia Sehova te ʼu ʼuluaki fua ʼo tanatou faga manu pea mo tanatou taʼukai. (Ekesote 22:29, 30; 23:19) Kae neʼe fakagafua e te Lao ke nātou tahi vakaʼi te lahi ʼo tana ʼu ʼuluaki fua ʼaē ka nātou foaki, ʼo nātou foaki pe te ʼu meʼa ʼaē ʼe lelei. Neʼe toe fakatuʼutuʼu e te Lao ke fai he ʼu mōlaga fakafetaʼi peʼe ko he fakapapau, neʼe nātou fai ʼaki he lotolelei. (Levitike 7:15, 16) Neʼe fakaloto mālohiʼi e Sehova tana hahaʼi ke nātou foaki ʼo mulimuli ki tana tapuakinaʼi nātou. (Teutalonome 16:17) Ohage ko te meʼa ʼaē neʼe hoko ʼi te laga ʼo te tapenakulo pea mo te laga ʼo te fale lotu ki muli age, neʼe nātou foaki te ʼu meʼa ʼaē neʼe uga e tonatou loto ke nātou foaki. (Ekesote 35:21; 1 Fakamatala 29:9) ʼE mahino ia, ko te ʼu taʼi meʼa ʼofa ʼaia neʼe leleiʼia ʼaupito e Sehova!
ʼI “te lao ʼa Kilisito,” ko te ʼu meʼa ʼofa fuli neʼe tonu ke fai ʼaki he lotolelei. (Kalate 6:2; 2 Kolonito 9:7) Neʼe mole faka ʼuhiga leva neʼe mole kei foaki he meʼa e te kau tisipulo ʼa Kilisito, pe neʼe veliveli te ʼu meʼa ʼaē neʼe nātou foaki. Kailoa! ʼI te fai faka mafola ʼa Sesu pea mo tana kau ʼapositolo ʼi Iselaele, neʼe muliʼi nātou e te ʼu fafine pea neʼe nātou tauhi kia nātou ʼaki tanatou ʼu koloā. (Luka 8:1-3) Neʼe toe feiā pe mo te ʼapositolo ko Paulo, neʼe foaki kia ia te ʼu meʼa ʼofa moʼo lagolago ki tana gāue misionea, pea neʼe ina fakaloto mālohiʼi te ʼu kokelekasio ke nātou foaki he falā kia nātou ʼaē neʼe nonofo ʼi te faigataʼaʼia. (2 Kolonito 8:14; Filipe 1:3-5) Ko te kolesi pule ʼo Selusalemi neʼe ina hinoʼi te ʼu tagata popoto, ke nātou vakavakaʼi pe neʼe tufa te ʼu meʼa ʼofa kia nātou ʼaē neʼe nonofo ʼi te faigataʼaʼia. (Gāue 6:2-4) ʼE mahino mai, neʼe faka ʼuhiga e te kau ʼuluaki Kilisitiano te meʼa ʼaē neʼe nātou fai ʼe ko he pilivilesio moʼo lagolago ki te tauhi maʼa.
Logope la te faʼahi ʼaia, e lagi ʼe tou feʼekeʼaki pe koʼe neʼe fakatuʼutuʼu e Sehova te loto fia foaki ko he koga ʼo tana tauhi. Tou vakaʼi te ʼu tupuʼaga e fā.
He Koʼe ʼe Tou Foaki
ʼUluaki, neʼe fakatuʼutuʼu e Sehova te loto fia foaki ko he koga ʼo te tauhi moʼoni, koteʼuhi ko tatatou fai te meʼa ʼaia ʼe lelei kia tatou. ʼE tou fakahā ai tatatou loto fakafetaʼi ki te agalelei ʼa te ʼAtua. Ohage la, kapau ʼe toʼo peʼe foaki e he tamasiʼi he meʼa ʼofa ki tana ʼu mātuʼa, he koʼe ʼe nā fiafia? ʼE ko he meʼa ʼofa koa neʼe faigataʼa ki te ʼu mātuʼa ke nā toʼo? Kailoa. Kae, ʼe fiafia te ʼu mātuʼa ʼi tanā sisio ʼaē ʼe fakahā e tanā toe he manatu ʼe lelei pea mo loto fia foaki. Ko te ʼu tupuʼaga la ʼaia ʼaē ʼe fakaloto mālohiʼi ai tatou e Sehova ke tou foaki, pea ʼe fiafia ʼi tatatou fai te meʼa ʼaia. ʼE ko te faʼahiga fai ʼaia ʼaē ʼe tou fakahā ai kia te ia ʼe tou leleiʼia moʼoni tona finegaloʼofa ʼaē ʼe mole hona tuʼakoi, pea mo tana foaki lahi kia tatou. ʼE ko ia ʼaē ʼe ina foaki “te meʼa ʼofa lelei fuli pea mo te mōlaga haohaoa fuli,” koia ʼe mole feʼauga anai tatatou fakafetaʼi kia te ia. (Sake 1:17) Ia meʼa fuli, neʼe foaki e Sehova tona ʼAlo ʼofaina, ʼo ina tuku ke mate ke feala ai ke tou maʼuʼuli ʼo heʼegata. (Soane 3:16) ʼE feala koa ke feʼauga tatatou fakafetaʼi kia te ia?
Lua, kapau ʼe tou fakamāhani ke tou foaki, pea ʼe tou ako ʼo faʼifaʼitaki kia Sehova pea mo tona ʼAlo, ia Sesu Kilisito, ʼi hona ʼu ʼaluʼaga ʼe maʼuhiga age. ʼE foaki tuʼumaʼu e Sehova, pea ʼe lahi tuʼumaʼu te ʼu meʼa ʼaē ʼe ina foaki. Ohage ko tona ʼui mai ʼi te Tohi-Tapu, ʼe ina foaki mai kia tatou “te maʼuli pea mo te mānava, pea mo te ʼu meʼa fuli.” (Gāue 17:25) ʼE tonu ke tou fakafetaʼi kia te ia ki te ʼaele ʼaē ʼe tou mānava kiai, ki te ʼu meʼa kai fuli ʼaē ʼe tou fakaʼaogaʼi, te ʼu temi fakafiafia pea mo lelei fuli ʼo te maʼuli. (Gāue 14:17) Ko Sesu, ohage ko tana Tāmai, neʼe ina fakahā te loto fia foaki ʼaia. Neʼe ina foaki te meʼa ʼaē neʼe ina maʼu. Neʼe koutou ʼiloʼi koa, ʼi te temi ʼaē neʼe fakahoko ai e Sesu te ʼu milakulo, neʼe mavae ia te ia te meʼa? ʼE tuʼa lahi te fakahā mai kia tatou e te Tohi-Tapu, ʼi te temi ʼaē neʼe ina fakamālōlō ai te hahaʼi mahaki, ko te mālohi ‘neʼe mavae ia te ia.’ (Luka 6:19; 8:45, 46) Neʼe foaki lahi e Sesu ʼo ina foaki mo tona nefesi, tona maʼuli, ʼi te mate.—Isaia 53:12.
Koia, ʼi tatatou foaki ʼo totatou temi, totatou mālohi, pe ko te ʼu meʼa ʼaē ʼe tou maʼu, ʼe tou faʼifaʼitakiʼi ia Sehova pea ʼe tou fakafiafia tona loto. (Tāʼaga Lea 27:11; Efesi 5:1) ʼE tou muliʼi foki mo te faʼifaʼitaki haohaoa ʼaē neʼe tuku mai e Sesu maʼa tatou ʼo ʼuhiga mo te aga ʼaē ʼe tonu ke tou fai.—1 Petelo 2:21.
Tolu, ʼi tatatou foaki, ʼe tou fakahoko he ʼu meʼa ʼe ʼaoga moʼoni pea mo maʼuhiga. ʼE moʼoni, neʼe feala pe ke fakahoko e Sehova te ʼu meʼa ʼo te Puleʼaga ʼo mole ʼaoga kiai tatatou tokoni, ohage pe ko te feala ʼaē ke ina fakaʼaogaʼi he ʼu maka moʼo kalagaʼi ʼo tana Folafola, ka mole ina fakaʼaogaʼi tatou ki te faʼahi ʼaia. (Luka 19:40) Kae neʼe ina fili ke ina fakaʼaogaʼi tatou ki te ʼu pilivilesio ʼaia. Koia, ka tou foaki hatatou ʼu koloā moʼo fakahaʼele ki muʼa te ʼu gāue ʼo te Puleʼaga, ʼe tou fiafia ʼaupito ʼi tatatou ʼiloʼi ʼaē ʼe tou kau moʼoni ki te gāue maʼuhiga e tahi ʼaē ʼe hoko ʼi te malamanei katoa.—Mateo 24:14.
ʼE moʼoni ʼe ʼaoga te faʼahi paʼaga ki te gāue faka malamanei ʼa te kau Fakamoʼoni ʼa Sehova. Lolotoga te taʼu gāue 1995, neʼe teitei fakaʼaogaʼi e te Sosiete te 60 miliona tola, moʼo tokoni ki te kau pionie makehe, mo te kau misionea, pea mo te kau tagata taupau feʼoloʼaki ʼi te ʼu fenua ʼaē neʼe hinoʼi nātou ke nātou ʼolo ʼo gāue ai. Kae, ʼe mole lahi ake te fakaʼaogaʼi ʼo te paʼaga ʼaia, mo kapau ʼe fakatatau ki tona fakaʼaogaʼi ki te laga ʼo te ʼu filiale pea mo te ʼu gāue ʼo te ʼu filiale ʼaia, pea mo te ʼu pilō tā tohi ʼi te malamanei katoa. Kae, neʼe feala ke fakahoko te ʼu meʼa fuli ʼaia ʼaki te ʼu koloā ʼaē neʼe foaki fakaʼofa!
ʼI te agamāhani, ʼe mole manatu te hahaʼi ʼa Sehova, kapau ʼe mole lahi hanatou ʼu koloā, pea ʼe nātou tuku anai ki ʼihi ke nātou fai te faʼahi ʼaia. Ko te taʼi aga ʼaia ʼe feala ke ina fakagaloʼi kia tatou te faʼahi ʼaia ʼi tatatou tauhi. Ohage ko tona ʼui e te ʼapositolo ko Paulo, neʼe “māsisiva ʼaupito” te kau Kilisitiano ʼo Masetonia, kae logope la te faʼahi ʼaia, neʼe nātou kole fakamālohi te pilivilesio ʼaē ko te foaki. Pea ko te meʼa ʼaē neʼe nātou foaki, neʼe fakamoʼoni kiai e Paulo, neʼe “laka age ʼi te ʼu meʼa ʼaē neʼe nātou maʼu moʼoni”!—2 Kolonito 8:1-4.
Fā, neʼe fakatuʼutuʼu e Sehova te loto fia foaki ko he koga ʼi te tauhi moʼoni, heʼe tokoni anai te loto fia foaki kia tatou ke tou maʼuli fiafia. Neʼe ʼui e Sesu totonu: “ ʼE lahi age te manuʼia ʼo takita foaki, ʼi takita tali.” (Gāue 20:35) Neʼe fakatupu feiā tatou e Sehova. Ko te tahi tupuʼaga ʼaia ke tou logoʼi ʼi totatou loto, tatau aipe pe koteā te lahi ʼo te ʼu koloā ʼaē ʼe feala ke tou foaki kia te ia, ʼe mole feala ʼi he ʼaho ke tatau mo te ʼofa ʼaē ʼe tou logoʼi ʼi totatou ʼu loto maʼa ia. Kae, meʼa fakafiafia foki, ʼe mole fakamaʼua mai e Sehova ke lahi fau te ʼu meʼa ʼaē ʼe tou foaki, kae ke tou foaki pe te ʼu meʼa ʼaē ʼe tou lavaʼi. ʼE feala ke tou falala ʼe fiafia ʼi te temi ʼaē ʼe tou foaki ai ʼaki he loto fiafia te ʼu meʼa ʼaē ʼe tou lavaʼi!—2 Kolonito 8:12; 9:7.
ʼE Tapuakina Ia Nātou ʼAē ʼe Nātou Loto Fia Foaki
ʼO ʼuhiga mo te faʼifaʼitaki ʼaē neʼe tou vakaʼi ʼi te kamata, koutou fakakaukauʼi age muʼa mo kanapaula neʼe tuku e te fafine vitua ʼo Salefate ki he tahi age ke ina foaki he meʼa kai kia Elia. Neʼe feala ke mole ina maʼu te ʼu tapuakina!
Kua tou ʼiloʼi papau ʼe tapuakina e Sehova ia nātou ʼaē ʼe nātou fakahā te loto fia foaki. (Tāʼaga Lea 11:25) Neʼe mole mamahi te fafine vitua ʼo Salefate ʼi tana foaki ʼaē tana meʼa kai ʼaē neʼe ina manatu neʼe ko tona kai fakaʼosi. Neʼe fakapale ia ia e Sehova ʼaki te milakulo. Ohage ko te meʼa ʼaē neʼe ʼui e Elia, neʼe mole gaʼasi tana ʼu ipu ʼaiʼaga falena pea mo tana moʼi lolo, ʼo aʼu ki te fakaʼosi ʼo te hoge. Kae neʼe ina maʼu te tahi fakapale ʼe lahi age. ʼI te temi ʼaē neʼe mahaki ai tana tama pea mo mate, ko Elia, te tagata ʼo te ʼAtua moʼoni, neʼe ina fakatuʼuake ia ia ʼo ina tuku age ki tana faʼe. Neʼe lagi lahi ai te tuputupu ʼa te fafine ʼi te faʼahi fakalaumālie!—1 Hau 17:16-24.
Ia ʼaho nei, ʼe mole tou ʼamanaki ke tapuakina tatou ʼaki he ʼu milakulo. (1 Kolonito 13:8) Kae ʼe fakapapau mai kia tatou e Sehova ʼe tokoni anai kia nātou ʼaē ʼe nātou tauhi kia te ia ʼaki tonatou nefesi katoa. (Mateo 6:33) Koia, ʼe feala ke tou hage ko te fafine vitua ʼo Salefate ʼi te faʼahi ʼaia, ʼo tou foaki lahi, pea mo falala ʼe tokaga anai ia Sehova kia tatou. ʼO toe feiā aipe, ʼe feala ke tou maʼu ai he ʼu tapuakina fakalaumālie lahi. Kapau ko totatou loto fia foaki ʼe ko he meʼa ʼe tou fai māhani, kae mole tahitahiga, peʼe tou fai ʼi te temi pe ʼaē ʼe tou loto kiai, pea ʼe tokoni anai kia tatou ke lelei tuʼumaʼu tatatou sio, pea mo tou tokagaʼi te ʼu meʼa ʼo te Puleʼaga, ohage ko tona fakatotonu mai e Sesu. (Luka 11:34; vakaʼi ia 1 Kolonito 16:1, 2.) ʼE toe tokoni anai ia te faʼahi ʼaia kia tatou, ke tou fakaōvi lelei kia Sehova pea mo Sesu ohage ko honā ʼu kaugā gāue. (1 Kolonito 3:9) Pea ʼe ina toe hikihiki anai te loto fia foaki, ʼaē ʼe maʼu e te kau atolasio ʼa Sehova ʼi te malamanei katoa.
[Talanoa ʼo te pasina 31]
TE ʼU FAʼAHIGA FAI ʼE FILI E ʼIHI MOʼO FOAKI ʼO HE ʼU MEʼA ʼOFA
TE ʼU MEʼA ʼOFA KI TE GĀUE FAKA MALAMANEI
Ko te tokolahi ʼe nātou tuku kehe he meʼa peʼe nātou fakatuʼutuʼu ʼi tanatou polokalama ke nātou ʼai he falā ki te ʼu kesi ʼaiʼaga meʼa ʼofa ʼaē ʼe tohi ai te meʼa ʼaenī: “Te ʼu meʼa ʼofa ki te gāue faka malamanei ʼa te Sosiete—Mateo 24:14.” ʼI te māhina fuli, ʼe fakamomoli e te ʼu kokelekasio te falā ʼaia ki te ʼu nofoʼaga faka malamanei ʼaē ʼi Brooklyn, ʼi New York, peʼe ki te filiale ʼo tonatou telituale.
ʼE feala foki ke tou fakamomoli fakahagatonu te ʼu meʼa ʼofa ki te filiale ʼaē ʼi totatou fenua. ʼE feala ke tou foaki he ʼu faʼahiga koloā kehekehe peʼe ko niʼihi age ʼu meʼa maʼuhiga. ʼE tonu ke tou fakamomoli fakatahi mo te ʼu meʼa ʼofa ʼaia he tohi fakanounou ʼe tuʼu katoa ai te lisi ʼo te ʼu meʼa ʼofa.
TE ʼU MEʼA ʼOFA ʼE FAKA TUʼAKOI
ʼE feala ke tou foaki he paʼaga ki te Sosiete Watch Tower, pea ʼe ina taupau anai te paʼaga ʼaia ʼo aʼu ki totatou mate, kae kapau ʼe ʼaoga ke tou fakaʼaogaʼi te paʼaga ʼaia, pea ʼe toe liufaki mai anai te paʼaga ʼaia kia tatou. Kapau ʼe koutou fia maʼu he tahi ʼu manatu, pea koutou faitohi ki te filiale.
TE FOAKI ʼO HE ʼU MEʼA ʼOFA KUA ʼOSI FAKATUʼUTUʼU
ʼO hilifaki atu ki te ʼu meʼa ʼofa faka paʼaga ʼaia pea mo te ʼu ʼofa ʼe faka tuʼakoi, ʼe toe ʼi ai ʼihi age ʼu faʼahiga fai ke tou foaki ki te haʼele lelei ʼo te gāue faka malamanei ʼo te Puleʼaga. ʼE kau kiai te ʼu meʼa ʼaenī:
Polices dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete/he posio. ʼE tonu ke tou fakahā ki te Sosiete te faʼahiga fakatuʼutuʼu ʼaia.
Kaupepa ʼe tuku ai te falā ʼi te fale paʼaga: Ko te kaupepa ʼe tuku ai te falā ʼi te fale paʼaga, peʼe ko he compte dépôt, peʼe ko he compte de retrait personnel ʼe feala ke fakagafua ki te Sosiete peʼe ke tohi ai te higoa ʼo te Sosiete ʼi te mate ʼo ia ʼaē neʼe ina fai te fakatuʼutuʼu ʼaia. ʼE tonu ke tou fakahā ki te Sosiete te faʼahiga fakatuʼutuʼu ʼaia.
Te ʼu meʼa ʼofa pea mo te ʼu kotala: ʼE feala ke foaki ki te Sosiete Watch Tower te ʼu meʼa maʼuhiga pea mo te ʼu kotala ohage ko he meʼa ʼofa katoa peʼe ko he fakatuʼutuʼu ʼe faka fealagia ai kia ia ʼaē ʼe ina foaki ke hoholo atu tana maʼu te paʼaga.
Te ʼu Koloā: ʼE feala ke tou foaki he ʼu koloā ki te Sosiete Watch Tower, peʼe tou foaki fakahagatonu te meʼa ʼofa ʼaia, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te Sosiete ʼi muʼa ʼo tatatou foaki kiai te ʼu koloā ʼaia.
Koʼeni toku loto fakamuli pea mo te pepa ʼaē ʼe tohi ai toku koloā: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, peʼe feala ke tou fakatuʼutuʼu ke maʼu e te Sosiete tatatou ʼu koloā. Ko he koloā ʼe fua lelei ki he kautahi faka lotu ʼe feala ke ina fakatuʼu he ʼu faʼahiga tukuhau. ʼE tonu ke tou fakamomoli ki te Sosiete te lua pepa ʼaē ʼe tuʼu ai te meʼa ʼaē ʼe loto kiai peʼe ko te koloā.
Ko nātou ʼaē ʼe nātou fia ʼiloʼi he faʼahiga meʼa ʼo ʼuhiga mo te ʼu fakatuʼutuʼu ʼo te foaki ʼo he ʼu meʼa ʼofa, ʼe tonu ke nātou faitohi ki te filiale ʼo tonatou fenua.