Koteā Te ʼu Logo Lelei ʼAia?

1. Koteā te ʼu logo ʼaē ʼe fakahā mai e te ʼAtua?

ʼE loto ia te ʼAtua ke maʼuli fiafia ia te hahaʼi ʼi te kele. Neʼe ina fakatupu te kele pea mo meʼa fuli ʼe maʼu ai ʼuhi ko tona ʼofa ʼaē ki te hahaʼi. Kua vave pē ia tana foaki mai ia he maʼuli ʼe lelei ki te hahaʼi ʼo te ʼatu fenua fuli pē. ʼE ina fakafīmālieʼi anai ia te ʼu mamahi ʼo te hahaʼi fuli pē.​—Lau ia Selemia 29:11.

Heʼeki ʼi ai he puleʼaga kua ina lavaʼi te pulihi ʼo te agamālohi, te mahaki, peʼe ko te mate. Kae ʼe ʼi ai te logo lelei. Kua vave pē te haga ʼa te ʼAtua ʼo fetogi ia te ʼu puleʼaga fakatagata ʼaki tona puleʼaga. ʼE maʼu anai e ʼana hahaʼi fakalogo ia te tokalelei pea mo te maʼuli mālōlō.​—Lau ia Esaia 25:8; 33:24; Taniela 2:44.

2. He koʼē ʼe maʼuhiga ʼaupitō ia te ʼu logo lelei iā ʼaho nei?

ʼE puli anai te mamahi ʼi te kele mokā haga anai te ʼAtua ʼo fakaʼauha te hahaʼi agakovi. (Sofoni 2:3) ʼE hoko anai ʼāfea? Neʼe tala fakakikite e te Folafola ʼa te ʼAtua ia te ʼu ʼaluʼaga ʼaē kā hoko anai ki te tagata. Ko te ʼu meʼa kovi fuli ʼaenī ʼe hoko ʼi te kele ʼe fakahā ʼaki ai kua vave ʼaupitō te temi ʼaē kā fakagata ai e te ʼAtua te ʼu mamahi.​—Lau ia 2 Timoteo 3:1-5.

3. Koteā ʼaē ʼe tonu ke tou fai?

ʼE tonu ke tou ako ke tou ʼiloʼi te ʼAtua ʼaki tana Folafola, ia te Tohi-Tapu. ʼE hagē ko he tohi neʼe fai mai e he tamai ʼofa kiā tātou. ʼE ina fakahā mai kiā tātou te faʼahiga maʼu ʼo he maʼuli ʼe lelei ʼi te temi ʼaenī pea mo te maʼu ʼo te maʼuli heʼegata ʼi te kele ʼi te temi kā haʼu. ʼE moʼoni, ko ʼihi ʼe mole natou loto anai ke ke ako pea mo mahino ki te Tohi-Tapu. Kae ʼe mole tonu ke ke tuku ke natou fakalotovaivaiʼi koe ʼi te ako ʼo te Tohi-Tapu heʼe ko te fakapapau ʼa te ʼAtua ʼe taulekaleka ʼaupitō.​—Lau ia Taaga Lea 29:25; Apokalipisi 14:6, 7.a