“Neʼe Matou Manatu Tahi Fuli”

1, 2. (1) Kotea te ʼu fehuʼi maʼuhiga neʼe vakaʼi e te kolesi pule ʼo te kokelekasio ʼo te ʼuluaki sekulo? (2) Kotea ʼae neʼe tokoni ki te ʼu tehina ke natou toʼo ai he tonu ʼe lelei?

ʼE FAKATAHITAHI te kau apositolo mo te kau tagata ʼafea ʼi he koga fale ʼi Selusalemi ʼo fakatalitali ai. ʼE natou fesioʼaki fuli mo mahino ki te maʼuhiga ʼo te tonu ʼae ka toʼo. Neʼe lagaʼi te ʼu fehuʼi maʼuhiga ʼi te fihi ʼo te silikosisio. ʼE tonu koa ke fakalogo te kau Kilisitiano ki te Lao ʼa Moisese? ʼE tonu koa ke fakakehekeheʼi te kau Kilisitiano Sutea pea mo natou ʼae ʼe mole Sutea?

² Neʼe vakavakaʼi e te ʼu taupau ni aluʼaga kehekehe. Neʼe natou manatuʼi te Folafola fakapolofeta ʼa te ʼAtua pea mo te fakamatala ʼa he tahi neʼe sio mata ki te tapuakina ʼa Sehova. Neʼe natou fefakahaleleiʼaki ʼanatou manatu. Kua feʼauga pe te ʼu fakamoʼoni ʼo ʼuhiga mo te fihi ʼaia. ʼE ha lelei ai ʼe takitaki natou e te laumalie ʼo Sehova. ʼE mulimuli anai koa te ʼu tehina ki te takitaki ʼaia?

3. Kotea te ʼu fua lelei ka tou maʼu ʼi tatatou vakaʼi te kapite 15 ʼo te tohi ʼo Gaue?

³ ʼE tonu anai ke lototoʼa mo tui malohi te kolesi pule ke ina tali te takitaki ʼa te laumalie maʼoniʼoni ʼi te aluʼaga ʼaia. ʼE feala ai ke kovi te fehiʼa ʼa te kau takitaki lotu Sutea. Pea tahi ko ʼihi ʼi te kokelekasio ʼe natou fakafeagai ki te kolesi pule he ʼe natou faiga malohi ke fakalogo te hahaʼi ʼa te ʼAtua ki te Lao ʼa Moisese. Koia, kotea ʼae ka ina fai? ʼI tatatou vakaʼi te faʼahi ʼaia, ʼe tou mahino anai neʼe ina tuku mai he faʼifaʼitaki ʼe lelei, ʼe mulimuli ki ai te Kolesi Pule ʼa te kau Fakamoʼoni ʼa Sehova ʼo te temi nei. Ko he faʼifaʼitaki ʼe tonu ke tou toe mulimuli ki ai ʼi totatou maʼuli Fakakilisitiano moka ʼe tou fai he tonu peʼe moka hoko he fihifihia.

“ ʼE Alu Tahi Te Faʼahi ʼAia Mo Te ʼu Folafola ʼa Te Kau Polofeta” (Gaue 15:13-21)

4, 5. Ko te lea fakapolofeta fea ʼae neʼe fakaʼaogaʼi e Sakopo moʼo tokoni ki te fihi?

⁴ Neʼe palalau leva te tisipulo ko Sakopo ia te tehina ʼo Sesu.a Neʼe lagi ko ia ʼae neʼe ina takitaki te fono ʼi te ʼaho ʼaia. ʼAki ʼana palalau, neʼe mahino ai te nofoʼaki kua logo tahi te kolesi pule ʼo fai he tonu. Neʼe ina ui: “Kua fakamatala fakalelei mai e Simioni te hoki tokaga ʼae ʼa te ʼAtua ki te hahaʼi ʼae ʼe mole Sutea, ke ina filifili mai ia natou he hahaʼi ke natou fua tona huafa. Pea ʼe alu tahi te faʼahi ʼaia mo te ʼu folafola ʼaeni neʼe tohi e te kau Polofeta.”​—Gaue 15:14, 15.

⁵ ʼAki te akonaki ʼa Simioni ʼae ko Simone Petelo pea mo te ʼu fakamatala ʼa Palenapa mo Paulo, neʼe lagi manatuʼi ai e Sakopo ko ni vaega Tohi-Tapu ʼe tokoni ki te fihi ʼaia. (Soa. 14:26) ʼI tana tokagaʼi ʼae ʼe alu tahi ‘te ʼu folafola ʼa te kau Polofeta,’ neʼe talanoa leva ki te manatu ʼae ia Amosi 9:11, 12. ʼE kau te tohi ʼaia ʼi te ʼu tohi Fakahepeleo ʼae ʼe tau fakahigoaʼi ko “te ʼu tohi ʼa te kau Polofeta.” (Mat. 22:40; Gaue 15:16-18) ʼE tou tokagaʼi anai ʼe ʼi ai te kiʼi kehekehe ʼi te ʼu kupu ʼa Sakopo pea mo te ʼu kupu ʼa Amosi ia ʼaho nei. Neʼe lagi fakaʼaogaʼi e Sakopo te Septante, ko te fakaliliu ʼo te ʼu tohi Fakahepeleo ki te lea Fakakeleka.

6. Neʼe tokoni feafeaʼi te ʼu Tohi Taputapu ki te fihi?

⁶ ʼAki te polofeta ko Amosi, neʼe fakakikite e Sehova, ʼe hoko mai anai he ʼaho ʼe ina toe fakatuʼu anai “te fale la ʼo Tavite,” ia te hakoga fakahau ʼae ʼe taki ki te Puleʼaga Fakamesia. (Esk. 21:26, 27) ʼE toe felogoi ʼateaina pe anai koa ia mo natou ʼae neʼe tutupu Sutea ohage ko he puleʼaga? Kailoa. ʼE toe ui ʼi te lea fakapolofeta, ʼe fakatahiʼi anai mo “te hahaʼi fuli ʼe mole Sutea, ʼae ʼe natou fua [te] huafa [ʼo te ʼAtua].” Tou manatuʼi, neʼe hoki ui pe e Petelo “[ko te ʼAtua] neʼe mole ina fakakehekeheʼi ia tatou [te kau Kilisitiano Sutea] pea mo natou [te kau Kilisitiano ʼe mole Sutea] kae neʼe ina fakamaʼa ʼonatou loto ʼaki te tui.” (Gaue 15:9) Ko tona fakaʼuhiga neʼe loto e te ʼAtua ke kau te kau Sutea mo natou ʼe mole Sutea ki te Puleʼaga, ʼei, ke natou maʼu tofiʼa. (Loma 8:17; Efe. 2:17-19) ʼE mole ui ʼi te ʼu lea fakapolofeta ʼaia neʼe tonu muʼa ke silikosisioʼi te kau Kilisitiano ʼae ʼe mole Sutea peʼe ke natou liliu ko he kau poloselite.

7, 8. (1) Kotea te manatu ʼae neʼe fakaha e Sakopo? (2) Kotea te fakaʼuhiga ʼo ʼana palalau?

⁷ Neʼe malave kia Sakopo te ʼu vaega Tohi-Tapu ʼaia pea mo te ʼu fakamatala ʼae neʼe logo ki ai ʼo ina fakaha ai te manatu ʼaeni ke natou fakakaukauʼi: “Koia, ko taku tonu ke ʼaua naʼa fakahohaʼa kia natou ʼe mole Sutea ʼae ʼe tafoki ki te ʼAtua, kae ke tou faitohi kia natou ke natou fakamamaʼo mai te ʼu meʼa ʼae ʼe pipiki ki te tauhi taula ʼatua, mo te ʼu felaveʼi fakasino heʼe ʼaoga, mo te ’u manu ʼae neʼe tege pea mo te toto. Koteʼuhi talu mai te ʼu temi ʼafea, ʼe fakamafola e te hahaʼi ia te ʼu tohi ʼa Moisese ʼi te ʼu kolo fuli pea ʼe lau leʼo lahi ʼi te ʼu sinakoka ʼi te Sapato fuli.”​—Gaue 15:19-21.

⁸ ʼI te ui ʼae e Sakopo “koia ko taku tonu,” neʼe ina fia puleʼi koa ʼona tehina he ʼe ina takitaki te fono? Neʼe faʼifaʼitaliha koa ʼi tana toʼo te tonu ʼaia? Kailoa. Ko te kupu Fakakeleka ʼae neʼe fakaliliu ʼaki te kupuʼi palalau “ko taku tonu” ʼe toe feala ke fakaʼuhiga “ ʼE au fakafuafua” peʼe “ ʼI taku manatu.” Koia, neʼe mole fia puleʼi e Sakopo ʼona tehina. Kae neʼe ina loto ke natou fakakaukauʼi te ʼu aga ʼae ʼe tonu ke fai ʼo mulimuli ki te ʼu fakamatala pea mo te ʼu vaega Tohi-Tapu ʼae ʼo ʼuhiga mo te fihi.

9. Neʼe kotea te ʼu fua lelei ʼo te manatu ʼa Sakopo?

⁹ Neʼe lelei koa te manatu ʼa Sakopo? ʼEi, he neʼe ʼio te kau apositolo pea mo te kau tagata ʼafea. Kotea anai ʼona fua lelei? ʼUluaki, ʼe mole “fakahohaʼa” anai ki te kau Kilisitiano ʼe mole Sutea peʼe mole “fakatupu ni faigataʼaʼia kia natou,” he ʼe mole fakamaʼua kia natou ke natou mulimuli ki te Lao ʼa Moisese. (Gaue 15:19; Ko te Tohi-Tapu ʼi te Fakaʼuvea) Lua, ʼe fakaʼapaʼapa anai te tonu ʼaia ki te leʼo ʼo loto ʼo te kau Kilisitiano Sutea ʼae neʼe logo lolotoga ni taʼu ki te ʼu tohi ʼa “Moisese . . . ʼe lau leʼo lahi ʼi te ʼu sinakoka ʼi te Sapato fuli.”b (Gaue 15:21) Kapau ʼe mulimuli te kau Kilisitiano Sutea pea mo te kau Kilisitiano ʼe mole Sutea ki te tonu ʼaia, ʼe toe malohi ai anai ʼanatou felogoi kae tafito ʼe fiafia anai ia Sehova ʼAtua he ʼe alu tahi mo te fakahoko ʼo tana fakatuʼutuʼu. ʼI lelei leva ʼo te fakatokatoka feia ʼo he fihifihia, neʼe puipui ai te logo tahi pea mo te tokalelei ʼo te kokelekasio katoa ʼo te hahaʼi ʼa te ʼAtua. ʼE ko he faʼifaʼitaki lelei ʼaia ki te kokelekasio Fakakilisitiano ʼo te temi nei.

10. Ia ʼaho nei, ʼe feafeaʼi te faʼifaʼitakiʼi e te Kolesi Pule ia te kolesi pule ʼo te ʼuluaki sekulo?

¹⁰ Neʼe tou vakaʼi ʼi te kapite ʼaeni kua hili, ʼe faʼifaʼitakiʼi e te Kolesi Pule ʼo te kau Fakamoʼoni ʼa Sehova ia ʼaho nei te kolesi pule ʼo te ʼuluaki sekulo. ʼE ina kole kia Sehova te Tuʼi ʼAliki ʼo te ʼAtulaulau pea mo Sesu Kilisito te Pule ʼo te kokelekasio ke nā takitaki ia ia ia meʼa fuli.c (1 Ko. 11:3) ʼO feafeaʼi? Koʼeni te fakamahino ʼa Albert Schroeder ʼae neʼe kau ʼi te Kolesi Pule talu mai te taʼu 1974 ʼo kaku ki te fakaʼosi ʼo tona maʼuli ʼi te kele ʼi Malesio 2006: “ ʼE fono te Kolesi Pule ʼi te Feliafa ʼo kamata ʼaki te faikole ʼo kumi te takitaki ʼo te laumalie ʼo Sehova. ʼE faiga fakamalotoloto ke alu tahi mo te Folafola ʼa te ʼAtua, te Tohi-Tapu te ʼu aluʼaga fuli ʼae ʼe ina vakaʼi pea mo te ʼu tonu fuli ʼae ʼe ina fai.” Pea ko Milton Henschel ʼae neʼe fualoa tana kau ki te Kolesi Pule ʼo kaku ki te fakaʼosi ʼo tona maʼuli ʼi te kele ʼi Malesio 2003, neʼe ina fai te fehuʼi maʼuhiga ʼaeni ki te kau maʼu pepa ʼo te kalasi 101 ʼo te Ako Tohi-Tapu ʼo Kileate ʼa te Watchtower: “ ʼE ʼi ai koa he tahi kautahi ʼi te kele ʼe vakaʼi e ʼona kau takitaki te Folafola ʼa te ʼAtua, te Tohi-Tapu ʼi muʼa ʼo hanatou fai he tonu maʼuhiga?” ʼE tou iloʼi pe tona tali.

“Neʼe Natou Fekauʼi Ni Tagata Neʼe Filifili” (Gaue 15:22-29)

11. Neʼe fakaha feafeaʼi te tonu ʼa te kolesi pule ki te ʼu kokelekasio?

¹¹ Kua toʼo e te kolesi pule ʼo Selusalemi he tonu ʼi te logo tahi ʼo ʼuhiga mo te silikosisio. Kae ke gaue te ʼu tehina ʼo te ʼu kokelekasio ʼi te logo tahi neʼe tonu ke fakaha age kia natou te tonu ʼaia ke tasilo pea mo fakalotomalohi. ʼO feafeaʼi? ʼE ui ʼi te Tohi-Tapu: “Neʼe fai leva e te kau apositolo, mo te kau tagata ʼafea pea mo te kokelekasio katoa te tonu ʼae ke filifili he ʼu tagata mai ia natou, ke kauga olo mo Paulo pea mo Palenapa ki Atiokia. Neʼe ko Sutasi ʼae ʼe toe higoa ko Palesapasi pea mo Silasi, pea neʼe nā kau ʼi te ʼu tehina ʼae neʼe natou takitaki te gaue.” Pea neʼe natou toe teuteuʼi he tohi ʼo natou foaki ki te ʼu tagata ʼaia ke lau ki te ʼu kokelekasio fuli ʼi Atiokia, mo Silia pea mo Silisia.​—Gaue 15:22-26.

12, 13. Kotea te fua lelei (1) ʼo te fekauʼi ʼo Sutasi pea mo Silasi? (2) ʼo te momoli ʼo te tohi ʼo te kolesi pule?

¹² Ko Sutasi mo Silasi “neʼe nā kau ʼi te ʼu tehina ʼae neʼe natou takitaki te gaue,” koia neʼe tuha mo naua ke nā fakafofoga te kolesi pule. ʼI te sisio ʼa te ʼu kokelekasio ki te ʼomai ʼa te ʼu tehina ʼe toko fa, neʼe natou mahino ai, mole ko he tali pe ki te fihi kae neʼe ʼomai mo ni fakatotonu maʼuhiga mai te kolesi pule. ʼI te kau ai ʼa Sutasi mo Silasi te ʼu ‘tagata ʼae neʼe filifili,’ neʼe feala ai ke felogoi lelei te kau Kilisitiano Sutea ʼo Selusalemi pea mo te kau Kilisitiano ʼae ʼe mole Sutea ʼo te ʼu kokelekasio. ʼI puleʼaki fakapotopoto leva mo lelei. ʼE mahino ia, neʼe fua lelei ki te tokalelei mo te logo tahi ʼa te hahaʼi ʼa te ʼAtua.

¹³ Neʼe fakaha ʼi te tohi ni fakatotonu ʼe mahino maʼa te kau Kilisitiano ʼae ʼe mole Sutea. Neʼe ko he ʼu fakatotonu ʼo ʼuhiga mo te silikosisio pea mo te ʼu meʼa ʼae neʼe tonu ke natou fai ke natou maʼu ai te ʼofa pea mo te tapuakina ʼa Sehova. Koʼeni tona koga maʼuhiga: “Neʼe tokoni mai te laumalie maʼoniʼoni ke matou fai te tonu ʼae ke ʼaua naʼa hilifaki atu he tahi age kavega ki te ʼu meʼa maʼuhiga ʼaeni: ke kotou fakamamaʼo mai te ʼu meʼa ʼae neʼe sakilifisioʼi ki te ʼu taula ʼatua, mo te toto, mo te ʼu manu ʼae neʼe tege pea mo te ʼu felaveʼi fakasino heʼe ʼaoga. Kapau ʼe kotou tokakaga ʼo fakamamaʼo mai te ʼu meʼa ʼaia, ʼe fua lelei anai kia koutou. ʼE matou ʼoʼofa mamahi atu!”​—Gaue 15:28, 29.

14. ʼE lava feafeaʼi te logo tahi ʼa te hahaʼi ʼa Sehova ʼi he malama ʼe mole felogoi ai te hahaʼi?

¹⁴ Ia ʼaho nei, kua toko 8 000 000 tupu te kau Fakamoʼoni ʼa Sehova ia kokelekasio ʼe 100 000 tupu ʼi te malamanei. ʼE natou logo tahi ʼi te tui pea mo te gaue. ʼE lava feafeaʼi te logo tahi ʼaia logo la te maveuveu pea mo te mole logo tahi ʼa te hahaʼi ʼi te malamanei? ʼE hoko tafito ʼuhi ko te ʼu fakatotonu ʼae ʼe mahino mo fakahagatonu ʼae ʼe foaki mai e Sesu Kilisito te Pule ʼo te kokelekasio ʼaki te “tagata kaugana agatonu mo poto,” ʼae ko te Kolesi Pule. (Mat. 24:45-47) ʼE toe hoko foki he ʼe gaue fakatahi mo fakamalotoloto te ʼu tehina ʼo te malamanei mo te Kolesi Pule.

“Neʼe Natou Fakafiafia ʼUhi Ko Te Fakalotomalohi ʼAia” (Gaue 15:30-35)

15, 16. Neʼe kotea te ikuʼaga ʼo te fihi ʼo te silikosisio pea kotea tona tupuʼaga?

¹⁵ ʼE ui ʼi te tohi ʼo Gaue ʼi te tau atu ʼa te ʼu tehina ʼo Selusalemi ki Atiokia, “neʼe natou fakatahitahiʼi te kau tisipulo katoa ʼo natou fakatoʼo age te tohi.” Neʼe malave feafeaʼi ki te ʼu tehina ʼo Atiokia te ʼu fakatotonu ʼa te kolesi pule? “ ʼI tanatou ʼosi lau, neʼe natou fakafiafia ʼuhi ko te fakalotomalohi ʼaia.” (Gaue 15:30, 31) Pea tahi ʼae, ko Sutasi pea mo Silasi “neʼe nā tokoni pea mo fakalotomalohiʼi te ʼu tehina ʼaki he ʼu akonaki.” Koia ʼae ʼe ui ai ko te ʼu tagata ʼaia ʼe lua neʼe ko he ʼu “polofeta,” ohage pe ko Palenapa mo Paulo pea mo ʼihi neʼe toe fakahigoaʼi ko te ʼu polofeta. ʼE fakaʼuhiga te kupu polofeta kia natou ʼae neʼe natou tala peʼe neʼe natou fakaha te finegalo ʼo te ʼAtua.​—Gaue 13:1; 15:32; Eke. 7:1, 2.

¹⁶ Neʼe tapuakiʼi e Sehova te ʼu puleʼaki fuli ʼae neʼe fai he neʼe iku lelei te fihi. Kotea tona tupuʼaga? Koteʼuhi neʼe foaki e te kolesi pule ni fakatotonu ʼe tasilo ʼi tona temi totonu, pea neʼe fakatafito ki te Folafola ʼa te ʼAtua pea neʼe takitaki e te laumalie maʼoniʼoni. ʼE tou toe tokagaʼi foki ia te agaʼofa ʼae neʼe fakaha ʼaki te ʼu tonu ki te ʼu kokelekasio.

17. ʼE faʼifaʼitakiʼi feafeaʼi e te ʼu taupau ʼo te siliko ia Paulo mo Palenapa mo Sutasi pea mo Silasi ia ʼaho nei?

¹⁷ ʼE mulimuli te Kolesi Pule ʼa te kau Fakamoʼoni ʼa Sehova ki te faʼifaʼitaki ʼaia ʼo ina foaki ni fakatotonu ʼi tona temi totonu ki te ʼu tehina fuli ʼi te malamanei. Ka ina fai he ʼu tonu, ʼe ina fakaha ki te ʼu kokelekasio ʼi hona aluʼaga ʼe tasilo pea mo fakahagatonu. Ohage la, ko te ʼu ʼaʼahi ʼa te ʼu taupau ʼo te siliko, ko he ʼu tehina ʼe maʼuli fakasakilifisio, ʼe natou ʼaʼahi te ʼu kokelekasio pea ʼe natou foaki ni fakatotonu ʼe tasilo mo ni fakalotomalohi ʼe fakatupu fiafia. ʼE faʼafai te ʼu tehina ʼaia ʼi te faifakamafola ohage pe ko Paulo mo Palenapa ʼo natou “faiakonaki pea mo tala te logo lelei ʼo ʼuhiga mo te folafola ʼa Sehova, fakatahi mo ʼihi atu.” (Gaue 15:35) ʼE natou tokoni pea mo fakalotomalohiʼi “te ʼu tehina ʼaki he ʼu akonaki” ohage pe ko Sutasi pea mo Silasi.

18. Kotea ʼae ʼe tonu ke fai e te hahaʼi ʼa te ʼAtua ke ina haga maʼu ia tana tapuakina?

¹⁸ Kae feafeaʼi ki te ʼu kokelekasio? Kotea ʼae ʼe feala ke natou maʼuli tokalelei ai pea mo felogoi tuʼumaʼu ʼi he malama ʼe maveuveu? Tou manatuʼi ko te tisipulo ko Sakopo ʼae neʼe ina tohi ki muli age: “Ko te poto ʼae mai ʼoluga, ʼuluaki ʼe maʼa, pea tokalelei, mo aga fakapotopoto, mo fakalogo ʼaki he lotolelei . . . Pea tahi ʼae, ko te fua ʼo te faitotonu ʼe nunusi ʼi te tokalelei maʼa natou ʼae ʼe natou kumi te tokalelei.” (Sakp. 3:17, 18) ʼE mole tou iloʼi pe neʼe manatu ki te kokelekasio ʼo Selusalemi ʼi tana tohi te ʼu manatu ʼaia. Kae ʼi tatatou vakaʼi te kapite 15 ʼo te tohi ʼo Gaue, ʼe tou tui papau ai ʼe feala pe ke maʼu te tapuakina ʼa te ʼAtua moka ʼe tou logo tahi pea mo gaue fakatahi.

19, 20. (1) Neʼe ha feafeaʼi neʼe toe maʼu e te kokelekasio ʼo Atiokia ia te tokalelei pea mo te logo tahi? (2) Kotea leva ʼae neʼe feala ke fai e Paulo pea mo Palenapa?

¹⁹ Kua toe maʼu ʼi te kokelekasio ʼo Atiokia ia te tokalelei pea mo te logo tahi. Neʼe mole fihi te ʼu tehina ʼo Atiokia pea mo te ʼu tehina ʼo Selusalemi kae neʼe natou fiafia ʼi tonatou ʼaʼahi e Sutasi pea mo Silasi. ʼE ui ʼi te Tohi-Tapu: “Neʼe nā nonofo ai ʼi he kiʼi temi. Hili ia, neʼe fakaliliu naua e te ʼu tehina ʼi te tokalelei [ki Selusalemi]d kia natou ʼae neʼe natou fekauʼi mai naua.” (Gaue 15:33) ʼE mahino ia, neʼe toe fiafia te ʼu tehina ʼo Selusalemi ʼi te fakamatala age e Sutasi pea mo Silasi ia tanā folau. Neʼe fua lelei te fakahoko ʼo tanā ʼaʼahi ʼuhi ko te ʼofa makehe ʼo Sehova.

²⁰ Neʼe nonofo ia Paulo mo Palenapa ʼi Atiokia pea neʼe feala ke nā faʼafai ʼo lagolago ki te faifakamafola. Ko te gaue ʼaia ʼe fakahoko ʼi te ʼaho nei e te ʼu taupau ʼo te siliko ʼi te ʼu kokelekasio ʼae ʼe natou ʼaʼahi. (Gaue 13:2, 3) ʼI toe tapuakina leva ki te hahaʼi ʼa te ʼAtua. Kae neʼe toe fakaʼaogaʼi mo tapuakiʼi feafeaʼi e Sehova ia te ʼu tehina faʼafai ʼaia ʼe lua? ʼE tou vakaʼi anai te faʼahi ʼaia ʼi te kapite ʼae ka hoa mai.