FEHUʼI 6
Kotea ʼae neʼe fakakikite ʼi te Tohi-Tapu ʼo ʼuhiga mo te Mesia?
LEA FAKAPOLOFETA
“Ko koe, Petelehemi Efalata, . . . ʼe haʼu anai mai ia koe ia ia ʼae ka pule maʼaku ʼi Iselaele.”
TONA FAKAHOKO
“ ʼI te ʼosi tupu ʼa Sesu ʼi Petelehemi ʼi Sutea, ʼi te temi ʼo te hau ko Helote, neʼe ʼomai he kau masi mai te potu Esite ki Selusalemi.”
LEA FAKAPOLOFETA
“ ʼE natou vaevae ʼoku mutuʼi meʼa, pea mo natou toho ke natou iloʼi pe ko ai ʼae ka ina maʼu toku kofu.”
TONA FAKAHOKO
“ ʼI te kua tutuki e te kau solia ia Sesu ki te pou, neʼe natou toʼo ʼona kofu tuʼa pea natou vae fa . . . Kae ko te kofu loto neʼe tuitahi, mai ʼoluga ki lalo. Koia, neʼe natou feuiʼaki: ‘ ʼAua naʼa tou hae, kae ke tou toho ke tou iloʼi pe ko ai ʼae ka ina maʼu.’ ”
LEA FAKAPOLOFETA
“ ʼE ina taupau ʼona hui fuli, pea neʼe mole pe la fasi hona hui ʼe tahi.”
TONA FAKAHOKO
“ ʼI tanatou fakaovi age kia Sesu, neʼe natou sisio neʼe kua mate ia, koia neʼe mole natou fasifasiʼi ai ʼona vaʼe.”
LEA FAKAPOLOFETA
“Neʼe hukiʼi ia ia ʼuhi ko ʼatatou agahala.”
TONA FAKAHOKO
“Neʼe hukiʼi tona faʼahi vakavaka e te tahi ʼi te kau solia ʼaki tana tao, pea ʼi te moʼi temi pe ʼaia, neʼe hali mai ai te toto mo te vai.”
LEA FAKAPOLOFETA
“Neʼe natou li mai ai toku totogi: neʼe ko foʼi piesi siliva ʼe 30.”
TONA FAKAHOKO
“Pea neʼe alu ki te kau pelepitelo pule ia te tahi ʼi te toko Hogofulu-ma-lua, ʼae neʼe higoa ko Sutasi Isekaliote, pea neʼe ina ui age: ‘Kotea ʼae ka kotou foaki mai anai ke au tuku atu ia ia?’ Neʼe natou tukuʼaki kia foʼi piesi siliva ʼe 30.”