Kapite 1

Ko Te Logo Tahi ʼi Te Tauhi—Koteā Tona Faka ʼUhiga Kia Koutou?

1, 2. (a) Koteā te tafitoʼaga ʼo te logo tahi ki te tauhi moʼoni ia ʼaho nei? (b) E feafeaʼi te fakamatalatala e te Tohi-Tapu te faʼahi ʼaia?

ʼE TOU sio ʼi te malamanei katoa ki he meʼa lelei ʼo ʼuhiga mo he logo tahi ki he tauhi ʼe ina fakatahiʼi te hahaʼi ʼo te ʼu fenua, te ʼu telepi, pea mo te ʼu lea kehekehe. Kae, ko tanatou logo tahi ʼe mole ko he fua ia ʼo ni fefakatokatokaʼaki ʼo he ʼu tui. ʼE mole ko he tali ia ʼo he ʼu aga māhani ʼe koviʼia e te Folafola ʼa te ʼAtua. Kae, ʼe lava feafeaʼi koa te faʼahi ʼaia? Mai tona ʼuhiga ʼaē ko te ʼu hahaʼi kehekehe ʼaenī ʼe nātou fakamoʼoni fuli ko Sehova ko te ʼAtua moʼoni pe ʼaia e tahi pea ʼe nātou lotolelei ʼo fakatonutonuʼi tonatou maʼuli ki tona ʼu ala faitotonu.—Vakaʼi te Fakahā 15:3, 4.

² Ko te fakatahi ʼaia ʼe ina fakahoko te lea faka polofeta neʼe tohi e te polofeta ko Mikea kua hili ki ai taʼu e 2 700. ʼI tana palalau ki te ʼu “ ʼaho ʼo te temi fakaʼosi,” neʼe ina tohi fēnei: “ ʼE tokolahi anai te ʼu fenua ʼe nātou ʼolo anai pea ʼe nātou ʼui anai: ‘Koutou ʼōmai, pea ke tou hake ki te moʼuga ʼo Sehova pea ki te ʼapi ʼo te ʼAtua ʼo Sakopo; pea ʼe ina akoʼi anai tatou ki tona ʼu ala, pea ʼe tou haʼele anai ʼi tona ʼu ala foufou.’ ” (Mi. 4:1, 2)a Kua hoko koa te ʼu palalau ʼaia ia ʼaho nei?

3, 4. (a) Koteā te faka ʼuhiga ʼo te ʼui ʼaē ko te ʼu “fenua” ʼe maliu kia Sehova? (b) Koteā te ʼu fehuʼi ʼaē ʼe tonu ke tou fai kia tatou takitokotahi?

³ ʼE moʼoni, ʼe mole tou mamata ki he ʼu “fenua” katoa ʼe ʼōmai ki te fale fakalaumālie ʼo Sehova, ʼaē ʼe tou atolasio ai kia te ia, kae ko te ʼu tagata mo te ʼu fafine ʼo te ʼu fenua kehekehe ʼe fakatahi ki ai. Neʼe malave ʼaupito ki tonatou ʼu loto ʼi tanatou ʼiloʼi te fakatuʼutuʼu ʼofa ʼa Sehova ʼAtua pea mo nātou ʼiloʼi tona ʼuhiga fakaofoofo ʼo ia. Koia, ʼe nātou faiga ʼaki te agavaivai ke nātou ʼiloʼi te meʼa ʼaē ʼe fakamaʼuaʼi ke nātou fai. Ko tanatou ʼu faikole ʼe hage ko te tagata tui ko Tavite, ʼaē neʼe faikole fēnei ki te ʼAtua: “Akoʼi ʼau ke ʼau fai tou finegalo, heʼe ko koe ko toku ʼAtua.” —Pes. 143:10.

⁴ ʼE koutou kau koa ki te toe hahaʼi tokolahi ʼaia ʼe atolasio kia Sehova? Ko takotou aga ki te akonaki ʼaē ʼe fai atu kia koutou, ʼe ina fakamoʼoni koa ʼe koutou ʼiloʼi ko Sehova ʼaē ko tona Matapuna? ʼE feafeaʼi koa ‘takotou haʼele ʼi tona ʼu ala foufou’?

Ko Te Logo Tahi ʼAia ʼe Feala

5. (a) ʼE feafeaʼi anai te fakahoko ʼo te logo tahi ki te tauhi? (b) He koʼe ʼe maʼuhiga ke tou liliu ko he tahi ʼe atolasio kia Sehova ʼi te temi nei, pea e feafeaʼi tatatou tokoni ki niʼihi ke nātou toe fai feiā?

⁵ Ko Sehova neʼe ina fakatuʼutuʼu ke ina fakatahiʼi fuli te ʼu meʼa popoto ʼaē neʼe ina fakatupu ʼi he tauhi e tahi; ʼe mole loto ia ke hēhē he tahi ʼi he hala peʼe haʼele fakataufā ʼi hana mole maʼu te ʼuhiga moʼoni ʼo te maʼuli. ʼE tou talitali pea mo fakaʼamu ki te ʼaho ʼaē ʼe tapuakiʼi ai anai e te hahaʼi fuli ia te ʼAtua moʼoni pe ʼaē e tahi! (Pes. 103:19-22) Kae ʼi muʼa ʼo te hoko ʼo te faʼahi ʼaia, ʼe tonu ke pulihi e te ʼAtua ia nātou ʼaē ʼe fakafisi mo manukinuki ki tana ʼafio ʼofa pea mo nātou fakatupu kovi ki te maʼuli ʼo ʼihi. ʼAki tona manavaʼofa, ʼe ina fakahā fakatomuʼa te meʼa ʼaē ka ina fai anai. ʼE feala ai ke fetogi te maʼuli ʼo te hahaʼi ʼo te potu fuli pe. Koia ʼaē ʼe fai ai te pāui fakavilivili ʼaenī ʼe fai ʼi te malamanei katoa: “Koutou manavasiʼi ki te ʼAtua pea mo faka kolōlia kia te ia, heʼe kua hoko mai te hola ʼo tana fai fakamāu, pea ke koutou atolasio kia te Ia ʼaē neʼe ina faʼu te lagi, mo te kele, mo te tai, pea mo te ʼu matapuna vai.” (Fkha. 14:6, 7) Kua koutou tali koa te fakaafe ʼaia? Kapau koia ʼaia, pea ʼe kua koutou maʼu te pilivilesio ʼi te temi nei, ʼaē ko te gāue fakatahi mo te kautahi ʼa Sehova moʼo tokoni ki niʼihi ke nātou toe fai feiā.

6. ʼI te ʼosi ʼo tatatou akoʼi te ʼu akonaki tāfito ʼo te Tohi-Tapu, ko te ʼu meʼa fea ʼaē ʼe tonu ke tou faiga fakamalotoloto ke tou fai?

⁶ ʼE mole hū ki te fakatuʼutuʼu ʼa te ʼAtua ke ina fakahū ki tana kautahi ni hahaʼi ʼe nātou ʼui ʼe nātou tui kia te ia pea mo fia maʼuʼuli ʼi te Palatiso, kae nātou haga kumi aipe tonatou ʼu lelei takitokotahi. Ko tona loto ke maʼu e te hahaʼi te “ ʼatamai mālama totonu ki tona finegalo” pea ke hā te faʼahi ʼaia ʼi tonatou maʼuli. (Kol. 1:9, 10) ʼI te ʼosi ʼo tanatou ako te ʼu akonaki tāfito ʼo te Tohi-Tapu, ko te kau Kilisitiano loto fakafetaʼi ʼe nātou fia tuputupu ʼo aʼu ki te katoa ʼo tonatou maʼuli faka Kilisitiano. ʼE nātou fia ʼiloʼi lelei ia Sehova, mo fakalahi pea mo fakaloloto aipe tanatou mālama ki tana Folafola pea ke hā katoa ʼi tonatou maʼuli. ʼE nātou faiga ke nātou faʼifaʼitaki ki tanatou Tāmai ʼaē ʼi Selo ʼo nātou maʼuliʼi tona ʼu kalitate pea mo nātou sio ki te ʼu meʼa ohage ko tana sio ʼa ia totonu. Ko te meʼa ʼaia ʼe ina uga ia nātou ke nātou kumi peʼe feafeaʼi te fakalahi ʼo te gāue ʼaē ʼe loto te ʼAtua ke hoko ʼi te malamanei ia ʼaho nei. ʼE koutou fai koa te faʼahi ʼaia?—Ef. 5:1; Hep. 5:12 ki te 6:3; 1 Tim. 4:15.

7. Koteā te meʼa ʼaē ʼe tonu ke tou fai ke tou maʼu ai te logo tahi ʼi te tauhi, pea koteā ʼaē ʼe faka fealagia te faʼahi ʼaia?

⁷ ʼE fakahā mai e te Tohi-Tapu ko nātou ʼaē ʼe kaugana kia Sehova ʼe tonu ke nātou liliu ko te hahaʼi ʼe logo tahi. (Ef. 4:1-3) Ko te logo tahi ʼaia ʼe tonu ke maʼu ʼi te temi nei, tatau aipe peʼe tou maʼuʼuli ʼi he mālama maveuveu pea mo tou tauʼi tuʼumaʼu ʼotatou ʼu vaivai aga. Neʼe faikole fakamalotoloto ia Sesu ke logo tahi tana kau tisipulo, pea mo nātou maʼuʼuli ʼi te logo tahi moʼoni. Koteā tona faka ʼuhiga? ʼUluaki, ʼe nātou vāhaʼa lelei anai mo Sehova pea mo tona ʼAlo, pea lua leva, ʼe nātou liliu anai ʼo felogoi tahi. (Soane 17:20, 21) ʼE feala ke nātou fai te faʼahi ʼaia ʼi te temi nei mo kapau ʼe nātou maʼuliʼi te akonaki ʼaē neʼe foaki age ʼi te “fale” ʼo Sehova.

Te ʼu Faʼahiga Meʼa Fakatupu Logo Tahi

8. (a) Koteā te meʼa ʼaē ʼe tuputupu ia tatou mo kapau ʼe tou fakaʼaogaʼi te Tohi-Tapu moʼo vakaʼi takitokotahi ʼo he ʼu fehuʼi ʼo ʼuhiga mo tatou? (b) ʼI takotou tali ki te ʼu fehuʼi ʼaē ʼe tuʼu ʼi ʼoluga, koutou vakaʼi te ʼu faʼahiga meʼa kehekehe ʼaē ʼe tokoni ki te logo tahi faka Kilisitiano.

⁸ Ko te ʼu faʼahiga meʼa tāfito ʼaē ʼe fakatupu logo tahi ʼe tuʼu ʼi lalo. Ka koutou lau anai te ʼu fehuʼi ʼo ʼuhiga mo te ʼu faʼahiga meʼa kehekehe ʼaia, koutou fakakaukauʼi peʼe feafeaʼi te lave ʼo te ʼu manatu ʼaia ki takotou ʼu felogoi mo Sehova pea mo te kau Kilisitiano. Kapau ʼe koutou fakakaukauʼi te ʼu manatu ʼaia ʼo mulimuli pe ki te ʼu kogaʼi tohi ʼaē ʼe fakaʼaogaʼi, pea ʼe tuputupu ai anai takotou fealagia ʼaē ʼi te fakakaukau pea mo takotou fakasiosio tonu ʼo mulimuli ki te meʼa ʼaē ʼe loto ki ai te ʼAtua, ʼe ko he ʼu kalitate ia ʼe ʼaoga tāfito kia tatou fuli. (Taag. 5:1, 2; Filp. 1:9-11) Koutou vakaʼi takitahi te ʼu faʼahiga meʼa ʼaia:

(1) ʼE tou atolasio fuli kia Sehova pea ʼe tou fakamoʼoni ko ia ʼaē ʼe tonu ke ina fakatuʼu te ʼu lekula ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi.

Koteā anai te manatu ʼa Sehova mo kapau ʼe mole tou fia fakaʼaogaʼi tana ʼu tokoni ʼo ʼuhiga mo he puani ʼe tou ʼui ʼe mole faʼa maʼuhiga? (Luka 16:10; vakaʼi Malakia 1:6-8.)

Kapau ʼe mole koutou fakalogo tuʼumaʼu ki te ʼu lao ʼa Sehova, ʼe feala koa ke fua kovi ki niʼihi? (Vakaʼi ia Loma 5:12; Sosue 7:20-26; 1 Hau 14:16.)

(2) ʼI he potu pe ʼo te malamanei ʼe tou maʼuʼuli ai, ʼe tou maʼu ia te Folafola ʼa te ʼAtua moʼo taki ʼo tatou.

Kapau ʼe tou fai he tonu, koteā te tuʼutāmaki ʼe feala ke hoko kia tatou mo kapau ʼe tou fai pe te meʼa ʼaē ʼe tou “manatu” ʼe totonu? (Sel. 17:9; Taag. 14:12)

Kapau ʼe mole tou ʼiloʼi te tokoni ʼa te Tohi-Tapu ʼo ʼuhiga mo he faʼahiga meʼa, koteā koa te meʼa ʼe tonu ke tou fai? (Taag. 2:3-5)

(3) ʼE tou maʼu fuli pe te meʼa kai fakalaumālie e tahi.

E feafeaʼi te ʼuhiga ʼo nātou ʼaē ʼe mole nātou leleiʼia te ʼu fakatuʼutuʼu ʼaē neʼe fai e Sehova moʼo fafaga ʼaki ʼo tatou ʼi te faʼahi fakalaumālie? (Vakaʼi ia Isaia 1:3; 9:16; 65:14.)

(4) Ko Sesu Kilisito ʼe ko totatou Takitaki, kae mole ko he tagata, pea ʼaki ia ia tokotahi pe, ʼe feala ai ke tou fakaōvi kia Sehova ʼo tou atolasio ki ai.

ʼE ʼi ai koa he tahi ia tatou ʼe ina maʼu he tupuʼaga lelei ke ina ʼui ai ʼe lahi age ia ʼi niʼihi? (Lom. 3:23, 24; 12:3; Mat. 23:8-10)

(5) ʼI he potu pe ʼe tou maʼuʼuli ai, ʼe mahino kia tatou, ko te Puleʼaga ʼo te ʼAtua ʼe ko te falalaʼaga pe ʼaia e tahi ki te malamanei katoa.

E feafeaʼi he puipui ʼo tatou e te manatu ʼaia, mai te ʼu faʼahiga meʼa fakatupu logo kehekehe? (Mat. 6:9, 10; Mi. 4:3)

(6) Ko te laumālie maʼoniʼoni ʼe ina fakatupu ʼi te kau atolasio ʼa Sehova te ʼu kalitate ʼe ʼaoga tāfito ki te logo tahi faka Kilisitiano.

ʼE feafeaʼi tatatou faka fealagia ki te laumālie ʼo te ʼAtua ke ina fakatupu ia tatou tona ʼu fua? (Pes. 1:2; Taag. 22:4; Fkha. 3:6; Ga. 5:32)

Koteā anai te faka ʼuhiga ʼo te ʼu fua ʼo te laumālie ki totatou vāhaʼa mo Sehova pea mo ʼotatou ʼu tēhina? (Kal. 5:22, 23)

(7) Ko totatou maʼua ʼo tatou fuli ko te faka mafola ʼo te logo lelei ʼo te Puleʼaga ʼo te ʼAtua.

Koteā te meʼa ka hoko mokā ʼe tou kaugā gāue mālohi ʼi te fai faka mafola mo ʼotatou ʼu tēhina? (Vakaʼi ia Kolose 4:7, 11.)

9. Koteā te ʼu fua ʼe tou maʼu mo kapau ʼe tou maʼuliʼi moʼoni te ʼu moʼoni ʼaia ʼi totatou maʼuli?

⁹ ʼE kehe pe anai te fakamoʼoni ki te ʼu manatu ʼaenī. Pea ʼe toe kehe pe anai te maʼuliʼi ʼo te ʼu manatu ʼaia. Kae, kapau ʼe tou fai te faʼahi ʼaia pea ʼe loloto ai anai totatou vāhaʼa mo Sehova. Ko tatatou fakatahi mo ʼotatou tēhina ʼe ko he meʼa fakaloto mālohi kia tatou. Ohage ko tatatou lau ia Pesalemo 133:1: “Koutou sisio! ʼE ko he meʼa lelei pea mo lave lelei ki he ʼu tēhina hanatou nonofo fakatahi ʼi te logo tahi!” Neʼe mole koutou logoʼi takitokotahi koa la ko he toe fakaloto mālohi, ia takita mavae mai te mālama ʼaē ʼe manatu pe kia ia, ʼo fakatahi ʼi te ʼu fono mo nātou ʼaē ʼe ʼoʼofa moʼoni kia Sehova?

Koutou Līaki Te ʼu Meʼa Fakatupu Logo Kehekehe

10. He koʼe ʼe tonu ke tou tokakaga ke feala ai hatatou līaki te loto faʼifaʼitaliha?

¹⁰ ʼE tonu ke tou līaki ki te ʼu meʼa ʼaē ʼe fakatupu logo kehekehe ki te logo tahi mo kapau ʼe mole tou loto ke tou maumauʼi te logo tahi maʼuhiga ʼaupito ʼaia. Ko te loto faʼifaʼitaliha ʼe kau ki te ʼu tupuʼaga tāfito ʼo te logo kehekehe. Kae ʼe tokoni ia Sehova kia tatou ke tou līaki te manatu ʼaia, ʼo ina fakahā mai tona tupuʼaga, ko Satana te Tevolo. Ko ia ʼaē neʼe ina fakahalaʼi ia Eva ʼaki tana ʼui age ʼaē ʼe lelei age tana mole tokagaʼi te meʼa ʼaē neʼe ʼui age e te ʼAtua pea ke faʼifaʼitaliha ia ʼi te takitaki ʼo tona maʼuli. Neʼe muliʼi e Atama tana agatuʼu, ʼo tupu ai la tona malaʼia ʼo feiā mo tatou. (Sen. 2:16, 17; 3:1-6, 17-19) ʼE tou maʼuʼuli ʼi te mālama ʼe mālohi ʼaupito ai te loto faʼifaʼitaliha, koia ʼaē ʼe mole tonu ai ke tou punamaʼuli mo kapau ʼe tonu ke tou tekeʼi te manatu ʼaia ke ʼaua naʼa ia tatou. ʼE tokoniʼi tatou e Sehova ʼaki te ʼofa ʼo ina tuku mai he ʼu tokoni ʼaki tana kautahi.

11. Koteā ʼaē ka ina fakahā anai ʼe tou teuteu fakamalotoloto ke tou maʼuli ʼi te mālama foʼou faitotonu ʼaē neʼe fakapapauʼi mai e te ʼAtua?

¹¹ ʼAki te kautahi ʼaia neʼe tou ʼiloʼi ai te fakapapau taulekaleka ʼa Sehova, ʼaē ko te pulihiʼi ʼo te tuʼu ʼaenī ʼe tou maʼuʼuli ai, kae fetogi ʼaki he ʼu lagi foʼou pea mo he kele foʼou ʼaē “ ʼe tonu ke maʼu ai te faitotonu.” (2 Petelo 3:13) ʼE tou fiafia foki ʼi tatatou ʼiloʼi ʼaē kua vave pulihi te mālama kovi ʼaenī, pea ʼe liliu anai te kele ko he Palatiso. Kae ʼe hā koa ʼi totatou maʼuli ʼe tou teuteu fakamalotoloto ke tou maʼuʼuli ʼi he mālama faitotonu? ʼE ʼui fakalelei mai e te Tohi-Tapu kia tatou: “ ʼAua naʼa koutou manako ki te malamanei mo te ʼu meʼa ʼaē ʼi te malamanei. Kapau ʼe ʼi ai he tahi ʼe manako ki te malamanei, ko te ʼofa ki te Tāmai ʼe mole ia te ia.” (1 Soane 2:15) ʼE moʼoni ko te mālama ʼe ina fakahā mai tona ʼu faʼahiga agaaga kehekehe ʼe mole fia fai ki ai he tahi ia tatou. Kae ʼe tou fehiʼa pe koa ki te meʼa ʼaē ʼi te mālama ʼaenī, ʼaē ʼe mole feala ke tou fiafia ai? Peʼe tou toe līaki koa mo tona loto, ʼaē ko te loto faʼifaʼitaliha pea mo te tahi manatu pe ʼaē kia kita? ʼE tou fakamāmāhani fakamalotoloto koa ʼo fagono kia Sehova pea mo fakalogo ki ai ʼaki totatou loto katoa, tatau aipe, peʼe fakafeagai kiai te ʼu holi ʼo totatou kakano? Ko totatou maʼuli katoa,—ʼi he potu pe ʼe tou maʼuʼuli ai, pe ko he meʼa pe ʼe tou fai,—ʼe tonu anai ke ina fakamoʼoni ko ʼatatou ʼu manatu pea mo te ʼu meʼa ʼaē ʼe tou loto kiai, ʼe tupu mai tatatou tokagaʼi e te ʼAtua.—Taag. 3:5, 6.

12. (a) He koʼe ʼe maʼuhiga tatatou tali ʼi te temi nei te faigamālie ʼaē ʼe foaki mai ke tou ako te ʼu ala ʼo Sehova, pea ke tou muliʼi ʼi totatou maʼuli? (b) Koteā te faka ʼuhiga ʼo te ʼu vaega ʼaē ʼi te palakalafe kia tatou takitokotahi?

¹² Ka hoko mai anai te temi ʼaē kua faka katofa e Sehova ke ina fakaʼauha ai te tuʼu agakovi ʼaenī pea mo nātou ʼaē ʼe manako kiai, ʼe mole ina toe holo atu anai ki he tahi temi. ʼE mole ina toe fakatuatuai anai ia te temi ʼaē ʼe tonu ke hoko ai, pea mo fetogi te ʼu lekula ke leleiʼia e nātou ʼaē kei fia pipiki ki te malamanei, pea ʼuhi ko te vaelua ʼo tonatou loto, ʼe nātou lotolotolua anai ʼi te ako pea mo te fai ʼo te finegalo ʼo te ʼAtua. ʼI te temi nei kua tonu ke tou gaūgaūe! (Luka 13:23, 24; 17:32; 21:34-36) ʼI meʼa fakaloto mālohi foki, hatatou sio ki he “toe hahaʼi tokolahi” ʼe nātou tali te faigamālie ʼaē ʼe foaki age e Sehova ke nātou kumi fakamālohi te akonaki ʼaē ʼe ina tuku mai ʼaki tana kautahi ʼaē ʼe takitaki ʼaki te ʼofa pea mo nātou haʼele fakatahi ʼi tona ʼu ala foufou!

[Nota]

Toe Fakamanatu

● Koteā te fakatuʼutuʼu ʼa Sehova ʼo ʼuhiga mo te tauhi?

● ʼI te ʼosi ʼo tatatou akoʼi te ʼu akonaki tāfito ʼo te Tohi-Tapu, ko te ʼu meʼa fea ʼaē ʼe tonu ke tou faiga fakamalotoloto ke tou fai?

● Koteā te meʼa ʼe feala ke tou fai takitokotahi, ke uga fakamālohi ai totatou maʼuli e te ʼu faʼahiga meʼa ki te logo tahi ʼaē neʼe tou palalau ki ai?