Kapite 114

Te Taumafa Fakamanatu

ʼI TANA ʼosi fufulu te ʼu vaʼe ʼo tana kau ʼapositolo, neʼe lau e Sesu te koga tohi ʼo Pesalemo 41:9, ʼo ʼui maʼana: “Ko ia ʼaē neʼe kai ki taku pane kua ina hiki ake tona muliʼi vaʼe kia te ʼau.” Pea, ʼi te hoha ʼo tona loto, neʼe ina fakamahino age: “ ʼE ʼi ai te tokotahi ia koutou ʼe ina fakatau anai ʼau.”

Kua kamata lotomamahi te kau ʼapositolo pea nātou tahi kamata fehuʼi kia Sesu: “ ʼE ko ʼau koa?” Māʼia mo Sutasi Isikaliote neʼe ina fai age te fehuʼi ʼaia. Ko Soane, ʼaē ʼe nofo ʼi te laupapa ia tafa ʼo Sesu, neʼe falele atu ki muli ʼo fehuʼi ki ai: “ ʼAliki, ko ai?”

Neʼe tali age e Sesu: “Ko te tokotahi ʼi te toko hogofulu-ma-lua, ʼaē ʼe ina peke mo ʼau ki te pa fakatahi. ʼIo, ko te Foha ʼo te tagata ʼe ʼalu, ohage pe ko te meʼa kua tohi ʼo ʼuhiga mo ia, kae malaʼia ki te tagata ʼaē ʼe fakatau ai te Foha ʼo te tagata! Neʼe lelei age pe ki te tagata ʼaia ke ʼaua naʼa tupu.” ʼOsi pe ʼaia, pea toe hū ia Satana kia Sutasi ʼaki te faigamālie ʼaē ʼo te kua liliu ʼo tona loto, ʼo agakovi, ʼo ava ai kia te ia. Ki muli age ʼi te afiafi ʼaia, neʼe fakahigoaʼi e Sesu ia Sutasi “ko te foha ʼo te fakaʼauha”.

ʼI te temi nei, ʼe ina ʼui age kia Sutasi: “Ko te meʼa ʼaē ʼe ke fai, foimo fai fakavilivili.” ʼE mole he tahi ʼi te kau ʼapositolo ʼe mahino ki tana palalau ʼaia. Neʼe manatu e ʼihi, ʼuhi ko te nofo ʼa Sutasi mo te falā, neʼe ʼui age e Sesu ki ai: “Totogi te ʼu meʼa ʼaē ʼe ʼaoga kia tatou ki te lafeti”, peʼe tonu ke ʼalu ia ʼo foaki he meʼa ki te kau masiva.

ʼI te mavae atu ʼa Sutasi, neʼe fakatuʼu e Sesu mo tana kau ʼapositolo agatonu te toʼotoʼoga, peʼe ko he fakamanatu, ʼe ko he meʼa foʼou ia. Neʼe ina toʼo te pane, pea ina fai te kole fakafetaʼi, pea ina tofitofi te pane, pea ina foaki kia nātou ʼo ʼui maʼana: “Koutou toʼo, ʼo kai.” Pea ina fakamahino age: “Ko te fakatātā ʼaenī ʼo toku sino, ʼaē ʼe tonu ke foaki maʼa koutou. Koutou haga fai te meʼa ʼaenī moʼo fakamanatu kia te ʼau.”

ʼI tanatou ʼosi kai fuli te pane, neʼe toʼo e Sesu te ipu vino, e lagi ko te ipu fā ʼaia ʼo te taumafa faka pāsikate pea ina toe fai foki te fakafetaʼi, pea ina foaki kia nātou pea ina ʼui age ke nātou ʼinu, ʼo ʼui maʼana: “Ko te ipu ʼaenī ʼe ina fakatātā te fuakava foʼou ʼo ʼuhiga mo toku taʼataʼa, ʼaē ʼe tonu ke liligi maʼa koutou.”

Koia, neʼe ina fakatuʼu ai te fakamanatu ʼo tona mate. ʼI te taʼu fuli, ʼi te ʼaho 14 ʼo Nisani, ʼe tonu anai ke fai te fakamanatu ʼaia, ohage ko tona ʼui e Sesu, moʼo fakamanatu kia te ia. ʼE ina fakamanatu anai kia nātou fuli ʼaē ʼe nātou fai te toʼotoʼoga ʼaia te meʼa ʼaē neʼe fai e Sesu pea mo tana Tāmai ʼe ʼi selo moʼo faka fealagia ki te hahaʼi katoa ke nātou hāo mai te tautea ki te mate. Ki te kau Sutea ʼaē ʼe liliu anai ko te ʼu tisipulo ʼa Kilisito, ko te ʼaho fakamanatu ʼaia ʼe ina fetogi anai te Pāsikate.

Ko te fuakava foʼou, ʼaē neʼe fakatuʼu ʼaki te liligi ʼo te taʼataʼa ʼo Sesu, ʼe ina fetogi te fuakava ʼāfea, ʼaē ʼo te Lao. Ko Sesu ko te tagata fakafelogoi ʼo te fuakava ʼaia ʼaē neʼe fai e te ʼu faʼahi e lua: ko te tahi faʼahi, ko Sehova ʼAtua, pea ko te tahi faʼahi, ko te toko 144 000 kilisitiano ʼaē kua fakanofo ʼaki te laumālie maʼoniʼoni. ʼO mole gata ʼaki pe tana faka fealagia te fakamolemole ʼo te ʼu agahala, ko te fuakava ʼaia ʼe ina faka fealagia te faʼufaʼu ʼo he Puleʼaga ʼi selo ʼo he kau hau-pelepitelo. Mateo 26:21-29; Maleko 14:18-25; Luka 22:19-23; Soane 13:18-30; 17:12; 1 Kolonito 5:7.

▪ Neʼe lau e Sesu te lea faka polofeta ʼo te Tohi-Tapu ʼo ʼuhiga mo te kaumeʼa: koteā te lea faka polofeta ʼaia, pea ʼe ina faka ʼuhiga feafeaʼi?

▪ He koʼe neʼe lotomamahi ʼaupito te kau ʼapositolo, pea koteā te fehuʼi ʼe nātou fai takitahi?

▪ Koteā ʼaē neʼe ʼui age e Sesu kia Sutasi ke ina fai, kae ʼe mahino feafeaʼi kia nātou ʼaē te fakatotonu ʼaia?

▪ Koteā te fakamanatu ʼaē neʼe fakatuʼu e Sesu ʼi te ʼosi mavae ʼa Sutasi, pea koteā tona tupuʼaga?

▪ Ko ai te ʼu faʼahi ʼaē e lua neʼe nā fai te fuakava foʼou? Koteā te meʼa ʼaē ʼe faka fealagia e te fuakava ʼaia?