Kapite 122

Iā Pilato Pea Mo Helote

NEʼE mole faiga ia Sesu ke ina fufū kia Pilato ko ia ko te hau, kae ʼe ina fakamahino age ko tona Puleʼaga ʼe mole ina fakatupu he tokakovi ki te puleʼaga Loma. “Ko toku puleʼaga ʼe mole kau ia ʼi te mālama ʼaenī, ko tana ʼui ʼaia. Ka na pau la neʼe kau toku puleʼaga ʼi te mālama ʼaenī, neʼe tau taku hahaʼi ke ʼaua naʼa ʼave ʼau ki te kau Sutea. Kae koʼeni, ko toku puleʼaga ʼe mole haʼu ia mai ai.” Koia, neʼe tuʼa tolu te fakamoʼoni e Sesu ʼe ʼi ai tona puleʼaga, kae ʼe mole ko he puleʼaga ʼi te kele.

Kae, ʼe toe fakakinau pe ia Pilato: “Pea ta ʼe ko koe ʼe ke hau?” ʼI tona tahi faʼahiga ʼui, ʼe ko koe koa ko he hau, tatau aipe pe ʼe mole kau tou puleʼaga ʼi te mālama ʼaenī?

Neʼe fakahā e Sesu kia Pilato kua ina fai te palalau ʼaē ʼe tonu, ʼaki tana tali ʼaenī: “Ko koe tonu ʼe ke ʼui ʼe ʼau hau. Neʼe ʼau tupu ko te potu ʼaenī, pea neʼe ʼau haʼu ki te malamanei ko te potu ʼaenī: ko te fakamoʼoni ki te moʼoni. Ko ʼaē ʼe kau ki te faʼahi ʼo te moʼoni, ʼe fakalogo ki toku leʼo.”

ʼIo, ko te tupuʼaga ʼo te maʼuli ʼo Sesu ʼi te kele ʼe ko te fakamoʼoni ki “te moʼoni”, kae tāfito ia te moʼoni ʼaē ki tona Puleʼaga. ʼE lavaʼi e Sesu tana nofo agatonu ki te moʼoni ʼaia, tatau aipe pe ʼe mate ai. “Koteā te moʼoni?” ko te fehuʼi ʼaia ʼa Pilato, kae neʼe mole talitali ia ki he tahi ʼu fakamatala. Kua ina feʼaugaʼia te ʼu meʼa ʼaē neʼe logo kiai ke ina fai ʼaki he fakamāu.

Neʼe toe liliu ia Pilato ki te hahaʼi ʼaē ʼe talitali mai tuʼa. Pea, ʼi te ʼiloga mai ʼaē ʼe tuʼu ia Sesu ʼi ʼona tafa, neʼe ʼui maʼana ki te kau pelepitelo pule pea mo nātou ʼaē neʼe kaugā ʼōmai fakatahi mo nātou: “ ʼE mole ʼau maʼu he hala ʼi te tagata ʼaenī.”

ʼI tonatou ʼiʼita ʼi te tonu ʼaia, neʼe fakaʼoʼono te hahaʼi, ʼo ʼui maʼa nātou: “ ʼE ina faka agatuʼu te hahaʼi ʼaki tana fai akonaki ʼi Sutea katoa, ʼo toe feiā aipe mai Kalilea, ʼaē neʼe ina kamata ai ʼo aʼu mai ki henī.”

Ko te loto fakavalevale ʼo te kau Sutea neʼe lagi punamaʼuli ʼaupito ai ia Pilato. Koia, ʼi te lolotoga ʼo te kalaga ʼa te kau pelepitelo pule pea mo te kau tagata ʼāfea, neʼe maliu age kia Sesu pea ʼui maʼana ki ai: “ ʼE mole ke logo koa la koe ki te tuʼuga meʼa ʼaē ʼe nātou fakamoʼoni ʼo fakafeagai kia te koe?” Kae neʼe mole faigaʼi pe la e Sesu ke ina tali kiai. Ko tana nofo fakaʼaoʼaoganoa ʼaē ʼi te fai kia ia ʼo te ʼu fakakovi fakavalevale ʼaia neʼe punamaʼuli ʼaupito ai ia Pilato.

ʼI tana hoki ʼiloʼi ʼaē ko Sesu ko te Kalilea, neʼe manatu ia Pilato kua ina maʼu he puleʼaki ke ʼāteaina ai mai te ʼu meʼa fuli ʼe fai ki ai. ʼI te nofo ʼa te kovana ʼo Kalilea ia Helote Atipasi (foha ʼo te Helote Lahi), ʼi Selusalemi ki te Pāsikate, neʼe ina fekau ke ʼave ia Sesu ki ai. Ki muʼa atu, neʼe haga ia Helote ʼo fekau ke tuʼusi te ʼulu ʼo Soane Patita pea ʼi tana logo ʼaē ki te ʼu milakulo neʼe fai e Sesu, neʼe mataku ai ia, he neʼe manavasiʼi naʼa ko Sesu ʼe ko Soane neʼe fakatuʼuake mai te mate.

ʼI te temi nei, kua fiafia Helote ʼi tana ʼamanaki ʼaē ke sio kia Sesu. ʼE mole tupu ia ko hana hoha ʼo ʼuhiga mo te meʼa ʼaē ka hoko kia Sesu peʼe ko hana fia ʼiloʼi moʼoni pe ko te ʼu fakakovi ʼaē neʼe fai ʼo ʼuhiga mo ia pe ʼe moʼoni peʼe loi. Kailoa, ko taʼana pe fia mamata ki ai, pea mo tona loto ʼaē ke sio ki hana fai he ʼu milakulo.

Kae, neʼe mole fia fakafimālie e Sesu te loto ʼo Helote. Koia, ʼi tona fakafehuʼi ʼaē e Helote, neʼe mole gū tuʼa tahi ia. ʼI te mole hoko ʼo te meʼa ʼaē neʼe nātou loto kiai, neʼe manukinuki ai ia Helote pea mo tana kau solia kia ia. Neʼe nātou fakakofuʼi ia ia ʼaki te kofu gigila pea nātou fakakataʼi. Pea ʼosi ʼaia pea nātou toe fakaliliu ia ia kia Pilato. Ko Pilato pea mo Helote, ʼaē ki muʼa atu neʼe fefiliʼaki, neʼe nā liliu leva ʼo kaumeʼa lelei ʼi te ʼosi ʼo te meʼa ʼaia.

ʼI te toe liliu mai ʼa Sesu, neʼe fekauʼi e Pilato te kau pelepitelo pule, te kau pule ʼo te kau Sutea pea mo te hahaʼi ke ʼolo age kia ia, pea ʼui maʼana kia nātou: “Neʼe koutou ʼaumai te tagata ʼaenī ohage ko he tahi ʼe ina uga te hahaʼi ki te maveuveu, pea koʼeni neʼe ʼau fakafehuʼi ia ia ʼi ʼokotou muʼa, kae neʼe mole ʼau maʼu pe la he meʼa ʼi te tagata ʼaenī ʼe ina fakamoʼoni takotou ʼu fakakovi ʼaē ʼo ʼuhiga mo ia. Pea neʼe toe feiā aipe mo Helote, he neʼe ina toe fakaliliu mai, pea koʼeni ʼe mole ʼi ai he meʼa neʼe ina fai ʼe tonu ai ke matehi ia ia. Koia ʼe ʼau tautea anai ia ia pea ʼe ʼau toe tuku age anai.”

Koia, neʼe tuʼa lua te tala e Pilato ko Sesu ʼe mole hana hala. Neʼe loto ʼaupito ia ke ina fakahāo ia ia, he neʼe mahino kia ia neʼe ko te fuaʼā pe ʼo te kau pelepitelo pule ki ai ʼaē neʼe nātou ʼavage ai kia ia. ʼI tana faiga ʼaē ke ina fakahāo ia Sesu, neʼe ʼi ai mo te tahi meʼa ʼe mālohi age neʼe ina toe fakauga ia ia ki te faʼahi ʼaia. Koteʼuhi, ʼi te lolotoga ʼo tana nofo ʼi te telepinale, neʼe fekauʼi age e tona ʼohoana te fekau ʼaenī ki ai: “ ʼAua naʼa ke kau ʼi he meʼa ʼe fai ki te agatonu ʼaenā, he neʼe ʼau mamahi lahi ʼi te ʼaho nei ʼi te misi [e lagi ko he misi mai te ʼAtua], ʼuhi ko ia.”

ʼE ʼiloʼi e Pilato ʼe tonu ke ina fakahāo te tagata ʼaia heʼe mole hana hala. Kae feafeaʼi? Soane 18:36-38; Luka 23:4-16; Mateo 27:12-14, 18, 19; 14:1, 2; Maleko 15:2-5.

▪ Neʼe feafeaʼi te tali ʼa Sesu ki te fehuʼi ʼaē ki tona ʼuhiga hau?

▪ Ko te “moʼoni” fea ʼaē neʼe fakamoʼoni kiai ia Sesu ʼi te lolotoga ʼo tona maʼuli ʼi te kele?

▪ Koteā te fakamāu ʼaē neʼe fai e Pilato, pea neʼe feafeaʼi te aga ʼa te hahaʼi, pea koteā te meʼa neʼe fai e Pilato ʼo ʼuhiga mo Sesu?

▪ Ko ai ia Helote Atipasi, he koʼe neʼe fiafia ʼi tana sio ʼaē kia Sesu, pea koteā te meʼa neʼe ina fai ki ai?

▪ He koʼe neʼe loto ʼaupito ia Pilato ke ina fakahāo ia Sesu?