Kapite 5

Te Tupu ʼo Sesu: ʼIfea Pea Neʼe Hoko ʼAnafea?

KO TE tuʼi ʼo Loma, ia Sesale Aukusito neʼe ina fakatotonu ke tahi ʼalu tana hahaʼi fakalogo ʼo tohi ia nātou ʼi te kolo neʼe nātou tutupu ai. Koia neʼe ʼalu ai Sosefo ki Petelehemi, he neʼe tupu ia ʼi te kolo ʼaia.

Neʼe tokolahi te hahaʼi neʼe ʼolo ʼo tohi ʼi Petelehemi, pea ko te koga meʼa pe ʼaē e tahi neʼe maʼu e Malia mo Sosefo ke nā nonofo ai ko te fale manu. Pea ko te fale manu ʼaia, ʼaē ʼe ʼai kiai te ʼu asino pea mo te tahi ʼu manu, ʼaē neʼe tupu ai ia Sesu. Neʼe kofukofu te tamasiʼi e Malia ʼaki te ʼu kie pea ina fakatakoto ki te kaiʼaga ʼo te faga manu.

ʼE mahino papau ia ko te ʼAtua ʼaē neʼe ina uga ia Sesale Aukusito ke ina fakatotonu te tohi ʼo te hahaʼi. ʼIo, ʼaki te fai ʼo te meʼa ʼaia neʼe tupu ai ia Sesu ʼi Petelehemi, te kolo ʼaē neʼe kua fualoa ʼaupito tona tuhiʼi e te Tohi-Tapu ko te kolo ʼaia ka tupu ai anai te pule ʼaē ʼe tonu ke haʼu.

Ko te po ʼaia ʼe faikehe ʼosi. ʼI tuʼa, ʼi te ʼu gāueʼaga e fokifā pe kua gigila te mālama ia tafa ʼo te kau tauhi ōvi. Ko te kolōlia ia ʼo Sehova! Pea tala age e te ʼaselo ʼa Sehova kia nātou: “ ʼAua naʼa koutou manavasiʼi, heʼe koʼeni ʼe ʼau fakahā atu kia koutou te logo lelei ʼo he fiafia lahi ka maʼu anai e te hahaʼi fuli, heʼe ʼi te ʼaho nei, ʼi te kolo ʼo Tavite, kua tupu tokotou Fakamaʼuli, ko Kilisito te ʼAliki. Pea koʼeni te fakaʼiloga kia koutou: ʼe koutou maʼu anai he kiʼi tamasiʼi ʼe kofukofu ʼaki te ʼu kie pea ʼe fakatakoto ia ʼi te kaiʼaga manu.” Pea fokifā pe, kua hā mai te tahi kau ʼaselo tokolahi, pea nātou hiva fakavikiviki ki te ʼAtua ʼo ʼui maʼa nātou: “Kolōlia ki te ʼAtua ʼi ʼoluga, pea fīmālie ʼi te kele ki te ʼu tagata ʼo te finegaloʼofa!”

ʼI te mavae ʼa te kau ʼaselo, neʼe feʼuiʼaki e te kau tauhi ōvi: “Tou ʼolo ki Petelehemi ʼo vakaʼi te meʼa ʼaenī kua hoko, ʼaenī kua fakahā mai kia tatou e Sehova.” Pea, nātou ʼolo fakavilivili atu aipe, pea nātou maʼu tonu atu pe ia Sesu ki te koga meʼa ʼaē neʼe tala age e te ʼaselo kia nātou. ʼI te fakahā age e te kau tauhi ōvi te ʼu palalau ʼa te ʼaselo, neʼe punamaʼuli ia nātou ʼaē neʼe logo kiai. Ka neʼe taupau e Malia te ʼu talanoa ʼaia, pea neʼe ʼofa mamahi ia kiai ʼi tona loto.

Ia ʼaho nei, ʼe lahi ia nātou ʼe nātou tui ko Sesu neʼe tupu ʼi te ʼaho 25 ʼo tesepeli. Kae, ko te māhina ʼaia ko tesepeli, ʼe ʼua pea ʼe momoko ʼi Petelehemi. Ko te kau tauhi ōvi ʼe mole feala hanatou nonofo ʼi tuʼa ʼi te pōʼuli mo tanatou ʼu faga manu ʼi te temi ʼaia ʼo te taʼu. Pea tahi, neʼe mole feala foki ke fakatotonu e te tuʼi ʼo Loma ki he hahaʼi e teitei pe ke nātou mafuta tau kia ia ke nātou fai fagona ʼi te lolotoga ʼo te nive ki he tohi ʼonatou. ʼE ʼiloga lelei mai ia ko Sesu neʼe tupu ʼi te fakaʼosi ʼo te temi vela ʼo te taʼu ʼaia. Luka 2:1-20; Mikea 5:2.

▪ He koʼe neʼe ʼolo ia Sosefo pea mo Malia ki Petelehemi?

▪ Koteā te meʼa faikehe neʼe hoko ʼi te po ʼaē neʼe tupu ai Sesu?

▪ He koʼe ʼe tou ʼiloʼi ko Sesu neʼe mole tupu ʼi te ʼaho 25 ʼo tesepeli?