Kapite 60

Ko Te Hā ʼo Te Kolōlia ʼo Kilisito ʼi Tona Puleʼaga

ʼI TANA kaku ʼaē ki te potu fenua ʼo Sesalea ʼo Filipo, neʼe kamata fai akonaki ai Sesu ki te hahaʼi e tokolahi, ʼo kau ai foki mo tana kau ʼapositolo. Neʼe ina fakahā age kia nātou te meʼa fakapuna’maʼuli: “ ʼE ʼau tala moʼoni atu kia koutou: ko ʼihi ia nātou ʼaenī ʼe tutuʼu ʼi henī, ʼe mole nātou tomuʼa mamate anai ka heʼeki nātou mamata muʼa ki te Foha ʼo te tagata ʼe haʼu ʼi tona puleʼaga.”

‘Koteā ʼapē te ʼuhiga ʼo tana palalau?’ ko te feʼuiʼaki ʼaia ʼa tana ʼu tisipulo. ʼI te vāhaʼa ki muli age, neʼe ʼave e Sesu ia Petelo, mo Sake pea mo Soane ki te moʼuga māʼoluga. E lagi kua pōʼuli, heʼe kua fia momoe tana ʼu tisipulo. ʼI te lolotoga ʼo te faikole ʼa Sesu, neʼe fetogi ia ʼi ʼonatou muʼa. Ko tona fofoga neʼe gigila ohage ko te laʼā, pea ko ʼona teu neʼe liliu ia ʼo gigila ohage ko te mālama.

Pea hā mai ai mo te ʼu tagata e lua, ʼe hage ko “Moisese pea mo Elia”, ʼo nā kamata palalau mo Sesu ʼo ʼuhiga mo tana ‘mavae ka hoko ʼi Selusalemi’. Ko te mavae ʼaia ʼe mahino papau ia ko te mate ʼo Sesu ʼo hoko atu kiai mo tona fakatuʼuake. Koia, ko te fai palalau ʼaia ʼe hā mai ai, ʼo kehe ia mo te meʼa ʼaē ʼe fakaʼamu kiai ia Petelo, ʼe mole tonu ke faigaʼi e Sesu ke hāo ia mai tona mate fakalainoa.

ʼI te temi leva ʼaia kua nātou ʼaʼala lelei, pea neʼe sisio te ʼu tisipulo pea mo nātou fakalogo ki te meʼa fakaofoofo ʼaia kua hoko. Logope ko te meʼa ʼe hā mai, kae ʼe hage ko he meʼa ʼe moʼoni koia kua kau ai mo Petelo ki te fai palalau ʼaia. Neʼe ina ʼui age: “ ʼAliki, ʼe matalelei ke tou ʼi henī. Kapau ʼe ke loto kiai, pea ʼe ʼau fakatuʼu anai ʼi henī ni fale lā e tolu, he tahi mo ʼou, he tahi moʼo Moisese, pea mo he tahi moʼo Elia.”

ʼI te lolotoga ʼo tana palalau, koʼeni te ʼao gigila ʼe ina ʼaofi ia nātou, pea koʼeni te leʼo ʼe haʼu mai te ʼao, ʼo ʼui maʼana: “Ko ia nei ko toku ʼAlo, ʼofaina, ʼaia kua ʼau fiafia ʼaupito ai ia te ia; ke koutou fakalogo kia te ia.” ʼI tanatou logo ki te leʼo ʼaia, neʼe tō faka foʼohifo te ʼu tisipulo ki ʼonatou fofoga. Kae neʼe ʼui age e Sesu kia nātou: “Koutou tutuʼu ake pea ʼaua takotou matataku.” ʼO nātou tutuʼu ake ai, pea neʼe mole kei nātou sisio ki he tahi, gata pe ko Sesu.

ʼI te ʼala uhu ake, ʼi tanatou hihifo ifo mai te moʼuga, neʼe fai e Sesu te fakatotonu ʼaenī kia nātou: “ ʼAua naʼa koutou talanoa ki he tahi ʼo ʼuhiga mo te meʼa ʼaia neʼe koutou mamata kiai, ʼo kaku ki te toe fakatuʼu ake ʼo te Foha ʼo te tagata mai te kau mate.” Ko te hā ʼaē ʼa Elia ʼi te meʼa ʼaē neʼe hā mai neʼe malaga ai te fehuʼi ʼi te kau tisipulo: “He koʼe ʼe ʼui e te kau sekelipa ko Elia ʼe tonu ke ʼuluaki haʼu muʼa?”

Neʼe ʼui e Sesu: “Ko Elia kua ʼosi haʼu, pea neʼe mole nātou ʼiloʼi ia ia.” Kae ʼe palalau ia kia Soane Patita, ʼaē neʼe ina fai te gāue ʼe tatau ia mo te gāue ʼa Elia. Koteʼuhi, neʼe teuteuʼi e Soane te ala maʼa Kilisito, ohage ko te fai ʼa Elia maʼa Eliseo.

ʼE ko he meʼa fakatupu lotomālohi ia ʼaē neʼe hā mai, tatau pe kia Sesu pea toe feiā foki ki tana ʼu tisipulo! Ko te meʼa ʼaia neʼe hā mai, ʼe ko he sio fakatomuʼa ia ki te kolōlia ʼo Kilisito ʼi tona Puleʼaga. ʼIo, neʼe mamata te kau tisipulo “ki te Foha ʼo te tagata ʼe haʼu ʼi tona puleʼaga”, ohage pe ko te fakapapau ʼaē neʼe fai age e Sesu kia nātou ʼi te vāhaʼa ki muʼa atu. ʼI te ʼosi ʼo te mate ʼo Sesu, neʼe tohi e Petelo ki muli age, ‘neʼe nātou sio mata ki te kolōlia ʼo Kilisito ʼi te temi ʼaē neʼe nātou nonofo ai mo ia ʼi te moʼuga tapu’.

Neʼe kole age e te kau Faliseo kia Sesu he fakaʼiloga ke fakamoʼoni ai ko ia totonu ʼaē neʼe fakahā e te Tohi-Tapu, ia ia ʼaē ʼe fili anai e te ʼAtua ko te hau. Kae neʼe mole foaki age kia nātou te fakaʼiloga ʼaia. Kae, ko te ʼu tisipulo ia ʼaē neʼe faifaitahi mo Sesu neʼe fakagafua age ia kia nātou ke nātou mamata ki tona kolōlia, ko he fakamoʼoni ʼo te ʼu lea faka polofeta ʼo ʼuhiga mo te Puleʼaga. Ko te tupuʼaga ʼaia ʼo te tohi e Petelo ki muli age: “Koia ʼe kua mātou maʼu ai te lea faka polofeta ʼe kua moʼoni ia.” Mateo 16:13, 28 ki te 17:13; Maleko 9:1-13; Luka 9:27-37; 2 Petelo 1:16-19.

▪ Neʼe feafeaʼi te mamata ʼa ʼihi ki te kolōlia ʼo Kilisito ʼi tona Puleʼaga, ʼi muʼa ʼo tonatou mamate?

▪ ʼI te meʼa ʼaē neʼe hā mai, koteā te meʼa ʼaē neʼe palalau ki ai ia Moisese, pea mo Elia pea mo Sesu?

▪ He koʼe ʼe fakatupu lotomālohi te meʼa ʼaia neʼe hā mai ki tana ʼu tisipulo?