Kapite 93

Mokā Fakahā Anai Te Foha ʼo Te Tagata

NEʼE kei nofo pe ia Sesu ʼi te potu tokelau ʼo te fenua (peʼe ʼi Samalia, peʼe ko Kalilea) kae fakafehuʼi ia ia e te kau Faliseo ʼo ʼuhiga mo te haʼu ʼa te Puleʼaga. Neʼe nātou manatu ʼe fakaʼaliʼaliki anai tana haʼu; kae neʼe ʼui age e Sesu: “Ko te puleʼaga ʼo te ʼAtua ʼe mole haʼu ia ʼo ohage ko he meʼa ʼe feala ke mamata kiai te hahaʼi; pea ʼe mole ʼui anai: ‘Vakaʼi ʼi henī, peʼe: ʼI hē!’ Heʼe koʼeni ko te puleʼaga ʼo te ʼAtua ʼe ʼi te lotolotoiga ʼo koutou.”

Ko te kupu ʼaē ʼa Sesu, “ ʼe ʼi te lotolotoiga ʼo koutou”, neʼe tautau fakaliliu fēnei e ʼihi ʼe “ ʼi loto ia koutou”. Koia ʼaē, neʼe ʼui ai e ʼihi ko Sesu neʼe ina ʼui ko te Puleʼaga ʼo te ʼAtua ʼe nofo ʼi te loto ʼo te kau kaugana ʼa te ʼAtua. Kae, ʼe hā lelei mai ia, ko te Puleʼaga ʼo te ʼAtua ʼe mole nofo ʼi te loto ʼo te kau Faliseo heʼe tui ʼaē ʼe palalau kiai ia Sesu. Kae ʼe nofo ʼi te lotolotoiga ʼonatou mai tona ʼuhiga ʼaē ko ia ʼaē kua fili ko te Hau ʼo te Puleʼaga ʼo te ʼAtua, ia Sesu Kilisito, ʼe nofo ia nātou.

Neʼe hoko atu te palalau ʼa Sesu mo tana kau tisipulo ʼo ʼuhiga mo te haʼu ʼa te Puleʼaga, ʼi te kua lagi ʼosi ʼolo ʼa te kau Faliseo. ʼI tana manatu tāfito ki tana ʼi henī anai ʼi he temi ka haʼu, ʼi te mālohi ʼo te Puleʼaga, neʼe ina fai age te fakatokaga ʼaenī: “ ʼE ʼui atu anai kia koutou: ‘Vakaʼi ʼi henā!’, peʼe: ‘Vakaʼi ʼi henī!’ ʼAua naʼa koutou ʼolo pea mo koutou feleleʼi ki [te ʼu Mesia loi ʼaia]. Heʼe, ohage pe ko te ʼuhila, ʼi tana makila, ʼe tapa mai he tahi potu fenua ʼo te lalo lagi ʼo aʼu ki he tahi atu potu fenua ʼo te lalo lagi, ʼe feiā anai mo te Foha ʼo te tagata.” ʼE fakamahino e Sesu ʼaki te ʼu palalau ʼaia, ohage pe ko te hā ʼo te ʼuhila ʼi he potu e lahi ʼo te kele, ʼe toe feiā pe mo te ʼu fakamoʼoni ʼo tana ʼafio ʼi te mālohi ʼo te Puleʼaga ʼe feala ke hā lelei kia nātou fuli ʼaē ʼe nātou fia sio kiai.

ʼOsi ʼaia, neʼe fai e Sesu tona fakatatau mo te ʼu faʼahiga meʼa neʼe kua ʼosi hoko moʼo fakahā ai peʼe feafeaʼi anai te aga ʼa te hahaʼi lolotoga tana ʼafio ʼaē ka hoko mai. Neʼe ina fakamahino age: “Pea, ohage pe ko te meʼa ʼaē neʼe hoko ʼi te ʼu ʼaho ʼo Noe, ʼe toe feiā pe anai ʼi te ʼu ʼaho ʼo te Foha ʼo te tagata (...). ʼO toe tatau pe, ohage ko te meʼa ʼaē neʼe hoko ʼi te ʼu ʼaho ʼo Lote: neʼe nātou kakai, neʼe nātou ʼiʼinu, neʼe nātou totogi, neʼe nātou fakatau, neʼe nātou to gāue, neʼe nātou laga fale; kae ʼi te ʼaho ʼaē neʼe mavae ai Lote ʼi Sotoma, neʼe tō ifo mai te lagi te ʼua afi mo te sufe, ʼo fakaʼauha fuli ai te hahaʼi. ʼE toe feiā pe anai ʼi te ʼaho ʼaē ʼe tonu ke fakahā ai te Foha ʼo te tagata.”

Neʼe mole ʼui e Sesu neʼe fakaʼauha te hahaʼi ʼi te ʼu ʼaho ʼo Noe pea mo te ʼu ʼaho ʼo Lote ʼuhi pe ko tanatou fai ia te ʼu meʼa māhani ohage ko te kai, te ʼinu, te totogi meʼa, te fakatau meʼa, te to gāue pea mo te laga fale. Māʼiape la mo Noe pea mo Lote, ʼo feiā aipe ki tonā ʼu famili, neʼe nātou fai te ʼu meʼa ʼaia. Ko te meʼa ia ʼaē ʼe kehekehe ai, heʼe ko te hahaʼi ʼo te temi ʼaia neʼe nātou fai te ʼu meʼa ʼaia ka mole nātou tokakaga tuʼa tahi ki te finegalo ʼo te ʼAtua, pea ko te tupuʼaga la ʼaia ʼo tonatou fakaʼauha. Pea ʼe ko te tupuʼaga pe ʼaia ʼo te fakaʼauha anai ʼo te hahaʼi mokā fakahā anai ia Kilisito lolotoga te mamahi lahi ʼaē ka tō anai ki te tuʼu ʼo te ʼu faʼahiga meʼa ʼaenī.

Moʼo fakahāhā ia te maʼuhiga ʼaē ʼo te foimo gāue fakavilivili mokā hā te ʼu fakamoʼoni ʼo tana kua ʼafio ʼi te mālohi ʼo te Puleʼaga, neʼe toe ʼui age e Sesu: “ ʼI te ʼaho ʼaia, ko ʼaē ʼe ʼi te ʼato fakaheketālaʼa kae tuku tona ʼu koloā ʼi te loto fale, ke ʼaua naʼa ʼalu ifo ia ko hona ʼave pea, ke toe feiā aipe, mo ia ʼaē ʼe ʼi te ʼu gāueʼaga ke ʼaua naʼa toe liliu mai ki te ʼu meʼa ʼaē kua ʼi muli. Koutou manatuʼi te ʼohoana ʼo Lote.”

Ka hā mai anai te ʼu fakamoʼoni ʼo te kua ʼafio ʼa Kilisito, ʼe mole tonu anai, ke kita tāʼofi ia kita ki te gāue fakavilivili, ʼuhi ko te pipiki ʼaē ki te ʼu koloā fakamālama. ʼI tana mavae ʼaē ʼi Sotoma, neʼe lagi ai he sio ʼe fonu ʼi te lotomamahi ʼa te ʼohoana ʼo Lote ki te ʼu meʼa fuli ʼaē kua ina tuku ki muli, pea neʼe liliu ai ia ko he pou māsima.

ʼI tana hoko atu ʼo tana fakamatala ʼo te ʼu meʼa ʼaē ka hoko anai lolotoga tana ʼafio, neʼe ʼui age e Sesu ki tana kau tisipulo: “ ʼI te po ʼaia, ko tagata e toko lua ʼe momoe anai ʼi he palepale e tahi; ʼe toʼo anai te tahi, kae tuku te tahi. Ko fafine e toko lua e nā lolotoga momosi fulumeto anai ʼaki te meʼa momosi fulumeto nima e tahi; ʼe toʼo anai te tahi kae tuku te tahi.”

Ko te toʼo, ʼe fakatatau ki te hū ʼaē ʼa Noe pea mo tona famili ki te aleka, peʼe ko te mavae ʼa Lote mo tona famili ʼi Sotoma ʼi tonatou taki e te ʼaselo. Ko tona faka ʼuhiga, ko te fakamaʼuli. Kae, ko te tuku, ʼe ko te kau ki te fakaʼauha.

ʼI te temi ʼaia, neʼe motuhi e te kau tisipulo te palalau ʼa Sesu: “ ʼIfea, ʼAliki?”

Pea neʼe tali age e Sesu: “Ko te potu ʼaē ʼe tuku ai te sino, ʼe ko te potu ʼaia ka toe fakatahitahi anai kiai te faga akuila.” Ko nātou ʼaē ʼe “toʼo” ke fakamaʼuli ʼe hage ko te ʼu akuila ʼaē ʼe mamaʼo tanatou sio, koteʼuhi heʼe nātou fakatahitahi ki te potu ʼaē ʼe tuku ai “te sino”. Ko te sino ʼe faka ʼuhiga ki te Kilisito moʼoni ʼi te lolotoga ʼo tana ʼafio fakapulipuli ʼi te mālohi ʼo te Puleʼaga pea mo te kātoaga fakalaumālie ʼaē ʼe fai e Sehova. Luka 17:20-37; Senesi 19:26.

▪ Koteā te faka ʼuhiga ʼo te ʼui ʼaē ko te Puleʼaga ʼe ʼi te lotolotoiga ʼo te kau Faliseo?

▪ He koʼe ʼe fakatatau te ʼafio ʼa Kilisito ki he ʼuhila?

▪ He koʼe ʼe fakaʼauha anai te hahaʼi ʼuhi ko tanatou ʼu gāue ʼi te lolotoga ʼo te ʼafio ʼa Kilisito?

▪ Koteā te faka ʼuhiga ʼo te toʼo ʼo he tahi, pea mo te tuku ʼo he tahi?