Toe Liliu Mai Ki ‘Te Tagata Tauhi Ovi, Ki Te Tagata Leʼoleʼo ʼo Tou Maʼuli’

KE KE tui papau, ʼe fakatalitali anai koe e Sehova mo kapau ʼe ke toe liliu mai kia te ia. ʼE tokoni atu anai ke ke tauʼi ia te lotohoha, mo te ʼu manatu fakalotomamahi, ke ke maʼu te tokalelei ʼi tau fakakaukau mo tou loto ʼaki he leʼo ʼo loto ʼe maʼa. Pea ʼe lagi ke toe fia tauhi anai mo ʼou tehina mo tuagaʼane kia Sehova. Neʼe toe feia pe la ia te kau ʼuluaki Kilisitiano ʼae neʼe faitohi fenei ki ai te apositolo ko Petelo: “Nee kotou hage ko ni ovi hehe. Kae i te temi nei, kua kotou toe liliu ki te tagata tauhi ovi, ki te tagata leoleo o okotou laumalie,” peʼe maʼuli.—1 Petelo 2:25.

Ko tau toe liliu ʼae kia Sehova, ʼe ko he faʼahi lelei ʼaupito ʼaia ʼe feala ke ke fakahoko. Kotea tona tupuʼaga? Koteʼuhi ʼe ke fakafiafiaʼi ai anai te loto ʼo Sehova. (Taaga Lea 27:11) Ohage pe ko te faʼahi kua ke mahino ki ai, ʼe logoʼi e Sehova te ʼu meʼa ʼi tona loto, koia ʼae ʼe malave ai ʼatatou aga kia te ia. ʼE moʼoni, ʼe mole fakakinauʼi tatou e Sehova ke tou ʼoʼofa mo tauhi age kia te ia. (Tetelonome 30:19, 20) ʼE ui fenei e te tagata sivi Tohi-Tapu: “ʼE mole he tahi ʼe feala ke ina avahi te matapa ʼo tou loto. Ko koe tokotahi pe ʼe ina fealagia.” Koia ʼe feala anai ke tou avahi te matapa ʼaia, moka tou atolasio kia Sehova mo he loto ʼe fonu ʼi te ʼofa. Pea ʼi tatatou fai te faʼahi ʼaia, ʼe tou foaki ai kia te ia te meʼa ʼofa maʼuhiga ʼae ko tatatou nofo agatonu pea mo tou fakafiafia lahi ai tona loto. ʼE mahino papau ia, ʼe mole he fakatatau ʼo te fiafia ʼae ʼe tou maʼu ʼi tatatou foaki ʼae kia Sehova ia te tauhi ʼae ʼe tau mo feʼauga mo ia.—Gaue 20:35; Apokalipisi 4:11.

Pea tahi, kapau ʼe ke toe fakahoko ia tau tauhi Fakakilisitiano, ʼe tonu anai ke ke toe tuputupu ʼi te faʼahi fakalaumalie. (Mateo 5:3) Ko te hahaʼi ʼae ʼi ʼotatou tafaʼaki ʼe natou feʼekeʼaki pe ‘koʼe ʼe tou maʼuʼuli ʼi te kele.’ ʼE natou fia iloʼi pe kotea te ʼuhiga moʼoni ʼo te maʼuli. ʼE natou fia iloʼi ia te ʼu faʼahi ʼaia, koteʼuhi neʼe fakatupu tatou e Sehova mo te ʼu manatu ʼaia. Pea neʼe ina fakatupu tatou ke tou maʼu te fiafia ʼi tatatou tauhi ʼae kia te ia. Kaʼe ʼe tou fiafia age ʼi tatatou iloʼi ʼae ʼe tou tauhi kia Sehova he ʼe tou ʼoʼofa ia te ia.—Pesalemo 63:2-6.

ʼOfa pe ke ke mahino ʼe fakaʼamu ia Sehova ke ke toe liliu mai kia te ia. Kaʼe ʼe feafeaʼi hau tui papau ki te faʼahi ʼaia? Fakakaukauʼi age muʼa te aluʼaga ʼaeni: Neʼe lahi te ʼu faikole ʼae neʼe matou fai moʼo teuteuʼi lelei ia te kaupepa ʼaeni. Neʼe lagi ko he tagata ʼafeā peʼe ko he tahi ʼi ʼou tehina mo tuagaʼane ʼae neʼe ina foaki atu ia te kaupepa ʼaia. Pea neʼe uga ai koe ke ke lau pea mo ke tali ia te ʼu fakatuʼutuʼu ʼofa ʼae ʼe maʼu ai. ʼE ko he fakamoʼoni ʼaia neʼe mole galoʼi koe e Sehova. Kaʼe, ʼe ina toe taki mai koe kia te ia ʼaki te agamalū.—Soane 6:44.

ʼE fimalie totatou loto ʼi tatatou iloʼi ʼae ko Sehova ʼe mole ina galoʼi ʼi he temi ʼana kaugana ʼae kua hehe. ʼE ko he faʼahi neʼe mahino ki ai ia totatou tuagaʼane ʼe higoa ko Donna. Neʼe ina ui fenei: “ʼAki te temi, neʼe au mavae ai mai te moʼoni, kaʼe neʼe au fakakaukauʼi tuʼumaʼu ia te Pesalemo 139:23, 24 ʼae ʼe ui ai: ‘Ke ke fakaaata au, oi Atua, pea ke ke iloi toku loto! Ke ke ahiahii au, pea ke ke iloi aku manatu! Ke ke sio pe e au nofo i he ala kovi, pea ke ke taki au i te ala o te mauli heegata!’ Neʼe au iloʼi pe, ko toku maʼuli ʼi te malama neʼe mole lelei pea neʼe mole hona ʼuhiga. Neʼe au kamata mahino ai leva neʼe mole he temi neʼe situʼa ai ia Sehova kia au; koia neʼe ʼaoga ai ke au maʼu te ala ʼae ke au toe liliu kia te ia. Pea ʼi toe fiafia leva ʼe au maʼu ʼi taku fakahoko te faʼahi ʼaia.”

ʼE matou faikole fakamalotoloto ke ke toe maʼu ia “te fiafia o [Sehova].” (Neemia 8:10) ʼE mole anai he temi ʼe ke fakahemala ai ʼi tau toe liliu mai kia Sehova.