Ko Ai Te Kau ʼAselo Pea Kotea ʼe Natou Fai?

ʼE ʼi ai te famili ʼo Sehova ʼi selo. ʼE kau ai te kau ʼaselo, ʼae ʼe fakahigoaʼi ko ‘te ʼu foha ʼo te ʼAtua.’ (Sopo 38:7) Kotea ʼe ui ʼi te Tohi-Tapu ʼo ʼuhiga mo natou? Kotea ʼe natou fai ki te hahaʼi? Pea ʼe kau fuli koa te kau ʼaselo ki te famili ʼo ʼAtua?

1. Ko ai te kau ʼaselo?

Neʼe fakatupu e Sehova te kau ʼaselo ʼi muʼa ʼo tana fakatupu te kele. ʼE natou hage ko ia. ʼE ko he ʼu laumalie pea ʼe natou maʼuʼuli ʼi selo. (Hepeleo 1:14) ʼE ʼi ai te ʼu lauʼi miliona ʼaselo pea ʼe natou tahi alu pe mo tona ʼuluagaaga. (Apokalipesi 5:11) ʼE natou ‘fakalogo kia Sehova pea mo fakahoko tana folafola.’ (Pesalemo 103:20) ʼI te temi muʼa, neʼe tau fekauʼi e Sehova he ʼu ʼaselo ke olo ʼo fakaha ni logo ki ʼana kaugana peʼe tokoni kia natou. Ia ʼaho nei, ʼe taki e te kau ʼaselo ia te ʼu tisipulo ʼa Sesu ki te hahaʼi ʼae ʼe natou kumi te ʼAtua.

2. Ko ai ia Satana mo tana kau temonio?

Neʼe ʼi ai ʼihi ʼaselo neʼe mole nonofo agatonu kia Sehova. Ko te ʼuluaki ʼaselo ʼae neʼe agatuʼu ʼe ko “ia ʼae ʼe higoa ko te Tevolo mo Satana, ʼae ʼe ina fakaheʼi te kele katoa.” (Apokalipesi 12:9) Neʼe fia puleʼi e Satana ʼihi, koia neʼe ina fakaneke ai ia Atama mo Eva ke nā talagataʼa kia Sehova. Pea ki muli age, neʼe ina toe fai feia ki ʼihi kau ʼaselo. Neʼe kapu ifo natou e Sehova mai te lagi. ʼE natou nonofo nei ʼi te kele pea ʼe kua vave pulihi pe ia natou.—Lau ia Apokalipesi 12:9, 12.

3. ʼE kakaʼi feafeaʼi e Satana mo te kau temonio ia te hahaʼi?

ʼE natou fakaʼaogaʼi te ʼu meʼa faifakalauʼakau moʼo kakaʼi te tokolahi. Ohage la, ʼe olo ʼihi kia natou ʼae ʼe faifakakikite ʼaki te ʼu fetuʼu, peʼe natou lau ʼi he ʼu tohi te ʼu horoscopes, peʼe olo ki te kau faifakakikite peʼe kia natou ʼae ʼe faitoʼo fakatemonio. Ko ʼihi ʼe olo ʼo kumi ni faitoʼo fakatoketa ʼe ʼi ai tona pikipikga mo te ʼu meʼa fakalauʼakau. Pea ko ʼihi leva ʼe natou tui ʼe feala hanatou palalau mo te kau mate. Kae ʼe fakatokaga fenei mai tatou e Sehova: “ʼAua naʼa kotou olo ʼo kumi tokoni ki te hahaʼi ʼae ʼe felogoi mo te kau mate pea mo te hahaʼi faifakakikite.” (Levitiko 19:31) ʼE ina fai mai te fakatokaga ʼaia he ʼe ina fia puipui tatou mai ia Satana mo te kau temonio. ʼE ko te ʼu fili ia ʼo te ʼAtua pea ʼe natou fia fakamamahiʼi tatou.

TA FAKALOLOTO

4. ʼE tokoni te kau ʼaselo kia natou ʼae ʼe natou kumi ia Sehova

ʼE mole faifakamafola fakahagatonu te kau ʼaselo ki te hahaʼi. Kae ʼe natou tokoni ki te ʼu kaugana ʼa te ʼAtua ke natou maʼu te hahaʼi ʼae ʼe natou fia iloʼi te ʼAtua. Lau ia Apokalipesi 14:6, 7, pea fai te ʼu fehuʼi ʼaeni:

• He koʼe ʼe ʼaoga mai te tokoni ʼa te kau ʼaselo ki te faifakamafola?

• ʼE feala ke taki koe e te kau ʼaselo ki te hahaʼi ʼae ʼe natou fia mahino ki te Folafola ʼa te ʼAtua. ʼE mole koa la fakalotomalohi tau iloʼi te faʼahi ʼaia? Kotea tona tupuʼaga?

5. Liʼaki te gaohi meʼa faifakalauʼakau

Ko Satana mo te kau temonio ʼe ko te ʼu fili ʼo Sehova. Pea ʼe ko totatou ʼu fili. Lau ia Luka 9:38-42, pea fai te fehuʼi ʼaeni:

• Kotea ʼae ʼe fai e te kau temonio ki te hahaʼi?

ʼE mole tou loto ke puleʼi tatou e te kau temonio. Lau ia Tetelonome 18:10-12, pea fai te ʼu fehuʼi ʼaeni:

• Kotea ʼe fakaʼaogaʼi e te kau temonio ke felogoi ai mo tatou peʼe ke ina fakahalaʼi tatou? Kotea ʼihi meʼa faifakalauʼakau ʼe ke sio ki ai ia ʼaho nei?

• ʼE tapuʼi e Sehova te fakaʼaogaʼi ʼo te ʼu meʼa faifakalauʼakau. ʼI tau manatu la, ʼe lelei koa tana tapuʼi mai te faʼahi ʼaia? Kotea tona tupuʼaga?

Vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: “Fakafeagai Ki Te Tevolo” (5:02)

• ʼI tau manatu la, neʼe fakatupu kovi koa te kiʼi vesa ʼae neʼe haʼi ʼi te nima ʼo te kiʼi toe ʼa Palesa? Kotea tona tupuʼaga?

• Kotea ʼae neʼe fai e Palesa moʼo puipui ia ia mai te kau temonio?

ʼE fakafeagai tuʼumaʼu te kau Kilisitiano moʼoni ki te kau temonio. Lau ia Gaue 19:19 mo 1 Kolonito 10:21, pea fai te fehuʼi ʼaeni:

• Kapau ʼe ke nofo mo he meʼa ʼe ʼi ai hona pikipikiga mo te gaohi meʼa faifakalauʼakau, he koʼe ʼe lelei ke ke maumauʼi?

6. Tauʼi ia Satana mo te kau temonio

ʼE ko Satana te pule ʼo te kau temonio. Kae ko te pule ʼo te kau ʼaselo agatonu ʼe ko te alekaselo ko Mikaele, ia Sesu. ʼE malohi koa te alekaselo ko Mikaele? Lau ia Apokalipesi 12:7-9, pea fai te ʼu fehuʼi ʼaeni:

• Ko ai ʼae ʼe malolohi ʼaupito? Ko Mikaele mo ʼana ʼaselo peʼe ko Satana mo ʼana temonio?

• Kia koe la ʼe tonu koa ke matataku te ʼu tisipulo ʼa Sesu ia Satana mo ʼana temonio?

ʼE feala hau malo ia Satana mo ʼana temonio. Lau ia Sakopo 4:7, pea fai te fehuʼi ʼaeni:

• ʼE feafeaʼi hau puipui ia koe mai ia Satana mo te kau temonio?

MANATU TAFITO

ʼE tokoni mai te kau ʼaselo agatonu. Ko Satana mo tana kau temonio ʼe ko te ʼu fili ʼo Sehova pea ʼe natou fakaʼaogaʼi te ʼu meʼa faifakalauʼakau moʼo kakaʼi te hahaʼi.

Fehuʼi Fakamanatu

• ʼE tokoni feafeaʼi te kau ʼaselo ki te hahaʼi ʼae ʼe natou kumi ia Sehova?

• Ko ai ia Satana mo tana kau temonio?

• He koʼe ʼe ke liʼaki te ʼu meʼa faifakalauʼakau?

TE TAHI ʼU MANATU

He koʼe ʼe tou iloʼi ko Sesu ʼe ko te alekaselo ko Mikaele?

“Ko Ai Te ʼAlekaselo Ko Mikaele?” (Alatike ʼi te jw.org)

Vakaʼi he ʼu fakamoʼoni ko te Tevolo ʼe ko he tahi ʼe maʼuli moʼoni.

“ʼE Maʼuli Moʼoni Koa Te Tevolo?” (Alatike ʼi te jw.org)

Neʼe ʼateaina feafeaʼi he fafine mai te ʼu meʼa fakatemonio?

“Neʼe Ina Maʼu Te Ikuʼaga ʼi Tona Maʼuli” (Ko Te Tule Leʼo ʼaho 1 ʼo Sulio 1993)

E fakaʼaogaʼi koa e Satana te ʼu meʼa faifakalauʼakau moʼo kakaʼi te hahaʼi?

“La vérité sur la magie et la sorcellerie” (La route qui mène à la vie éternelle, section 5)