KAPITE 29

ʼE Tou Olo Kifea Moka Tou Mamate?

Pepa

Neʼe kua mate koa he tahi neʼe ke ʼofa mamahi ai? ʼE mahino ia. Pea ka hoko he aluʼaga feia, ʼe lagi ke feuiʼaki: ‘ʼE tou olo kifea moka tou mamate? ʼE au toe sio anai koa kia natou ʼaia kua mamate ʼi he ʼaho?’ ʼI te kapite ʼaeni mo ʼae ʼe hoa mai, ʼe ke maʼu ai anai he ʼu tali fakalotofimalie ʼi te Tohi-Tapu.

1. ʼE tou olo kifea moka tou mamate?

Neʼe fakatatau e Sesu te mate ki he mate moe. Kotea ʼae ʼe tatau ai te mate mo te moe? Ka mate moe he tahi, ʼe mole kei ina iloʼi age he meʼa. ʼE toe feia pe mo te mate. Ka mate he tahi, ʼe mole kei ina logoʼi he meʼa pea ʼe mole kei mamahi. ʼE ui ʼi te Tohi-Tapu ‘ʼe mole kei iloʼi he meʼa e natou ʼae kua mamate.’—Lau ia Ekelesiasi 9:5.

2. He koʼe ʼe lelei ke ke iloʼi te moʼoni ʼo ʼuhiga mo te kau mate?

Tokolahi ʼe mole natou fia mamate. Pea ko ʼihi ʼe natou matataku ʼi te kau mate. Kae ʼe fakalotofimalie te manatu ʼae ʼe ui ʼi te Tohi-Tapu ʼo ʼuhiga mo te mate. Neʼe ui fenei e Sesu: “ʼE fakaʼateaina anai koutou e te moʼoni.” (Soane 8:32) ʼE ui e ʼihi lotu ʼe hoko atu pe te maʼuli ia hili te mate. Kae ʼe mole ko te faʼahi ʼaia ʼe ui mai ʼi te Tohi-Tapu. ʼE mole kei iloʼi age he meʼa e te kau mate koia ʼe mole kei natou maʼuli mamahi. Koia, ʼe mole tonu ke tou atoalsio ki te kau mate, peʼe fai he meʼa ke mole natou fakamamahiʼi tatou peʼe hufakiʼi natou.

ʼE ui e ʼihi ʼe natou felogoi mo te kau mate. Kae ʼe mole feala tuʼa tahi te faʼahi ʼaia. Neʼe tou vakaʼi ʼi muʼa atu, ‘ʼe mole kei iloʼi he meʼa’ e te kau mate. Koia kapau ʼe tui ʼihi ʼe natou felogoi mo te kau mate, pea ʼe felogoi fakahagatonu natou mo te kau temonio. Ka ke iloʼi te moʼoni ʼo ʼuhiga mo te kau mate, pea ʼe ina puipui koe mai te kau temonio. ʼE ui mai e Sehova ke ʼaua naʼa tou faiga ke tou felogoi mo te kau mate. Kotea tona tupuʼaga? He ʼe ina iloʼi ʼe fakatupu tuʼutamaki kia tatou te felogoi mo te kau temonio.—Lau ia Tetelonome 18:10-12.

TA FAKALOLOTO

Ta vakaʼi he tahi ʼu manatu ʼi te Tohi-Tapu ʼo ʼuhiga mo te mate. Pea ta fakamalohiʼi tata tui ʼae ʼe mole fakamamahiʼi e Sehova te kau mate.

Ko he tagata mo ʼana toe ʼe lua ʼe heheka ʼi he hekeʼaga lolotoga te faiavaifo ʼo tona ʼohoana. ʼE omai ʼonatou kaumeʼa mo te famili ʼo fakalotomalohiʼi pea lagolago kia natou.

3. Kotea te aluʼaga moʼoni ʼo te kau mate?

ʼE lahi te ʼu akonaki ʼe fakamafola ʼo ʼuhiga mo te aluʼaga ʼae ʼe hoko hili te mate. Kae ʼe mole moʼoni te ʼu akonaki fuli ʼaia.

Kotea ʼae ʼe tui ki ai te hahaʼi ʼo tou fenua ʼo ʼuhiga mo te aluʼaga ʼo te kau mate?

Kapau ʼe ke fia iloʼi te manatu ʼa te Tohi-Tapu, vakaʼi te ʼATA VITEO.

ʼATA VITEO: ʼE Feafeaʼi Te Aluʼaga ʼo Te Kau Mate?—Kogaʼi ʼAta (1:19)

Te ʼu pāki: Ko he pāki ʼo te ʼata viteo ‘ʼE Feafeaʼi Te Aluʼaga ʼo Te Kau Mate?—Kogaʼi ʼAta.’ 1. Ko he sino mate ʼi he palepale ʼo te lopitali. 2. Ko he tagata ʼe moe ʼi te vaha ʼo he foʼi toko lua, ʼi te saliote afi.

Lau ia Ekelesiasi 3:20, pea fai te ʼu fehuʼi ʼaeni:

Kotea ʼe ui ʼi te vaega ʼaeni moka mate he tahi?
ʼE ʼi ai koa he koga ʼo tatou ʼe hoko pe atu tona maʼuli hili te mate?

ʼE fakamatala ʼi te Tohi-Tapu te aluʼaga neʼe hoko hili te mate ʼo Lasalo, te kaumea lelei ʼo Sesu. Lau ia Soane 11:11-14 ke ke iloʼi ai te ʼu palalau neʼe fai e Sesu ʼo ʼuhiga mo Lasalo. Pea fai te ʼu fehuʼi ʼaeni:

Neʼe fakatatau e Sesu te mate kitea?
Pea kotea te ako ʼe tou taʼofi mai ai?
Kotea tau manatu ki te meʼa ʼae ʼe ui ʼi te Tohi-Tapu ʼo ʼuhiga mo te mate?

4. ʼE tou fiafia

Ka tou iloʼi te moʼoni ʼo ʼuhiga mo te mate, pea ʼe mole kei tou matataku ʼi te kau mate. Kua fakaʼateainaʼi tatou. Lau ia Ekelesiasi 9:10, pea fai te fehuʼi ʼaeni:

ʼE feala koa ki te kau mate ke natou fai mai he meʼa ʼe kovi?

Ka tou ako te ʼu moʼoni Fakatohi-tapu, ʼe ina toe fakaʼateaina tatou mai te ʼu akonaki hala. Ohage la ko te fai he meʼa ke mole fakamamahiʼi tatou e te kau mate peʼe ko te atolasio ki te kau mate. Lau ia Esaia 8:19 mo Apokalipesi 4:11, pea fai te fehuʼi ʼaeni:

Kia koe la kotea te manatu ʼa Sehova moka ʼatolasio he tahi ki te kau mate peʼe kole tokoni ki ai?

Te ʼu pāki: Ko he ʼu agaʼi fenua kehekehe ʼe ʼi ai tonatou pikipikiga mo te atolasio ki te kau mate. 1. Ko he tagata ʼe tuʼutuli ʼo faikole ʼi muʼa ʼo he fale maka, neʼe ina tuku ai he meʼa kai ko hana molaga. 2. Ko he ʼu tagata ʼe toko tolu ʼe memeʼe pea ʼe natou tui ni teu faifakalauʼakau. 3. Ko he hahaʼi ʼe natou faipolesesio ʼi te ʼAho ʼo Te Kau Mate pea ʼe natou ʼai he ʼu masque ʼo he ʼu foʼi ʼulu poko pea ʼe natou toʼo ni ʼakau ʼe fakapipiki ai ni foʼi ʼulu poko. — Ka tou iloʼi te moʼoni ʼo ʼuhiga mo te kau mate, ʼe mole tou fai te ʼu agaʼi fenua ʼae ʼe mole leleiʼia e Sehova

5. ʼE fakalotofimalie

Neʼe akoʼi ki te tokolahi ka natou mamate pea ʼe tauteaʼi anai natou ʼuhi ko ʼanatou aga ʼe kovi. Kae ʼe fakalotofimalie tatatou iloʼi ʼae ʼe mole kei mamahi he tahi hili tana mate, maʼia mo he tahi neʼe lahi ʼana aga kovi neʼe ina fai. Lau ia Loma 6:7, pea fai te fehuʼi ʼaeni:

ʼE ui ʼi te Tohi-Tapu ka mate he tahi pea kua ʼateaina ia mai tana agahala. Kapau koia ʼaia, ʼi tau manatu la ʼe maʼuli mamahi koa te kau mate ʼuhi ko te ʼu agahala neʼe natou fai ki muʼa atu?

Ka tou iloʼi lelei ia Sehova pea ʼe tou tui papau ʼe mole ina fakamamahiʼi te kau mate. Lau ia Tetelonome 32:4 mo 1 Soane 4:8, pea fai te ʼu fehuʼi ʼaeni:

Kapau ʼe maʼu e te ʼAtua te ʼu kalitate ʼaeni ʼe talanoa ki ai te ʼu vaega, ʼe feala koa ke ke ui ʼe ina fakamamahiʼi te kau mate?
ʼE mole koa la fakalotofimalie tau iloʼi te moʼoni ʼo ʼuhiga mo te kau mate? Kotea tona tupuʼaga?

ʼE UI E ʼIHI: “ʼE au mataku ki te aluʼaga ka hoko moka au mate.”