KAPITE 37
Te Manatu ʼa Te Tohi-Tapu Ki Te Gaue Pea Mo Te Falā
Neʼe kua ke tuʼania koa ʼo ʼuhiga mo te gaue peʼe ko te falā? ʼE mole faigafua tuʼumaʼu te tokaga ki tokita maʼuli pea mo tatatou tauhi kia Sehova. Kae ʼe feala ke tokoni mai te Tohi-Tapu.
1. Kotea ʼe ui ʼi te Tohi-Tapu ʼo ʼuhiga mo te gaue?
ʼE loto e te ʼAtua ke ke fiafia ʼi tau gaue. ʼE ui ʼi te Tohi-Tapu ‘ʼe mole he meʼa ʼe lelei age ki te tagata ko te fiafia ʼi tana gaue kinakina.’ (Ekelesiasi 2:24) ʼE gaue kinakina ia Sehova. Ka ke hage ko ia, pea ʼe ke fakafiafiaʼi ia ia pea mo ke fiafia ai.
ʼE maʼuhiga te gaue. Kae ʼe mole tonu ke maʼuhiga age ʼi tau tauhi kia Sehova. (Soane 6:27) ʼE fakapapau e te ʼAtua kapau ʼe ke fakamuʼamuʼa ia ia ʼi tou maʼuli, ʼe ina foaki atu anai te ʼu meʼa ʼe ʼaoga kia koe.
2. Kotea te fakaʼuhiga ʼo te maʼu ʼo he sio fakapotopoto ki te falā?
ʼE ui ʼi te Tohi-Tapu ‘ko te falā ʼe ko he puipuiʼaga’ kae ʼe mole ko te matapuna ʼaia ʼo te fiafia moʼoni. (Ekelesiasi 7:12) ʼE mole ui mai ai ke ke manako ki te paʼaga kae ‘ke ke fakafeʼauga pe ʼi te ʼu meʼa ʼae ʼe ke maʼu.’ (Lau ia Hepeleo 13:5.) Ka ke muliʼi te tokoni ʼaia, ʼe ke hao mai te ʼu nunuʼa ʼe tau mo natou ʼe loto tuʼumaʼu ke lahi tanatou foʼi falā. ʼE mole lahi anai ni maʼua ʼe ke huʼi. (Taʼaga Lea 22:7) Pea ʼe mole ke to anai ki te hele ʼae ko te gaoʼi paʼaga peʼe ko ʼihi gaoʼi ʼe ke maʼu vave ai hau falā.
3. ʼE feafeaʼi hau fakaʼaogaʼi fakapotopoto te falā?
Ko Sehova ʼe ko te ʼAtua lotofoaki. Pea ʼe ke faʼifaʼitakiʼi anai ia ia moka ke ‘lotofoaki pea mo fia vaevae.’ (1 Timoteo 6:18) ʼE feala hau fakaʼaogaʼi fakapotopoto tau foʼi falā. ʼO feafeaʼi? ʼAki hau foaki he meʼa ʼofa ki te kokelekasio, pea mo tokoni kia natou ʼe ʼaoga ki ai, tafito ʼou tehina mo tuagaʼane. ʼE mole ko te lahi ʼo te foʼi falā ʼae ʼe maʼuhiga kia Sehova. Kae ʼe ko te tupuʼaga ʼo tau fai te faʼahi ʼaia. Kapau ʼe ke foaki ʼaki he lotolelei, ʼe ke fiafia anai pea mo fakafiafiaʼi ia Sehova.—Lau ia Gaue 20:35.
TA FAKALOLOTO
Ta vakaʼi te ʼu fua lelei moka kita maʼu he sio fakapotopoto ki te gaue pea mo maʼuli fakafeʼauga.
4. Fakakololiaʼi ia Sehova moka tou gaue
Kapau ʼe tou maʼu ni felogoi lelei mo Sehova, pea ʼe ha ʼi tatatou faʼahiga manatu ʼo ʼuhiga mo te gaue. Vakaʼi ʼATA VITEO, pea fai te ʼu fehuʼi ʼe hoa mai.
Kotea neʼe ke tokagaʼi ʼi te faʼahiga manatu mo te aga ʼa Jason ʼi tona fale gaue?
Kotea neʼe ina fai ke ina maʼu he sio fakapotopoto ʼo ʼuhiga mo te gaue?
Lau ia Kolose 3:23, 24, pea fai te fehuʼi ʼaeni:
He koʼe ʼe maʼuhiga tatatou faʼahiga manatu ʼo ʼuhiga mo te gaue?
ʼE maʼuhiga te gaue. Kae ʼe mole tonu ke maʼuhiga age ʼi tau tauhi kia Sehova
5. Te ʼu fua lelei moka tou maʼuli fakafeʼauga
Tokolahi ʼe natou faiga ke lahi tanatou falā. Kae ʼe fakalotomalohiʼi tatou ʼi te Tohi-Tapu ke mole tou maʼu te faʼahiga manatu ʼaia. Lau ia 1 Timoteo 6:6-8, pea fai te fehuʼi ʼaeni:
Kotea ʼe ui mai ʼi te Tohi-Tapu ke tou fai?
ʼE feala ki he tahi ʼe mole lahi tana foʼi falā ke fiafia. Vakaʼi te ʼATA VITEO, pea fai te fehuʼi ʼe hoa mai.
He koʼe ʼe fiafia te ʼu famili ʼaia logo la tonatou masisiva?
ʼE feala ki he tahi ʼe koloaʼia ke faiga ke toe lahi age tana falā. Neʼe fakamahino e Sesu ʼe feala ke tou tuʼutamakiʼia moka tou maʼu te faʼahiga manatu ʼaia. Lau ia Luka 12:15-21, pea fai te fehuʼi ʼaeni:
Kotea te ako neʼe ke taʼofi mai te hisitolia ʼa Sesu?—Vakaʼi te vaega 15.
Lau mo vakaʼi ia Taʼaga Lea 10:22 mo 1 Timoteo 6:10. Pea fai te ʼu fehuʼi ʼaeni:
Kia koe kotea ʼae ʼe maʼuhiga age? ʼE ko te kaumeʼa mo Sehova peʼe ko te maʼu lahi ʼo te falā? Kotea tona tupuʼaga?
Kotea te ʼu fihifihia ʼe feala ke tou tau mo ia moka tou loto ke lahi tuʼumaʼu tatatou foʼi falā?
6. ʼE tokaga anai Sehova kia tatou
Ka tou tau mo ni fihifihia ʼi te gaue peʼe fakapaʼaga, ʼe tou fakaha ai pe ʼe tou falala katoa kia Sehova. Vakaʼi te ʼATA VITEO pe ʼe feafeaʼi hatatou tauʼi te taʼi fihifihia ʼaia. Pea fai te ʼu fehuʼi ʼe hoa mai.
Kotea te ʼu fihifihia neʼe tau mo te tehina?
Kotea neʼe ina fai moʼo tauʼi te ʼu fihifihia ʼaia?
Lau ia Mateo 6:25-34, pea fai te fehuʼi ʼaeni:
Kotea ʼe fakapapauʼi e Sehova kia natou ʼae ʼe natou fakamuʼamuʼa ia ia ʼi tonatou maʼuli?
ʼE UI E ʼIHI: “ ʼE tonu ke au gaue kinakina moʼo taupau toku kiʼi famili. Koia, ʼe mole feala haku kau tuʼumaʼu ki te ʼu fono.”
Ko te vaega fea ʼe ke tui papau ai ʼe tokaga anai Sehova kia koe mo kapau ʼe ke fakamuʼamuʼa tau tauhi kia te ia?
MANATU TAFITO
ʼE tonu ke tou gaue mo maʼu he foʼi falā, kae ʼe mole tonu ke tou tuku te ʼu faʼahi ʼaia ke ina taʼofi ai tatatou tauhi kia Sehova.
Fehuʼi Fakamanatu
Kotea ʼe tokoni atu ke ke maʼu he sio fakapotopoto ki te gaue?
Kotea te ʼu fua lelei ʼe ke maʼu moka ke maʼuli fakafeʼauga?
ʼE ke fakaha feafeaʼi ʼe ke falala ʼe tokaga anai ia Sehova ki tana hahaʼi?
TE TAHI ʼU MANATU
ʼE ui ʼi te Tohi-Tapu ʼe mole lelei te falā.
“Ko Te Falā ʼe Ko Te Aka Koa ʼAia ʼo Mamahi Fuli?” (Alatike ʼi te jw.org)
Te ʼu meʼa ʼofa ʼae ʼe leleiʼia e te ʼAtua.
“Kotea ʼe Ui ʼi Te Tohi-Tapu ʼo ʼUhiga Mo Te Foaki?” (Alatike ʼi te jw.org)
ʼE fakatupu tuʼutamaki koa te ʼu gaoʼi paʼaga?
“D’après la Bible : Les jeux d’argent” (Réveillez-vous !, mars 2015)
Vakaʼi pe kotea neʼe ina uga he tagata gaoʼi paʼaga mo kaihaʼa ke ina fai ni fetogi.
“Les courses de chevaux étaient ma passion” (Ko Te Tule Leʼo [Fakafalani] ʼaho 1 ʼo Novepeli 2011)