ʼE Leleiʼia Koa e Te ʼAtua Te ʼu Fakafiafia Fuli?

ʼE loto e Sehova ke tou fakaʼaogaʼi lelei te maʼuli pea mo fakafiafia ʼi ʼihi temi. Kae ʼe ina leleiʼia koa te ʼu fakafiafia fuli? ʼE feafeaʼi tatatou fakaha totatou ʼofa kia Sehova ʼi te aluʼaga ʼaia?

1. He koʼe ʼe lahi te ʼu fakafiafia ʼe mole leleiʼia e Sehova?

ʼE lagi ke punamaʼuli anai ʼi tau iloʼi ʼae ʼe lahi te ʼu fakafiafia ʼe fakafeagai ki te Tohi-Tapu peʼe haʼu mai ni fakafiafia fakapagani. Ko ʼihi fakafiafia ʼe ʼi ai tona pikipikiga mo te ʼu meʼa faifakalauʼakau peʼe ko te manatu ʼae ʼe maʼuli tuputupua te tagata. Pea ko ʼihi fakafiafia leva ʼe fakatafito ki ni meʼa ʼe mole moʼoni ohage ko te lasio. (Esaia 65:11) Koia, ʼe tou mahino ai leva pe koʼe neʼe tuku mai e Sehova te fakatokga ʼaeni ki ʼana kaugana: “Mavae kehe mai ai . . . pea tuku takotou fāfā ki te meʼa ʼae ʼe heʼe maʼa.”—2 Kolonito 6:17.a

2. Kotea te manatu ʼa Sehova ki te ʼu fakafiafia ʼae ʼe fakamaʼuhigaʼi ai te tagata?

ʼE fakatokaga mai ia Sehova ke ʼaua naʼa tou “falala ki te tagata.” (Lau ia Selemia 17:5.) ʼE ʼi ai ʼihi fakafiafia ʼe natou fakamaʼuhigaʼi te kau taki peʼe ko te kau solia, peʼe ko te fuka, peʼe ko te puleʼaga faʼitaliha ʼo he fenua. (1 Soane 5:21) Pea ko ʼihi fakafiafia leva ʼe natou fakamaʼuhigaʼi ia te faipolitike. Kotea anai te manatu ʼa Sehova moka ʼe tou fakamaʼuhigaʼi he tahi peʼe ko he kautahi, tafito la moka ʼe fakafeagai ki Tana fakatuʼutuʼu?

3. Kotea te ʼu aga ʼe feala ke liliu ai he fakafiafia ʼo mole lelei?

ʼE tapuʼi ʼi te Tohi-Tapu te ‘inu kava fakavalevale, te fai ʼo he ʼu fakafiafia fakavalevale pea mo te konahia.’ (1 Petelo 4:3) Ko ʼihi fakafiafia ʼe uga ai te hahaʼi ke natou inu kava fakavale mo fai ni aga heʼe ʼaoga. Kapau ʼe tou fia kaumeʼa mo Sehova, ʼe tonu ke tou fakamamaʼo mai te ʼu aga uli fuli ʼaia.

TA FAKALOLOTO

4. Tou liʼaki te ʼu fakafiafia ʼae ʼe mole fakamaʼuhigaʼi ai ia Sehova

Lau ia Efeso 5:10, pea fai te ʼu fehuʼi ʼaeni:

• ʼI muʼa ʼo hatatou fakatuʼutuʼu pe ʼe tou kau ki he fakafiafia, kotea ʼe tonu ke tou vakavakaʼi?

• Kotea te ʼu fakafiafia ʼe fai mahani ʼi te faʼahi ʼae ʼe ke maʼuli ai?

• Kia koe la, ʼe leleiʼia koa e Sehova te ʼu fakafiafia ʼaia?

Ohage la, neʼe kua ke feuiʼaki koa la pe kotea te manatu ʼa te ʼAtua ʼo ʼuhiga mo te ʼu ʼaho tupu? ʼI te Tohi-Tapu, ʼe mole tou maʼu ai he ʼu hisitolia ʼo he kaugana ʼa Sehova neʼe ina fai tona ʼaho tupu. Kae ʼe fakamatala ai te ʼu ʼaho tupu ʼo he foʼi toko lua neʼe mole atolasio kia Sehova. Lau ia Senesi 40:20-22 mo Mateo 14:6-10. Pea fai te ʼu fehuʼi ʼaeni:

• Kotea ʼe tatau ai te ʼu ʼaho tupu ʼaeni ʼe lua?

• ʼI tau manatu la, kotea te ʼu ako mai te ʼu fakamatala ʼaia ʼo ʼuhiga mo te manatu ʼa Sehova ki te ʼu ʼaho tupu?

Kae ʼe lagi ke feʼekeʼaki pe ‘ʼe kovi moʼoni koa kia Sehova hakita kau ki he ʼaho tupu peʼe ko he tahi age fakafiafia ʼe fakafeagai ki te Tohi-Tapu?’ Lau ia Ekesote 32:1-8. Pea, vakaʼi te ʼATA VITEO mo fai te ʼu fehuʼi ʼae ʼe hoa mai.

ʼATA VITEO: Te ʼu ʼAho Lalahi Mo Te ʼu Agaʼi Fenua ʼe Fehiʼa Ki Ai Te ʼAtua (5:07)

• He koʼe ʼe maʼuhiga ke tou fakasiosio pe ko he fakafiafia ʼe leleiʼia e Sehova?

• ʼE feafeaʼi hatatou fai te faʼahi ʼaia?

ʼE feafeaʼi hatatou iloʼi pe ʼe leleiʼia koa e te ʼAtua te fakafiafia ʼaeni?

• ʼE fakatafito koa ki he ʼu manatu ʼe fakafeagai ki te Tohi-Tapu? Ke tou iloʼi, tou kumi tona haʼuʼaga.

• ʼE ina fakamaʼuhigaʼi koa te tagata, peʼe ko he ʼu kautahi peʼe ko te fuka? ʼE ko Sehova ʼae ʼe tou ʼuluaki fakamaʼuhigaʼi pea ʼe tou falala ʼe ko ia pe ʼae ʼe ina fakatokatoka te ʼu fihifihia ʼo te malamanei.

• ʼE fai ai koa ni aga ʼe fakafeagai ki te ʼu lao ʼa Sehova? ʼE tonu ke tou maʼa ʼi te aga ʼae ʼe tonu ke fai.

5. Ke fakaʼapaʼapaʼi te ʼu akonaki ʼae ʼe tou tui ki ai

ʼATA VITEO: Fakamahino Tau Tui ʼAki He Fakaʼeteʼete (2:01)

Lau ia Mateo 7:12, pea fai te ʼu fehuʼi ʼaeni:

• ʼE tonu koa ke ke ui age ki tou famili ʼae ʼe mole tauhi kia Sehova ʼe mole tonu ke natou fai te fakafiafia ʼae mo ʼae?

• ʼE feafeaʼi hau tokoni ki tou famili ke natou mahino ʼe kei ke ʼofa pe ia natou logo la ʼe mole ke kau mo natou ki ʼihi fakafiafia?

6. ʼE loto e Sehova ke tou fiafia

ʼE loto e Sehova ke tou fakatahi fakafiafia mo ʼotatou famili pea mo ʼotatou kaumeʼa. Lau ia Ekelesiasi 8:15, pea fai te fehuʼi ʼaeni:

• Kotea ʼe ha mai ʼi te vaega ʼaeni ʼe loto e Sehova ke tou fiafia?

ʼE loto e Sehova ke fakatahi fakafiafia ʼana kaugana. Vakaʼi te ʼATA VITEO ʼae ʼe fakaha te faʼahi ʼaia ʼi ʼatatou fakatahi lalahi fakafenua.

ʼATA VITEO: He Fakatalitali Fakagalo Gataʼa ʼi Te ʼu Fakatahi Lahi Fakafenua (5:40)

Lau ia Kalate 6:10, pea fai te ʼu fehuʼi ʼaeni:

• ʼE tonu koa ke tou kau ki te ʼu fakafiafia ʼae ʼe fai e te hahaʼi ke fiafia ai ʼihi?

• ʼE ke fiafia koa moka ke foaki he meʼa ʼofa ʼuhi he ʼe fakamaʼua atu ʼi te ʼaho fakafiafia ʼaia ke ke fai peʼe ʼuhi he ʼe ke loto ki ai?

• Tokolahi te kau Fakamoʼoni ʼa Sehova ʼe natou fakatuʼutuʼu he kiʼi temi fakafiafia ki ʼanatou fanau pea ʼe natou tau foaki age ʼanatou meʼa ʼofa. Kapau ʼe ke maʼu fanau, kotea ʼe feala ke ke fai ke natou fiafia ai?

MANATU TAFITO

ʼE loto e Sehova ke tou fakatahi fakafiafia mo ʼotatou famili pea mo ʼotatou kaumeʼa. Kae ʼe ina toe loto foki ke tou liʼaki te ʼu fakafiafia ʼae ʼe mole ina leleiʼia.

Fehuʼi Fakamanatu

• Kotea te ʼu fehuʼi ʼe feala ke tou fai ke tou iloʼi ai pe ʼe leleiʼia e Sehova he fakafiafia?

• ʼE tou lava tokoni feafeaʼi ki ʼotatou famili mo ʼotatou kaumeʼa ke natou mahino ki ʼatatou tonu ʼo ʼuhiga mo te ʼu fakafiafia?

• ʼE ke iloʼi feafeaʼi ʼe loto e Sehova ke tou fakafiafia?

TE TAHI ʼU MANATU

He ʼu fakafiafia ʼe mole fai e te kau Kilisitiano.

“He Koʼe ʼe Mole Fai e Te Kau Fakamoʼoni ʼa Sehova ʼIhi Fakafiafia?” (Alatike ʼi te jw.org)

He ʼu tupuʼaga ʼe fa ʼe mole leleiʼia e te ʼAtua te ʼu ʼaho tupu.

“He Koʼe ʼe Mole Fakamanatu e Te Kau Fakamoʼoni ʼa Sehova Te ʼu ʼAho Tupu?” (Alatike ʼi te jw.org)

Kotea ʼae neʼe fai e he tupulaga ʼi tona vaʼi e ʼona kaumeʼa mo ʼana faiako ʼuhi ko tana mole fai te Po Tapu?

Tali Ki Te ʼu Vava ʼAki He Fakaʼeteʼete (2:04)

Ko te toko lauʼi miliona Kilisitiano ʼe mole natou fai te Po Tapu. Kotea ʼae neʼe natou logoʼi ʼi tanatou fai te tonu ʼaia?

“Ils ont trouvé mieux” (Ko Te Tule Leʼo [Fakafalani] ʼaho 1 ʼo Tesepeli 2012)