ʼE Tonu Koa Ke Tou Taupau Te ʼu ʼAho Lalahi?

ʼE MOLE tuʼu ʼi te Tohi-Tapu ia te ʼu ʼaho lalahi ʼo te lotu pea mo te ʼu ʼaho lalahi faka puleʼaga ʼaē ʼe fai ia ʼaho nei. ʼE haʼu koa maifea ia te ʼu ʼaho lalahi ʼaia? Kapau ʼe koutou lava ʼolo ʼo fai he ʼu kumi ʼi te ʼu tānakiʼaga tohi, ʼe feala hakotou kumi te ʼu tohi ʼaē ʼe talanoa ai ʼo ʼuhiga mo te ʼu ʼaho lalahi ʼaē ʼe fai ʼi tokotou fenua. Tou vakaʼi age muʼa te ʼu ʼaho lalaho ʼaenī.

Te Pāsikate Katolika. ʼE ʼui ʼi te tohi The Encyclopædia Britannica: “ ʼE mole talanoa te Tauhi Foʼou ki te ʼaho lahi ʼo te Pāsikate Katolika.” Kae ʼe haʼu koa maifea ia te Pāsikate ʼaia? ʼE haʼu mai te tauhi pagani. ʼE ʼui ʼe taupau ia te ʼaho ʼaia moʼo fakamanatu ia te fakatuʼuake ʼo Sesu, kae ko te ʼu toʼotoʼoga ʼaē ʼe fai ʼi te Pāsikate Katolika ʼe fakafeagai ki te ʼu pelesepeto faka Kilisitiano. Ohage la, ʼe ʼui ʼi te tohi The Catholic Encyclopedia: “Ko te lapino ʼaē ʼe fakaʼaogaʼi ki te ʼaho ʼaia, ʼe ko he fakatātā faka pagani pea neʼe fakaʼaogaʼi tuʼumaʼu ohage ko he meʼa moʼo fakatā ia te fanaunau.”

Te Taʼu Foʼou. ʼE tahi ʼalu te fenua mo tona ʼaho Taʼu Foʼou pea mo tona ʼu fakafiafia. ʼO ʼuhiga mo te haʼuʼaga ʼo te ʼaho lahi ʼaia, ʼe ʼui ʼi te tohi The World Book Encyclopedia: “ ʼI te taʼu 46 ʼo totatou temi, neʼe fakatotonu e te pule Loma ko Jules César, ko te ʼuluaki ʼaho ʼo Sānualio ʼe liliu anai ko te ʼaho ʼo te Taʼu. Neʼe molagaʼi ia te ʼaho ʼaia kiā Janus, te ʼatua ʼo te ʼu matapā pea mo te ʼu kamataʼaga. ʼE haʼu te māhina ko Sānualio mai te higoa ʼo Janus, ʼaē ko ʼona fofoga e lua, ko te tahi ʼe haga ki muʼa, pea ko te tahi ʼe haga ki muli.” Koia ko te Taʼu Foʼou ʼe haʼu mai te ʼu talatisio faka pagani.

Halloween. ʼO ʼuhiga mo te ʼaho lahi ʼaia, ʼaē ʼe tatau mo te ʼaho ʼo te kau mate, ʼe ʼui ʼi te tohi The Encyclopedia Americana: “Ko te ʼu meʼa ʼaē ʼe fai māhani ʼi te Halloween ʼe feala ke fakapipiki ki te toʼotoʼoga neʼe fai e te kau pelepitelo Celtes, ʼi muʼa ʼo te temi ʼo te kau Kilisitiano. Ko te kau Celtes ʼe nātou taupau ia te ʼu ʼaho lalahi ʼo ʼuhiga mo te ʼu ʼatua maʼuhiga e lua, ko te ʼatua lāʼa pea mo te ʼatua ʼa te kau mate . . . , ʼe fai tonā ʼaho lahi ʼi te ʼuluaki ʼaho ʼo Novepeli. Ko te ʼaho ʼo te kau mate neʼe fakaulu māmālie ki te tauhi ʼa te Keletiate.”

Te Tahi ʼu ʼAho Lalahi. ʼE mole tou vakaʼi anai ia te ʼu toʼotoʼoga fuli ʼaē ʼe fai ʼi te malamanei. Kae ko Sehova ʼe mole ina tali ia te ʼu fakafiafia ʼaē ʼe faka maʼuhigaʼi ai te tagata peʼe ko te ʼu kautahi fakatagata. (Selemia 17:​5-7; Gaue 10:​25, 26) Tahi ʼaē meʼa, tou manatuʼi ko te haʼuʼaga ʼo te ʼu ʼaho lalahi faka lotu ʼe tou lava ʼiloʼi ai peʼe leleiʼia peʼe kailoa e te ʼAtua. (Isaia 52:11; Apokalipesi 18:4) Ko te ʼu pelesepeto faka Tohi-Tapu ʼaē ʼe tuʼu ʼi te Kapite 16 ʼo te tohi ʼaenī, ʼe tokoni atu anai ke koutou ʼiloʼi te manatu ʼa te ʼAtua ʼo ʼuhiga mo te ʼu ʼaho lalahi ʼaē ʼe mole ko he ʼu fakafiafia faka lotu.