Neʼe Kotou Iloʼi Koa?

Neʼe toe laga koa te fale lotu ʼo Selusalemi ʼi te hili ʼo te taʼu 70 H.T.S.?

NEʼE fakakikite e Sesu, ʼe mole toe hili anai he maka ki he tahi maka ʼo te fale lotu ʼo Sehova, pea neʼe hoko te faʼahi ʼaia ʼi te taʼu 70 ʼi te temi ʼae neʼe haga ai te ʼu kautau Loma ʼae neʼe taki e Tito ʼo maumauʼi ia Selusalemi. (Mat. 24:2) Ki muli age, neʼe fakatuʼutuʼu e te hau Loma ko Julien ke ina toe laga te fale lotu.

Ko Julien, neʼe ko te hau pagani fakamuli ʼaia ʼo Loma. Neʼe ko te ʼilamutu ʼo Constantin le Grand, pea neʼe akoʼi ia ia e te hahaʼi neʼe natou ui ʼe natou Kilisitiano. Kaʼe ʼi te temi ʼae neʼe liliu ai ko te hau ʼo Loma ʼi te taʼu 361, neʼe fakafisi ki te ʼu akonaki ʼae neʼe akoʼi age. Neʼe fakahigoa ia ia e te ʼu tohi hisitolia ko Julien lʼApostat ʼuhi ko tana lituʼa ki te ʼu akonaki ʼo tana lotu.

Neʼe fehiʼa ia Julien ki te hahaʼi ʼae ʼe natou ui ko te kau Kilisitiano. Neʼe lagi tupu ko te meʼa ʼae neʼe hoko ʼi tona taʼu ono, ʼae neʼe matehi ai tana matuʼā pea mo ʼona kaiga e te ʼu hahaʼi ʼaia. ʼE ui e te kau faihisitolia lotu neʼe uga e Julien te kau Sutea ke natou toe laga tonatou fale lotu. Ko tana loto ʼae ke fakaha ʼaki ai ko Sesu neʼe ko te polofeta loi.a

ʼE mole fai he mahalohalo ki te loto ʼae ʼo Julien ke toe laga te fale lotu. Kaʼe ʼe mole tou iloʼi papau pe neʼe kua ina kamata tona laga. Pea kapau neʼe ina kamata te gaue ʼaia, kaʼe ʼe mole tou iloʼi pe kotea ʼae neʼe tupu ai tona tuku. Tatau aipe pe kotea te meʼa neʼe ina fai, neʼe fakapogi ia ia kaʼe ʼe heʼeki katoa ni taʼu ʼe lua ki tona fakanofo hau, ʼo gata ai mo tana fakatuʼutuʼu ʼaia.