Logo La Neʼe Au Umiuminoa ʼOsi Kae Neʼe Au Misionea

Neʼe au tupu ʼi te 1951, ʼi Vienne, ʼi Autriche, ʼi he famili Katolika. Neʼe au umiuminoa kae neʼe au tui ki te ʼAtua mo faikole tuʼumaʼu kia te ia. ʼI toku taʼu hiva, neʼe kamata ako e taku tamai te Tohi-Tapu mo te kau Fakamoʼoni ʼa Sehova. Ki muli age, neʼe toe ako mo taku faʼe.

Neʼe matou kau atu aipe ki te Kokelekasio ʼo Döbling, ʼi Vienne. Neʼe lahi te ʼu meʼa neʼe matou fai fakatahi fakafamili. Neʼe matou lau mo ako fakatahi te Tohi-Tapu, mo kau ki te ʼu fono pea mo tokoni ki he ʼu gaue ʼe fai ʼi te ʼu kokelekasio. Lolotoga te ʼu taʼu ʼaia, neʼe tokoni mai taku tamai ke malohi age toku ʼofa kia Sehova. Neʼe faikole tuʼumaʼu taku tamai ke au liliu mo toku kiʼi tehina ʼo pionie. Kae ʼi te temi ʼaia, neʼe mole ko taku fakatuʼutuʼu ʼaia.

NEʼE AU KAMATA PIONIE KATOA

Neʼe au papitema ʼi te 1965, ʼi toku taʼu 14. Kae neʼe faigataʼa ʼosi kia au taku faifakamafola ki he ʼu hahaʼi ʼe mole au iloʼi. Neʼe au toe tauʼi te manatu ʼae ʼe mole hoku ʼuhiga, pea neʼe au loto ke tali au e ʼihi tupulaga. Mole fualoa ki taku ʼosi papitema, neʼe au kamata fakatahi mo he ʼu hahaʼi ʼe mole tauhi kia Sehova. Logo la neʼe au leleiʼia taku fakatahi mo natou, kae neʼe gaue toku leʼo ʼo loto he neʼe lahi toku temi neʼe au fakatahi mo he ʼu hahaʼi ʼe mole tauhi kia Sehova. Kae neʼe faigataʼa kia au taku fakagata te fahaʼi ʼaia. Kotea ʼae neʼe tokoni mai kia au?

ʼI te temi ʼaia, neʼe ʼi ai he finemui ʼe higoa ko Dorothée, neʼe taʼu 16. Pea neʼe kau ki tamatou kokelekasio. Neʼe au punamaʼuli ʼi tana faʼafai ʼi te faifakamafola ʼi te ʼu ʼapi. Neʼe au lahi ake ia ia, kae neʼe mole au faʼafai au ʼi te minisitelio. Pea neʼe au feuiʼaki fenei: ‘ ʼE tauhi ʼaku matuʼā kia Sehova, kae ʼe mole ʼi ai foki la he famili ʼo Dorothée ʼi te moʼoni. Neʼe maʼuli mo tana faʼe ʼae ʼe mahaki, kae ʼe faifakamafola tuʼumaʼu pe. Neʼe ina tuku mai he faʼifaʼitaki lelei ʼo uga ai au ke au gaue lahi maʼa Sehova. Mole fualoa pea neʼe ma pionie toko lua mo Dorothée. Neʼe ma pionie vaeluaʼi temi muʼa pea ʼosi ʼaia neʼe ma pionie katoa. Neʼe fiafia ia Dorothée ʼi tana faʼafai ʼi te faifakamafola, koia neʼe au toe leleiʼia ai mo au te faifakamafola. Neʼe tokoni mai ki te kamata ʼo taku ʼuluaki ako Tohi-Tapu. ʼAki te temi, neʼe faigafua leva kia au haku palalau ki te hahaʼi ʼi te ʼu api, mo te ala pea mo ʼihi atu koga meʼa.

Lolotoga toku ʼuluaki taʼu ʼae neʼe au pionie ai, neʼe haʼu he tuagaʼane mai Autriche ʼe higoa ko Heinz ki tamatou kokelekasio. Neʼe ina iloʼi te moʼoni ʼi Kanata ʼi tana alu ʼo fakasiosio tona tehina, ʼae neʼe ko he Fakamoʼoni ʼa Sehova. Neʼe hinoʼi ia ia ki tamatou kokelekasio ʼi Vienne ko he pionie makehe. Neʼe au manako atu aipe ia ia. Kae neʼe fia misionea kae neʼe mole au fakatuʼutuʼu au ke au misionea. Koia, ʼi te kamata neʼe mole au fakaha age ki ai taku manako ia ia. Kae ki muli age, neʼe ma fakatahi leva mo Heinz ʼo ma ʼohoana leva. Pea neʼe ma kamata pionie fakatahi ʼi Autriche.

NEʼE AU FIA LILIU LEVA ʼO MISIONEA

Neʼe palalau tuʼumaʼu mai ia Heinz ki tana fia liliu ʼae ʼo misionea. Logo la neʼe mole ina fakamalohiʼi au, kae neʼe ina fai mai he ʼu fehuʼi neʼe tokoni mai ke au fakakaukauʼi. Ohage la, neʼe ina ui mai: “Koʼeni ʼe mole hatā fanau, ʼe mole feala la ke ta gaue lahi maʼa Sehova?” Ko au ko he tahi neʼe umiuminoa, koia ʼae neʼe au mataku ai ʼi te liliu ʼo misionea. Neʼe au lava pionie logo la toku umiuminoa, kae neʼe faigataʼa ʼosi leva kia au taku liliu ʼae ʼo misionea. Kae neʼe haga fakalotomalohiʼi tuʼumaʼu pe au e Heinz ke au fakakaukauʼi te gaue misionea. Neʼe toe tokoni mai ke lahi age taku tokaga tafito pe ki te ʼofa ki te hahaʼi, kae mole ki taku mataku. Neʼe ʼaoga moʼoni mai ʼosi ʼana tokoni.

Neʼe faifai pe pea neʼe au fia liliu ʼo misionea, koia neʼe ma fai ai hama kole ke ma kau ki te Ako ʼo Kileate. Neʼe ui mai e he tuagaʼane ʼe gaue ʼi te filiale ke au ako muʼa ke au poto lelei ʼi te palalau ʼi te Fakapilitania. Hili ki ai taʼu ʼe tolu ki taku faiga ʼae ke au poto ʼi te Fakapiltania, neʼe ma punamaʼuli he neʼe hinoʼi leva maua ki te kokelekasio lea Yougoslave, ʼi Salzbourg, ʼi Autriche. Lolotoga te ʼu taʼu ʼe fitu ʼae neʼe hoa mai ki ai, neʼe ma faifakamafola ki ni hahaʼi ʼe palalau ʼi te lea Serbo-Croate. Neʼe liliu leva toku ʼohoana ko te taupau ʼo te siliko, pea lolotoga te taʼu katoa neʼe ma ʼaʼahi fakatahi te ʼu kokelekasio ʼi te lea Serbo-Croate. Neʼe faigataʼa ʼosi te lea ʼaia, kae neʼe lahi ʼosi tamā ʼu ako Tohi-Tapu.

ʼI te 1979, neʼe kole mai e te ʼu tuagaʼane ʼo te filiale ke ma olo ʼo “malolo” ʼi Bulgarie. Neʼe tapuʼi te gaue faifakamafola ʼi ai, koia neʼe natou kole mai ke ma fai ohage pe ʼe ma olo ʼo malolo. Neʼe natou ui mai ke ʼaua tama faifakamafola, kae ke ma ʼave he ʼu kiʼi tohi maʼa te ʼu kiʼi tehina ʼe toko nima, ʼae ʼe maʼuʼuli ʼi Sofia, te kolo muʼa ʼo Bulgarie. Neʼe au mataku ʼosi, kae neʼe tokoni mai ia Sehova. Neʼe sio ki te lototoʼa ʼa te ʼu kiʼi tehina, pea mo tanatou fiafia logo la neʼe feala ke pilisoniʼi natou. ʼI taku sio ki te fahaʼi ʼaia, neʼe au lotomalohi ai, ʼo fai te meʼa ʼe au lavaʼi moka kole mai e te kautahi ʼa Sehova ke au fai he gaue pe.

Mole faʼa fualoa ki ai, neʼe ma toe fai hama kole ke ma kau ki te Ako ʼo Kileate, pea neʼe tali leva. Neʼe ma manatu ʼe ma kau anai ki te ako ʼi te Fakapilitania, ʼi Amelika. Kae ʼi Novepeli 1981, neʼe fai he Tahi Ako ʼo Kileate ʼi te filiale ʼo Wiesbaden, ʼi Siamani. Koia, neʼe ma lava kau ki te Ako ʼi Siamani, ʼae neʼe faigafua kia au taku mahino ki ai he neʼe fai ʼi te lea Fakasiamani. ʼE hinoʼi anai maua kifea?

NEʼE MA FAIFAKAMAFOLA ʼI HE FENUA ʼE LAHI AI TE TAU

Neʼe hinoʼi maua ke ma olo ki Kenya! Kae neʼe kole mai e te filiale ʼo Kenya pe ʼe ma fia olo ʼo faifakamafola ʼi te fenua ʼae ʼe ovi mai ko Ouganda. Hili taʼu ʼe hogofulu ki muʼa atu, neʼe puleʼi leva e te pule solia ko Idi Amin ia te puleʼaga ʼo Ouganda. Lolotoga tona temi pule, neʼe ina fekauʼi ke matehi he toko lauʼi afe hahaʼi, pea neʼe maʼuli mamahi ia te toko lauʼi miliona hahaʼi. Pea ʼi te 1979, neʼe fakafeagai ʼihi kia Idi Amin ke gata tana pule. ʼE kua kotou mahino leva pe koʼe neʼe au mataku ʼi te alu ʼo maʼuli ʼi he fenua feia, ʼe lahi ai te agamalohi. Kae neʼe tokoni mai te Ako ʼo Kileate ke ma nofo teuteu ʼo falala kia Sehova. Koia, neʼe ma io ki ai.

Neʼe fakamataku ʼosi te maʼuli ʼae ʼi Ouganda. Neʼe mole lava tufaki e te puleʼaga te vai, mo te hila pea mo ʼihi atu meʼa ʼe ʼaoga tafito ki te hahaʼi. Neʼe mole kei haele te telefoni. Neʼe fefaifanaʼaki pe te hahaʼi mo kaihaʼa, tafito ʼi te poʼuli. Koia ka poʼuli, pea ʼe nonofo maʼu te hahaʼi ʼi ʼonatou api, mo fakaʼamu pea mo faikole ke ʼaua naʼa haʼu he tahi ʼo kaihaʼa ʼonatou api peʼe matehi natou. Logo te faigataʼa ʼo te maʼuli, kae neʼe malohi tuʼumaʼu pe te tui ʼa te ʼu tehina mo tuagaʼane ʼo Ouganda, pea mo natou tauhi kia Sehova ʼaki he fiafia.

ʼI te 1982, neʼe ma tau leva mo Heinz ki Kampala, te kolo muʼa ʼo Ouganda. ʼI te ʼu ʼuluaki mahina ʼe nima, neʼe ma nonofo io Sam mo Christina Waiswa, fakatahi mo ʼana fanau ʼe toko nima pea mo te tahi foʼi toko fa ʼo tonā famili. Neʼe kakai tuʼa tahi ʼi te ʼaho ia te tehina mo te tuagaʼane Waiswa mo tonā famili. Kae neʼe natou lotofoaki tuʼumaʼu pe pea mo vaevae mo maua te kiʼi meʼa pe ʼe natou maʼu. ʼI tama nonofo ʼi te famili Waiswas, neʼe lahi te ʼu ako neʼe ma maʼu taumatuʼa pea neʼe tokoni mai ki toma maʼuli misionea. Ohage la, neʼe ma ako ke ma fakasiʼisiʼi te fakaʼaogaʼi ʼo te vai moka ma maʼanu pea mo toe fakaʼaogaʼi te vai pe ʼaia ʼo tama ʼosi maʼanu ki te kapine. ʼI te 1983, neʼe ma maʼu mo Heinz homa api ʼi he kolo ʼi Kampala ʼe mole hoko ai he meʼa.

Neʼe ma leleiʼia ʼosi te gaue faifakamafola. Neʼe au manatuʼi neʼe ma tufa ia nusipepa ʼe 4 000 tupu ʼi te mahina pe ʼe tahi. Kae ko te meʼa ʼae ʼe fakafiafia ko tama sisio ki te faʼahiga tali e te hahaʼi ia te moʼoni. Neʼe natou fakaʼapaʼapa ki te ʼAtua pea mo fia palalau ki te Tohi-Tapu. Neʼe ma tahi maʼu mo Heinz ʼama ako ʼe 10 peʼe 15. Pea neʼe lahi te ʼu meʼa neʼe ma ako mai tama ʼu ako. Ohage la, neʼe ma fiafia ʼi tanatou maʼu ia he faʼahiga sio ʼe lelei moka olo ʼo fono ʼi te vahaʼa fuli. ʼE mole natou meo ʼi he temi kae ʼe natou fiafia tuʼumaʼu pe.

ʼI te 1985 mo te 1986, neʼe hoko ai he tahi ʼu tau ʼe lua ʼi Ouganda. Neʼe ma sisio tuʼumaʼu ki he ʼu fanau ʼe toʼo mahafu pea mo tutuʼu ʼi te ʼu ala ʼo taʼofi te ʼu motoka. ʼI te ʼu taʼu ʼaia, neʼe ma kole tuʼumaʼu kia Sehova ke tokoni mai ke ma maʼu te fakasiosiotonu, pea mo nonofo tokaga ʼi tama faifakamafola, pea ke ʼaua naʼa ma matataku. Pea neʼe tali ia Sehova ki ʼama faikole. Neʼe puli atu aipe toma matataku moka ma felaveʼi mo he tahi ʼe fia logo ki te logo ʼo te Puleʼaga.

Neʼe ma toe leleiʼia tama faifakamafola ki te kau matapule. Ohage la, neʼe ma felaveʼi pea mo fai te ako ʼa Murat mo Dilbar Ibatullin. Ko he taumatuʼa mai Tatarstan, ʼi Lusia. Ko Murat neʼe ko te toketa. Neʼe papitema taumatuʼa leva pea mo tauhi agatonu tuʼumaʼu kia Sehova. Ki muli age, neʼe au felaveʼi mo Tatiana Vileïska, ko he fafine mai Ukraine. ʼI te temi ʼaia, neʼe lotomamahi ʼaupito pea mo fia fakamate. Hili tona papitema, neʼe toe liliu ki Ukraine pea ki muli age neʼe tokoni leva ki te fakaliliu ʼo te ʼu tohi ʼi te lea Ukraine.a

NEʼE MA MISIONEA ʼI HE TAHI AGE FENUA

ʼI te 1991, neʼe ma malolo mo Heinz ʼi Autriche, pea neʼe pauʼi mai te filiale ʼo te fenua ʼo fakaha mai ke ma olo ʼo gaue ʼi Bulgarie. Lolotoga ni taʼu, neʼe tapuʼi te gaue ʼi ʼihi fenua ʼo te Eulopa. Kae neʼe kua fetogi leva pea neʼe fakagafua ki te kau Fakamoʼoni ʼa Sehova ke natou faifakamafola ʼi te ʼu fenua ʼaia. Pea neʼe kau ia Bulgarie ʼi te ʼu fenua ʼaia. Ohage pe ko te aluʼaga ʼae neʼe au talanoa ki ai ʼi muʼa atu, neʼe ma ʼave fakafufu mo Heinz he ʼu tohi ki te fenua ʼaia logo la neʼe tapuʼi ai te gaue faifakamafola. Kae ʼi te temi nei, kua fekauʼi leva maua ke ma olo ʼo faifakamafola ai.

Neʼe toe ui mai e te ʼu tuagaʼane ke ʼaua tama toe liliu ki Ouganda. Koia, neʼe mole ma toe liliu ai ki Ouganda ʼo fakatoka ʼama ʼuta peʼe tauine mo ʼoma tehina mo tuagaʼane ʼi ai. Kae neʼe ma olo ki te Petele ʼo Siamani, ʼo toʼo ai te motoka pea ma olo ai ki Bulgarie. Neʼe hinoʼi maua ke ma kau ki he kutuga ʼe ko kau faifakamafola ʼe teitei 20 ʼi Sofia.

Neʼe toe lahi te ʼu fihifihia neʼe ma tau mo ia ʼi Bulgarie. ʼUluaki, neʼe mole ma iloʼi te lea. Pea tahi, ko te ʼu tohi pe neʼe maʼu ʼi te lea Bulgarie ko te La vérité qui conduit à la vie éternelle, mo Te Tohi ʼo Te ʼu Hisitolia Fakatohi-tapu. Pea neʼe faigataʼa kia maua te kamata ʼo he ʼu ako Tohi-Tapu. Logo la te ʼu fihifihia ʼaia neʼe faʼafai pe te kiʼi kutuga pea mo tuputupu. Neʼe tokagaʼi e te Ekelesia Orthodoxe, pea neʼe mole natou leleiʼia tamatou faifakamafola ʼo natou kamata fakatagaʼi ai matou.

ʼI te 1994, neʼe mole kei fakamoʼoni ʼi te lao ko te kau Fakamoʼoni ʼa Sehova ʼe ko he lotu pea neʼe kua ui ʼe ko he magaʼi lotu. Neʼe puke ʼihi tuagaʼane. Neʼe fakamafola he ʼu loi ʼo ʼuhiga mo matou ʼi te ʼu talalogo, ʼo natou ui ʼe matehi e te kau Fakamoʼoni ʼa Sehova ʼanatou fanau pea mo uga ʼihi kau Fakamoʼoni ke natou fakamate. Neʼe faigataʼa ai kia maua mo Heinz ia te faifakamafola. Neʼe ma tau felaveʼi mo he ʼu hahaʼi agamalohi ʼe kalaga mai, mo pauʼi ki te kau polisi pea mo tuki maua. Neʼe faigataʼa ʼaupito te tufa ʼo te ʼu tohi ʼi te fenua pea mo te lue ʼo he ʼu fale ke fai ai te ʼu fono. Neʼe faiga te kau polisi ke natou taʼofi ʼamatou fakatahi lalahi. Neʼe heʼeki mahani maua ʼi te sisio ki he fehiʼaʼinaʼi feia ʼo tatou. Neʼe kehe ʼosi mo te hahaʼi ʼo Ouganda, ʼae neʼe natou fia ako te Tohi-Tapu. Kotea ʼae neʼe tokoni mai kia maua mo Heinz ke ma taupau maʼu toma fiafia?

Neʼe ma fiafia ʼi tama fakatahi tuʼumaʼu mo te ʼu tehina mo tuagaʼane ʼo te fenua. Neʼe natou fiafia ʼi tanatou maʼu te moʼoni pea mo te tokoni ʼae neʼe foaki age kia natou. Neʼe matou fetokoniʼaki pea mo felagolagoʼaki. Neʼe ma ako mai te ʼu aluʼaga ʼaia, ʼe feala ke tou fiafia ʼi he gaue pe ʼe tuku mai, mo kapau ʼe tou haga ʼoʼofa ki te hahaʼi, kae mole tou manatu pe ki ʼotatou fihfihia.

ʼAki te temi, neʼe faigafua leva te faifakamafola. Neʼe toe fakamoʼoni ʼi te lao tatatou kautahi ʼi te 1998, pea neʼe lahi leva te ʼu tohi neʼe maʼu ʼi te lea Bulgare. Pea ʼi te 2004, neʼe laga mo avahi leva ia he filiale foʼou. ʼI te temi nei, ko kokelekasio ʼe 57 ʼi Bulgarie pea mo kau faifakamafola ʼe 2 953. Pea ʼi te 2024, ko te toko 6 475 neʼe kau ki te ʼAho Fakamanatu. Kae neʼe ʼi ai te temi, ko tehina pe ʼe toko nima ʼi Sofia, kae ia ʼaho nei ko kokelekasio leva ʼe hiva. Neʼe ma sisio mata ki te moʼoni ʼo te ʼu palalau ʼaeni kua “liliu . . . te tokosiʼi ko he toko afe.”​—Esa. 60:22.

NEʼE LAHI TE ʼU ʼAHIʼAHI NEʼE AU TAU MO IA ʼI TOKU MAʼULI

Neʼe lahi te ʼu mahaki neʼe au tau mo ia. Neʼe tuʼa lahi te tala e te kau toketa ʼe au maʼu he ʼu kosea, pea ko te tahi neʼe maʼu ʼi toku ʼulu. Neʼe au fai taku radiothérapie pea neʼe tafa lahi au ʼi Initia. Pea neʼe hola 12 toku tafa ʼaia ke toʼo he koga lahi ʼo toku mahaki. Hili toku tafa, neʼe ma nonofo ʼi he kiʼi temi ʼi te Petele ʼo Initia ke lelei muʼa toku mahaki. Pea neʼe ma toe liliu leva ʼo fakahoko tama gaue ʼi Bulgarie.

ʼI te temi ʼaia, neʼe toe mahaki mo Heinz. Ko he mahaki neʼe tuku holo pea ʼe tahitahiga tona maʼu. ʼE higoa te mahaki ʼaia ko Huntington. Neʼe faigataʼa kia ia tana haʼele, mo palalau pea mo tana fai ʼihi meʼa. ʼI te ʼaʼasili kovi leva ʼo tona mahaki, neʼe tonu leva ke au tokoni ki ai. ʼI ʼihi temi, neʼe kua au gaʼegaʼe ʼosi, pea mo mataku naʼa mole au lava tokaga tuʼumaʼu ki ai. Kae neʼe ʼi ai te tuagaʼane tupulaga ʼe higoa ko Bobi, neʼe faifakamafola tuʼumaʼu mo Heinz. Neʼe mole ufiufi ia Bobi moka mole mahino lelei te ʼu palalau ʼa Heinz peʼe moka mole ina lava tuku noa ʼona nima mo vaʼe. Neʼe feala pe ke au falala kia Bobi moka mole au lava tokoni kia Heinz. Loga la neʼe mole ma fakatuʼutuʼu mo Heinz ke ma maʼu fanau ʼi te malama ʼaeni, kae neʼe foaki mai e Sehova ia Bobi ko hama kiʼi tama.​—Mko. 10:​29, 30.

Neʼe toe tau ia Heinz mo he kosea. Meʼa fakaʼofaʼofa he neʼe mate leva siʼoku ʼohoana ʼi te 2015. Hili te mate ʼo Heinz, neʼe au manatuʼi ʼosi ia ia he neʼe ko ia tuʼumaʼu ʼae neʼe tokoni mai ke ʼaua taku hoha fau. ʼE mole feala ke au galoʼi siʼoku ʼohoana, ʼe hage pe kia au ʼe kei maʼuli. (Luka 20:38) ʼI te ʼaho fuli, ʼe au manatuʼi pe ʼana palalau fakalotomalohi pea mo ʼana tokoni lelei. ʼE au lotofakafetaʼi ʼaupito ki tama tauhi fakatahi kia Sehova lolotoga te ʼu taʼu ʼaia.

ʼE AU LOTOFAKAFETAʼI KI TE TOKONI ʼA SEHOVA

Neʼe tokoni moʼoni mai ia Sehova ʼi ʼoku ʼahiʼahi fuli. Neʼe toe tokoni mai ke au tauʼi toku umiuminoa pea ke au misionea mo ʼofa ki te hahaʼi. (2 Tim. 1:7) ʼE au fakamalo kia Sehova he ko au mo toku kiʼi tehina veliveli kua ma gaue temi katoa kia Sehova ʼi te temi nei. Ko ia mo tona ʼohoana ʼe na gaue ʼi te siliko ʼo ʼaʼahi te ʼu kokelekasio ʼi te lea Serbe, ʼi te ʼu kolo kehekehe ʼo te Eulopa. Neʼe hoko moʼoni leva te ʼu fakaʼamu ʼo siʼaku tamai kae kei matou liliki.

Ka au ako te Tohi-Tapu ʼe au maʼu ai te tokalelei ʼo te loto. ʼI te ʼu temi faigataʼa, neʼe au ako ai ke au faikole “fakamalotoloto age” ohage ko tona fai e Sesu. (Luka 22:44) Neʼe tali e Sehova ʼaku faikole ʼaki te ʼofa mo te agalelei ʼo te ʼu tehina mo tuagaʼane ʼo taku kokelekasio ʼae ʼi Nadezhda, ʼi Sofia. ʼE natou fakaafe tuʼumaʼu au ke matou fakatahi pea mo fakaha mai tonatou ʼofa. ʼAki te ʼu fahaʼi ʼaia, neʼe au fiafia ʼaupito ai.

ʼE au metitasio tuʼumaʼu ki te fakatuʼuake. ʼE au fakakaukauʼi ʼe tutuʼu ʼaku matuʼā ʼi tomatou muʼa api, kua nā tupulaga mo finemui ohage pe ko te temi ʼae neʼe nā ʼohoana ai. Pea ʼe au sio ki toku kiʼi tehina ʼe ina teuteuʼi he meʼa kai. Kae ko Heinz ʼe tuʼu ovi ki tana hosi. Ka au fakakaukauʼi te ʼu aluʼaga ʼaia, pea ʼe puli ai te ʼu manatu fakalotomamahi ʼe au nofo mo ia pea mo au lotofakafetaʼi lahi kia Sehova.

Ka au fakakaukauʼi toku maʼuli pea mo sioʼi toku ka haʼu, ʼe au manatu tahi mo te ʼu palalu ʼaeni ʼa Tavite ia Pesalemo 27:​13, 14: “ ʼE au nofo anai koa ʼifea, mo ka na pau la neʼe mole au iloʼi papau ʼe au sio anai ki te agalelei ʼo Sehova ʼi te fenua ʼo te kau maʼuli? Falala kia Sehova. Ke ke lototoʼa pea mo lotomalohi. ʼEi, falala kia Sehova.”