Lu tax nit di dee?

Li Biibël bi wax

Laaj lu tax nit di dee lu jaadu la, rawatina bu dee suñu mbokk walla xarit moo gaañu. Biibël bi nee na: «Peyu bàkkaar mooy dee» (Room 6:23).

Lu tax nit ñépp di bàkkaar te di dee?

Suñuy maam Aadama ak Awa ñàkk nañu seen bakkan ndaxte dañu bàkkaaroon (Njàlbéen ga 3:17-19). Seen bañ a déggal Yàlla, dee rekk la leen jural, ndaxte ci Yàlla «la dund di balle» (Sabóor 36:10; Njàlbéen ga 2:17).

Aadama wàll na doomam yépp bàkkaar. Biibël bi nee na: «Bàkkaar ci kenn nit la jaar, dugg ci àddina, indaale fi dee, te dee daldi law ci nit ñépp, ndaxte ñépp a bàkkaar» (Room 5:12). Kon ñépp ay dee ndaxte ñépp ay bàkkaar (Room 3:23).

Naka la dee di jeexe?

Yàlla wax na ne bés dina ñëw «dina noot dee ba fàww» (Esayi 25:8). Waaye bala muy def loolu, fàww mu dindi li waral dee, maanaam bàkkaar. Dina ko def jaare ci Yeesu Kirist miy «dindi bàkkaaru àddina» (Yowaana 1:29 ; 1 Yowaana 1:7).