Ipinagbabawal Daw kan Mga Saksi ni Jehova an Partikular na mga Pelikula, Libro, o Kanta?

Dai. An samong organisasyon dai nagre-review nin espesipikong mga pelikula, libro, o kanta para magdikta kun arin an mga dapat likayan kan mga indibidwal. Taano?

Dinadagka kan Bibliya an lambang indibidwal na sanayon an saiyang “kakayahan na makasabot” para maaraman kun arin an marahay asin kun arin an maraot.—Hebreo 5:14.

Nagtatao an Kasuratan nin pundamental na mga prinsipyo na puwedeng turutimbangon nin sarong Kristiyano pag nagpipili nin libangan.a Arog kan sa gabos na aspekto nin buhay, an pasuhan mi iyo na “padagos na siguraduhon kun ano an akseptable sa Kagurangnan.”—Efeso 5:10.

Itinutukdo kan Bibliya na may awtoridad an mga payo nin pamilya, kaya puwede sindang magdesisyon na dai itugot an partikular na mga libangan sa saindang pamilya. (1 Corinto 11:3; Efeso 6:1-4) Pero sa luwas kan pamilya, mayo nin siisay man an igwang awtoridad na ipagbawal an partikular na mga pelikula, kanta, o mga artist asin ibilang iyan na dai puwede para sa mga Saksi sa pangkagabsan.—Galacia 6:5.