Nganatholere Ingasaba Ababuyirire?

Ekya Biblia yikasubiraya

Eyihi. E Biblia yikabugha yithi thutholere ithwasaba Nyamuhanga musa, erilhabira omwa lina lya Yesu. Yesu mwabwira abigha biwe athi: “Neryo ku musabe muthya, muthi, Thatha wethu oyuli elhubulha, erina lyawu libye libuyirire.” (Matayo 6:9) Yesu mwathabwira abigha biwe athi ibasaba ababuyirire, abamalaika, kutse omundu wosi-wosi kw’ihaho Nyamuhanga.

Yesu kandi mwabwira abigha biwe athi: “Ingye indi nzira, ingye indi mwatsi w’ekwenene, ingye indi ngebe; sihali mundu oyukahika oku Thatha athe kwingye.” (Yoane 14:6) Yesu musa yo Nyamuhanga abiriha ehamuli y’erithusabira.​—Abaebrania 7:25.

Kandi ibbwa namasaba Nyamuhanga n’ababuyirire?

Omwa kihano kighuma omwa Bihano Ikumi, Nyamuhanga mwabugha athi: “Ingye Mwami Mukulhu Nyamuhanga wawu, indi Nyamuhanga w’obuha.” (Eriluayo 20:5) Ni mwa nziraki Nyamuhanga ni “w’obuha”? Nyamuhanga ni w’obuha omwa nzira indi anzire abandu ibamuramya iyo musa. Nyamuhanga anzire ebyosi ebihambire okw’iramya​—imwamuli n’omusabe, ibyakolerwa iyo musa.​—Isaya 48:11.

Thukahithanaya Nyamuhanga thwamasaba owundi mundu wosi-wosi, imwamune ababuyirire kutse abamalaika. Omukwenda Yoane abere akanza eriramya omumalaika, omumalaika mwamuthanga omw’imubwira athi: “Sukole wuthya! Ingye indi mughombe mulikyenyu haghuma nawu, n’abalikyenyu abakathulha omwatsi wa Yesu. Wuramaye Nyamuhanga!”​—Eribisulirwa 19:10.