ABALERE BAKABULHAYA
Busana Naki Ingasaba?
Eminyethu minene yikabugha yithi yikasaba, aliwe butsira obuli kiro. Ahathe erithika-thika, abandi bakayibulhaya: ‘Mbwino erisaba ni nzira y’erithekaniryamo obulengekania, kutse hali ekindi ekilengire okw’aho?’
Omusabe niki?
Omusabe ni kanirania n’Omuhangiki w’ebindu byosi. Thalengekania ekyo nga kikamanyisayaki! Yehova ni w’obuthoki bunene okwa bandu omwa buli kindu, nomwabine “syali hali okw’ithwe okwa buli mundu.” (Emibiri 17:27) Erithwalira haghuma, e Biblia muli erikokya libuyanga lino: “Muyithunde hakuhi na Nyamuhanga, nayo akendiyithunda hakuhi nenyu.”—Yakobo 4:8.
Wangayithunda wuthi hakuhi na Nyamuhanga?
Enzira nguma ly’erisaba—kwa wukakanaya wuthya na Nyamuhanga.
Eyindi nzira ly’erigha e Biblia—Nyamuhanga kw’akakanaya nawu athya.
Erikanirania ng’eryo—erisaba n’erigha e Biblia—likendi kuwathikya eribya n’obunywani obughumire na Nyamuhanga.
“Erikania na Yehova—erikanirania n’ow’Endatha Kutsibu—ni kighuma ky’okwa syonzunzo esya bandu bawithe.”—Jeremy.
“Eribwira Yehova y’eriyowa lyaghe ly’omwakathi erilhabira omwa musabe kikaleka ingayowa ingali hakuhi-kuhi nayu.”—Miranda.
Nyamuhanga akanowa emisabe?
Nomuwangabya iw’ikirirye omu Nyamuhanga—kandi nomuwangabya iwukamusaba—kyangana kalha eriligha wuthi kwenene akowa emisabe. Nomwabine, e Biblia yikakanaya oku Yehova ‘ng’oyukasubiraya erisaba.’ (Esyonyimbo 65:2) Nibya yikakukokaya yithi “muhire erihangya-hangya lyenyu lyosi oku Nyamuhanga.” Busana naki? ‘Kusangwa akabatheghaya.’—1 Petero 5:7.
Eky’erilengekaniako: Wukanathunga obuthuku bw’erikanirania na munywani wawu ow’okwa ndungu mughulhu wosi? Ekyo kya wangana kolha n’oku Nyamuhanga. Kanaya nayu mughulhu wosi omwa musabe, kandi kolha ekyo omw’ikolesya erina liwe, Yehova. (Esyonyimbo 86:5-7; 88:9) Omo kwenene, e Biblia yikakukokaya yithi ‘wusabe butsira eriumbya.’—1 Abanya Tesalonika 5:17.
“Omusabe ni kanirania ahakathi-kathi kaghe na Thatha waghe w’elhubulha, oyo ngabwira ebyosi ebiri okwa muthima.”—Moises.
“Ngabwira Yehova ya buli kindu erilhua okwa muthima, ngoku nangana kania na mama waghe kutse munywani waghe w’okwa ndungu.”—Karen.
Ni byahi ebyo nangasaba?
E Biblia yikabugha yithi: ‘Omo buli mwatsi mubwire Nyamuhanga obwagha bwenyu, imukamusaba n’erimuhathikana, imunemuha ewasingya.’—Abanya Filipi 4:6.
Mbwino ekyo kikamanyisaya kithi siki eribwira Nyamuhanga okwa bitsibu byawu? Ee! Kundi nibya e Biblia yikabugha yithi: “Wughusire Omwami Mukulhu y’amalighe wawu, nayu akendi kuhanganira.”—Esyonyimbo 55:22.
Aliwe ibbwa, wukasaba Nyamuhanga isiwabera erikania okwa bitsibu byawu bisa. Omukali oyukahulhawamo Chantelle akabugha athi: “Isibwendibya bunywani obuwene na Yehova namabera erimusaba obuwathikya lisa. Ngayowa eriha ewasingya iryalitholere iryabya embere, kandi n’elisti y’ebindu ebya ngasima yitholere iy’eyabya nene.”
Eky’erilengekaniako: Ni bindu byahi omwa ngebe yawu ebya wukahako ewasingya? Mbwino wangana lengekania okwa bindu bisathu ebya wanga simirako Yehova munabwire?
“Nibya n’akandu kake buyira, ng’erisima ekimole ikyuwene, kyanganaleka ithwaha omusabe w’erisima Yehova.”—Anita.
“Ghaniraya okwa kindu kyosi-kyosi omwa by’obuhangwa ekikakutsemesaya kutse soma erisako omwa Biblia erikakuhambako, neryo sima Yehova busana n’ekyo.”—Brian.