Luku bun nanga nyunsu di no tru
Na ini a ten disi a moro makelek leki fosi fu kon sabi sani, soleki san yu kan du fu ogri no miti yu noso fa yu kan tan gosontu. Ma te yu wani kon sabi moro fu den sani disi, dan yu musu luku bun nanga tori di no tru. Luku bun nanga sani soleki:
Nyunsu di e kori sma
Nyunsu di e fruteri lei
Te sma e denki taki na tiriman e meki taki ogri e pasa, aladi buweisi no de fu dati
Fu eksempre, a fesiman fu den Verenigde Naties ben warskow taki sma ben o panya ala sortu leitori na a ten di a COVID-19 siki ben panya na heri grontapu èn taki den leitori disi ben o abi takru bakapisi. A taki: „Sma e kon nanga ala sortu fowtu rai fu sori san wi musu du fu no kon siki èn omeni sma e plèi datra gi trawan. Ala sortu lei yu e yere na tapu telefisi nanga radio. Heri Internet lai nanga nyunsu taki na tiriman e meki taki ogri e pasa, aladi buweisi no de fu dati. Na wan pôpi sani now fu sori bita-ati gi makandra èn na heri grontapu, sma e desko trawan fu di den de tra fasi leki den.”
Wi sabi taki a no wan nyun sani taki sma e fruteri tori di no tru. Ma Bijbel ben taki dati na ini a ten disi, ’ogri sma nanga bedrigiman ben o kon ogri moro nanga moro. Den ben o kori trawan èn trawan ben o kori den’ (2 Timoteyus 3:1, 13). Now Internet e meki en moro makelek gi wi fu kisi nyunsu di e fruteri lei èn a e pasa taki wisrefi e panya a nyunsu dati fu di wi ben denki taki a tru. A bakapisi na taki social media, den email fu wi nanga den nyunsu di wi e kisi lai nanga tori di no tru helemaal.
San wi kan du fu no bribi tori di e fruteri lei? San wi kan du fu no bribi nyunsu di sma e panya fu meki trawan denki taki na tiriman e meki taki ogri e pasa, aladi buweisi no de fu dati? Luku sortu rai Bijbel e gi.
No bribi ala san yu e si noso e yere
San Bijbel e taki: „Wan sma sondro ondrofeni e bribi ala san sma e taki, ma a koniwan e luku bun pe a e poti en futu.”—Odo 14:15.
Efu wi no luku bun, dan sma kan kisi wi makelek. Fu eksempre, fowtow noso syatu felem de pe wan sani skrifi na en ondro èn tapu heri Internet, spesrutu tapu social media, sma a panya den sani disi. Furu tron den sortu fowtow noso syatu felem disi na fu meki sma lafu. Ma a no muilek fu kenki den fowtow noso felem disi, noso fu drai den poti na so wan fasi taki sma e kisi wan heri tra denki leki fa a tori ben de trutru. Sma kan meki felem srefi fu trutru sma di e du noso e taki sani di den no taki srefisrefi noso di noiti den no du.
„Furu fu den leitori di ondrosukuman feni tapu social media na fowtow noso felem di sma teki puru fu wan tra tori, ma di no e sori fa sani pasa trutru.”—Axios Media.
Aksi yusrefi: ’A nyunsu disi na trutru nyunsu, noso wan nyunsu di e fruteri lei?’
Ondrosuku fu pe a nyunsu komoto èn efu a tru
San Bijbel e taki: „Ondrosuku ala sani fu luku efu den tru.”—1 Tesalonikasma 5:21.
Fosi yu bribi wan nyunsu noso yu e seni en go gi trawan, ondrosuku fosi efu a tru, awinsi na wan nyunsu di pôpi noso di sma e taki fu en ibri leisi baka. Fa yu kan du dati?
Ondrosuku efu yu kan frutrow den sma fu pe a nyunsu komoto. Nyunsuman kan kenki wan tori soso fu meki moni, noso fu politiek ede. Dati meki te yu leisi noso yere wan nyunsu, dan a bun fu agersi en nanga san tra nyunsuman e taki fu en. Son leisi, mati kan seni wan e-mail kon gi yu noso den kan poti wan boskopu tapu social media di no tru. A no fu espresi den du en, ma na sabi den no ben sabi. Dati meki yu no musu frutrow wan nyunsu efu yu no ondrosuku fu pe a komoto.
Luku efu a no owru nyunsu èn efu a e taki sani leki fa a pasa trutru. Luku tu efu a abi wan datum, efu yu kan ondrosuku fu pe a komoto èn efu nofo buweisi de fu en. De na ai te yu e si taki seryusu nyunsu tyari na so wan fasi taki a gersi leki na wan gewoon sani. Luku bun nanga nyunsu di e wroko tapu a firi fu sma, kande fu di a e meki den ati e bron.
„Neleki fa a prenspari fu wasi yu anu ibri tron baka, na so a prenspari tu fu ondrosuku ibri leisi baka efu wan nyunsu tru.”—Sridhar Dharmapuri, Senior Food Safety and Nutrition fu a VN.
Aksi yusrefi: ’A muilek fu frustan efu a nyunsu disi de so trutru, noso efu wan sma en eigi denki? Na wán sei nomo fu a tori a e fruteri?’
Luku san na a tru fu tori, na presi fu abi yu eigi denki
San Bijbel e taki: „A sma di e frutrow na tapu ensrefi na wan don sma.”—Odo 28:26.
Te wan tori de a srefi leki san wi e denki, dan wi abi a gwenti fu frutrow en. Furu Internet bedrijf e seni nyunsu gi wi di wi lobi. Noso den e seni boskopu gi wi tapu social media fu di den kon si taki na den sortu sani dati wi gwenti leisi. Noso den e si taki wi ben e suku sowan sani wan leisi kaba. Ma san wi lobi fu yere, a no ala ten san wi musu fu yere.
„Libisma man denki bun fu sani. Ma den sani di den e winsi, den sani di den e howpu, den sani di den e frede èn den sani den wani du, kan bruya a denki fu den. Sobun, te den e yere wan sani, dan den e bribi en moro gaw fu di a e kruderi nanga san den e denki.”—Peter Ditto, wan sabiman fu libimakandra afersi
Aksi yusrefi: ’Mi e bribi a tori disi soso fu di a e taki san mi wani yere?’
No panya tori di no tru
San Bijbel e taki: „Un no musu panya tori di no tru.”—Eksodes 23:1.
Hori na prakseri taki te yu e fruteri trawan wan tori, a kan abi krakti tapu a denki fu den èn tapu den sani di den e du. Srefi te a e pasa taki yu panya wan tori di no tru, aladi a no fu espresi yu du en, a kan abi takru bakapisi.
„A fosi sani di yu musu du te sma seni wan nyunsu gi yu na fu wakti pikinso èn fu denki bun fu a tori. Aksi yusrefi: ’Mi de seiker taki a tori di mi wani prati, tru?’ Efu ala sma ben o du a sani disi, dan wi ben o si taki furu leitori no ben o de moro tapu Internet.”— Peter Adams, wan fesiman fu News Literacy Project.
Aksi yusrefi: ’Mi e prati a nyunsu noso a tori disi fu di mi de seiker taki a tru?’