SUKKUN-SUKKUN NI AKKA NA POSO
Adong do Gunana Martangiang
Menurut sada survei, 80 persen akka na poso di Amerika martangiang do. Alai, holan satonga do sian nasida na martangiang ganup ari. Adong do na sukkun-sukkun rohana, ‘Holan mambahen hita asa tenang do tangiang i, manang adong dope manfaatna na asing?’
Aha do tangiang i?
Tangiang, i ma sada caratta lao makkatai dohot Sipanoppa saluhutna. Bayakkon ma, molo dibandikkon dohot jolma, dao do unjago Debata Jahowa di sasude. Nang pe songon i, sasittongna “dang dao Ibana sian ganup hita”. (Ulaon ni Apostel 17:27) Didok do di Bibel, “Pajonok hamu ma tu Debata, dung i pajonokonna ma tu hamu.” (Jakobus 4:8) Sada undangan na luar biasa do on.
Songon dia do hamu boi jonok tu Debata?
Sada carana, i ma marhite tangiang. On ma carana boi hamu makkatai dohot Debata.
Cara na asing, i ma marsiajar Bibel. On ma cara ni Debata “makkatai” tu hamu.
Martangiang dohot marsiajar Bibel, dos do i songon dua halak na makkata-hatai. Songon i ma hamu dohot Debata. Molo dibahen hamu songon i, boi ma lam solhot hamu tu Debata.
“Sada kehormatan na luar biasa do boi makkatai tu Jahowa, i ma Debata na Marhuaso.”—Jeremy.
“Marhite tangiang, hupaboa do sude aha pe na di rohakku tu Jahowa. Gabe boi ma huhilala na jonok do au tu Ibana.”—Miranda.
Dibege Debata do tangiangmu?
Nang pe porsea hamu na tutu do adong Debata, jala martangiang do hamu tu Ibana, alai olo do maol hamu porsea na ditangihon Debata do tangiangmuna. Alai didok di Bibel, molo Debata i ma “Sitangihon tangiang”. (Psalmen 65:2) Jala didok do tu hamu “pasahat hamu ma sude holso ni rohamuna tu Ibana”. Boasa? “Alana diparrohahon do hamu.”—1 Petrus 5:7.
Pikkirhon ma: Jotjot do hamu makkatai dohot ale-alemuna? Hamu pe, boi do jotjot makkatai dohot Debata marhite tangiang. Tikki martangiang hamu, dokkon ma goar ni Debata, i ma Jahowa. (Psalmen 86: 5-7; 88:9) Didok Bibel do tu hita “torus ma hamu martangiang”.—1 Tessalonik 5:17.
“Marhite tangiang, boi ma au makkatai dohot Bapakku na di surgo. Hupaboa do sude aha na di rohakku tu Debata.”—Moises.
“Hupaboa do sude rahasiakku tu Jahowa, dos songon tikki marcerita au tu oma dohot tu ale-alekku.”—Karen.
Akka aha do na boi tatangiakkon?
Didok di Bibel, “Pangido hamu ma saluhutna tu Debata marhite tangiang dohot elek-elek mardongan hamauliateon.”—Pilippi 4:6.
Jadi, boi do tapaboa sude masalahta tu Debata? Boi. Didok di Bibel, “Pasahat ma holso ni roham tu Jahowa, Sai urupanna do ho.”—Psalmen 55:22.
Alai, unang ma holan masalahmuna na diceritahon hamu tu Debata. Sahalak na poso na margoar si Chantelle mandokkon, “Molo holan na mangido tolong do torus isi ni tangiangta, dang na marale-ale na denggan songon i. Menuruttu, ikkon parjolo do hita mandok mauliate tu Debata. Jala ikkon unggodang do na taceritahon taringot pasu-pasu na tadapot.”
Pikkirhon ma: Akka aha do na boi mambahen hamu mandok mauliate? Pikkirhon ma tolu na boi mambahen hamu mandok mauliate tu Jahowa di bagasan sadari on.
“Tikki diida hamu bunga na bagak, boi do didok hamu mauliate tu Jahowa.”—Anita.
“Rimangi ma akka toppaan ni Debata na palongang roha manang ayat ni Bibel na hona tu rohamuna. Dung i, dokkon ma mauliate tu Jahowa tu sude na dihilala hamu.”—Brian.