Ntak Emi Mme Ntiense Jehovah Mîsinịmke Udia Ọbọn̄ Mmọ Nte Nsio Nsio Ufọkabasi Ẹsinịmde?
Ke ini inịmde “Udia Ọbọn̄” emi isidade iti n̄kpa Jesus, nnyịn isinam n̄kukụre se Bible ọdọhọde inam. (1 Corinth 11:20; Edisana N̄wed Abasi Ibom) Ndi emekere ke Bible ọdọhọ ẹnam kpukpru se ediwak ufọkabasi ẹsinamde ke ini Udia Ọbọn̄ ye se mmọ ẹsinyụn̄ ẹkpepde mme owo ẹban̄a Udia Ọbọn̄?
Ntak emi isinịmde Udia Ọbọn̄
Jesus ọkọtọn̄ọ Udia Ọbọn̄ man isida iti n̄kpa imọ inyụn̄ iwụt ke imama nte enye ekedide edikpa ọnọ nnyịn. (Matthew 20:28; 1 Corinth 11:24) Nsio nsio ufọkabasi ẹnyene mme edinam emi mmọ ẹdade nte Udia Ọbọn̄; mmọ ẹsinyụn̄ ẹdọhọ ke edinam emi esinam Abasi atua mmimọ mbọm m̀mê efen idiọkn̄kpọ mmimọ.a Bible idọhọke ke mme edinam ufọkabasi anam Abasi efen mme idiọkn̄kpọ nnyịn, edi ọdọhọ ke Abasi edifen idiọkn̄kpọ nnyịn edieke ibuọtde idem ke Jesus.—Rome 3:25; 1 John 2:1, 2.
Ikafan̄ ke ẹkpenịm Udia Ọbọn̄ ke isua?
Jesus ọkọdọhọ mbet esie ẹsinịm Udia Ọbọn̄ ndida nti n̄kpa imọ, edi enye iketịn̄ke m̀mê ikafan̄ ke ẹkpesinịm Udia Ọbọn̄ emi. (Luke 22:19) Ndusụk owo ẹdọhọ ke ẹkpesidi kpukpru ọfiọn̄, ndusụk ẹte ke ekpedi kpukpru urua, kpukpru usen, ediwak ini ke usen, mîdịghe ke ini ekededi emi owo amade.b Edi, yak ise ndusụk n̄kpọ oro ẹkemede ndin̄wam nnyịn idiọn̄ọ m̀mê ikafan̄ ke ẹkpesinịm Udia Ọbọn̄.
Jesus ọkọtọn̄ọ Udia Ọbọn̄ ke ukem usen oro mme Jew ẹkesinịmde Passover, ndien ẹkewot enye kpa usen oro. (Matthew 26:1, 2) Enyene ntak emi Jesus akakpade kpa usen oro. N̄wed Abasi owụt ke n̄kpa Jesus okonyụn̄ etie nte uwa emi ẹkewade ke usen Passover. (1 Corinth 5:7, 8) Ẹkesinịm Passover ini kiet kpọt ke isua. (Exodus 12:1-6; Leviticus 23:5) Ntak edi oro mbet Jesus ẹkesinịmde Udia Ọbọn̄ ndida nti n̄kpa Jesus ini kiet kpọt ke isua.c Mme Ntiense Jehovah ẹnam se mbet Jesus ẹkesinamde; mmọ ẹsinyụn̄ ẹnịm Udia Ọbọn̄ mmọ ini kiet kpọt ke isua.
Usen ye ini emi ẹkpenịmde Udia Ọbọn̄
Jesus ama anam owụt nte ẹkpetide n̄kpa imọ. Oro n̄ko anam nnyịn idiọn̄ọ m̀mê ikafan̄ ke ẹkpesinịm Udia Ọbọn̄, onyụn̄ an̄wam nnyịn idiọn̄ọ usen ye ini oro ẹkpenịmde enye. Jesus okowụt mbet esie nte ẹkpetide n̄kpa imọ ke utịn ama okosop, ndien Bible anam idiọn̄ọ ke enye akanam emi ke usenọfiọn̄ 14 ke akpa ọfiọn̄ mme Jew emi ẹkotde Nisan ke isua 33 C.E. (Matthew 26:18-20, 26) Nnyịn isiti n̄kpa Jesus ke ukem usenọfiọn̄ oro kpukpru isua, nte mbet esie ẹkenamde.d
Kpa ye oro usenọfiọn̄ 14 ke ọfiọn̄ Nisan eke isua 33 C.E. ọkọduọde ke Friday, usenọfiọn̄ oro isiduọhọ ke Friday kpukpru isua, edi ekeme ndiduọ ke usen ekededi. Man idiọn̄ọ nnennen usen emi edide Nisan 14 ke isua kiet kiet, isida ukem usụn̄ emi mme owo ke eyo Jesus ẹkesibatde usen ibat; nnyịn isibatke nte mme Jew eyomfịn ẹsibatde usen.e
Uyo ye wine Udia Ọbọn̄
Jesus akada nyọhọ nsụhọ uyo emi owo mîkesịnke leaven (mmê n̄kpọ nte yeast) ye ndatndat wine oro mmọ ẹkedade ẹnam usọrọ Passover anam owụt mbet esie nte mmọ ẹdisitide n̄kpa imọ. (Matthew 26:26-28) Utọ uyo oro ke nnyịn isinyụn̄ ida inịm Udia Ọbọn̄. Isida uyo emi owo mîsịnke yeast m̀mê n̄kpọ ntre ye ndatndat wine emi owo mîsịnke n̄kpọ emi anamde enye enịn̄e inịm Udia Ọbọn̄.
Ndusụk ufọkabasi ẹsida uyo emi ẹsịnde leaven m̀mê yeast, edi ke ediwak itie ke Bible, leaven ada aban̄a idiọkn̄kpọ ye n̄kpọ emi abiarade. (Luke 12:1; 1 Corinth 5:6-8; Galatia 5:7-9) Oro owụt ke uyo emi odotde ndida mban̄a mfọnmma idem Christ edi enye emi owo mîsịnke leaven m̀mê n̄kpọ ekededi emi ekemede ndinam uyo oro ofụt m̀mê abiara. (1 Peter 2:22) Ndusụk ufọkabasi ẹsida mmọn̄ mfri grape emi ẹtetde kpa usen oro ẹnịm Udia Ọbọn̄, utu ke ndida wine. Ndusụk mmọ ẹsinam emi sia mmọ ẹkerede ke ifọnke owo Abasi ọn̄wọn̄ ọkpọsọn̄ mmịn nte wine. Edi Bible itịn̄ke utọ ikọ oro.—1 Timothy 5:23.
Uyo ye wine oro idịghe ata idem ye iyịp Christ
Uyo ye wine Udia Ọbọn̄ idịghe ata idem ye iyịp Christ, edi ẹdada ẹban̄a mmọ. Ndusụk ufọkabasi ẹdọhọ ke Abasi esinam uyo ye wine oro akabade ata idem ye iyịp Christ ke ini Udia Ọbọn̄. Yak ise n̄kpọ ifan̄ ke Bible emi owụtde ke idịghe ntre.
Edieke Jesus ọkpọkọdọhọde mbet esie ẹn̄wọn̄ ata iyịp imọ, ọwọrọ enye ọkọdọhọ mmọ ẹbiat ibet Abasi emi ọdọhọde yak ẹbet iyịp. (Genesis 9:4; Utom 15:28, 29) Nsa-o, Jesus ikpedehe-dei idọhọ mme owo ẹnam se Abasi ọkọdọhọde ẹkûnam sia iyịp adade aban̄a uwem emi edide enọ Abasi.—John 8:28, 29.
Edieke mme apostle ẹken̄wọn̄de ata iyịp Jesus, Jesus ikpọkọdọhọke mmọ ke ‘ẹyeduọk iyịp imọ.’ Edi ikọ esie emi okowụt ke owo ikọduọkke iyịp esie kan̄a.—Matthew 26:28.
Jesus akawa idemesie ọnọ nnyịn “ini kiet kpọt.” (Mme Hebrew 9:25, 26) Edieke uyo ye wine Udia Ọbọn̄ ẹsikabarede idem ye iyịp Jesus, oro ọkpọwọrọ ke Jesus ayak mme owo ẹwa enye ata ediwak ini idahaemi.
Ti ke Jesus ọkọdọhọ ete: “Ẹka iso ẹnam emi nditi mi,” ikọdọhọke “ẹka iso ẹnam emi ndiwa mi.”—1 Corinth 11:24.
Mbon oro ẹsikpepde ke uyo ye wine oro ẹsikabade idem ye iyịp Jesus, ẹkere ke ndusụk ufan̄ikọ Bible enyịme ye ukpepn̄kpọ emi. Ke uwụtn̄kpọ, ndusụk Bible ẹkabade se Jesus eketịn̄de ntem: “Emi edi iyịp mi.” (Matthew 26:28) Edi fiọk n̄ko ke ẹkeme ndikabade ikọ Jesus oro ntem: “Emi ọwọrọ iyịp mi,” “emi ada aban̄a iyịp mi,” m̀mê “emi ebiet iyịp mi.”f Jesus ama esima ndida n̄kpọ kiet ndomo ye en̄wen, idịghe akpa ekedi oro.—Matthew 13:34, 35.
Mmanie ẹkpeta uyo ẹnyụn̄ ẹn̄wọn̄ wine Udia Ọbọn̄?
Yak itịn̄ eke nnyịn Mme Ntiense Jehovah, owo tọsịn ifan̄ kpọt ẹsita uyo ẹnyụn̄ ẹn̄wọn̄ wine ke ini inịmde Udia Ọbọn̄. Ntak emi kpukpru owo emi ẹdụkde Udia Ọbọn̄ nnyịn mîsitieneke ita uyo inyụn̄ in̄wọn̄ wine oro?
Bible ọdọhọ ke ẹkeda iyịp Jesus ẹtọn̄ọ “obufa ediomi” emi akadade itie akani ediomi emi Jehovah okodụkde ye nditọ Israel. (Mme Hebrew 8:10-13) Ntre, mbon oro ẹdude ke obufa ediomi emi kpọt ẹsita uyo ẹnyụn̄ ẹn̄wọn̄ wine Udia Ọbọn̄. Idịghe kpukpru mme Christian ẹsịne ke obufa ediomi emi, edi sụk mbon oro Abasi ẹmekde san̄asan̄a, ẹsịne ke ediomi emi. (Mme Hebrew 9:15; Luke 22:20) Mmọ ẹditiene Jesus ikara ke heaven. Bible ọdọhọ ke owo 144,000 kpọt ẹsịne ke obufa ediomi emi.—Luke 22:28-30; Ediyarade 5:9, 10;14:1, 3.
Bible okot mbon oro ẹditienede Jesus mi ikara ke heaven “ekpri otuerọn̄.” Edi ata ediwak nnyịn mme Christian idi “akwa otuowo” emi ẹdidude uwem ke nsinsi ke Paradise mi ke isọn̄. (Luke 12:32; Ediyarade 7:9, 10) Kpa ye oro nnyịn emi ididude nsinsi uwem mi ke isọn̄ mîsitaha uyo inyụn̄ in̄wọn̄ wine Udia Ọbọn̄, nnyịn imesitiene idụk edinam emi man iwụt ke imama se Christ akanamde ọnọ nnyịn ke ndikenyịme ndidi ndikpa nnọ nnyịn.—1 John 2:2.
a Akamba n̄wed kiet ọdọhọ ke ikọ oro, sacrament isịneke ke Obufa Testament, ke inyụn̄ idụhe itie ndomokiet emi ẹsịnde ikọ Greek emi μυστήριον [my·steʹri·on] ke ini ẹtịn̄de n̄kpọ ẹban̄a baptism m̀mê Udia Ọbọn̄, m̀mê edinam ekededi.—Cyclopedia McClintock ye Strong, Ọyọhọ IX, page 212.
b Ndusụk Bible ẹdọhọ “adan̄a ini nte,” oro edi, adan̄a ini nte ẹdiade m̀mê ẹnịmde Udia Ọbọn̄. Oro anam ndusụk owo ẹkere ke akpana ẹnịm Udia Ọbọn̄ ediwak ini. Edi ke usem oro ẹkedade ẹwet Bible, ikọ oro ọwọrọ “ini ekededi” m̀mê “kpukpru ini” emi ẹnịmde edinam emi.—1 Corinth 11:25, 26; New International Version; Good News Translation.
c Se The New Schaff-Herzog Encyclopedia of Religious Knowledge, Ọyọhọ 4, page 43-44, ye Cyclopedia McClintock ye Strong, Ọyọhọ 8, page 836.
d Se The New Cambridge History of the Bible, akpa emi ẹkesiode, page 841.
e Ke n̄wed usenọfiọn̄ mme Jew eyomfịn, ẹsida ini emi ntaifiọk ẹsitọn̄ọde ẹbat obufa ọfiọn̄ ediọn̄ọ ini emi ọfiọn̄ Nisan ọtọn̄ọde. Edi mme Jew eyo mme apostle ikesinamke ntre. Mmọ ẹkesitọn̄ọ ndibat ọfiọn̄ Nisan akpa usen emi mmọ ẹdade ke Jerusalem ẹkụt ọfiọn̄, emi edide usen kiet m̀mê iba ẹkeme ndibe mbemiso ntaifiọk emi ẹkpepde n̄kpọ ẹban̄a ikpaenyọn̄ ẹkụtde obufa ọfiọn̄. Ntak edi oro usen emi Mme Ntiense Jehovah ẹsinịmde Udia Ọbọn̄ mmọ esikpụhọrede ndusụk isua ye usen oro mme Jew eyomfịn ẹsinamde Passover.
f Se A New Translation of the Bible, eke James Moffatt; The New Testament—A Translation in the Language of the People, eke Charles B. Williams; ye The Original New Testament, eke Hugh J. Schonfield.