ယဟိဝၤပှၤအုၣ်အသးတဖၣ်​ တြီဝဲတၢ်ကွၢ်တၢ်ဂီၤမူ, တၢ်ဖးလံာ်, တၢ်ဒိကနၣ်​ တၢ်သးဝံၣ်​ တနီၤဧါ

ပတတြီဘၣ်. ပတၢ်ကရၢကရိ တပဲာ်ထံနီၤဖးလီၤတံၢ်လီၤဆဲးဝဲ တၢ်ဂီၤမူ, လံာ်လဲၢ်, ဒီးတၢ်သးဝံၣ်​ မနုၤလၢ တၢ်အိၣ်ဖှိၣ်ဖိတဖၣ်​ ကြၢးဟးဆှဲးဝဲဘၣ်. လၢမနုၤအဃိလဲၣ်.

လံာ်စီဆှံဟ့ၣ်ဂံၢ်ဟ့ၣ်ဘါ ပှၤတဂၤစုာ်စုာ်လၢ ကသိၣ်လိအ ‘တၢ်ပဲာ်ဖးနီၤဖး’ လၢကထံၣ်သ့ၣ်ညါဝဲ တၢ်အဘၣ်ဒီးတၢ်အကမၣ်န့ၣ်လီၤ.—ဧ့ၤဘြံၤ ၅:၁၄.

လံာ်စီဆှံပာ်ဖျါဝဲ တၢ်သိၣ်တၢ်သီအခီၣ်ထံးလၢ ခရံာ်ဖိတဖၣ်​ တယာ်ဆိကမိၣ်တၢ်ကသ့ဖဲ ဃုထၢတၢ်မၤမုာ်မၤဖှံသး အခါန့ၣ်လီၤ.a လၢတၢ်အိၣ်မူ ကိးသနၢၣ်ဒဲးအပူၤ, ပတၢ်ပညိၣ်န့ၣ်​ မ့ၢ်တၢ် “ဂုာ်ဃုသ့ၣ်ညါ တၢ်လၢအဘၣ်ကစၢ်အသး” လီၤ.—အ့းဖ့းစူး ၅:၁၀.

လံာ်စီဆှံသိၣ်လိဝဲလၢ ဟံၣ်ခိၣ်တဖၣ်န့ၣ်​ အိၣ်ဒီးတၢ်န့ၢ်စိန့ၢ်ကမီၤဖဲအကြၢးလီၤ. လၢတၢ်န့ၣ်အဃိ အဝဲသ့ၣ်ဃုထၢဝဲလၢ ကတြီတၢ်မၤမုာ်မၤဖှံသးတနီၤလၢ အဟံၣ်ဖိဃီဖိအဂီၢ်သ့လီၤ. (၁ ကရံၣ်သူး ၁၁:၃; အ့းဖ့းစူး ၆:၁-၄) ဘၣ်ဆၣ်, မ့တမ့ၢ်အပှၤဟံၣ်ဖိန့ၣ်, ပှၤတဂၤလၢ်လၢ် တအိၣ်ဒီးတၢ်န့ၢ်စိန့ၢ်ကမီၤလၢကတြီ တၢ်ဂီၤမူ, တၢ်သးဝံၣ်, ဒီးလံာ်လဲၢ် ဒ်သိးတၢ်လၢ တၢ်အိၣ်ဖှိၣ်ဖိတဖၣ်​ တူၢ်လိာ်တသ့န့ၣ်ဘၣ်.—ကလၤတံ ၆:၅.