¿Allinchu kanman santosmanta mañakuna?

Biblia nin

Mana. Bibliaqa mana ninchu santosman rezakunata, nitaj paykunamanta mañakunatapis. Astawanpis niwanchej Diosllamanta mañakuna kasqanta, chaytataj Jesuspa sutinpi ruwanata. Jesusllataj discipulosninman nerqa: “Qankunaqa kay jinata mañakunkichej: Janaj pachapi kashaj Tatayku, sutiyki jatunchasqa kachun”, nispa (Mateo 6:9, Diosmanta Qhelqasqa [DQ]). Jesusqa ni jaykʼaj yachacherqachu, santosmanta, angelesmanta chayri waj imasmanta mañakunanchejta.

Pay nillarqataj: “Noqa ñan kani, cheqa kajtaj, kawsaytaj; mana pipis Dios Tataman chayayta atinchu, mana noqanejta rispaqa”, nispa (Juan 14:6, DQ). Chantapis Jesuslla Diosmanta yanapata mañapuyta atiwanchej (Hebreos 7:25).

Diosninchej, ¿munanmanchu paymantawan santosmantawan mañakunanchejta?

Mana. Payqa israelitasman chunka kamachiykunata qoshaspa jinata nerqa: “Noqamin Señorniyki Tata Dios kani, sinchʼi, celoso Dios”, nispa (Éxodo 20:5, DQ). Kay versiculopi “celoso” nispaqa, Diosninchej payllata yupaychanata munasqanta nishan. Chayrayku Diospa Palabran Bibliapi chay versículo jinata nin: “Noqa Jehová Diosniykeqa munani noqallata yupaychanawankuta”, nispa. Chayrayku Jehová Diosllamanta mañakunanchej tiyan. Imaraykuchus paymanta mañakuy chayri orakoyqa, payta yupaychaywan ninakun (Isaías 48:11).

Santosman rezakuspa chayri uj angelmanta mañakuspaqa, Jehová Diosninchejta phiñachisunman. ¿Imaynatá chayta yachanchej? Apocalipsis libroqa, imatachus apóstol Juan uj kuti ruwasqanmanta parlan. Payqa uj angelpa chakisnin chayman qonqoriykukusqa, payta yupaychananpaj. Chay angeltaj payman jinata nisqa: “¡Amapuni yupaychawaychu! Camachimasillayqui cani. Jesusmanta willaj hermanosniyquimanta cani. ¡Diosllata yupaychay!”, nispa (Apocalipsis 19:10, Dios Parlapawanchej).