VAMPSHA VA VUTISA
Hi Mhaka Muni Ni Fanele Ni Khongela
Hi ku ya hi pexkiza lin’wana, vampsha va vanyingi va le América va yentxa xikhongelo, kambe i hanfu ya vona ntsena va yentxaka xikhongelo siku ni siku. A swi kanakanisi swaku xikarhi ka vona van’wana va tivutisa va ku: ‘Indje xikhongelo o va nchumu lexi yentxaka hi titwa kahle kumbe ku ni swin’wana?’
I yini xikhongelo?
Xikhongelo i ku vulavula ni lweyi a nga yentxa minchumu hinkwayu. Pimisa hileswi Bibele li swi vulaka! Yehovha a tlakukile ku tlula vanhu hinkwavu, kambe a nga le “kule ni mun’wana ni mun’wana wa hina.” (Mintirho 17:27) Bibele li hi byela minchumu ya ku tsakisa: “Tshinelani ka Xikwembu kutani na xona xi ta tshinela ka n’wina.” — Yakobo 4:8.
U nga tshinelisa ku yini ka Xikwembu?
Yin’wana ya tindlela i ku khongela, u vulavula ni Xikwembu.
Ndlela yin’wana i ku djondza Bibele, ku nga nkama Xikwembu xi “vulavulaka” na wena.
Mabulu lawa, ku khongela ni ku lerha Bibele, swi nga ku pfuna ku va ni wunghanu la ku tiya ni Xikwembu.
“I nkateko wa wukulu ku vulavula na Yehovha, lweyi a nga tlakuka ka vanhu hinkwavu.” — Jeremy.
“Ku bulela Yehovha hileswi ni titwisaka xiswona swi ni yentxa ni titwa ni li kusuhi na yena.” — Miranda.
Xikwembu xa swi yingisela?
Hambiloko u kholwa ka Xikwembu, u tlhela u yentxa xikhongelo swi nga ha ku karhatela ku pfumela swaku xa swi twa. Hambileswo Bibele li vitana Yehovha hi “Mutwi wa xikhongelo.” (Tipisalema 65:2) Bibele li tlhela li hi rhamba swaku hi “rhula ku vivela” ka hina hinkwaku ka xona. Hi mhaka muni? “Hikusa xa hi hlayisa.” — 1 Pedru 5:7.
Pimisa hi leswi: U vulavula ni vanghanu va wena nkama ni nkama? U nga yentxa leswi fanaka ni ka Xikwembu. Vulavula na xona hi xikhongelo nkama ni nkama, u tlhela u tirhisa vito la xona, Yehovha. (Tipisalema 86:5-7; 88:9) Ina, Bibele li ku rhamba swaku u khongela “minkama hinkwayu.” — 1 Vatesalonika 5:17.
“Xikhongelo i ku bula ni papayi wa mina lweyi a nga matilweni, lani ni nga mu byelaka hinkwaswu swi nga mbilwini.” — Moises.
“Yehovha ni mu bulela hinkwaswu, ku fana ni leswi ni yentxisaka xiswona loko ni bula na mamana kumbe munghanu wa mina wa mukulu.” — Karen.
Ni nga vulavula hi yini ka swikhongelo swa mina?
Bibele li li: “Kambe ka hinkwaswu khongelani mi tivisa Xikwembu leswi mi swi pfumalaka, mi kombela na mi khensa.” — Vafilipiya 4:6.
Leswo swi vula swaku hi nga khongela hi swikarhatu swa hina? Ina! Phela Bibele li li: “Rhula ndzhwalo wa wena ka Yehovha, a ta ku seketela.” — Tipisalema 55:22.
Impela, loko u khongela, u nga byela Xikwembu minchumu yin’wana ku nga li swikarhatu ntsena. Ntombi yin’wana leyi vitaniwaka Chantelle yi li: “A ku nga ta va wunghanu la linene loko u tshamela ku kombela ku pfuniwa hi Yehovha ntsena. Ni pimisa swaku xa ku sungula a hi fanele hi khensa, naswona a xikhongelo xa hina a xi fanele xi tala hi minchumu leyi hi khensaka Yehovha hi yona.”
Pimisa hi leswi: I mpsini ka wutomi la wena swi ku yentxaka u khensa Yehovha? U nga pimisa hi 3 wa minchumu swi nga ku yentxaka u khensa Yehovha namuntlha?
“Hambi ku li minchumu ya yitsongo, ya ku fana ni ku vona a filori la ku xonga, swi nga hi yentxa hi khongela ka Yehovha hi mu khensa.” — Anita.
“Pimisa hi minchumu leyi Yehovha a nga yi yentxa kumbe ndzimana ya Bibele leyi ku khumbaka, u nga ha mu khensa hi mhaka ya swoleswo.” — Brian.