جاستاردىڭ ساۋالدارى
نە ٷشىن دۇعا ايتۋ قاجەت؟
ٴبىر ەلدە جۇرگىزىلگەن ساۋالناما ناتيجەسىندە جاستاردىڭ 80 پايىزى جاراتۋشىعا دۇعا ەتەتىنى انىقتالدى. ٴبىراق ولاردىڭ جارتىسى عانا كۇن سايىن دۇعا ەتەدى ەكەن. بۇل جاستار: «دۇعا شەر تارقاتۋ ٷشىن عانا ايتىلا ما، الدە ونىڭ بۇدان دا زور ماڭىزى بار ما؟»— دەپ ويلاناتىن بولار.
دۇعا دەگەن نە؟
دۇعا دەگەنىمىز — بۇكىل عالامنىڭ جاراتۋشىسىمەن سويلەسۋ. ٴبىر ٴسات ويلانىپ كورشى. ەحوبا قۇداي ادامداردان قانشا جوعارى بولسا دا، «ول ٴارقايسىسىمىزدان الىس ەمەس» (ەلشىلەردىڭ ىستەرى 17:27). كيەلى كىتاپتا مىنانداي كەرەمەت سوزدەر جازىلعان: «قۇدايعا جاقىنداڭدار، سوندا ول دا سەندەرگە جاقىندايدى» (جاقىپ 4:8).
قۇدايعا جاقىنداۋ ٷشىن نە ىستەۋ كەرەك؟
مۇنىڭ ٴبىر جولى — دۇعا ەتۋ، ياعني سەنىڭ قۇدايعا سويلەيتىن كەزىڭ.
تاعى ٴبىر جولى — كيەلى كىتاپتى زەرتتەۋ. بۇل — قۇدايدىڭ ساعان «سويلەيتىن» كەزى.
وسىلاي اڭگىمەلەسۋ، ياعني دۇعا ەتۋ جانە كيەلى كىتاپتى زەرتتەۋ، قۇدايمەن جاقىن دوس بولۋعا كومەكتەسەدى.
«ەحوبامەن، قۇدىرەتتى جاراتۋشىنىڭ وزىمەن، سويلەسۋ — ادام بالاسىنا بەرىلگەن ەڭ كۇشتى سيلاردىڭ ٴبىرى» (دجەرەمي).
«ەحوباعا جۇرەك تۇبىندە جاتقان سەزىمدەرىمدى اشىپ دۇعا ەتكەندە، وعان جاقىنداي تۇسەمىن» (ميراندا).
قۇداي دۇعانى تىڭداي ما؟
قۇدايدىڭ بار ەكەنىنە سەنسەڭ دە، ٴتىپتى وعان دۇعا ايتىپ جۇرسەڭ دە، ونىڭ شىنىمەن سەنى تىڭدايتىنىنا كۇمانداناتىن كەزدەرىڭ بولاتىن شىعار. ٴبىراق كيەلى كىتاپتا ەحوبا تۋرالى: «سەن دۇعالاردى تىڭدايسىڭ»،— دەپ جازىلعان (ٴزابۇر 65:2). سونداي-اق وندا: «بار ۋايىمدارىڭدى وعان ارتىڭدار»،— دەگەن كەڭەس بەرىلەدى. نەلىكتەن؟ «سەبەبى ول قامىمىزدى ويلايدى» (پەتىردىڭ 1-حاتى 5:7).
ويلاناتىن جايت. سەن جان دوسىڭمەن سويلەسۋ ٷشىن ۋاقىت ٴبولىپ تۇراسىڭ عوي. قۇدايمەن سويلەسۋ ٷشىن دە سولاي ەتسەڭ بولادى. وعان ۇنەمى دۇعا ايتىپ، ونى ەحوبا دەگەن ەسىمىمەن اتا (ٴزابۇر 86:5—7؛ 88:9). كيەلى كىتاپ ەحوباعا «ۇدايى دۇعا ەتۋگە» شاقىرادى (سالونيكالىقتارعا 1-حات 5:17).
«دۇعا دەگەنىمىز — كوكتەگى اكەم ەكەۋمىزدىڭ ارامىزداعى اڭگىمە، وعان ىشىمدەگىنىڭ ٴبارىن اقتارىپ ايتاتىن كەزىم» (مويزەس).
«مەن ەحوباعا كوڭىل تۇبىندە جۇرگەن ماسەلەلەر جايىندا ايتامىن، اناممەن نەمەسە جان دوسىممەن سويلەسكەندەي سويلەسەمىن» (كارەن).
نە تۋرالى دۇعا ايتساڭ بولادى؟
كيەلى كىتاپ بىلاي دەيدى: «بارلىق وتىنىشتەرىڭدى دۇعا ەتىپ، جالبارىنىپ، ريزاشىلىقپەن قۇدايعا بىلدىرىڭدەر» (فىلىپىلىكتەرگە 4:6).
دەمەك، ٶزىڭدى مازالاپ جۇرگەن نارسەلەر جايىندا وعان ايتا بەرۋگە بولا ما؟ ارينە! قۇدايدىڭ سوزىندە بىلاي دەلىنگەن: «بار اۋىرتپالىعىڭدى ەحوباعا ارت، ول سەنى دەمەيدى» (ٴزابۇر 55:22).
قۇدايعا قيىندىقتارىڭنان باسقا دا جايتتار تۋرالى ايتقانىڭ جاقسى. شانتەل ەسىمدى قىز بىلاي دەيدى: «ەحوبادان تەك كومەك سۇراي بەرسەم، بۇل ناعىز دوستىققا جاتپاس ەدى. مەنىڭ ويىمشا، دۇعانى ريزاشىلىق سوزدەرمەن باستاۋ ماڭىزدى جانە العىس بىلدىرگىم كەلەتىن نارسەلەردىڭ ٴتىزىمى ۇزىن بولۋ كەرەك».
ويلاناتىن جايت. سەن ومىرىڭدە نە نارسەلەر ٷشىن ريزاسىڭ؟ بۇگىن بولعان قانداي ٷش نارسە ٷشىن ەحوباعا راقمەت ايتقىڭ كەلەدى؟
«بولماشى نارسەنىڭ ٶزى، مىسالى ٴبىر ادەمى گۇلدى كورگەنىمىز، ەحوباعا سول مەزەتتە دۇعا ايتىپ، ريزاشىلىق بىلدىرۋگە تالپىندىرادى» (انيتا).
«وزىڭە ۇنايتىن ٴبىر جاراتىلىس تۋرالى نە كيەلى كىتاپتاعى سوزدەر جايلى وي جۇگىرتىپ، كەيىن سول ٷشىن ەحوباعا العىس ايتۋىڭا بولادى» (براين).