Zenezi

ꞌRe ihâimana uꞌâsi mono, Abrã te te ipisutuzé wasuꞌu

12 Tawamhã nimahã bâtâ na te Uburé Danhibꞌapito hã, Abrãhã ma tinha ãne:

— Asiptiꞌai hawimhã te za aiwato, asisãnawã norĩ hawimhã, duré aimama nhorõwa hawimhã, ro hã za te aima ihâiꞌrézéb u aimorĩ da. 2 Tawamhã asihudu sidâpâsi ahâ uptabi na ꞌre hâimana zaꞌra mono da hã, wa hã wa za pisutu, aꞌuwẽ misi ãma isitom na dama siptete na ꞌre hâimana zaꞌra mono da. Duré iwẽ uptabi hã wa za te aima ꞌre anhomri uꞌâsi. Duré uburé dama hã asisi wasuꞌu zaꞌẽtẽ di za. Tawamhã iwẽ hã te aima ꞌre iꞌapisutu mono zéb uꞌâbâ, te za duré a hã iwẽ na hã ꞌre idaꞌapawapto mo. 3 Duré iwẽ te te aima ꞌre iꞌmanharĩ zaꞌra mono norĩ ma, wa hã wa za duré iwẽ hã te tãma ꞌre ꞌmanharĩ uꞌâsi zaꞌra, isimiꞌmanharĩ zaꞌra zé waꞌrãmimhã aima. Duré te te aima ꞌre irobꞌmanharĩ wasété zaꞌra mono norĩ ma, wa za duré iwẽꞌõ hã te tãma ꞌre pisutu zaꞌra, isimiꞌmanharĩ wasété zaꞌra zé waꞌrãmi, aima hã. Tawamhã duré aiꞌuꞌâbâmhã, wa hã wa za tiꞌai ãma uburé aꞌuwẽ mono bâ ꞌre idahâimana zaꞌra mono norĩ ma, iwẽ hã te dama ꞌre anhomri uꞌâsi.

4 Tawamhã Abrãhã ãma 75 na iwahub ãma, ma tô Harã hawimhã oto mo, Uburé Danhibꞌapito te te tãma iwaihuꞌuzéb zarina. Taha wamhã, Lo ma tô isiré hã mo. 5 Tawamhã timro te siré saprõ, Saraꞌi hã. Tizamarĩꞌwai ꞌra, tiꞌra wapté te duré siré saprõ, Lo hã. Duré uburé Harã ãma isimarĩ tãma ꞌre ihâimana mono norĩ hã, te siré tidu. Duré uburé pawaꞌâbâ ãna tãma iromhuriꞌwa norĩ zama hã te duré siré te te simro. Tawamhã oto Canaꞌã u sihutu wamhã, 6 Abrã ma tô tiꞌai waꞌõtõ nhoꞌu hã ꞌrazâri waré, Siquẽ na ꞌri nhoꞌõmo nhisi u wisi da, ro iwazéb zahi, Moré na romnhisi ãma rowede iwazéb zahi ꞌre isa mono zéb u. Taha wamhã, cananeu norĩ te tame tiꞌai ꞌremhã ꞌre hâimana zaꞌra. 7 Tawamhã tame Uburé Danhibꞌapito, Abrãhã u wisi wamhã, ma tô ãne tãma tinha:

— Asihudu norĩ ma, wa za ã tiꞌa hã tãma sõmri zaꞌra.

Tawamhã tame Abrã ma tô ẽtẽ zaꞌra hã ꞌmanha, tinhimizama te te tãma ãma zata da, Uburé Danhibꞌapito ma. E marĩ wa. Tame hâimana ré, itẽmemhã wisi wa.

8 Taha pari Abrã, Bétéu na ꞌri nhoꞌõmo nhisi ãma bâtâ pusizém niwĩ, ẽtẽ ahâ na ꞌre iromhâimana mono u hã, te duré oto mo. Tawamhã tame ma tô te te sima ꞌri nhoré. Bétéu hã te bâtâ zasizém niwĩmhã ꞌre hâimana, duré Ai na ꞌri waꞌõtõ nhisi te bâtâ pusizém niwĩmhã ꞌre hâimana. Ta norĩ waꞌwa te te sima iꞌri nhoré mono hã ma tô simasa. Tawamhã tameb zama ẽtẽ zaꞌra te te ꞌmanharĩ wamhã, ma tô duré Uburé Danhibꞌapito ãma hã tiwata. 9 Tawamhã ta hawi watobro wamhã, ma tô Canaꞌã tiꞌa nhoꞌõmoi baba si õne uꞌâsi nasi te te rowaimrami.

Abrã, Ezitu u imorĩzé wasuꞌu

10 Tawamhã Canaꞌã ãma mra hã te oto da te ꞌre sépata zaꞌẽtẽ zaꞌra. Tahawa Abrã hã ma tô Ezitu u hã mo, aꞌâ tame hâimana hutu da, mrab ꞌrata. 11 Tawamhã Ezitu u oto simasisi wana ré, ma tô Abrã hã, timro Saraꞌihi ma tinha ãne:

— Te za ĩwapa! Tô sena a hã piꞌõ iꞌaiwẽ uptabi. 12 Tahawa, ezipsiu norĩ te te siwi aiꞌmadâꞌâ wamhã, te za sima aiwasuꞌu zaꞌra ãne: “Ãhã piꞌõ hã õhõ mro. E niha iwẽ uptabi.” Ãhã wamhã, te za siwi ĩwĩ. Tawamhã aiwétési hã te te siwi aiwĩrĩ õ di za. Aihâiba ré te za aihâiba. 13 Tahawa, te za ĩhidiba na hã dama asiwasuꞌu. Tawamhã ãne na dama asiwasuꞌu wamhã, da te dasiwi ĩwĩrĩ õ di za. Te za duré dasiwi hã ĩꞌâri wẽ ni.

14 Tawamhã Abrã, Ezitu u oto wisi wamhã, ma tô ezipsiu norĩ, Saraꞌi sena piꞌõ iwẽ uptabi na hã siwi ꞌmadâ. 15 Tawamhã duré niꞌwam norĩ, Ezitu ãma apito ma, daꞌmadâꞌâꞌwa norĩ ipire, piꞌõ iwẽ uptabi na te te siwi ꞌmadâꞌâ zaꞌra wa, ma tô duré tãma wasuꞌu zaꞌra. Tahawa, apito nhimiromhurizé ꞌri u hã, ma tô tãma siwi saprõ.

16 Tawamhã duré taha hâiba uꞌâbâmhã ma tô apito, Abrãhã ma, marĩ hã tãma ꞌmanharĩ wẽ. Tahawa poneꞌẽrebâ norĩ hã, duré powawẽ norĩ hã, duré awaru poꞌre pore siꞌaibâ norĩ isipiꞌõ norĩ me, duré pawaꞌâbâ ãna romhuriꞌwa siꞌaibâ norĩ piꞌõ norĩ me hã, duré awaru baꞌõmore norĩ hã ma tô tãma sõmri zaꞌra. 17 Tane nherẽ, Saraꞌihi hâiba uꞌâbâ, ma tô Uburé Danhibꞌapito, apito, duré isõrõwa ꞌre, ꞌre ihâimana zaꞌra mono norĩ me, ihâzé pire na hã hâ zaꞌra. 18 Tahawa, te apito, Abrã itẽme morĩ da hã sô hâ. Tawamhã te ãne tãma tinha:

— E marĩ da, ma ãne hã ĩma iꞌmanha. E marĩ wa, aimro na hã ĩma wasuꞌu õ di bété. 19 Aihidiba na hã ma tô ĩma iwasuꞌu. Tahawa, wa hã wa tô aré ãma ĩmro. Ã ãhãta aimro. Ã hawimhã te za oto aipusi ꞌwa.

20 Tawamhã apito tite robꞌmadâꞌâꞌwa norĩ ma hã, ma tô tãma waihuꞌu zaꞌra, Abrã, imro ré, duré marĩ tãma ihâimana zaꞌra ré, apâ Ezitu hawimhã te te siwi satõrĩ da.