Zenezi

Abrã norĩ Loho me, sima isiwãnhizari zahuré zé wasuꞌu

13 Tawamhã Abrã, Ezitu hawi timro ré, duré uburé marĩ tãma ihâimana zaꞌra ré ma tô watobro. Tahawa, hâiwa nhimire niwĩ Canaꞌã na romnhisi u ma tô mo. Ãhã wamhã, te duré Lo isisãnawãi ꞌra isiré hã mo. 2 Abrã hã isimarĩ pese uptabi di, pozé wasété na hã, ẽtẽ waipo prã prata na hã, duré ẽtẽ waipo pré oru na hã.

3 Tahawa, ma tô Bétéu na ꞌri nhoꞌõmo nhisi nhoꞌõmoi baba si zâmo, itẽme iwisizéb u. Tawamhã ta hawimhã Bétéu ꞌrem norĩ ꞌre, Ai na ꞌri nhoꞌõmo nhisi ꞌre me, ro ihâimana u ma tô duré zâmo, nimahã na imorĩꞌrata na te te sima ꞌri iwa isõré mono zéb u. 4 Tawamhã duré ẽtẽ zaꞌra imorĩꞌrata na te te aré iꞌmanharĩ ꞌrata u wisi wamhã, ma tô Uburé Danhibꞌapito ãma tiwata.

5 Tahawa Lo, Abrãhã siré imorĩ ma tô tite poneꞌẽrebâ zéré mapure norĩ hã, poneꞌẽrebâ zéré uzé norĩ hã, pozé wasété norĩ hã, duré tite romhuriꞌwa norĩ hã, timro, tiꞌra norĩ siré hã te te simro. 6 Tane nherẽ, siré ꞌre ihâimana zahuré mono da hã waihuꞌu õ di, isimizama zahuré sazéb da du ihâimana hã, sadai õ wa. E marĩ wa. Simizama ahâ uptabi zahuré wa. 7 Tahawa te Abrãhã nhimizama ꞌmadâꞌâꞌwa norĩ, rom na ãma ꞌre sisadaꞌâbâ zaꞌra, Loho nhimizama ꞌmadâꞌâꞌwa norĩ me hã. Tô taha wa, te duré zahadu tamemhã cananeu norĩ hã, perizeu norĩ me hã ꞌre hâimana zaꞌra. 8 Tahawa, te nimahã bâtâ na Abrã, Loho ma tinha ãne:

— Wa norĩ hã wasiwapru ꞌrâwibre hã. Tahawa ibâi õ di, wasima iwazahi da hã. Duré ĩnhimizama na romhuriꞌwa norĩ, asimizama na romhuriꞌwa norĩ me sima ꞌre isahi zaꞌra mono da hã, ibâi õ di. 9 Tahawa wa za wasima aiwãnhizari ni. Õhõta ro inomro hã maꞌãpé ꞌmadâꞌâ, robꞌre zaꞌẽtẽ uptabi di. Tahawa, maꞌãpé nima niwĩ ro inomro hã asima pisutu! Asimiꞌe niwĩ aimorĩ da wamhã, wa hã wa za ĩnhimire niwĩmhã mo. Duré asimire niwĩ aimorĩ da hã wamhã, wa hã wa za duré ĩnhimiꞌe niwĩmhã mo.

10 Tawamhã Lo te te ꞌre robꞌmadâꞌâ mono wamhã, Zodã na romharé nhisi ma tô ꞌmadâ, ꞌri nhoꞌu Zoa na isisi tẽme, pa nhoꞌõmo nhipti ahâ ré ro inomro hã, Uburé Danhibꞌapito te, robꞌre iwẽ* ꞌre ihâimana mono sine hã, duré Ezitu ãma tiꞌa iwẽ ꞌre ihâimana mono ne hã. Ãne na romharé iwẽ na ma tô aré ꞌre hâimana, Uburé Danhibꞌapito, ꞌri nhoꞌu Sodoma, Gomora me te te uprosi zahuré wana ré hã. 11 Tawamhã Lo, Zodã na romharé nhisi ãma uburé tiꞌa ꞌre ihâimana mono hã te te sima pisutu wa, ma tô bâtâ pusizém niwĩmhã oto mo. Ãne ma tô oto tahawa, sima aiwãnhizari zahuré. 12 Tawamhã Abrã, Canaꞌã tiꞌai ꞌremhã ma tô sisaꞌu zahuré hã ꞌre hâimana uꞌâsi. Tane nherẽ, Lo hã ma tô ta hawimhã zâmo, ro Sodoma ꞌrata, ꞌri nhoꞌu siwaptõma, ihâimana zaꞌra waꞌwa ẽtẽ siwaꞌaba ãma, te te sima ꞌri nharĩ da, 13 aꞌuwẽ wasété uptabi na si ꞌre ihâimana zaꞌra mono ãma, tiwasété si ꞌRe ihâimana uꞌâsi mono zada, te te ꞌre iꞌmanharĩ zaꞌra mono zéb ãma.

ꞌRe ihâimana uꞌâsi mono, Abrãhã ma, te te iropisutuzé wasuꞌu

14 Tawamhã duré Lo morĩ zaꞌu si, te Uburé Danhibꞌapito, Abrãhã ma tinha ãne:

— Ta hã iꞌasabzém hawimhã maꞌãpé ro aꞌmadâꞌâ, hâiwa nhimire niwĩmhã, hâiwa nhimiꞌe niwĩmhã, bâtâ pusizém niwĩmhã, duré bâtâ zasizém niwĩmhã. 15 Ta hã wa za asihudu norĩ ma ropibuma aima tisõ, õne uꞌâ asihudu norĩ nhiptiꞌa na tãma ꞌre hâimana zaꞌra mono da, ã hã iꞌaꞌmadâꞌâ mono hã. 16 Asihudu norĩ hã tiꞌa zapru ahâ uptabi na ꞌre ihâimana zaꞌra mono ne, wa za ahâ uptabi na ꞌre hâimana zaꞌra mono da hã tãma pisutu zaꞌra. Tiꞌa zapru hã da te ꞌre isaꞌrata waihuꞌu zaꞌra mono õ ne, duré asihudu norĩ, da te ꞌre isaꞌrata waihuꞌu zaꞌra mono da hã mare di za. 17 Tahawa te za ã hã tiꞌa na hâiwa nhimiꞌe niwĩmhã, hâiwa nhimire niwĩmhã, bâtâ pusizém niwĩmhã, duré bâtâ zasizém niwĩmhã ꞌre robzabui mono da hã ꞌre aimo, wa hã za te aima sõmri dâꞌâsina.

18 Tawamhã ãne te te tãma waihuꞌu wa, Abrã te te sima iꞌri nhoré mono zé hã ma tô te te awasihu, te te azaꞌré da ꞌri hã, rowede iwazéb zahi, Mare na isisi ꞌrata ꞌre hâimana mono da oto, ꞌri nhoꞌu Hebrõ na isisi ꞌrata ꞌre isa mono ãma. Tame ma tô Abrã, Uburé Danhibꞌapito ma, ẽtẽ zaꞌra hã ꞌmanha, ãma iwatazéb da hã.