Zenezi
Izaqui, Zacoho ãma, ꞌRe ihâimana uꞌâsi mono, iwẽ te te tãma ꞌre pisutu mono da, te te ãma irowaptẽrẽzé wasuꞌu
27 Tawamhã Izaqui ma tô siꞌihi pese oto. Tahawa te te oto robꞌmadâꞌâ waihuꞌu õ di, tobꞌa wa. Tawamhã nimahã bâtâ na ma tô tiꞌra siꞌaibâ potoꞌrata zô hã hâ, Ezauhu zô. Te tãma tinha, ãne:
— Ĩꞌra!
— E marĩ ĩmama. Ãhãta ãme wa ĩhâiba. — Ãne ma te timama sadaꞌâ.
2 Tawamhã te imama tãma tinha ãne:
— Wa tô oto ĩsiꞌihi pese. Duré wa hã bâdâ hã te ĩsina waihuꞌu õ di, ĩdâꞌâzéb da hã.
3 Tahawa maꞌãpé, asimnhiꞌã ate ti hã âri, rom na aba ĩzada ꞌre aimorĩ da, abaze zô. 4 Asõpãrĩ nhi na, dasa ise te ĩsima iwẽzé hã ĩma ãma ꞌmanharĩ da. Tawamhã ta hã te za we ĩma iꞌâ. Ĩsai parip si ĩdâꞌâ õ ré, wa za aiꞌãma mre, ꞌRe ihâimana uꞌâsi mono iwẽ te te aima ꞌre apisutu mono da hã.
5 Tawamhã Rebeca, Ezauhu ma, Izaqui te te roti ré, ma tô mreme wapa. Tahawa rom na aba ꞌre morĩ da, watobro zaꞌu hã, 6 ma tô Zacoho ma tãma tinha ãne:
— Ãhã na aimama hã wa tô mreme wapa, adubꞌrada Ezauhu ma, te te roti ré. Ãne te aimama tãma tinha: 7 “Maꞌãpé, rom na abaze zô ꞌre aimorĩ, ꞌmaiwĩrĩ wa, dasa ise hã ãma ĩma ꞌmanharĩ da. Tawamhã ĩsai parip si, wa za ꞌRe ihâimana uꞌâsi mono ma, ĩdâꞌâ õ ré aiꞌãma mre, iwẽ te te aima ꞌre apisutu mono da.” 8 Ĩꞌra, tahawa te za ĩwapa, te aima iwaihuꞌuzéb zarina, za iꞌmanharĩ da hã. 9 Maꞌãpé tahawa, wanhimizama isimasabzéb u hã aimorĩ, maparane poneꞌẽrebâ zéré uzé ꞌra iwẽ uptabi hã mrami da. Tawamhã wa hã aimama te te sima iwẽzéb uwaibaba, wa za ise na hã ãma tãma api. 10 Taha parip si te za te te ꞌrẽne da hã tãma iꞌâ. Ãhã wamhã, te za aimama hã dâꞌâ õ ré aiꞌãma mre, ꞌRe ihâimana uꞌâsi mono ma, iwẽ hã te te aima ꞌre apisutu mono da.
11 Tawamhã Zaco, te tina ma asa tãma tinha ãne:
— Ĩdubꞌrada hã hâiba sui ꞌré di. Wa hã ĩhâiba sui õ di. 12 Bété za ĩmama te te ĩhâiba upi mono wamhã, te za ĩwaihuꞌu, ĩhâimana nhipese sina marĩ te tãma iꞌmanharĩzém na hã. Tawamhã iwẽ hã te te ĩꞌãma ꞌre apisutu mono da nherẽ, te za taha waꞌrãmi iwasété si ĩmama hã te te ĩꞌãma ꞌre apisutu.
13 Tane nherẽ, ma te ina ãne ãma sadaꞌâ:
— Ĩꞌra, tiha hã tô aiꞌupana iwasédé hã ĩꞌãma hâimana. Tihai õ di. Tahawa te aima iwaihuꞌuzé hã, te za tô iꞌmanha. Tahawa maꞌãpé poneꞌẽrebâ zéré uzé ꞌra we ĩma mrami da hã, te za tô sô aimo.
14 Tawamhã Zacoho ma, ina tãma sadahutu õ wa, te oto sô mo. Tahawa, ma tô poneꞌẽrebâ zéré uzé ꞌra hã timra. Duré ta norĩ hã ma tô oto tina ma mrami zahuré. Taha na Izaqui te te sima iwẽzéb zarina dasa ise na ma tô ãma tãma ꞌmanha. 15 Taha pari, Rebeca ma tô Ezau uza ihâi wẽ uptabi ꞌri ꞌre inomro hã tiꞌâ. Taha na ma tô Zaco hã ãma uza. 16 Tawamhã poneꞌẽrebâ zéré uzé hâ na ma tô ãma sibꞌrata ubu. Ibutu suiꞌõi ãma zama ma tô duré ãma butu ubu. 17 Taha pari dasa isei uptabi na tinhipi, iꞌuꞌẽtẽ wapu te te iꞌmanharĩ me ma tô tãma sõmri zahuré.
18 Tawamhã Zaco, timama hâimanazéb u ma tô oto iré mo. Ãne te tawamhã ꞌmahâ:
— Ĩmama.
— E marĩ. Ãhãta wa nhamra. — Ãne ma te sadaꞌâ asa.
Te duré sadanha ãne:
— E ma hã, a hã ĩꞌra.
19 — Wa hã Ezau, dadubꞌrada. Ĩma iꞌruzéb uwaibaba, wa tô asa hã aima ꞌmanha. Maꞌãpé ĩzawi na hã aiꞌutu. Duré asahâ na asãmra, ĩnhisõpãrĩ nhi na asaihâ. Taha parip si, te za ĩꞌãma aimre, ꞌRe ihâimana uꞌâsi mono ma, iwẽ hã te te ĩma ꞌre apisutu mono da.
20 Tawamhã Izaqui te sadanha ãne:
— Ĩꞌra, e niha ma te merẽ waptu na asõwẽ su.
Tawamhã Zaco, ma te ãma sadaꞌâ ãne asa:
— Uburé Danhibꞌapito, ate ꞌRe ihâimana uꞌâsi mono ma tô ãne na hã ãma ĩpawapto.
21 Tawamhã Izaqui, te duré Zacoho ma tinha ãne:
— We ĩtẽme asina rotété pé, ꞌrâwi te aiꞌupi mono da. Ãhã wamhã, wa za tô aiwaihuꞌu, sena tô a hã ĩꞌra Ezau na hã, niha wamhã duré ta hãi õ na hã.
22 Tawamhã Zaco, Izaquihi tẽme ma tô ꞌrâwi itẽme aiꞌré. Imama te te upi mono sina, ma tô ãne duré tãma tinha:
— Aimreme hã, tô Zacoho mreme ne, a hã. Tane nherẽ, asibꞌrata si hã, tô Ezau nhibꞌrata ne.
23 Ãne wa, Izaqui, Zaco hã te te waihuꞌu õ di, Ezau nhibꞌrata ne sibꞌrata sui ꞌré wa. Tahawa ma tô aré ãma imreme na hã sãnaꞌrata, ꞌRe ihâimana uꞌâsi mono ma, iwẽ hã te te tô tãma ꞌre apisutu mono da. 24 Tane nherẽ, ãma mreme õ ré, te duré sadanha ãne:
— E tô a hã, ĩꞌra Ezau.
— Ĩhe, wa hã tô Ezau.
25 Tawamhã imama te oto tãma tinha ãne:
— Wẽ di tô. Asisõpãrĩ nhi na ĩsa da, we ĩma âri pé. Taha parip si, wa za aiꞌãma mre, ꞌRe ihâimana uꞌâsi mono ma, iwẽ hã te te tô aima ꞌre apisutu mono da.
Tawamhã Zaco, timama ma hã ma tô tiꞌâ. Duré uva ꞌrãi waꞌu isé zama hã ma tô tãma tiꞌâ. Tahawa Izaqui ma tô tiꞌrẽ. Ma tô duré simizâ, tisa hã. 26 Taha pari te imama hã ãne oto tãma tinha:
— Ĩꞌra, we ĩtẽme aiꞌré na ꞌrâwi, ĩtobꞌrata hârâ da.
27 Tawamhã Zaco, timama u hã ma tô ꞌrâwi pesere oto itẽme aiꞌré. Tahawa, ma tô timama hã tobꞌrata hârâ na sawi. Tawamhã Zaco, ãma isiꞌuzazé te te hãi waihuꞌu wamhã, ma tô Izaqui tiꞌra ãma hã mre ãne:
“Ĩꞌra hâiba zadaze hã, rom na danhibꞌre ma, Uburé Danhibꞌapito iwẽ te te tãma ꞌre apisutu mono wa, isadaze ne.
28 Ĩꞌra, ꞌRe ihâimana uꞌâsi mono, hâiwa hawi atébré hã te te aima ꞌre sõmri mono da si, iwẽ hã.
Duré rom na aiburu na ꞌre irobꞌre mono, aima ꞌre ꞌrãipese mono da si iwẽ hã, amnho norĩ hã, uva ꞌrãi waꞌu isé me.
29 Aꞌuwẽ mono bâ asapari te te aima ꞌre iromhuri zaꞌra mono da si, iwẽ hã.
Duré daro mono bâ da te dasiwi ꞌre iꞌaiwazé mono da si, iwẽ hã.
Duré asisãnawã norĩ nhibꞌapito na ꞌre iꞌaihâimana mono da si, iwẽ hã.
Duré ana zéꞌre hawi aꞌuwẽ norĩ hã, asõꞌremhã aima ꞌre isiwẽꞌẽ zaꞌra mono da si, iwẽ hã.
Tawamhã duré iwasédé te te aima ꞌre ipisutu zaꞌra mono norĩ ma hã, ꞌRe ihâimana uꞌâsi mono, ta norĩ ma, iwasédé te te tãma ꞌre ipisutu zaꞌra mono da si, iwẽ hã. Duré iwẽ te te aima ꞌre ipisutu zaꞌra mono norĩ ma, ꞌRe ihâimana uꞌâsi mono, iwẽ te te tãma ꞌre ipisutu zaꞌra mono da si, iwẽ hã.”
30 Tawamhã Izaqui, tiꞌra Zacoho ãma, iwẽ hã te te tãma ꞌre apisutu mono da, ãma mreme pari, Ezau, aba hawi iwisi ꞌwabꞌrere ma tô oto watobro, timama hawimhã. 31 Tawamhã taha zama ma tô tinhipi ise hã timama ma ꞌmanha. Taha pari, ma tô tãma tiꞌâ. Tahawa te ãne timama hã ꞌmahâ:
— Ĩmama, maꞌãpé ĩzawi na hã aiꞌutu, abaze te iꞌmaiwĩrĩ nhi na asaihâ. Taha parip si, te za ꞌRe ihâimana uꞌâsi mono ma, ĩꞌãma aimre, iwẽ hã te te ĩma ꞌre apisutu mono da.
32 Tawamhã imama te sadanha ãne:
— E ꞌwa hã, a hã.
— Wa hã, aiꞌra Ezau ipotoꞌrada.
33 Tawamhã Izaqui, ãne na imreme te te wapari wamhã, ma tô tãma pẽꞌẽwara. Ma tô duré popo. Tahawa, te tãma tinha ãne:
— E ꞌwa ma te bété tinhisõpãrĩ hã we ĩma ãwisi. Taha na, we aiwisi wana ré, wa tô ĩsai pa. Duré taha pari, wa tô ꞌRe ihâimana uꞌâsi mono ma hã ãma mre, iwẽ hã te te tô tãma ꞌre apisutu mono da. Tahawa, te za tô õhõ ma si iwẽ hã tãma ꞌre hâimana.
34 Tawamhã Ezau ãne hã te te wapari wamhã, ma tô rosaꞌratazé te ꞌre sadari. Tahawa te duré tãma tinha ãne:
— Ĩmama, ĩꞌãma zama te za aimreme, ꞌRe ihâimana uꞌâsi mono, iwẽ hã te te tô ĩma zama ꞌre apisutu mono da.
35 Tane nherẽ, asa ma te ãma sadaꞌâ ãne:
— Ano we imorĩ hã ma tô ĩma sadawa hapese. Tahawa taha ãma si wa tô mre aiꞌupana, aré aima ihâimana da hã.
36 Tawamhã Ezau, te ãne tinoi hâiba na ãma tãma tinha:
— Ã hã oto maparane ãma hã ma tô taré hâimana nhipese na ĩhâiba na hã ĩꞌãma apsaihu. Tô ibâre tô, ma te sisi ni, Zaco* na hã. Imorĩꞌrata na dama ipotoꞌrata ma, ꞌre ihâimana zaꞌra mono zé, ma tô ĩwi waze. Ãhã na hã ma tô oto ĩwi waze, iwẽ aré ĩma ꞌre ihâimana mono da hã. Ĩmama, e duré iwẽ hã ĩma ipisutuzéb da hã ꞌmaihâimana õ di.
37 Tawamhã Izaqui, ma te ãne asa sadaꞌâ:
Wa hã Zacoho ma, pire na aima ꞌre ihâimana mono zéb da hã wa tô tãma pisutu pa. Duré uburé isisãnawã norĩ te te tãma ꞌre romhuri zaꞌra mono da hã, wa tô tãma pisutu. Duré amnho na saꞌẽtẽ na te ãma ꞌre upari uꞌâsi mono da hã, duré uva ꞌrãi waꞌu isé saꞌẽtẽ na te ãma ꞌre upari uꞌâsi mono da hã, wa tô tãma pisutu. Tahawa ãhã na hã ĩꞌra, te aiꞌãma irowaptẽrẽ da hã waihuꞌu õ di.
38 Tane nherẽ, Ezau timama ma hã te nasi tãma siꞌru ãne:
— Ĩmama, e tô misi haré te asimirowaptẽrẽzé iwẽ na hã tihâiba. Maꞌãpé ĩꞌãma zama ꞌRe ihâimana uꞌâsi mono ma hã aimreme, iwẽ hã te te tô ĩma ꞌre apisutu mono da.
Ãne te te sina tãma nharĩ pari, ma tô wawa ꞌrãihâ na hã oto aiwaꞌõ, sina siwamri pese wa.
39 Tawamhã imama te tãma tinha ãne:
“Romhâ na tiꞌai wẽ nhiti te za ꞌre aihâimana mo, atébré hâiwa hawi we te te ꞌre irobdiꞌi mono nhiti.
40 Ãhã wa, te za asiꞌwa iꞌwa pa ré si ꞌre aihâimana mo. Asisãnawãi ma, te za duré ꞌre iromhuri mo.
Tane nherẽ, niha na tãma aihâimanazéb da, sada asiptete õ wapsi hã, te za tiwi asiwaze, asima iwẽ na ꞌre aihâimana mono da oto.”
Zaco, Mezopotãmia u imorĩzé wasuꞌu
41 Tawamhã Ezau, Zacoho da ma tô abꞌrui pese. E marĩ wa. Imama, ꞌRe ihâimana uꞌâsi mono ma, iwẽ õhõ ma si te te ꞌre apisutu mono da, ãma mreme wa. Tahawa ma tô ãne sima rosaꞌrata: “Ĩmama dâꞌâzé hã romhuture di oto. Te za tidâꞌâ suꞌu. Tawamhã nimahã na apâ wapoꞌre simrami wa, wapẽꞌẽ hâzaꞌõtõ wapsi, wa za ĩno hã tiwĩ za.”
42 Tawamhã Rebeca, Ezau te te sima irowaꞌõtõzé ma tô tiwi waihuꞌu. Tahawa, Zacoho zô te sima sô hâ. Tawamhã te ãne tãma tinha:
— Te za ĩwapa! Adubꞌrada Ezau hã te sima rosaꞌrata, siꞌruiwaꞌâbâ da, te te aiwĩrĩ da. 43 Tahawa, ĩꞌra, ĩmreme hã te za iwapa. Ãhã na te za aiꞌabaꞌré na aimo ĩhitébré Labã, Harã na ꞌri nhoꞌõmo nhisi ãma ꞌre ihâimana mono nhorõwa u, 44 tame aꞌâ iꞌrata ꞌre aihâimana mono da, niha bâtâ na adubꞌrada asada isitiꞌruzé hã tãma isiꞌutõrĩzéb u, 45 tãma asimiꞌmanharĩzém na ãma ipoꞌre siꞌârizéb u. Ãhã wapsi, wa za niꞌwa hã ãma asô satõ, we apâ ãwa te te asaprõni da hã. E tihai wa. Wa hã te ĩsima wẽ õ di, misi bâtâ na ĩꞌra norĩ te iꞌasimini aba da hã.
46 Taha pari Rebeca, te Izaquihi u hã mo. Tawamhã te ãne tãma tinha:
— Ezau, hitita norĩ nhipiꞌõ maparane tãma ꞌmaihâimana zahuré wa, ma tô ĩwĩ sina roꞌwaꞌré pese zahuré. Tahawa, Zacoho zama hitita norĩ nhipiꞌõ na mro wamhã, ĩdâꞌâ da si za oto, ĩnhimirosaꞌrada hã.