Zenezi
28 Tawamhã Izaqui, Zacoho zô ma tô hâ. Sô hârâ wamhã, ma tô duré ãma mre. Taha pari te duré ãne tãma rowaihuꞌu:
— Ãme Canaꞌã ãma azarutu norĩ na hã ãma aiꞌmaimro õ di za. 2 Tahawa maꞌãpé asima robꞌubumro na, Mezopotãmia u aimorĩ da. Tawamhã aiꞌrada Betuꞌéhé nhorõwa ãma te za asã. Tame asãmra wamhã, te za aimama wapté Labãhã ꞌra norĩ na hã ãma aiꞌmaimro za. 3 ꞌRe ihâimana uꞌâsi mono danhipai u iwaihuꞌu pe, iwẽ hã te te aima ꞌre iꞌapisutu mono da si, wa ĩsima wẽ. Duré asihudu norĩ ahâ uptabi na aihawimhã aꞌuwẽ mono bâ sipuꞌu pese na ꞌre isitébré mono da si, wa duré ĩsima wẽ. 4 Abraꞌãhã ma, iwẽ te te ꞌre iꞌapisutu mono ne, te te duré aima ꞌre iꞌapisutu mono da si, wa ĩsima wẽ. Asihudu norĩ ma zama te te duré tãma ꞌre apisutu mono da si, wa tô ĩsima wẽ, ã hã tiꞌai ꞌre, dasiré aꞌuwẽꞌõ na ꞌre iꞌaihâimana mono zé tedeꞌwa na ta norĩ hã oto ꞌre hâimana zaꞌra mono da, Abraꞌãhã ma, ꞌRe ihâimana uꞌâsi mono, tiꞌa te te isõmri hã.
5 Ãne ma tô Izaqui, Zacoho ma robꞌru, Mezopotãmia u morĩ da tame ꞌre hâimana mono da, Labã, Betuꞌéhé ꞌra nhorõwa ãma, Arameu norĩ siré, Rebeca Ezau norĩ na, Zacoho me taha hitébré ꞌre isãmra mono zéb ãma.
Ezau, Ismaeu ꞌra na imrozé wasuꞌu
6 Tawamhã Ezau, Izaqui, Zacoho ãma iwẽ te te ipisutuzé hã ma tô waihuꞌu. Duré Mezopotãmia u morĩ da, tame mro da, te te tãma irobꞌruzéb zama ma tô duré waihuꞌu. Tawamhã imama, ãma mreme wa, tiꞌai waꞌõtõ nhoꞌu Canaꞌã nhipiꞌõ na mro tõ da, te te tiwi isawizéb zama ma tô waihuꞌu. 7 Imama norĩ nhimiroti, ina norĩ nhimiroti me te te iwapari zahuré zéb zarina, Zaco Mezopotãmia u imorĩzéb zama ma tô duré waihuꞌu. 8 Tawamhã Ezau, Canaꞌã nhipiꞌõ, imama tõmo ma, te te irowẽꞌõzé hã ma tô duré waihuꞌu. 9 Tahawa Ismaeu, Abraꞌãhã ꞌra nhorõwa u ma tô mo. Tawamhã iꞌra sipiꞌõ Maalate, Nebaiotehe hidiba na ma tô timro, Ezau hã.
Zaco, Bétéu ãma te te isahoi mono zé wasuꞌu
10 Tawamhã Zaco, Beseba hawimhã ma tô watobro, morĩ da oto, Harã u. 11 Tawamhã hâiwahâ pesere ro iwazéb zahi u wisi wamhã, ma tô tame aꞌâ mazazâ, ãma awẽ da, bâdâ hã za oto sébré wa. Tawamhã tamemhã ẽne hã ma tô sima ꞌmaiꞌâ, tiꞌrã zaparizéb da. Tahawa ma tô oto nomro, sõtõ da hã. 12 Tawamhã Zaco ma tô te te saho. Te te isahoi mono ꞌremhã ma tô saiꞌurizé hã ꞌmadâ, tiꞌai hawi isãnaꞌrada, hâiwa u iꞌrãsudu hã. Tawamhã ꞌRe ihâimana uꞌâsi mono ma romhuriꞌwa norĩ hã te nasi ãma saiꞌuri zaꞌra. Te duré nasi ãma siꞌra zaꞌra, tiꞌai u hã. 13 Tahawa, te te isahoi mono ꞌremhã te Uburé Danhibꞌapito, saiꞌurizé zababamhã za. Ãhã wamhã, te tãma tinha ãne, ta hã:
— Wa hã Uburé Danhibꞌapito, aiꞌrada Abraꞌãhã te, duré Izaqui aimama te, ꞌRe ihâimana uꞌâsi mono. Tiꞌa iwa iꞌanomrozé hã wa za aima tisõ. Asihudu norĩ ma zama wa za tãma sõmri zaꞌra. 14 Asihudu norĩ hã tiꞌa zapru ropâ ꞌre ihâimana zaꞌra mono ne, ahâ uptabi na te za ꞌre hâimana zaꞌra. Ta norĩ te za hâiwa nhimire niwĩb ãma ro ꞌre ihâimana mono u hã, hâiwa nhimiꞌe niwĩb ãma ro ꞌre ihâimana mono u hã, bâtâ pusizém niwĩb ãma, ro ꞌre ihâimana mono u hã, duré bâtâ zasizém niwĩb ãma ro ꞌre ihâimana mono u hã te te ropé. Tawamhã aiꞌuꞌâbâ, asihudu norĩ uꞌâbâb zama wa za daro mono bâ uburé ꞌre idahâimana zaꞌra mono norĩ ma hã, iwẽ te dama ꞌre apisutu. 15 Wa hã wa za asiré ꞌre ĩhâimana uꞌâsi. Wa za duré aiꞌwawimhã ꞌre ĩsimapa, nimomo ꞌre ane mono sidâpâsi. Wa za duré ã hã tiꞌai u we apâ aiꞌãma siri. Te iꞌairẽme da hã mare di, uburé ĩnhimiropisutuzé te aima ãma iꞌuwaimramizéb u.
16 Tawamhã Zaco topoꞌo wamhã, te ãne tinha: “Sena te Uburé Danhibꞌapito ãmemhã tihâiba. Ãne hã wa hã te aré waihuꞌu õ di.” 17 Tawamhã pahi wa, te ãne duré tinha: “Ã hã ro hã ma tô ĩpahi sina ĩma waze. Ãme te ꞌRe ihâimana uꞌâsi mono nhorõwa hã tihâiba. Ãme te duré hâiwa ꞌridawazé hã tihâiba.”
18 Tawamhã awẽ wi Zaco utu wamhã, ma tô ẽne ãma isiꞌrã zaparizé hã hâiwi tisã, ro iwazéb zahi wasuꞌuzéb da hã. Taha pari azeitona ꞌrãi waꞌu to hã ma tô duré isisiwi saꞌwa, ꞌRe ihâimana uꞌâsi mono ma, te te ipisutu na ꞌre sa mono da. 19 Tawamhã taha rob ãma ꞌri nhoꞌu ꞌre ihâimana mono hã, Rowaꞌa na isisi hã aré. Tane nherẽ, Zaco hã ma tô isisi na ãma saprĩ, Bétéu* na. 20 Tawamhã Zaco, tame ma tô ꞌRe ihâimana uꞌâsi mono ma sina ropisudu hã ꞌmanha ãne: “A hã ĩsiré aimorĩ da wamhã, za ĩmorĩzém na iꞌmadâꞌâ pese mono wamhã, duré ĩꞌuzazé norĩ mra me ĩma sõmri zaꞌra wamhã, 21 rowẽ na apâ ĩhâiba ré ĩmama nhorõwa u ĩwisi wamhã, a hã te za Ĩnhibꞌapito, ĩte ꞌRe ihâimana uꞌâsi mono na hã ꞌre aihâimana mo. 22 Ã hã ẽne hâiwi te isãrĩ asõrõwa da hã, ꞌRe ihâimana uꞌâsi mono. Duré uburé marĩ ĩma ꞌre iꞌanhomri mono hã, wa za aima te ꞌre sõmri apâ, 10 na isaꞌrata ãma.”