E niha bö tsadzöri õ di dza Jeová na romnhoré.

1. E marĩ wa aima rowẽ di dza Bíblia na ꞌre romnhoré mono wamhã.

Tô tsena, ã hã romnhoré Bíblia nhimirowahudu ĩmorĩꞌrata norĩ na ma tô aima tidzaꞌẽtẽ atsimidzawidzé Jeová ãma. ꞌRe romnhoré mono Jeová ãma atsimizawidzé hã ꞌre tsaꞌẽtẽ mono da. (1 Pedro 2:2) ꞌRe aihöimana uꞌötsi mono da, natsi ãma udzutsi Höimanaꞌuꞌö tẽme aiwitsi da Ĩmreme na ꞌre romnhoré mono wa. —Tsõré na 1 Timóteo 2:3, 4; Judas 21.

Atsimirowaihu hã Höimanaꞌuꞌö na ꞌre tsaꞌẽtẽ mono tsidöpötsi, atsimidzadze te dza tinhiptete. Atsimidzadze te dza aipawapto Höimanaꞌuꞌö ma rowẽ da. (Hebreus 11:1, 6) Te dza aipawapto duré aiwatsédé hã rẽme da duré aihöimanadzém na hã ãma tsaprĩ da. —Tsõré na Atos 3:19, 20.

2. E niha atsimirowaihuꞌu na hã Höimanaꞌuꞌö ãma te dza ꞌre ĩdapawapto mo.

Tô tsena, te dza atsima ĩwẽ dama robdzanhamri da ĩromnhorédzém na — wama wẽ dzaꞌra di wa te dama watsuꞌu dzaꞌra wamhã romahörö wẽ norĩ. Bíblia na ꞌre romnhoré mono wamhã, dama ãma rowatsuꞌu waihuꞌu petse di dza atsimidzadze Jeová na duré dama tsabui waihuꞌu petse di dza romahörö wẽ norĩ hã ĩꞌremhã ĩhöimana dzaꞌra.—Tsõré na Romanos 10:13-15.

Ãma tsãnaꞌrata rowatsuꞌu na marĩ wẽ norĩ na ĩwaihuꞌudzé atsitsãnawã norĩ ma duré atsiwaihu norĩ ma. Atsimiwadzép tsina dama ꞌre rowatsuꞌu mono. Nharĩ tõ ĩtsimidzadze dzaꞌra ĩböi õ na, taha upana tãma rowatsuꞌu dzaꞌra na Höimanaꞌuꞌö nhimiropitsutu na. Ãma aipoꞌretsiꞌöri tõ: te dza tatobꞌudzu dzaꞌra ni ꞌre ĩꞌmanharĩ mono dzém na aimreme nhipai u.—Tsõré na 2 Timóteo 2:24-26.

3. E ma hã marĩ ĩwẽ uptabi te dza aima watobro Höimanaꞌuꞌö tẽme aiwitsi wamhã.

Bíblia na romhoré ré atsimidzadze te dza tinhiptete. Tawamhã, marĩ ĩwẽ uptabi te dza aima watobro. Tô tsena, te dza ꞌre aihöimana mo Jeová ꞌra na.—Tsõré na 2 Coríntios 6:18.

4. E niha te dza ꞌre ĩtsaꞌẽtẽ mo atsimidzadze.

Te dza aiprédu atsimidzadze na Höimanaꞌuꞌö Mreme na ꞌre romnhoré mono tsidöpötsi. (Hebreus 5:13, 14)Waptẽrẽ nimahã Jeová Watsuꞌuꞌwa Bíblia na te te aima romnhoré da, ĩhöiwarobo ré O que A Bíblia Realmente Ensina?. Bíblia hã ꞌre waihuꞌu mono tsidöpötsi danhipai u dza ꞌre robdzei mono di aihöimanadzém na. —Tsõré na 1 Timóteo 4:15, 16; Romanos 12:2.

Romahörö wẽ hã Jeová hawi, Höimanaꞌuꞌö rowẽ uꞌötsi ꞌre ĩmorĩ hã. Te dza ĩtẽme aiwi Ĩtsibꞌaꞌuwẽ norĩ u aiwitsi wamhã. (Hebreus 10:24, 25) Tsada ꞌre atsiptete mono wamhã tãma rowẽ da, te dza ꞌre atsõpré mo dahöimana uptabi dzéb dzô — dahöimana uꞌötsidzé hã. Jeová tẽme dawitsidzé tô tsena marĩ danhipai u ĩwẽ uptabi ĩꞌmanharĩ da hã.—Tsõré na 1 Timóteo 1:11; 1 João 2:17.