E aimro hã tiwatsédé te ꞌmanha aihöiba nhiti hã

“Ĩ̱mro ma tô ĩ̱ma tinha: ‘Wa dza airẽ’. Te tsima wẽ piꞌõ ĩhöibaté. Wa hã ĩ̱pẽꞌẽdzé uptabi di. Tahã ĩböiꞌõ. Uburé wa tô ꞌmanha te tãma rowẽ da.” — Maria, Espanha hawi.

“Ĩ̱mro ma tô ĩ̱rẽ. Ĩ̱pẽꞌẽdzé uptabi di, wa aré dörö. Uburé wa te watsima ĩrowaꞌõtõdzé hã töibö. Nimahã na hã ĩ̱ma robdze ti, tane nherẽ, ĩ̱pẽꞌẽdzé uptabi di apö.” — Bill, Espanha hawi.

DAMRO na danhiptsaihuri ĩwatsété uptabi. Niꞌwam norĩ hã tsada ꞌre tsiptete tsimitsutu ꞌre höimana dzahuré da apö.a Niꞌwa tsiptsaihuri wamhã ĩmro tsaꞌẽtẽ di ĩpẽꞌẽdzé di. E marĩ te dza tãma pawaptob dzaꞌra.

BÍBLIA TE DZA AIPAWAPTO

Daꞌahö na te tsépata dzaꞌra ni damro danhiptsaihuri wi hã. Bíblia te tãma pawaptob dzaꞌra. Tãma waihuꞌu petse di Höimanaꞌuꞌö te ꞌmadö ĩtsiwaꞌõ duré ĩtsimirobdzépada. — Malaquias 2:13-16.

‘Duré ĩ̱pẽꞌẽ ꞌre ĩ̱hötöꞌö dzaꞌẽtẽ na ꞌre ĩ̱höimana mono wamhã, te a hã ꞌre ĩ̱pẽꞌẽ tété uꞌötsi mo. Te duré tsaꞌẽtẽ na ĩ̱pẽꞌẽ to ĩ̱ma ꞌre ĩtsõmri mo ĩ̱pẽꞌẽ ꞌremhã.’ — Salmo 94:19.

“Ãhã robꞌuiéré hã te tsõré wamhã ĩ̱ma hã Jeováb wamama ĩtsimidzawi pe. Ĩ̱ꞌra norĩ hã te te ꞌre ꞌmadöꞌö wẽ dzaꞌra mono di, duré te ĩ̱pawapto”, ãne Bill te watsuꞌu.

‘Tawamhã Wanhibꞌapito ꞌRe ĩhöimana uꞌötsi mono nhitsi dzaꞌẽtẽ dzarina ma tô ropitsutu, te te airẽme dzaꞌra waꞌaba tõ da hã.’ — 1 Samuel 12:22.

Piꞌõ hã, Carmen na ĩtsitsi, ĩmro ma tô aptsaihu piꞌõ na bötö ahö na. Te tinha: “Ĩ̱mro ma tô aptsaihu piꞌõ aimawi u, tadzahã ĩ̱ma waihuꞌu petse di Jeová te te ĩ̱rẽme õ di dza. Tahawa, Jeová ãma wa tô umnhatsi õne uꞌö.”

‘Marĩ na ꞌre aihötöꞌö dzaꞌra waꞌaba mono ãna, te dza oto ꞌre aihöimana dzaꞌra waꞌaba mo. ꞌRe ĩhöimana uꞌötsi mono ma, ꞌre aimreme dzutsi aba mono dzép tsidöpötsi, te dza duré tiwi ꞌre ĩrowaptẽrẽ dzaꞌra waꞌaba mo . . . Rowẽ hã ꞌRe ĩhöimana uꞌötsi mono te te wama ꞌre ĩꞌapitsutu mono hã, ĩwẽ uptabi hã te wama ꞌre höimana dzaꞌra, da te ꞌre ĩwaihuꞌu dzaꞌra mono õ hã. Taha tsi te dza te te ꞌre aipẽꞌẽ nomri wẽ dzaꞌra waꞌwa, marĩ na ꞌre aihötöꞌö dzaꞌra waꞌaba mono ãna ꞌre aihöimana dzaꞌra waꞌaba mono da.’ — Filipenses 4:6, 7.

Piꞌõ hã, Sandra na ĩtsitsi, te watsuꞌu: “Ãhã romnhihödö wa tô tsõré dzahu ahö uptabi na, duré wa tô waptẽ ahö uptabi na, ãne wamhã rowẽ hã Höimanaꞌuꞌö hawi wa ĩ̱höiba.”

Nimahã na hã Maria, Bill, Daniel, Sandra duré Carmen te rotsaꞌrata dzaꞌra ꞌre höimana wẽ dzaꞌra mono õ di dza apö. Tane nherẽ, te te umnhatsi dzaꞌra Jeová, Höimanaꞌuꞌö ãma, duré Bíblia ma tô pawaptob dzaꞌra. Bill duré te ãma rowatsuꞌu: “Uburé rowatsété wamhã Jeová ãma umnhatsidzé ma tô ĩ̱pawapto. Nimahã bötö ré, ‘robra uptabi ne’ wa ꞌre mo, tadzahã Höimanaꞌuꞌö wa hã ĩ̱tsiré ꞌre ĩ̱morĩ.” — Salmo 23:4.

a Taha na duré aiwaihuꞌu da, ꞌmadöꞌö “Quando o cônjuge é infiel”, ĩtsõrédzém na hã Despertai! 22 abril na 1999 na, waradzu mreme na.

b Bíblia dzarina, Höimanaꞌuꞌö Jeová na ĩtsitsi.

E niha niꞌwam norĩ hã rowẽ na te ꞌre höimana dzaꞌra apö

Romnhihödö aima wẽ di Bíblia ꞌrem na rotsaꞌrata petse.

Bill te tinha: “Bíblia te watsuꞌu niꞌwam norĩ hã ma tsépata dzaꞌra ĩ̱tsine. Ĩ̱ma rowẽ di. Wa tô tsõré Jó duré Salmo, duré wa tô awawi uburé te ĩ̱pawapto.”

Danhoꞌre te dza aipawapto.

Carmen te poꞌre puꞌu: “Ĩ̱nhõtõ waihuꞌuꞌõ wamhã, danhoꞌre wa natsi wapa. Tawamhã atãma ꞌre ĩ̱höimana.” Daniel te tinha: “Wa hã, wa tô romnhoré violão taꞌa da, tawamhã romharé na wa ĩ̱höimana.”

Atsimirobdzépada watsuꞌu na.

Daniel te tinha: “Wa natsi robdzanhamri tsyry na, tane nherẽ, ĩ̱tsiwaihuꞌu ĩwẽ ĩré hã. Wa robdzanhamri dzaꞌra ni bötö tsidöpötsi. Ĩ̱nhimirobdzépatadzém na te tãma watsuꞌu dzaꞌra wamhã duré te tãma tsihötö dzaꞌra wamhã ĩ̱ma rowẽ di.” Sandra te tinha: “Ĩ̱mama, ĩ̱na, ĩ̱tsitsãnawã norĩ ma tô ĩ̱pawapto petse. Wa umnhatsi ĩ̱na, õ hã te ĩ̱wapa õne uꞌö. Duré ĩ̱ꞌumnhatsi ĩ̱mama nhimipawaptobdzé hã, atãma ꞌre ĩ̱höimana wẽ apö.”

Rowaptẽrẽ tsiꞌutõrĩ tõ.

Carmen te tinha: “Wa tô rowaptẽ tsiꞌutõrĩꞌõ na. Höimanaꞌuꞌö ĩ̱ma waihuꞌu petse di ĩ̱tsiré te ꞌre höimana. Õ hã te ĩ̱wapa duré ĩ̱pawapto. Ropire uptabi ꞌre höimana mono ré wa tô wi Höimanaꞌuꞌö tẽme.”