Dapawaptobdzé danhipai u ĩwẽ tiwi datsiꞌutõrĩ norĩ ma

ROWAIHUꞌU PETSE ꞌWA NORĨ TE TE ꞌRE ROMNHORÉ PETSE DZAꞌRA TIWI DATSIꞌUTÕRĨ NORĨ TE ROBDZÉPATADZÉM NA. Wa te ĩꞌmadöꞌödzéb dzarina ãhã ĩtsõrédzéb ꞌremhã, ta norĩ nhimiroti danhipai u ĩwẽ norĩ Bíblia na te ãma tsitsadze dzaꞌra. Tawamhã, ãhã ĩhöiwarobo ĩꞌrata nhimiroti norĩ dzahadu dapawaptobdzé ã bötö mono na. Tadzahã Ropotoꞌwai mreme ꞌrep tsi, roti norĩ me te duré tihöiba rowatsuꞌu dapẽꞌẽ nomri petse dzé tiwi datsiꞌutõrĩ norĩ ma. Ãma ĩtsimiré:

• Wama ĩtsawi petse dzaꞌra norĩ ĩdöꞌö dzaꞌra hã te te robdzépata dzaꞌra õ di

  Bíblia te tinha ‘adöꞌö norĩ ma hã marĩ tãma ĩwaihuꞌu uptabi dzaꞌra õ na hã’ duré ‘ĩtsimirotsaꞌrada ĩtsiꞌutõrĩ dzaꞌra na hã’. (Eclesiastes 9:5 TNM; Salmo 146:4 TNM) Taha wa, Ropotoꞌwai mreme te ãma tsimiréꞌé dadö danhotõ petse ne.—João 11:11.

• Ropotoꞌwa ĩtsimidzawi petse umnhatsi dapẽꞌẽ nomridzé

  Bíblia te tinha: ‘ꞌRe ĩhöimana uꞌötsi mono hã [Jeová]a te tsena na ꞌre ĩhöimana dzaꞌra mono norĩ hã te te ꞌre daꞌabꞌmadöꞌö petse. Te duré te te tiwi ꞌre ĩrowaptẽrẽ dzaꞌra mono dzé hã te te ꞌre awapari.’ (Salmo 34:15) Wama hã rowaptẽrẽ hã mare di taré dapẽꞌẽ na datsiwatsuꞌudzé niwamhã rotsaꞌrata hiri wẽ dzé. Tsena na Ropotoꞌwai ma wapẽꞌẽ na watsiwatsuꞌu dzaꞌra wamhã, wa dza ãma watsiwaihuꞌu dzaꞌra ni. Duré õ hã tinhiptetedzé na te dza wapẽꞌẽ nomri dzaꞌra.

• Danhimipari dahöimanadzé ĩwẽ dzô aptoꞌoré

  E niha robdzei uptabi di dza aptoꞌoré Tiꞌai ãma wama ĩtsawi petse norĩ ĩdöꞌö dzaꞌra hã apö höiwaꞌutu dzaꞌra wamhã! Bíblia te arowatsuꞌu dahöiwaꞌutudzém na duré e niha dza dahöimanadzé hã ãne wamhã. Te tinha Jeová dza ‘te te ĩdaꞌatõmo uꞌõ na, dapẽꞌẽdzé õ uꞌötsi ꞌre dahöimana uꞌötsi dzaꞌra mono da’ duré ‘dadö, datsiwaꞌõ duré dahödzé’ dza te te ĩꞌuprotsi na hã. — Apocalipse 21:4.

Ãhã ropitsutu umnhatsi wẽ te, Jeová dzadzeiꞌwa ahö na, Ropotoꞌwa Bíblia ꞌremhã, tsiptete na te ꞌre nomro tãma ĩtsawi petse norĩ tiwi tsiꞌutõrĩ dzaꞌra nherẽ.

Ãma ĩtsimiré, 65 wahu parimhã mro ré, Ann mro ma tiwi aiꞌutõ. Õ hã te tinha: “Bíblia te ĩ̱ma ropitsutu wama ĩtsawi petse norĩ ĩdöꞌö dzaꞌra te te ĩrobdzépata dzaꞌra õ na duré Ropotoꞌwa dza apö te te ĩꞌahöiwaꞌutu na hã. Ĩ̱mro ãma ĩ̱pẽꞌẽdzé wamhã, wa poꞌre puru ãhã ropitsutu na. Ãne na, te ꞌwapéi waihuꞌu petse di ãhã robdzépada ĩtsaꞌẽne hã!”

Tina, oto ĩwatsuꞌu hã ãhã ĩtsõrédzém na, te tinha: “Timo döꞌödzém hawimhã, te ꞌmadöꞌö waihuꞌu petse di Jeová te te ĩ̱ꞌupari na duré ĩtsibꞌrata nhiptede te te ĩ̱pawaptom na ãhã ropire ꞌremhã. Duré wa hã, wa ĩ̱nhimidzadzei petse Ropotoꞌwa nhimiropitsutu na dahöiwaꞌutudzém na. Tahã te ĩ̱nhiptete ĩ̱höimanadzém na te ãma udzutsi da Timo apö te ĩ̱tsõpẽtẽdzéb u hã.”

Ãne duré romhöimanadzé Bíblia dzadzeiꞌwa ĩꞌahö norĩ ma hã. Ãté te ĩrotsaꞌra Ropotoꞌwai mreme nhimiropitsudu ĩꞌuptabiꞌõ na niwamhã taré ropitsutu na. Tane nherẽ ãté aima wẽ di dza romnhoré wamhã Bíblia nhimiropitsutu na duré ĩtsimiroti na tô tsena ĩꞌuptabi dzô. Ãté te dza ĩꞌuptsibi me Bíblia dapawaptobdzé danhipai u ĩwẽ na tiwi datsiꞌutõrĩ norĩ ma.

E TE ATSIMA ĨWẼ WAIHUꞌU DA DURÉ DAHÖIWAꞌUTUDZÉM NA

ꞌMadöꞌö ĩropoto norĩ taha na site jw.org na

E MARĨ TE TIHÖIBA DADÖꞌÖ PARIMHÃ.

E marĩ te dza wa dzô tiwatobro dzaꞌra wadöꞌö dzaꞌra parimhã. Ropotoꞌwai mreme nhimidzadaꞌöbödzé tsõꞌawi te wapẽꞌẽ nomri dzaꞌra duré te wanhiptete dzaꞌra.

ꞌMadöꞌö ROMNHORÉDZÉ MONO > ĨROPOTO MONO (Ĩropoto norĩ ubumro: Bíblia hã > Bíblia nhimirowahutu mono)

E TE ATSIMA ĨWẼ ROꞌMAHÖRÖ WẼ WAPARI DA.

ꞌMadöꞌö ROMNHORÉDZÉ MONO > ĨROPOTO MONO