Hezekile
24 Laphinda lafika ilizwi likaYehova kum ngonyaka wethoba, ngenyanga yeshumi, ngomhla weshumi kuloo nyanga, lisithi: 2 “Nyana womntu, wubhale phantsi lo mhla,* yona kanye le mini. Ukumkani waseBhabhiloni uqale kanye ngale mini ukuhlasela iYerusalem.+ 3 Uze wenze isaci ngendlu engathobeliyo, uthi ngayo:
“‘Ithi iNkosi enguMongami uYehova:
“Beka imbiza;* yibeke eziko uze ugalele amanzi kuyo.+
4 Faka kuyo amaqatha enyama,+ onke amaqatha amahle,
Umlenze nomkhono; yigcwalise ngawona mathambo mahle.
5 Thatha eyona gusha intle emhlambini,+ uze ufake iinkuni ngaphantsi kwembiza macala onke.
Wabilise amaqatha, uze upheke amathambo angaphakathi kuyo.”’
6 “Ngoko ke ithi iNkosi enguMongami uYehova:
‘Siza kuthi shu isixeko esidume ngokuchitha igazi,+ imbiza enomlomo obanzi, engasuswanga irusi!
Wakhuphe amaqatha akuyo;+ uze ungenzi maqashiso ngawo.
7 Kuba igazi laso likuso;+ silichithe eliweni.
Asilichithanga emhlabeni, ukuze logqunywe ngomhlaba.+
8 Ukuze kunyuke umsindo wempindezelo,
Igazi laso ndilibeke phezu kweliwa elikhazimlayo
Ukuze lingogqunywa.’+
9 “Ithi iNkosi enguMongami uYehova:
‘Siza kuthi shu isixeko esidume ngokuchitha igazi!+
Ndiza kuqokelela imfumba yeenkuni.
10 Fumba iinkuni uze uphembe umlilo,
Yibilise ngokucokisekileyo inyama; wuqongqothe umhluzi, ukuze amathambo atshe.
11 Yimise phezu kwamalahle loo mbiza ingenanto ukuze ibe shushu,
Ukuze ikopolo yayo itshe ibe bomvu.
Ukungcola kwayo kuza kunyibilika,+ itshe nerusi yayo.
Yiphose emlilweni naloo rusi yayo!’
13 “‘Ungcoliswe ngamanyundululu obuwenza.+ Ndazama ukukucoca, kodwa awuzange ucoceke. Awuzukuba sacoceka de uphele umsindo wam.+ 14 Mna Yehova, ndithethile. Iza kwenzeka le nto. Andizukuzibamba, andizukuba nasizi, ibe andizukuzisola.+ Baza kukugweba ngokweendlela zakho nangokwezenzo zakho,’ itsho iNkosi enguMongami uYehova.”
15 Laphinda lafika ilizwi likaYehova kum, lisithi: 16 “Nyana womntu, ngesithonga nje esinye ndiza kuthatha lowo umthanda kunene.+ Uze ungazili;* ungalili okanye uphume iinyembezi. 17 Ncwinela ngaphakathi, ungamzileli lowo ufileyo.+ Thwala iqhiya,+ unxibe neembadada.+ Ufanele ungawogqumi amabhovu,*+ ungasityi nesonka osiziselwa ngabanye abantu.”*+
18 Ndathetha nabantu kusasa, waza wasweleka umfazi wam ngokuhlwa. Ngoko ngentsasa elandelayo ndenza yonke into endandiyiyalelwe. 19 Abantu babesithi kum: “Awuzukusixelela na ukuba ezi zinto uzenzayo zidibana njani nathi?” 20 Ndabaphendula ndathi: “Ilizwi likaYehova lifikile kum, lisithi, 21 ‘Yithi kwindlu kaSirayeli: “Ithi iNkosi enguMongami uYehova, ‘Ndiza kuyingcolisa ingcwele yam,+ leyo nineqhayiya ngayo, leyo niyithanda ngokusuka entliziyweni. Oonyana benu neentombi zenu enizishiye ngasemva ziza kuwa likrele.+ 22 Kuza kufuneka nenze yonke le nto ndiyenzileyo. Anizukuwogquma amabhovu enu, ningasityi nesonka enisiziselwa ngabanye abantu.+ 23 Niza kuthwala iiqhiya, ninxibe neembadada. Anizukuzila okanye nilile. Endaweni yoko, niza kubolela kwiziphoso zenu,+ nincwinelane. 24 Into eyenzeke kuHezekile isisilumkiso kuni.+ Niza kwenza yonke into ayenzileyo. Xa isenzeka, niza kutsho nazi ukuba ndiyiNkosi enguMongami uYehova.’”’”
25 “Wena ke nyana womntu, mhla ndathatha kubo indawo yabo ekhuselekileyo, leyo ibavuyisayo nabayithanda ngokusuka entliziyweni, noonyana babo neentombi zabo,+ 26 lowo usindileyo uza kukubalisela.+ 27 Ngaloo mini uza kuwuvula umlomo wakho uze uthethe nalowo usindileyo, utsho ukwazi ukuthetha.+ Uza kuba sisilumkiso kubo, batsho bazi ukuba ndinguYehova.”