Ukuhlonela Amabhinqa Ebandleni

IBHAYIBHILE ibekela amaKristu uludwe lobuthixo lobuntloko, elinoKristu engaphantsi kuThixo, indoda ingaphatsi kuKristu nomfazi engaphantsi komyeni wakhe. (1 Korinte 11:⁠3) Noko ke, oku kuba ngaphantsi akuthethi ukulawulwa ngegqudu. Ubuntloko entsatsheni abuze bumiselwe ngogonyamelo, enoba lolungokwasemzimbeni, ngokwasengqondweni, okanye ngamazwi. Ngokubhekele phayaa, ubuntloko bobuKristu bulinganiselwe yaye abuthethi ukuba indoda inokuba yingqwayingqwayi ezigqala ingenazimpazamo.a Ukwazi indlela nexesha lokuthi “Uxolo, ubunyanisile” kunokunceda ukuba amaqabane ahlaziyane yaye imitshato ihlale ithuba elide. Sekunjalo, hayi indlela ekulula ngayo ukuba loo mazwi okuthobeka abambeke angafuni ukuphuma emqaleni!​—⁠Kolose 3:​12-14, 18.

Kwisiluleko sabo esingomtshato, umpostile ongumKristu uPawulos noPetros basoloko besikhumbuza ngomzekelo kaKristu. Intlonelo izuzwa ngomzekelo ohlaziyayo womyeni njengoko elandela umzekelo owamiselwa nguKristu, ekubeni “indoda le iyintloko yomfazi, njengokuba naye uKristu eyintloko yebandla eli; waye yena ngokwakhe enguMsindisi [walo mzimba].”​—⁠Efese 5:⁠23.

Isiluleko sikaPetros kumadoda sicacile: “Nina madoda, hlalani [nabafazi benu] ngokokwazi.” (1 Petros 3:⁠7) Inguqulelo yale mihla yeSpanish ishwankathela loo mazwi, isithi: “Ngokuphathelele abayeni: bonakalisa ubuchule kubomi benu obahluleleneyo, ubonakalisa ulwazelelelo ngomfazi.” La mazwi abonisa iinkalo ezininzi, kuquka uvelwano kulwalamano lomtshato. Umyeni akafanele amgqale umkakhe njengento nje yokuzanelisa ngokwesini. Omnye umfazi owakhe waxhatshazwa esengumntwana wabhala: “Ndinqwenela kuphela ukuba ningathetha okungakumbi ngenkxaso umyeni anokuyinika umkakhe oye wanala mava. Okufunwa yinkoliso yethu bafazi kukwazi ukuba sithandwa ngokwenyaniso yaye sinyanyekelwe, ingekuko ukuba silapho nje ukuze sanelise iminqweno ethile engokwasemzimbeni okanye njengomgcini wendlu, kungekho ulwalamano olungokweemvakalelo.”b Umtshato wasungulwa nguThixo ukuze amadoda nabafazi babe ngamaqabane nabancedani. Ngumbandela wokusebenzisana nokucingelana.​—⁠Genesis 2:18; IMizekeliso 31:​28, 29.

Usiso Njani “Esona Sitya Siethe-ethe”?

Kwakhona uPetros ululeka amadoda ukuba abahlonele abafazi bawo “njengesona sitya siethe-ethe.” (1 Petros 3:⁠7) Wayenokuba uthetha ukuthini uPetros ngokuthi umfazi ‘usesona sitya siethe-ethe’? Ngokuqinisekileyo, ngokomlinganiselo, umfazi uethe-ethe ngokomzimba kunendoda. Oko kungenxa yomahluko wokwakhiwa kwamathambo nezihlunu. Kodwa ukuba sithetha ngamandla okuziphatha angaphakathi, ngoko umfazi akakho ethe-ethe nakancinane kunendoda. Kangangeminyaka abafazi baye banyamezela iimeko mhlawumbi amadoda amaninzi abengayi kuzinyamezela nakancinane​—⁠kuquka ukuphathwa kakubi liqabane elinogonyamelo okanye elilikhoboka lotywala. Yaye cinga ngoko umfazi akunyamezelayo ukuze azale umntwana, kuquka iiyure zokubandezeleka ebudeni bokuzala! Nayiphi na indoda eneemvakalelo eye yazibonela ummangaliso wokuzala ifanele ngenxa yoko isale inentlonelo eyongezelelekileyo ngomfazi wayo nangamandla akhe angaphakathi.

Kulo mbandela wamandla angaphakathi, uHannah Levy-Haas, ibanjwa elingumYuda elavalelwa kwinkampu yoxinaniso yamaNazi iRavensbrück wabhala oku kwincwadi yakhe yokubhala iziganeko zemihla ngemihla ngowe-1944: “Inye into endikhathaza gqitha apha, yaye loo nto kukubona ukuba amadoda abuthathaka gqitha yaye angaphantsi gqitha ngamandla okunyamezela ubunzima kunabafazi​—⁠ngokwasemzimbenzi yaye ngokufuthi nangokweemvakalelo. Engakwazi ukuzilawula, abonakalisa ukungakwazi ukomelela ngokweemvakalelo ngokokude ubani angakwazi ukungawaveli usizi kuphela.”​—⁠Mothers in the Fatherland, nguClaudia Koonz.

La mava abonisa ukuba asikho isiseko esomeleleyo sokucalucalula amabhinqa kuba nje esenokuba ethe-ethe ngokwasemzimbeni. UEdwin Reischauer wabhala: “Kumaxesha angoku, yamkeleke ngokubanzi into yokuba abafazi banozimiselo namandla angakumbi engqondo kunamadoda.” (The Japanese) La mandla anokusetyenziswa ebandleni lamaKristu xa amabhinqa akhulileyo anokukwazi ukunceda amanye amabhinqa athubeleza phantsi kwengcinezelo enzima ngokweemvakalelo. Ngokuqinisekileyo, kwezinye iimeko kulula ngakumbi ngebhinqa eliphethwe kakubi ukuba liye kumfazi okhulileyo ukuze lifumane ukuhlaziyeka okukhawulezileyo kunokuba liye endodeni. Ukuba kuyimfuneko, kusenokuyiwa kumdala ongumKristu ukuze kufunyanwe ukhokelo olongezelelekileyo.​—⁠1 Timoti 5:​9, 10; Yakobi 5:​14, 15.

Ukusuka nje izenzo zomfazi zikhutshwe engqondweni njengeziziimvakalelo, uthi zibangelwa “kukuba sexesheni kwakhe” kuyawacaphukisa amabhinqa amaninzi. UBetty, umKristu okhutheleyo, wathi: “Siyazi, njengoko umpostile uPetros wabhalayo, ukuba ngandlel’ ithile ‘sisesona sitya siethe-ethe,’ esobubhinqa, sibunjwe ngokuceketheke ngakumbi. Kodwa oko akuthethi ukuba umphathi emsebenzini ufanele asijongele phantsi aze azenze umzali wethu, aze athi nasiphi na isenzo sebhinqa sibangelwe kukuba sexesheni kwethu. Sinengqondo yaye sifuna ukuphulaphulwa ngentlonelo.”

Asingawo onke amabhinqa aqhutywa ziimvakalelo, kanye njengokuba ingengawo onke amadoda angaqhutywa ziimvakalelo. Umntu ngamnye ufanele athatyathwe njengomntu owahlukileyo. UBetty, ekucatshulwe amazwi akhe ngaphambilana, wamxelela oku uVukani!: “Andithandi ukucalucalulwa ngokobuni bam. Ndiye ndawabona amadoda ecuntsula kule nto yabantwana yaye engabi yonto inye ngawo onke amaxesha. Yaye kukho amabhinqa anokomelela okwezikhonkwane ngokweemvakalelo. Ngoko amadoda mawasiphulaphule ngokunyanisekileyo engacingi ngobuni bethu.”

Yintoni Efunekayo Ukuze Kubekho Inguqulelo?

Ukuba kuza kufuneka kuguqukelwe kokulunge ngakumbi, bambi bathi akwanele ngamabhinqa ukuba alwele amalungelo nokwenziwa kokusesikweni kuwo; yaye akwanele ukuba amadoda enze izimbo zenkwalambisa zokubonakalisa intlonelo ngamabhinqa. Kuso nasiphi na isithethe nendawo, amadoda amele ahlole indima yawo kule meko aze azibuze oko anokukwenza ukuze enze ubomi bonwabise buze buhlaziye ngakumbi kumabhinqa.​—⁠Mateyu 11:​28, 29.

Umbhali nembongi uKatha Pollitt wabhala oku kwiTime: “Kambe ke, inkoliso yamadoda ayidlwenguli okanye ibethe okanye ibulale. Kodwa oko akuthethi ukuba, njengoko amaninzi awo ebonakala ecinga, awananto yakwenza nogonyamelo kumabhinqa. Ngamnye wethu kubomi bethu bemihla ngemihla uyanceda ekubumbeni iingcamango neentelekelelo zezithethe ezichaza imida yoko kuvumelekileyo. . . . Ndithetha ngamadoda azihlola ngokunzulu, alucel’ umngeni ikhethe namalungelo awo, esithabatha isabelo sawo sembopheleleko ngemeko embi esikuyo.”

Kodwa nokuba amadoda kulo lonke ihlabathi enza inguqulelo ephawulekayo kwisimo sawo sengqondo kumabhinqa, sekunjalo oko akuyi kuba sisicombululo esipheleleyo ekwenziweni kokungekho sikweni okukhathaza uluntu. Ngoba? Kuba amadoda enza okungekho sikweni nobukrwada kungekuphela nje kumabhinqa kodwa nakubamelwane bawo. Imfazwe, ugonyamelo, ukubulala, amaqela axhobileyo abulalayo nobugrogrisi zisezizinto zemihla ngemihla kumazwe amaninzi. Okufunekayo yinkqubo entsha ngokupheleleyo yokulawula umhlaba wonke. Yaye kufuneka lonke uluntu lufundiswe ngokutsha. Yaye oko koko uThixo aye wakuthembisa ngolawulo loBukumkani bakhe obuya kulawula umhlaba busemazulwini. Kuya kuba ngoko kuphela ekuya kubakho okusesikweni nokulingana kubo bonke abantu​—⁠amadoda, amabhinqa nabantwana. Kuya kuba ngoko kuphela ekuya kuthi kubekho ukuhlonelana phakathi kwamadoda nabafazi. IBhayibhile ikubeka oku ngolu hlobo kuIsaya 54:13: “Bonke abantwana bakho baya kuba ngabafundi bakaYehova, lube lukhulu uxolo lwabantwana bakho.” Ewe, ukufundiswa kakuhle ngemigaqo kaYehova yobulungisa kuya kuba negalelo kwihlabathi elitsha lokuhlonelana.

[Imibhalo esemazantsi]

[Umfanekiso okwiphepha 16]

Ngokufuthi umfazi okhulileyo unokunikela isiluleko esiluncedo

[Umfanekiso okwiphepha 17]

Ukufak’ isandla kwimisebenzi yekhaya yenye indlela indoda enokubonakalisa ngayo intlonelo ngomfazi wayo