ICawa YaseTshetshi EOstreliya—Indlu Eyahluleleneyo
Ngumbhaleli kaVukani! eOstreliya
INGXOXO yokuba amabhinqa amele amiselwe njengabefundisi kwiCawa yaseTshetshi asinto intsha. Kodwa kutshanje lo mbandela uye wayimbambano enkulu eOstreliya.
NgoJanuwari 1992 ubhishophu waseCanberra naseGoulburn wenza isaziso sokuba uceba ukumisela iqela lamabhinqa angabadikoni njengabefundisi kwiCawa yaseTshetshi. Wayengazi kulinda ingqungquthela yecawa elandelayo. Enyanisweni, ingqungquthela yayisele ikukhabile oko kumiselwa izihlandlo ezithathu.
Njengoko oko kwenzekayo ekugqibeleni, ebutsheni bukaMatshi amabhinqa alishumi amiselwa njengabefundisi baseTshetshi ePerth, eOstreliya, phezu kwako nje ukungamkelwa kwaloo nto. Ngoko, akumangalisi ukuba ingqungquthela yecawa elandelayo yayilindelwe ngamehlo abomvu. Intlanganiso eyaqhutywa ngoJulayi ayizange ikhuphe sigqibo, ngoko kwaqhutywa “intlanganiso engaqhelekanga” ngoNovemba 21, 1992.
Kwithuba elingangeveki ngaphambi koko, kwiNgqungquthela eNkulu yeCawa yaseTshetshi ukumiselwa kwamabhinqa kwamkelwa. Abaninzi babelindele ukuba esi sigqibo sasiya kwamkelwa ngezandla ezishushu eOstreliya. Xa kwaqhutywa ingqungquthela eOstreliya, elinye iphephandaba lagqabaza lathi: “Kuvuke ingxoxo kwimini ebikade ilindelwe.” Ngaphambi kokuchaza iziphumo ezikwiphepha lokuvota, umongameli wale ngqungquthela wacela ukuba xa kusenziwa esi saziso kuzolwe. Xa kwatyhilwayo ukuba ukumiselwa kwabafazi kwamkelwe, bambi abaphulaphuli abazange bakwazi ukuzibamba iimvakalelo zabo. Xa ezo ndaba zasasazekayo, kwaba yimincili, yaye abantu babephephezelisa iibhanile emoyeni.
Olo chulumanco lwalungamanyanisi kwaphela. IThe Sydney Morning Herald yacaphula amazwi kabhishophu omkhulu waseSydney esithi: “Asisayi kuhlalisana ngolonwabo . . . Kuza kubakho iinkonzo ezimbini kwiCawa yaseTshetshi enye.” Omnye umfundisi wada wathi ukumiselwa kwabafazi njengabefundisi kungumqondiso wokuba “iCawa yaseTshetshi eOstreliya iqalisa ukuqhekeka.”
IBhayibhile inikela isizekabani sale ngxaki. UYesu Kristu wathi: “Ubukumkani obahlulelene bodwa buyaphanza; yaye ayikho idolophu, ayikho indlu, eyahlulelene yodwa enokuma.”—Mateyu 12:25, The New English Bible.
Oku kuphakamisa umbuzo ekubonakala ukuba awucingwa kuzo zonke iingxoxo zecawa othi, Ithini iBhayibhile ngendima yamabhinqa ebandleni? Nangona ivuma ukuba uYehova uThixo uwajonga amadoda namabhinqa azahluleleyo ngokulinganayo, sekunjalo amadoda namabhinqa iwanika iindima ezahlukeneyo ebandleni. (Galati 3:28) Kweyoku-1 kwabaseKorinte 11:3 ikubeka ngale ndlela oku: “Intloko yomntu wonke oyindoda nguKristu, intloko ke yomfazi yindoda, intloko ke kaKristu nguThixo.” Ngaloo ndlela, ngokuphathelele umbandela wokufundisa phambi kwebandla, uPawulos waphefumlelwa nguThixo ukuba abhale oku: “Umfazi, ezolile, makafunde ethobele konke. Umfazi ke andimvumeli ukuba afundise, nokuba ayilawule indoda.”—1 Timoti 2:11, 12.
Noko ke, oku akufanele kuwakhathaze amabhinqa angamaKristu, kuba akhululekile ukuba angafundisa kubulungiseleli basekuhleni njengokuba babesenza abafazi abafana noLoyisi, uYunike, uWodiya noSintike kumaxesha amaKristu amandulo.—Filipi 4:2, 3; 2 Timoti 1:5.