Isizathu Sokuba Ndiyeke Ubufundisi Ndingenele Ubulungiseleli Obulunge Ngakumbi

NDABEKW’ izandla njengomfundisi wamaKatolika ngoJulayi 31, 1955, xa ndandineminyaka engama-24 ubudala. Yayiyincopho yeminyaka eli-12 endayichithela kwisikolo sokufundela ubufundisi, eRachol, eGoa, eIndiya. Yaye yintoni eyandenza ndanomnqweno wokuba ngumfundisi?

Ndazalelwa eBombay, eIndiya, ngoSeptemba 3, 1930. Kunyaka olandelayo, ubawo wadla umhlala- phantsi, yaza intsapho yasekhaya yaya kuhlala eSalvador do Mundo, eBardez, eGoa, kunxweme olukumzantsi-ntshona weIndiya. Kubantwana basekhaya abane ndandinguntondo. Ukususela ebuntwaneni ndakhulela kwindawo nakwizithethe zamaKatolika angamaPhuthukezi, nezazikho eGoa ukususela ngowe-1510, xa yenziwa ithanga lasePortugal.

Abazali bam, ababethembekile kwiinkolelo zabo, babengamaKatolika anenzondelelo nababesithi nyaka ngamnye babhiyozele iKrisimesi, uMthetho wokuZila, i-Ista nemisitho yokuzukisa iNtombi Enyulu uMariya neqela lezinye “iingcwele.” Abefundisi ababesiba nenxaxheba kule mibhiyozo babedla ngokufikela ekhayeni lethu, maxa wambi babedla ngokuhlala ngaphezu kweentsuku ezilishumi sihlandlo ngasinye. Ngaloo ndlela, sasisoloko sinxulumana nabo, yaye njengomntu oselula ndandibathanda.

Inkonzo Yam EGoa, ESalamanca, NaseRome

Ndaqalisa ubufundisi ngehlombe elingummangaliso, yaye ndandingacingi nokucinga ngobunyaniso beemfundiso nezinto ezazisenziwa kwiCawa yamaKatolika. Kwiminyaka esixhenxe yokuqala ndikhonza eGoa, ndandisenza imisebenzi yobufundisi neyolonwabo kwiCawa iSt. Thomas ePanaji, elikomkhulu laseGoa. Kwangaxeshanye, kwiZiko Lemfundo Ephakamileyo Yezobugcisa (Polytechnic Institute) lorhulumente welo xesha wasePortugal, ndandikwizikhundla zaseburhulumenteni ezintlumbini—ndandingunjingalwazi ndikwangumalathisi kwelo ziko.

Ngowe-1962, ndathunyelwa kwiYunivesithi yaseSalamanca, eSpeyin, apho ndathweswa khona isidanga sePhD kwezeNtanda-bulumko yoMthetho neyoMthetho weCawa. Ngoxa ndandiqeqeshelwa ezomthetho, zimbi zezifundo endandizifunda, ingakumbi ezoMthetho wamaRoma neMbali yoMthetho weCawa, zandibangela ukuba ndiphande ngendlela iCawa yamaKatolika eyavela ngayo nokude ifikelele ekuchazeni upopu njengelandela likaPetros ‘elikwisikhundla sokulawula icawa.’

Ndavuya kuba kwakusenziwa amalungiselelo okuba izifundo zam ngezakwalizwi zibe seRome, eItali, apho ndandinokukwazi ukufumana ithuba lokufunda ngakumbi ngequmrhu labaphathi becawa. Ndaya eRome ehlotyeni lowe-1965.

Ngeli thuba ibhunga lazo zonke iinkonzo leVatican II lalifikelele kwincopho yalo. Ngoxa ndandiqhubeka nezifundo zam ngezakwalizwi, ndandineengxubusho ezibangela umdla neqela labafundi bezakwalizwi kunye “nabaSeki beBhunga” ababezichasa iingcamango ezingqongqo zangaphambili kwelo bhunga. Upopu owayelawula ngelo xesha yayinguPaul VI, endandikhe ndidibane naye ubuso ngobuso njengoko ndandikwisikhundla sesekelamongameli kuMbutho WaBefundisi baseIndiya eRome.

Ukuqalisa Kokruthakruthwano Namathandabuzo

Ngalo lonke elo xesha lokudibana kwam naye ukufunda kunye nokuphanda ngezi mfundiso, ndafumana ithuba lokuyiqonda ngakumbi imbali nemvelaphi yesiseko seCawa yamaKatolika.a Ngokuchasene neembono zabo babebambelele ngokungqongqo kwiingcamango zangaphambili kwelo bhunga, ulawulo lwabo olwalufana ngqo nolukaPius XII (1939-58), ekugqibeleni abo babehambisana neenguqulelo boyisela elo bhunga ekubeni kubekho uMgaqo-siseko oNgqongqo eCaweni (igama lesiLatin, Lumen Gentium, UKhanyo kwiiNtlanga). Phakathi kweminye imicimbi, kwisahluko 3 yayixubusha ngelungelo loobhishophu lokuthabatha inxaxheba ngokuzeleyo njengequmrhu ekulawuleni koopopu icawa. Le mfundiso yayisekelwe ngokunzulu kwisithethe kodwa abo babebambelele ngokungqongqo kwiimfundiso zamandulo babeyigqala njengowexuko nemvukelo.

Zombini ezi mbono ndazifumanisa zingamkeleki, njengoko zazingavisisani neVangeli. Azivisisani noMateyu 16:18, 19 yaye zivumela ukuba kubekho zonke iimfundiso zecawa ezingangqinelaniyo neZibhalo.b Ndaphawula ukuba amagama esiGrike asetyenziswe kwesi sibhalo, upeʹtra (isikhomokazi), elithetha “ulwalwa,” nelithi peʹtros (isiduna) elithetha “ilitye,” akazange asetyenziswe nguYesu njengezithetha-ntonye. Ngokubhekele phaya, ukuba uPetros wayenikwe iwonga lokuba lulwalwa, njengelitye lembombo, ngekwakungazange kubekho kubangisana phakathi kwabapostile kamva ngelokuba nguwuphi na omkhulu phakathi kwabo. (Thelekisa uMarko 9:33-35; Luka 22:24-26.) Kwakhona, uPawulos ngewayengazange abe nesibindi sokukhalimela uPetros ekuhleni ‘ngokungahambi ngqo enyanisweni yeendaba ezilungileyo.’ (Galati 2:11-14) Ndafikelela kwisigqibo sokuba bonke abalandeli bakaKristu abathanjiswe ngomoya bangamatye alinganayo, uYesu ulilitye lembombo kubo.—1 Korinte 10:4; Efese 2:19-22; ISityhilelo 21:2, 9-14.

Okukhona ndaya ndisiba kumanqwanqwa aphezulu kwisikhundla sobufundisi nokukhona ndaya ndifumana iingcamango ezingakumbi, kokukhona yayishenxa ngakumbi ingqondo nentliziyo yam kwiimfundiso ezahlukahlukeneyo zeCawa yamaKatolika, ingakumbi ezo zinxulumene nokubekwa izandla kwabefundisi egameni loko kubizwa ngokuthi yi-“Holy Sacrifice of the Mass” (UMbingelelo Ongcwele WeMisa) nelithi “Most Blessed Sacrament of the Eucharist” (Owona Mthendeleko Usikelelekileyo WeMisa)—obizwa ngokuba yitransubstantiation (ukuguquka kwesonka newayini).

Kwintetho eqhelekileyo yamaKatolika, i-“Holy Sacrifice of the Mass” sisikhumbuzo sokuhlaziywa okungenagazi kwedini likaYesu “emnqamlezweni.” Kodwa iZibhalo zamaKristu zesiGrike ngokuqhelekileyo nencwadi kaPawulos eya kumaHebhere zazikwenza kucace gca kum ukuba idini likaYesu lalilidini eligqibeleleyo. Umsebenzi wakhe wawufezekile. Wawungafuni kongezwa, kuphindaphindwa okanye uphuculwe. Idini lanikelwa “kwabakanye.”—Hebhere 7:27, 28.

Ukuqhubeka Nephulo Lam Lokuphanda Ngenyaniso

Ukuze ndizivavanye, ndaqhubeka ndisebenza kumaziko oobhishophu aliqela nakumaziko oobhishophu abakhulu kwiNtshona Yurophu, nakwiziko loobhishophu abakhulu laseNew York, nakwiziko loobhishophu eFairbanks, eAlaska. Ndaphanda ngenyaniso kabuhlungu iminyaka esithoba. Ngokuyintloko ndandibandakanyeke kwimicimbi yolawulo, kwinzululwazi ngemithetho yecawa, nasekugwebeni. Ndazigcina ndikude kangangoko ndandinako kwizithethe nemibhiyozo yonqulo. Olona celomngeni lukhulu yayilolo lokwenza idini leMisa imihla ngemihla. Lalibangela ukubethabethana engqondweni yam kuba ndandingakholelwa ekuphindaphindweni kwedini elingenagazi likaKristu okanye ekuguqukeni kwesonka newayini okanye kwisekramente yabefundisi efunekayo ukuze bakwazi ukwenza “umlingo” wokuguqula isonka newayini.

Ebudeni beBhunga lesiBini leVatican, kwabakho ungquzulwano ngalo “mlingo.” Abo babehambisana neenguqulelo bekhokelwa ngabaphathi becawa yamaKatolika abangamaDatshi baxhasa kuphela i-“transignification,” okuthetha ukuthi, isonka newayini kuphela zimela umzimba negazi likaKristu. Kwelinye icala, abo babebambelele ngokungqongqo kwiingcamango zangaphambili, bekhokelwa ngabaphathi becawa yamaKatolika baseItali, bakumela ngokungqongqo “ukuguquka kwesonka newayini,” okuthetha ukuthi, isonka newayini ziguquka zibe ngumzimba negazi lokoqobo likaKristu “ngamazwi okuzimisela” athethwa ebudeni beMisa. Ngenxa yoko, kwakusithiwa: ‘EHolani zonke izinto ziyaguquka ngaphandle kwesonka newayini, ngoxa eItali kungekho nto iguqukayo ngaphandle kwesonka newayini.’

Ukurhoxa Kwam

Ngenxa yoko kumelwa kakubi kukaKristu kunye nevangeli yakhe, ndaziva ndidane kakhulu yaye ndikhathazekile kukuba usukelo lwam lokuzukisa uThixo nokusindisa imiphefumlo lwalusingelwe phantsi ziimfundiso zobuxoki. Ngenxa yoko, ngoJulayi 1974, ndabuyeka ubufundisi ngokufaka isicelo sokuzibeka phantsi iintambo. Kwabonakala kungekho ngqiqweni yaye kuyinto engafanelekanga kum ukucela ukuyekiswa kubufundisi obabungenasiseko esingokweBhayibhile. Ekugqibeleni, ukususela ngoJulayi 1974 ukusa ngoDisemba 1984, ndalunikela umva ngokupheleleyo unqulo. Andizange ndiphinde ndinxulumane nalo naluphi na unqulo lweNgqobhoko kuba akukho nalunye lwalo olwaluvisisana noko ndandifikelele kuko ngokuchasene noBathathu Emnye, ukungafi komphefumlo, ingcamango yokuba bonke abantu abalungileyo baya kufumana ubomi obungunaphakade ezulwini nesigwebo somlilo wesihogo ongacimiyo. Ezi mfundiso ndazijonga njengezivela kubuhedeni.

Uxolo Lwengqondo Nolonwabo

Ukulunikela kwam umva unqulo kwaphela ngoDisemba 1984. Kwisikhundla sam njengomphathi kwiSebe Lokuvula Amatyala nelokuhlola Amatyala Angekahlawulwa Ngabathengi (Credit and Accounts Receivables) kwishishini eliyiAnchorage, eAlaska, kwafuneka ndixubushe nomnye umthengi ngamaphepha athile ekubhalwa kuwo izinto ezithengiweyo, uBarbara Lerma. Wayengxamile waza wathi uya “kwisifundo seBhayibhile.” Ibinzana elithi “isifundo seBhayibhile” layitsala ingqalelo yam, ndaza ndambuza imibuzo embalwa yeBhayibhile. Ngokukhawuleza nangobuchule wandinika iimpendulo zeZibhalo ezazivisisana nezigqibo endandifikelele kuzo ngeemfundiso zonqulo. Akufumanisa ukuba ndandisenemibuzo engakumbi, uBarbara wandidibanisa noGerald Ronco, owayekwiofisi yesebe yamaNgqina kaYehova eAlaska.

Iingxoxo zeBhayibhile ezazisakha zabangela ukuba ndibe noxolo lwengqondo nolonwabo. Olu yayiluhlobo lwabantu endandilufuna—abantu bakaThixo. Ndathandazela ulwalathiso lukaThixo yaye ngexesha elifanelekileyo ndaqalisa ukunxulumana namaNgqina kaYehova njengomshumayeli weendaba ezilungileyo ongabhaptizwanga. Eneneni ndamangaliswa kukuva ukuba ikomkhulu lalo mbutho laliseBrooklyn, eNew York, ekumgama oziikhilomitha nje ezimbalwa ukusuka kwiHoly Family Church eManhattan, apho ndandikhonza khona (ngowe-1969, 1971 nowe-1974) njengomfundisi weParish Church yeZizwe Ezimanyeneyo.

Ukunceda Intsapho Yam Ibone Inyaniso

Emva kweenyanga ezintandathu ndinxulumana namaNgqina kaYehova eAnchorage, ndafudukela ePennsylvania ngoJulayi 31, 1985. Apha ndaba nelungelo lokuba nesabelo kwiindaba ezilungileyo zoBukumkani bukaYehova nomtshana wam uMylene Mendanha, owayefundela izifundo zenzululwazi ngemichiza yezinto eziphilayo kwiYunivesithi yaseScranton. Xa uMylene weva ukuba ndandifuna amaNgqina kaYehova, wothuka, njengoko ngaphambili wayexelelwe inkcazelo ebubuxoki yokuba eli qela yayiluhlobo oluthile lwehlelo. Ekuqaleni akazange athethe nto kum kuba wayendihlonela njengomalume wakhe nomfundisi yaye wayesihlonela isikhundla endandisifumene sobufundisi.

KwiCawa elandelayo, uMylene waya kwiMisa kwiCawa yamaKatolika, yaye ndaya kwiHolo yoBukumkani kwintetho yeBhayibhile nesifundo seMboniselo. Ngolo rhatya sahlala kunye, yena ephethe iJerusalem Bible yamaKatolika mna ndiphethe iNew World Translation of the Holy Scriptures. Ndambonisa igama elithi Yahweh kwiBhayibhile yakhe negama elifana nalo, uYehova, kwiNew World Translation. Waba nemincili kukuva ukuba uThixo unegama yaye ufuna simbize ngalo. Kwakhona ndamxelela indlela ezazingaxhaswa ngayo zizibhalo iimfundiso ezifana noBathathu Emnye, ukuguquka kwesonka newayini nokungafi komphefumlo ndaza ndambonisa izibhalo ezingqinelana noko. Wamangaliswa!

Umdla kaMylene wakhula ngakumbi ndakumxelela ngethemba lobomi obungunaphakade kwiParadisi esemhlabeni. Ngaphambi koko wayenexhala loko kwakuza kwenzeka kuye xa efile. Wayecinga ukuba wayengekho ngcwele ngokwaneleyo ukuba angaya ngqo ezulwini, kodwa wayengacingi ukuba wayembi ngohlobo lokuba wayefanele agwetyelwe isihogo somlilo ngonaphakade. Ngenxa yoko, ekuphela kwethemba awayenalo yayiyintlambululo-miphefumlo, apho wayeza kulinda ngomonde imithandazo yabantu namadini eMisa ukuba zimnyusele ezulwini. Noko ke, emva kokuba ndimbonisile ndaza ndamchazela ngezibhalo eziliqela ngokuphathelele ithemba lobomi obungunaphakade kwiParadisi esemhlabeni, waba nomdla wokufunda okungakumbi ngezi ndaba zilungileyo zimangalisayo. UMylene wahamba nam ukuya kwiintlanganiso ezazikwiHolo yoBukumkani. Saqalisa isifundo seBhayibhile namaNgqina asekuhlaleni. Kungekudala emva koko, sazahlulela kuYehova uThixo saza sabhaptizwa ngoMeyi 31, 1986.

Intsapho yam, ingakumbi umkhuluwa wam, uOrlando, yacaphuka yakuva ukuba ndibuyekile ubufundisi. Wadibana nodade wethu uMyra Lobo Mendanha, owamthuthuzelayo esithi: “Masingazikhathazi ngako oku, kuba uAlinio ebengenakuncama umsebenzi wakhe onzima awenze iminyaka engama-43 ngaphandle kwesizathu esivakalayo.” NgoSeptemba 1987, uMyra nentsapho yakhe beza kuhlala nam eWisconsin, eUnited States. Akuzange kubekho nto inzima ekubeni ndibenze babone ukungangqinelwa zizibhalo kweemfundiso ezininzi nezinto ezazisenziwa ngamaKatolika. Babezimisele ukufunda inyaniso yeBhayibhile. Kungekudala, mna noMylene saqalisa ukubaqhubela isifundo seBhayibhile. Besakuba befudukele eOrlando, eFlorida, baqhubeka nesifundo sabo.

Uxolo nolonwabo esasilunandipha lwasenza ukuba sabelane ngeendaba ezilungileyo zoBukumkani bukaYehova nodade wethu omdala, uJessie Lobo, ohlala eToronto, eKhanada. Kwakunikelwe kuye ubungqina ngowe-1983. Noko ke, kuba umnakwabo engumfundisi, wakholelwa lelokuba akukho nto yayinokumenza aguqule ukholo lwakhe. Iminyaka emine emva kokuncokola kwakhe okokuqala namaNgqina kaYehova, esakufumanisa ukuba ndaba ngomnye wamaNgqina kaYehova nokuba uMyra nentsapho yakhe babengabashumayeli beendaba ezilungileyo, wadibana neNgqina elalungiselela isifundo seBhayibhile ngokukhawuleza. UJessie wabhaptizwa ngoAprili 14, 1990; uMyra, umlanya wam uOswald nomtshana wam uGlynis babhaptizwa ngoFebruwari 2, 1991. Bavuya kakhulu kukukhonza uYehova, Osenyangweni.

Abo babambelele kwiimfundiso zesithethe zangaphambili nabo balwela inkululeko yonqulo kwiCawa yamaKatolika ngokuqinisekileyo bangabantu abakrelekrele. Bakholelwa kwelokuba benza ukuthanda kukaThixo. Noko ke, asifanele siligatye elokuba ‘uthixo weli phakade uzimfamekise ngaphakathi kwabo iingqiqo zabangakholwayo, ukuze singabengezeli kubo isikhanyiso seendaba ezilungileyo zobuqaqawuli bukaKristu, ongumfanekiselo kaThixo.’ (2 Korinte 4:4) Ngoko, licacile elokuba, ubulumko beli phakade bubudenge kuThixo. (1 Korinte 3:18, 19) Hayi indlela endinombulelo nendinovuyo ngayo kuba uYehova ‘enika isiyatha ubulumko’ ngolwazi oluchanileyo lweLizwi lakhe.—INdumiso 19:7.

Inkonzo yam yeminyaka eli-19 njengomfundisi wamaKatolika yinto eyedlulayo. Ngoku ndiliNgqina likaYehova. Ngumnqweno wam ukuhamba kwiindlela zikaYehova ndize ndilandele uNyana wakhe, uYesu Kristu, uKumkani noMsindisi wethu. Ndinomnqweno wokunceda abanye bazi uYehova ukuze nabo bakwazi ukufumana umvuzo wobomi obungunaphakade kumhlaba oyiparadisi, ukuze kuzukiswe uThixo oyinyaniso, uYehova.—Ngokubaliswa nguAlinio de Santa Rita Lobo.

[Imibhalo esemazantsi]

[Ibhokisi ekwiphepha 17]

Izitshixo zoBukumkani

Ngokuphathelele ‘izitshixo zobukumkani bamazulu,’ intsingiselo yazo iyacaca xa siqwalasela ukukhalimela kukaYesu iinkokeli zonqulo: “Nasisusa isitshixo sokwazi; nina anangena, nabangenayo nabalela.” (Luka 11:52) UMateyu 23:13 ucacisa ngokubhekele phaya ‘ukungena’ njengokuthetha ukungena ‘ebukumkanini bamazulu.’

Izitshixo uYesu awathembisa ngazo uPetros zaseka indima ebalaseleyo yokufundisa eyayiya kuvulela amathuba akhethekileyo okungena kwabantu kuBukumkani basezulwini. UPetros walisebenzisa eli lungelo kwizihlandlo ezithathu, ekuncedeni amaYuda, amaSamariya neeNtlanga.—IZenzo 2:1-41; 8:14-17; 10:1-48; 15:7-9.

Eyona njongo yesithembiso yayingekokuba uPetros alawule oko kwakufanele okanye kungafanele kubotshwe okanye kukhululwe emazulwini, kodwa yayikukuba uPetros asetyenziswe njengesixhobo sasezulwini sezabelo ezicacileyo ezithathu. Oko kunjalo kuba uYesu wahlala eyiNtloko yebandla.—Thelekisa eyoku-1 kwabaseKorinte 11:3; Efese 4:15, 16; 5:23; Kolose 2:8-10; Hebhere 8:6-13.

[Umfanekiso okwiphepha 18]

UAlinio de Santa Rita Lobo ngoku oliNgqina