Imbono YeBhayibhile

Luhlobo Olunjani Loqhawulo-mtshato UThixo Aluthiyileyo?

ELINYE ibhinqa elingumKristu indoda yalo eyayingathembekanga labhala oku: “Zazininzi iingxaki ezabangelwa kukuqhawula kwam umtshato. Ixesha lokwenza uhlengahlengiso alilula. Kwafuneka ndenze uhlengahlengiso kungekuphela nje engqondweni kodwa ngokwemali nangokomoya. Ndandithandabuza enoba uYehova uya kusisikelela kusini na isigqibo sam, kuba ndisazi ukuba iZibhalo zithi uluthiyile uqhawulo-mtshato. Le yeyona nto yayisoloko indikhathaza.”

Xa umtshato uphela, iingxaki zona azipheli. Ngequbuliso kuvela uthotho lweengxaki ezintsha. Kubakho iimvakalelo—udandatheko, ubulolo nokuziva unetyala—ongazaziyo ukuba zivela phi. Kubekho nedabi lelungelo lokugcina umntwana ekufuneka ulilwe. Unyana okanye intombi ibe ikhala ecaleni ifuna uMama okanye uTata. Kukho neengxaki zemali ezizisa ingcinezelo. Ube uzama ukuhlangabezana nomnqweno wokuthandwa ofumaneka emtshatweni kuphela.

Kanti ke kukho nembono kaThixo ekufuneka ucinge ngayo. IBhayibhile ithi uThixo ‘ukuthiyile ukwala [“uqhawulo-mtshato,” NW].’ (Malaki 2:16) Ngaba la mazwi athetha ukuba uThixo uthiye zonke iintlobo zoqhawulo-mtshato? Ngoko ke, ngaba umKristu ufanele azive enetyala kuba eqhawule umtshato xa elinye iqabane belingathembekanga? Ukuze sifumane iimpendulo, makhe sihlolisise iimeko zomhla kaMalaki ezabangela uThixo athi uluthiyile uqhawulo-mtshato.

“Ungamnginizeli”

UMalaki waprofeta emva kowama-443 B.C.E., malunga nenkulungwane emva kokuba amaYuda awayethinjiwe ebuyile eBhabhiloni. Kwakusekuvele iimeko ezingathandekiyo kwaYuda, ngokukodwa phakathi kwababingeleli. (Malaki 2:7-9) Izenzo ezinjengobuxoki, ukukrexeza, ukuqhatha nengcinezelo zazixhaphake gqitha phakathi kwamaSirayeli ngokubanzi. (Malaki 3:5) Ezi meko zabangela amathandabuzo amaninzi kangangokuba abanye bafikelela kwesi sigqibo: “Akunto yanto ukumkhonza uThixo.”—Malaki 3:14.

Ukonakala ngokonqulo nangokokuziphatha okwakukho ngomhla kaMalaki kwabonakaliswa nakukungahlonelwa komtshato. Amadoda amaninzi akwaSirayeli ayebalahla abafazi bobutsha bawo, mhlawumbi ukuze atshate abafazi abaselula abangabahedeni. Isibingelelo sikaYehova sasigqunywe ziinyembezi zabafazi abalahliweyo ababesiza esibingelelweni ukuze balile baze baphalaze intlungu yabo phambi koThixo.—Malaki 2:13-15.

Wayevakalelwa njani uYehova uThixo ngoqhawulo-mtshato olunjalo? Esebenzisa uMalaki walumkisa ngelithi: “Wugcineni ngoko umoya wenu, ungamnginizeli umfazi wobutsha bakho; kuba ndikuthiyile ukwala [“uqhawulo-mtshato,” NW], utsho uYehova, uThixo kaSirayeli . . . wugcineni ke umoya wenu, ninganginizi.” (Malaki 2:15, 16) Ngokutsho kweTheological Wordbook of the Old Testament, igama lesiHebhere eliguqulelwe ngokuthi ‘ukunginizela’ lithetha “ukuqhubana ngobuqhinga, (ukuqhubana) ngokungathembeki.” KwiNdumiso 59:5 (NW), uhlobo lwesenzi esikwimo eqhubekayo siguqulelwe ngokuthi “abangcatshi.”

Ngenxa yaloo mvelaphi, sinokuwaqonda kakuhle ngakumbi amazwi akuMalaki 2:16 athi: “Ndikuthiyile ukwala [“uqhawulo-mtshato,” NW].” UYehova uluthiyile uhlobo loqhawulo-mtshato olubandakanya ukulahla iqabane likabani ngezizathu ezingavakaliyo kuba efuna ukuthabatha elinye. Ngokomzekelo, indoda ekrexezayo ize ililahle iqabane layo elimsulwa lona lingakufuni oko okanye ilicinezelele ukuba liyilahle ukuze ikwazi ukutshata omnye umntu oko ngenene kukumnginizela umfazi wayo. Oku kuliphatha ngenkohliso nangokungathembeki okunjalo iqabane elimsulwa sisono esinzulu emehlweni kaThixo. Indoda emfimfitha eyona minyaka ilungileyo yebhinqa ize ililahle kwesinomhlwa, mhlawumbi kuba ithanda ibhinqa eliselula, ngokwenene ingumngcatshi.a

Noko ke, kuthekani ngeqabane elimsulwa elikhetha ukuqhawula umtshato neqabane elikrexezileyo? Ngaba uThixo uluthiyile noqhawulo-mtshato olunjalo?

Umzekelo KaThixo

Ngaba ngokwenene uThixo unokuyazi indlela ovakalelwa ngayo xa ujamelene nokwenza isigqibo sokuba uwuqhawule okanye ungawuqhawuli kusini na umtshato neqabane elikrexezileyo? Ngokufuziselayo, uYehova wayezigqala etshate nohlanga lwamandulo lwakwaSirayeli ngomnqophiso awawenza nalo. (Isaya 54:1, 5, 6; 62:1-6; Yeremiya 31:31, 32) Njengomyeni, uYehova wayesoloko ethembekile, akazange awubonakalise kolunye uhlanga umsa wakhe. (INdumiso 147:19, 20; Amosi 3:1, 2) Kodwa kuthekani ngoSirayeli? Olo hlanga lwazingqina luluhlobo olunjani lomfazi?

Olo hlanga luphela ngokuphindaphindiweyo lwazingqina lungathembekanga kumnqophiso, ekugqibeleni lwada lwafikelela kwimeko echazwe kumthandazo obhalwe kuDaniyeli 9:5, 6: “Sonile, senze ngobugwenxa, senze okungendawo; sigwilikile, siphambukile emithethweni yakho nasemasikweni akho. Asibaphulaphulanga abakhonzi bakho, abaprofeti ababethetha egameni lakho kookumkani bethu, nakubathetheli bethu, nakoobawo, nakubo bonke abantu belizwe.” Emehlweni kaYehova, ukungathembeki okunjalo kwakufana nje nomfazi okrexezayo.—Yeremiya 3:1.

Ngemva kweenkulungwane enyamezele yaye ezeka kade umsindo, yintoni awayenzayo uYehova? Ngokulugweba ngokuqatha, ngokulukhupha kwilizwe lalo elisa ekuthinjweni eqala ngohlanga lwangasentla walandelisa ngolwangasezantsi, ngokungathi kunjalo, uYehova wawuqhawula umtshato wakhe nolo hlanga. (Yeremiya 3:8; Daniyeli 9:11, 12) Ngoko ngenxa yomzekelo wakhe, uYehova uThixo ebenokuyithiya njani into yokuba iqabane elimsulwa likhethe ukuqhawula umtshato neqabane ebelingathembekanga kwisifungo somtshato?

Umtshato lilungiselelo elingcwele emehlweni kaThixo, yaye abo bazifaka kulo abafanele basithabathe lula isifungo abasenzileyo. (Hebhere 13:4) Kodwa ukuba iqabane likabani alithembekanga kwisifungo ‘ngokuhenyuza,’ uThixo ulinika ilungelo iqabane elimsulwa ukuba ligqibe enoba lifuna ukulixolela okanye ukuqhawula umtshato. (Mateyu 19:9) Eso sisigqibo esinzima, sigqibo eso esimele senziwe liqabane elimsulwa kuphela. Ukuba iqabane elimsulwa ligqiba ekubeni liwuphelise umtshato, alifanele lizive linetyala ngokuqhawula umtshato. Khumbula ukuba uYehova, akathiyanga zonke iintlobo zoqhawulo-mtshato, kodwa uthiye uhlobo loqhawulo-mtshato olubandakanya ukulahla iqabane likabani ngaphandle kwemigaqo yezibhalo ukuze athabathe elinye.b

[Imibhalo esemazantsi]

[Inkcazelo Ngomfanekiso okwiphepha 29]

Historic Costume in Pictures/Dover Publications, Inc., New York