Imbono YeBhayibhile

Ukuthobela Komfazi—Kuthetha Ntoni?

ILIZWI LIKATHIXO, iBhayibhile, kwabase-Efese 5:22 lithi: “Abafazi mabathobele amadoda abo njengakuyo iNkosi.” Kanye kanye kuthetha ntoni oku? Ngaba umfazi umele athobele yonke into efunwa yindoda yakhe, kungakhathaliseki ukuba yintoni na? Ngaba akanakuze enze nto ngendlela yakhe okanye abe nezimvo ezahlukileyo kwezayo?

Khawucinge ngengxelo yeBhayibhile engoAbhigali. Wenza ngobulumko kodwa indlela awenza ngayo yayahlukile koko kwakufunwa yindoda yakhe eyayisisityebi, uNabhali. Phezu kwabo nje ububele obaboniswa kuNabhali ngabalandeli bakaDavide, owayenyulwe nguThixo ukuba abe ngukumkani wakwaSirayeli, uNabhali ‘wesuka wabadlakavula.’ UDavide, evuke umnyele ngenxa yokungabi nambulelo kukaNabhali, wayelungele ukumcim’ igama. UAbhigali waqonda ukuba yonke indlu yakhe yayisengozini. Wathomalalisa umsindo kaDavide. Njani?—1 Samuweli 25:2-35.

UAbhigali wavuma kuDavide ukuba uNabhali ‘ungumntu olitshijolo’ waza wanika uDavide oko kutya wayekubandezwa nguNabhali. Ngokuqhelekileyo, kuphosakele ngendoda okanye umfazi ukuhamba ethetha ngeempazamo zeqabane lakhe. Ngaba uAbhigali wayevukela ngokuthetha okanye ngokwenza ngale ndlela? Akunjalo. Wayezama ukusindisa ubomi bukaNabhali nendlu yakhe. Ayikhankanywa nokukhankanywa into yokuba wayekuqhelile ukubonakalisa ukungabi nambeko okanye ukufuna ukuzimela geqe. Ibe noNabhali ekwakunzima ukumkholisa akazange abonakalise ukungayithandi indlela awayebuphatha ngayo ubutyebi bakhe obuninzi. Kodwa kule meko yamanqam, wabonisa ubulumko ngokwenza izinto ngendlela yakhe. Ngaphezu koko, iBhayibhile iyakuncoma okwenziwa nguAbhigali.—1 Samuweli 25:3, 25, 32, 33.

Kwakude kudala ngaphambi komhla ka-Abhigali, kwakukho amaxesha axa abafazi boosolusapho babevelisa iimbono zabo baze benze izinto ngendlela eyahlukileyo kuleyo ifunwa ngamadoda abo. Sekunjalo, aba ‘bafazi bangcwele ababethembele kuThixo’ bayimizekelo yokuthobela komfazi ongumKristu. (1 Petros 3:1-6) Ngokomzekelo, xa uSara wafumanisa ukuba unyana ka-Abraham uIshmayeli wayesisisongelo kunyana wabo, uIsake, wagqiba kwelokuba agxothwe uIshmayeli. ‘Laba libi kunene elo zwi emehlweni ka-Abraham.’ Kodwa uThixo wathi kuAbraham: “Malingabi libi emehlweni akho ngenxa yenkwenkwe . . . phulaphula izwi lakhe.”—Genesis 21:11, 12.

Ukuqonda Kuyafuneka

Ngoko, bekungayi kuba bubulumko ngomfazi ukuziva enyanzelekile ukwenza oko akwaziyo ukuba kububutyhakala okanye aphule imigaqo yobuthixo, kuba esithi uyathobela. Ibe akafanele azive enetyala ngokuthabatha inyathelo lokuqala xa kuyimfuneko, njengokuba wenzayo uAbhigali noSara.

Ukuthobela komfazi akuthethi ukuba umfazi umele asoloko esenza ngokuvisisana nayo nantoni na efunwa yindoda yakhe. Yintoni eyenza umahluko? Xa imigaqo elungileyo ibonakala iza kwaphulwa, kusenokufuneka angavumelani nendoda yakhe. Sekunjalo, ufanele abonise umoya wokuthobela uThixo ngokupheleleyo.

Kambe ke, umfazi ufanele akulumkele ukuyityeshela ngabom iminqweno yendoda yakhe, ngenxa yolunya okanye ezinye iintshukumisa eziphosakeleyo. Umele abe ngoqondayo, ‘enengqondo entle,’ njengoAbhigali.—1 Samuweli 25:3.

Xa Indoda Iphepha Imbopheleleko

Usukelo oluyintloko lokuba umfazi abonakalise umoya wokuthobela ngokobuthixo kukukholisa uYehova ngokusebenzisana nendoda yakhe nokuyixhasa kwizigqibo zayo. Oku kulula ngakumbi xa indoda iqolile ngokomoya. Kunokuba lucelomngeni xa ingenjalo.

Unokuhlangabezana njani nale meko? Usenokuyicela ngokunyanisekileyo okanye anikele amacebiso ngezigqibo eziya kuba yingenelo ngakumbi entsatsheni yakhe. Ukuba uyayivumela ‘ikhokele,’ isenokuba nobuchule obungakumbi ekwenzeni oko. Ukusoloko uyicela ukuba yenze le nale ngokuyicenga indoda asikokubonisa umoya ofanelekileyo wokuthobela. (IMizekeliso 21:19) Kodwa, ukuba impilo-ntle yentsapho ngokucacileyo ibekw’ esichengeni yindlela ezenza ngayo izinto, usenokukhetha ukunikela icebiso ngendlela efanelekileyo, njengoko wenzayo uSara.

Ukuba indoda ayikholwa, umfazi unocelomngeni olungakumbi. Sekunjalo, ufanele ayithobele logama nje ingamceli ukuba aphule imithetho yeBhayibhile. Ukuba imcela ukuba enjenjalo, umfazi ongumKristu uya kusabela njengabafundi abathetha oku xa inkundla yayifuna baphule imiyalelo kaThixo: “Simele sithobele uThixo njengomphathi kunabantu.”—IZenzo 5:29.

Noko ke, ngenxa yokuba bengenamava ibe benobulumko obusikelwe umda, kwanamadoda nabafazi abaneenjongo ezintle banokuzityeshela iindima zabo. Indoda isenokungabi nalwazelelelo; umfazi usenokugxininisa ngokugqith’ emgceni koko akuthandayo. Yintoni eya kunceda? Kubalulekile ukuba bobabini bazijonge ngendlela efanelekileyo, ekubeni ‘sonke sikhubeka izihlandlo ezininzi.’—Yakobi 3:2.

Amadoda amaninzi ayalixabisa inyathelo lomfazi elinyanisekileyo ukuba ulithabatha ngobulumko. Ibe kubakho intsebenziswano ukuba bobabini bacela uxolo xa benze iimpazamo. Njengoko uYehova ezixolela iintsilelo zethu zemihla ngemihla, ngoko sifanele sibaxolele abanye. “Ukuba uthe wabunqala ubugwenxa, Yehova, ngubani na ongaba nokuma, Nkosi? Ngokuba kunawe ukuxolela.”—INdumiso 130:3, 4.

‘Ukuthobelana’

Ngoko, ukusinceda, iZibhalo ziyasicebisa: “Thobelanani ngokoyika uKristu.” Bonakalisani intlonelo enothando omnye komnye; ningaphazamisani okanye nikhuphisane. Esi sibhalo siyaqhubeka: “Abafazi mabathobele amadoda abo njengakuyo iNkosi, ngenxa yokuba indoda iyintloko yomfazi wayo njengokuba kanjalo noKristu eyintloko yebandla.”—Efese 5:21-23.

Igama lesiGrike elisetyenziswa nguPawulos kwabase-Efese 5:21, 22 lithetha ukuthobela kukabani, enganyanzelwanga ukuba athobele. Ibe ukuthobela kwenziwa ngenxa yeNkosi, kungekuphela nje ukuze kubekho imvisiswano emtshatweni. Ibandla likaKristu labathanjiswa limthobela ngokuzithandela nangovuyo uKristu. Xa umfazi esenza okufanayo kwindoda yakhe, umtshato unokuba ngowonwabisayo uze uphumelele.

Kwakhona iZibhalo zithi: ‘[Ndoda] nganye mayimthande umfazi wayo njengoko isenjenjalo kuyo,’ ngentliziyo epheleleyo. (Efese 5:33; 1 Petros 3:7) Indoda ifanele ikhumbule ukuba nayo ifanele izithobe kwintloko yayo, kuba iBhayibhile ithi: “Intloko yayo yonke indoda nguKristu.” Ewe, indoda ifanele izithobele iimfundiso zikaKristu. NoKristu, ngokunjalo, uthobela intloko yakhe: “Intloko kaKristu nguThixo.” Ngaloo ndlela, wonke umntu ngaphandle koYehova unentloko yakhe. Ibe naye ubambelela kwimithetho yakhe.—1 Korinte 11:3; Tito 1:2; Hebhere 6:18.

Ukuthobela kwamaKristu kulungelelene ibe kuyingenelo kwindoda nakumfazi. Kubangela imvisiswano nolwaneliseko emtshatweni olunokuziswa kuphela nguMdali wethu onothando.—Filipi 4:7.

[Inkcazelo Ngomfanekiso okwiphepha 26]

Leslie’s