Isicombululo Sehlabathi Lonke—Ngaba Sinokufumaneka?
IINGCAPHEPHE ziyavuma ukuba isifo sephepha yingxaki esehlabathini lonke nefuna isicombululo sehlabathi lonke. Alikho ilizwe elinokulwa nesifo sephepha lilodwa, ekubeni izigidi zabantu zinqumla imida yamazwe ngamazwe veki nganye.
Abaninzi bakholelwa kwelokuba, ukusebenzisana kwamazwe ngamazwe, kufuna ukuba amazwe atyebileyo ancede ahlwempuzekileyo, nangawona athwaxwa kanobom sisifo sephepha. Njengoko uGqr. Arata Kochi esitsho, “amazwe atyebileyo anomdla wokunceda amazwe asakhasayo ekulweni nesifo sephepha, ngaphambi kokuba size kuwo.”
Kodwa amazwe atyebileyo xa ejamelene nezona ngxaki acinga ukuba zingxamisekile, akakhawulezi anikele uncedo. Amanye amazwe ahlwempuzekileyo aye akutyeshela ukunyamekela impilo, kunoko aye asebenzisa intywenka yemali ekuthengeni izixhobo. Phakathi kowe-1996, bali-10 ekhulwini kuphela abaguli ababenesifo sephepha ehlabathini lonke abanyangwa kusetyenziswa inkqubo yeDOTS, nani elo elincinane gqitha ukuba kungathintelwa lo bhubhani anganwenwi.
IWHO ithi: “Ulwazi namayeza angabizi mali ininzi okunyanga isifo sephepha ebekho kangangamashumi eminyaka. Eyona nto ifunekayo ehlabathini ngoku kukungenelela kwabantu abasemagunyeni, abanempembelelo nabanovelwano abaya kuqiniseka ukuba la mayeza asetyenziswa ngokunengenelo ehlabathini lonke.”
Uloyiso Oluzayo
Ngaba sinokuthembela kubantu abasemagunyeni nabanempembelelo ukuze sicombulule le ngxaki? Umdumisi waseBhayibhileni ophefumlelweyo wabhala wathi: “Musani ukukholosa ngamanene, ngonyana womntu, yena ungenalo usindiso.” Ngoko, ngubani esinokukholosa ngaye? Esi sibhalo salek’ umsundulo sisithi: “Hayi, uyolo lwalowo uluncedo lunguThixo kaYakobi, lwalowo ulinde kuYehova uThixo wakhe: kuMenzi wezulu nomhlaba, nolwandle neento zonke ezikulo.”—INdumiso 146:3, 5, 6.
NjengoMyili noMdali womhlaba, uYehova uThixo unamandla nobulumko bokuphelisa izifo. Ngaba unayo imfesane? Ngomprofeti wakhe ophefumlelweyo uYehova uthi: “Ndibaconge [abantu bam], njengomntu oconga unyana wakhe omkhonzayo.”—Malaki 3:17.
Isahluko sokugqibela seBhayibhile sichaza umbono owanikwa umpostile uYohane. Wabona “imithi yobomi evelisa izilimo zeziqhamo ezilishumi elinesibini, ivelisa iziqhamo zayo nyanga nganye.” Le mithi yokomfuziselo neziqhamo ezivelisayo zibonisa amalungiselelo kaThixo aya kwenza abantu abathobelayo baphile ngonaphakade emhlabeni.—ISityhilelo 22:2.
Ehlabela mgama, uYohane wabhala: “Amagqabi emithi ayengawokunyanga iintlanga.” La magqabi okomfuziselo afuzisela iintsikelelo ezivela kuThixo eziya kuphumela ekunyangweni koluntu, ngokomoya nangokwasemzimbeni. Ngenxa yoko, sinokuqiniseka ukuba kwihlabathi elitsha elinobulungisa ngaphantsi kolawulo lukaThixo, isifo sephepha siya kungqengqiswa ngophothe ngokupheleleyo nangonaphakade.—ISityhilelo 21:3, 4.
[Imifanekiso ekwiphepha 8, 9]
UThixo uthembisa ukuphiliswa koluntu ngokusisigxina