Unokuyifumana Phi Eyona Mfundo Isemagqabini?
“Njengoko kunokuphuma umfanekiso omhle kwilitye eligudisiweyo, inokwenjenjalo ke nemfundo emntwini.”—UJoseph Addison, ngowe-1711.
NGABA wakha waya esikolweni? Abantu abaninzi banokuvuma—kodwa hayi bonke. Njengoko siqalisa inkulungwane yama-21, izigidi ezingaphaya kwengqondo zabantwana azihambi sikolo. Kudala isenzeka loo nto, kangangokuba kungokunje bakufutshane kwiwaka lezigidi abantu abakhulileyo abangafundanga.
Kodwa, imfundo esemgangathweni yinto esisiseko. Kunokuba bayijonge njengobunewunewu obungafikelelekiyo, abaninzi namhlanje bayijonga njengelungelo labantwana nabantu abakhulileyo. Kodwa imfundo esemgangathweni inokufumaneka njani imali ingekho? Iza kuthiwani into yokungabikho kweencwadi ezaneleyo, ukungabikho kwabafundisi-ntsapho abafanelekayo, kungekho nazikolo zaneleyo?
Eneneni, abantu banokuyifumana phi imfundo esemgangathweni ekhuthaza umntu ukuba abe negalelo, ebavul’ ingqondo ngehlabathi elibangqongileyo, ize ibafundise imilinganiselo yokomoya enokuguqula ubomi babo? Yiyiphi imfundo ebethelela imilinganiselo engcwele yokuziphatha, ebafundisa indlela yokuphila ubomi obusemgangathweni, ize ibanike ithemba eliqinisekileyo ngekamva? Ngaba imfundo enjalo inokufunyanwa ngumntu wonke?
Isiseko Semfundo Esemagqabini
Nangona oko kusenokubonakala kumangalisa, ngentembelo sinokuthi ewe, imfundo esemgangathweni inokufunyanwa ngumntu wonke. Oku kungenxa yesixhobo sokufundisa esinamandla nesekelwe kuso. “Yincwadi yesikhokelo” eye yamelana nezanzwili zexesha, ekho iyonke okanye ngokwamacandelo, ngeelwimi ezingaphezu kwama-2 200 zehlabathi. Phantse wonke umntu osemhlabeni unokuyifumana ngolwimi anokuluqonda. Yiyiphi le ncwadi?
YiBhayibhile, incwadi eye yanconywa ngokubanzi njengeyona ncwadi ibalulekileyo kwezakha zabhalwa. Umphengululi wasebutsheni benkulungwane yama-20 uWilliam Lyon Phelps wabhala wathi: “Wonke umntu oyazi ngokucokisekileyo iBhayibhile eneneni kunokuthiwa ufundile. Ayikho enye imfundo okanye isithethe, enoba ininzi okanye inomtsalane kangakanani, . . . enokuyithabathel’ indawo.”
IBhayibhile yingqokelela yeencwadi ezibhalwe kwisithuba seminyaka emalunga ne-1 600. Ethetha ngeli thala leencwadi libalulekileyo, uPhelps wongezelela ngelithi: “Iingcamango zethu, ubulumko bethu, iintanda-bulumko zethu, uncwadi lwethu, ubuchule bethu, iinjongo zethu, zivela ubukhulu becala eBhayibhileni kunakwezinye iincwadi zidibene . . . Ndikholelwa ukuba ulwazi lweBhayibhile ngaphandle kwezifundo zakwanokholeji lubaluleke ngaphezu kwezifundo zakwanokholeji ingekho iBhayibhile.”
Namhlanje amaKristu angamaNgqina kaYehova adlulisela imfundo esemagqabini esekelwe eBhayibhileni ehlabathini lonke. Loo mfundo ayaneli nje ukufundisa izinto ezisisiseko njengokulesa nokubhala. Ivula ingqondo, yenze umntu abe nemilinganiselo ephakamileyo yokuziphatha. Ngendlela eyakhayo, ichaphazela indlela abantu abalijonga ngayo ikamva, inikela isiseko sethemba eliqinisekileyo lokuba ikamva lilunge ngakumbi kunoko sele kudlulile.
Nceda ufunde ngale mfundo inika ubomi kwinqaku elilandelayo.